09/08/2026
મહેસાણા LCBને મોટી સફળતા: સિમ વિસ્તારમાં બોરની ઓરડીઓમાંથી કેબલ ચોરી કરતી ગેંગના ૪ સાગરીતો ૧.૩૬ લાખના મુદ્દામાલ સાથે ઝડપાયા
વિસનગર અને લાડોલ પોલીસ સ્ટેશન હેઠળના કેબલ ચોરીના ૨ વણઉકેલાયેલા ગુનાઓનો ભેદ ઉકેલાયો
ચોરીમાં વપરાયેલ બાઇક, મોબાઇલ અને કેબલ વાયર સહિત કુલ ₹૧,૩૬,૮૪૦/- નો મુદ્દામાલ જપ્ત
૧ આરોપી વોન્ટેડ, તેને પકડવા પોલીસે ચક્રો ગતિમાન કર્યા
મહેસાણા જિલ્લાના ગ્રામ્ય વિસ્તારોની સીમમાં રાત્રિ દરમિયાન ટ્યુબવેલ (બોર) પરથી કેબલ વાયર કાપી ચોરી કરતી સક્રિય ગેંગનો મહેસાણા લોકલ ક્રાઇમ બ્રાન્ચ (LCB) એ પર્દાફાશ કર્યો છે. એલ.સી.બી. પોલીસે કિંમતી કેબલ વાયર, મોબાઇલ, મોટરસાયકલ સહિત કુલ ૧,૩૬,૮૪૦/- ના મુદ્દામાલ સાથે ચાર શાતિર તસ્કરોને દબોચી લીધા છે, જ્યારે એક આરોપીને પકડવાના ચક્રો ગતિમાન કર્યા છે.
મળતી વિગતો અનુસાર, છેલ્લા બે મહિનાથી જિલ્લાના વિવિધ ગામોની સીમમાં આવેલ બોરની ઓરડીઓના તાળા તોડી તથા બહાર દેખાતા કેબલ વાયરો કાપી ચોરી થવાના બનાવોમાં ભારે ઉછાળો આવ્યો હતો. જેને પગલે ગાંધીનગર રેન્જ ડીઆઇજી વિરેન્દ્રસિંહ યાદવ તથા મહેસાણા પોલીસ અધિક્ષક હિમાંશુ સોલંકીની સૂચનાથી LCB પી.આઈ. એ.એમ. કામળીયાના માર્ગદર્શન હેઠળ અલગ-અલગ ટીમો બનાવી તપાસ હાથ ધરવામાં આવી હતી.
દરમિયાન વિસનગર પોલીસ સ્ટેશન વિસ્તારમાં પેટ્રોલિંગમાં રહેલ LCB ટીમ (PSI બી.વી. વાઘેલા, PSI બી.એ. પરમાર તથા ટીમના કર્મચારીઓ)ના શક્તિસિંહ અને અજયસિંહને ટેકનિકલ સોર્સિસ અને ખાનગી બાતમીદારોથી ચોક્કસ માહિતી મળી હતી. જેના આધારે પોલીસે ચાર ઇસમોને ઝડપી પાડ્યા હતા.
ઝડપાયેલા આરોપીઓ:
૧. ઠાકોર રાકેશજી ઉર્ફે રાકો લાલાજી (રહે. ગોઠવા વાઘાજીપરા, તા. વિસનગર)
૨. ઠાકોર અર્જુનજી ઉર્ફે જોની દીપકજી (રહે. ગોઠવા વાઘાજીપરા, તા. વિસનગર)
૩. ઠાકોર બીપીનજી અજમલજી (રહે. ગોઠવા વાઘાજીપરા, તા. વિસનગર)
૪. વાઘરી પ્રકાશભાઇ બળદેવભાઇ (રહે. ગોઠવા વાઘાજીપરા, તા. વિસનગર)
* વોન્ટેડ આરોપી: ઠાકોર સાગરજી ગણપતજી (રહે. ગોઠવા, તા. વિસનગર)
