21/05/2025
गोर्खाल्याण्डको मागलाई लिएर सशक्त स्वर: 'एक यात्रा, एक लक्ष्य – गोर्खाल्याण्ड'
–अर्पण राई "गोर्खा
दार्जिलिङ, मे २०२५ – भारतको गोर्खा भाषी समुदायले फेरि एकपटक छुट्टै राज्य गोर्खाल्याण्ड को मागलाई लिएर आवाज बुलन्द बनाएको छ। "एक यात्रा, एक लक्ष्य – गोर्खाल्याण्ड निर्माणका लागि एक बनौं" भन्ने मूल नारासहित छुट्टै राज्यको मागमा तीव्रता आएको छ।
विगतमा थुप्रै बलिदान, संघर्ष र रक्तपातका बाबजुद पनि गोर्खाहरूको सपना अधुरै रहेको पीडा अझै ताजा छ। आन्दोलनको इतिहासमा शहिद भएका वीर-वीरांगनाहरूको योगदान र सपना अझै अपूरा छन्। स्थानीय नेतृत्वप्रति जनतामा व्यापक असन्तुष्टि देखिएको छ – उनीहरूलाई आरोप लगाइँदैछ कि गोर्खाल्याण्डजस्तो पवित्र मुद्दालाई केवल राजनीतिक व्यापार र स्वार्थपूर्तिको माध्यम बनाइएको छ।
"अलग राज्य समन्वय समिति" को अगुवाइमा हालसालै फेरि एकपटक सशक्तरूपमा आवाज उठेको छ। उनीहरूको भनाइ छ, "अब बंगालको दासत्वबाट मुक्त भएर गोर्खाहरूले आफ्नै अस्तित्व र पहिचान सुनिश्चित गर्नु पर्छ।"
राजनीतिक विभाजन र कूटनीतिक षड्यन्त्रबाट आजसम्म गोर्खा समाज टुक्रा-टुक्रा पारिएको आरोप लगाइएको छ। विगतका अनुभवलाई स्मरण गर्दै यो पटक सबै राजनीतिक दलहरू, बुद्धिजीवी वर्ग, युवाशक्ति र सर्वसाधारणलाई एकताबद्ध हुन आह्वान गरिएको छ।
समितिका अनुसार, बंगालको राजनीतिक चरित्र नै यस्तो छ जसले गोर्खा नेतृत्वलाई आपसमा भिडाउने काम गर्दै आएको छ। "हामीले देख्यौं – कहिले बिमललाई अघि सारे, कहिले अनितलाई पछारेर एडवर्डलाई उचाले, र फेरि उसैलाई पनि विस्थापित गर्ने काम भयो," एक वक्तव्यमा भनिएको छ।
यसैबीच, केही नेताहरूलाई "बिकासको नाममा जनताको भावना बेच्ने" आरोप लगाइएको छ। उनीहरूलाई सोधिएको छ – "यदि तिमीहरू साँचो अर्थमा गोर्खा हौ भने, यो ऐतिहासिक अभियानमा किन अनुपस्थित?"
जनताको आवाज आज स्पष्ट देखिन्छ – अब समय आएको छ गोर्खाल्याण्डको सपनालाई साकार पार्ने। "हामी बाँकी रहन चाहँदैनौं कठपुतली बनेर, न त हामी गोर्खा जातिको अस्तित्वलाई अझै मेटिँदै जान दिन सक्छौं," गोर्खा युवाहरूको स्वर उचालिंदैछ।
निष्कर्षमा, सम्पूर्ण गोर्खा समुदायलाई आह्वान गरिएको छ – आफ्नो जातीय पहिचान र भविष्यको लागि एकतामा जुट्न, राजनीतिक मतभेदभन्दा माथि उठ्न, र छुट्टै राज्य गोर्खाल्याण्डको निर्माणमा सामूहिक कदम चाल्न।
"अबको गोर्खा – न घाँस खाने बाघ हो, न बिक्ने आवाज। हामी संगठित छौं, सचेत छौं, र अबको लक्ष्य स्पष्ट छ – गोर्खाल्याण्ड!"
