FalDee News and Updates

FalDee News and Updates The home to all the latest news and current affairs to keep you updated!

07/06/2025

સ્ટારલિંકની ભારતમાં એન્ટ્રી!!
----------------------------
42,000 સેટેલાઇટ તરતા મૂકી મસ્કનો કર લો દુનિયા મુઠ્ઠી મેં પ્લાન!
------------------------------------
એલોન મસ્કની સેટેલાઇટ-આધારિત ઇન્ટરનેટ સેવા સ્ટારલિંકને ભારતમાં જરૂરી લાઇસન્સ મળ્યું ગયું છે. એલોન મસ્કની કંપની છેલ્લા ઘણા વર્ષોથી ભારતમાં તેની સર્વિસ શરૂ કરવા માગતી હતી. સ્ટારલિંકને ભારતીય ટેલિકોમ મંત્રાલય તરફથી એક મહત્વપૂર્ણ લાઇસન્સ મળ્યું છે. હવે કંપની ઝડપથી તેની સર્વિસ ભારતમાં શરૂ કરી શકશે. સ્ટારલિંક ભારતના ટેલિકોમ્યુનિકેશન વિભાગ દ્વારા લાઇસન્સ મેળવનારી ત્રીજી કંપની છે. અગાઉ, વનવેબ અને રિલાયન્સ જિયોને પણ સેટેલાઇટ સેવા શરૂ કરવા માટે લાઇસન્સ આપવામાં આવ્યું છે.
------------------------------------
એલોન મસ્કની કંપની સ્ટારલિંકએ ભારતમાં લાઇસન્સ માટે વર્ષોથી અરજી કરી હતી. કંપનીએ આ માટે 2021માં તો પ્રી-બુકિંગ પણ શરૂ કરી દીધું હતું, પરંતુ નવેમ્બર 2021માં DoTએ સ્ટારલિંકને ભારતમાં કામ કરવાની મનાઈ ફરમાવી દીધી હતી, એવું કહીને કે કંપનીએ તમામ જરૂરી લાયસન્સ લેવા પડશે. આ પછી કંપનીએ યુઝર્સને પૈસા પરત કરવા પડ્યા હતા. એલોન મસ્કની કંપની સ્પેસએક્સે ભારતમાં સેટેલાઇટ આધારિત બ્રોડબેન્ડ સેવા આપવા માટે ગ્લોબલ મોબાઈલ પર્સનલ કોમ્યુનિકેશન બાય સેટેલાઇટ લાઇસન્સ માગ્યું હતું. ભારતમાં GMPCS લાઇસન્સ માટે અરજી કરનાર સ્ટારલિંક ત્રીજી કંપની છે. એવું કહેવાય છે કે, ભારતના સ્પેસ ઇન્ટરનેટ સેગમેન્ટમાં સ્ટાલિંકના આગમન પછી એરટેલ, જિયો અને એમેઝોન સામે સખત સ્પર્ધા ઊભી થવાની છે. એવું કહેવાય છે કે, DoTએ સ્ટારલિંકને ભારતીય વપરાશકર્તાઓને $99ની પ્રી-બુકિંગ રકમ પરત કરવાનો આદેશ પણ આપ્યો હતો. 1 ડિસેમ્બર, 2021 સુધીમાં સ્ટારલિંકે તમામ વપરાશકર્તાઓને રિફંડ કરીને પ્રી-બુકિંગ બંધ કરી દીધા હતા.
GMPCS લાયસન્સ સિવાય ભારતમાં સેટેલાઇટ આધારિત બ્રોડબેન્ડ સેવા પ્રદાન કરવા માટે અન્ય ઘણી પરવાનગીઓ પણ જરૂરી હોય છે. સ્ટારલિંકને તેની સેવા પૂરી પાડવા માટે સેટેલાઇટ બ્રોડબેન્ડ માટે ડિપાર્ટમેન્ટ ઓફ સ્પેસ અને સ્પેક્ટ્રમની મંજૂરી પણ લેવી પડે છે. સ્ટારલિંક પાસે વિશ્વનું સૌથી મોટું સ્પેસ બ્રોડબેન્ડ કોન્સ્ટલેશન છે, જેમાં 3,451 ઉપગ્રહો લોન્ચ કરવામાં આવ્યા છે. તેમાંથી 2,700થી વધુ ઉપગ્રહો હાલમાં કાર્યરત છે. હજુ કંપની 12,000 સેટેલાઇટ લોન્ચ કરવાની યોજના ધરાવે છે. બીજી તરફ, ભારતમાં સ્ટારલિંકને ફાઇટ આપી શકે એવું સક્ષમ નેટવર્ક એરટેલ પાસે છે. કવરેજની ટકાવારીની દ્રષ્ટિએ સૌથી વધુ વિકસિત સેટેલાઇટ કોન્સ્ટલેશન એરટેલ ધરાવે છે. આકાશ અંબાણીની આગેવાની હેઠળના જિયોએ સેટેલાઇટ ઇન્ટરનેટ માટે વૈશ્વિક સેટેલાઇટ બ્રોડબેન્ડ પ્રદાતા એસઇએસ સાથે હાથ મિલાવ્યા છે.
ઉપગ્રહો પૃથ્વીના કોઈપણ ભાગમાંથી ઇન્ટરનેટ કવરેજને શક્ય બનાવે છે. સેટેલાઇટ નેટવર્ક વપરાશકર્તાઓને હાઇ-સ્પીડ, લો-લેટન્સી ઇન્ટરનેટ કવરેજ પ્રદાન કરે છે. લેટન્સીનો મતલબ, ડેટાને એક બિંદુથી બીજા સ્થાને ટ્રાન્સમિટ કરવામાં જે સમય લાગે છે તેને કહેવાય છે. એલોન મસ્કની આ યોજના ભારતમાં ઈન્ટરનેટ ઉપરાંત કમ્યુનિકેશન ઇન્ડસ્ટ્રીને બદલવાની પૂરી તાકાત ધરાવે છે! એ કેવી રીતે એ પણ જાણીએ. સ્ટારલિંક એ અમેરિકન એરોસ્પેસ કંપની સ્પેસએક્સ દ્વારા સંચાલિત ઉપગ્રહ ઈન્ટરનેટ સમૂહ છે, જે 56થી વધુ દેશોને સેટેલાઇટ ઈન્ટરનેટ એક્સેસ કવરેજ પ્રદાન કરે છે. મસ્કની આ કંપની 2023 પછી વૈશ્વિક મોબાઇલ ફોન સેવા ઉપલબ્ધ કરાવવાનું પણ લક્ષ્ય રાખે છે. મજાની વાત એ છે કે, સ્ટારલિંક માટે અવકાશમાં સેટેલાઇટ લોન્ચ કરવાની જવાબદારી પણ મસ્કની જ બીજી એક કંપની સ્પેસએકસે ઉપાડી હતી. 2019માં સ્ટારલિંક માટે ઉપગ્રહો લોન્ચ કરવાનું શરૂ કર્યું હતું. મે 2023 સુધીમાં સ્ટારલિંકમાં લો અર્થ ઓર્બિટમાં 4,000થી વધુ નાના ઉપગ્રહો ઓલરેડી અવકાશમાં પહોંચી ગયા છે. કુલ મળીને લગભગ 12,000 સેટેલાઇટ અવકાશમાં તૈનાત કરવાની મસ્કની કંપનીની યોજના છે! અલબત્ત, આ યોજના હાલ પૂરતી છે, મસ્ક અવકાશમાં 42,000 સેટેલાઇટ તરતા મુકવાની યોજના ધરાવે છે! એવું સમજો કે આખી દુનિયાને પોતાના કબજામાં કરવા માગે છે. સ્પેસએક્સે ડિસેમ્બર 2022માં 1 મિલિયનથી વધુ ગ્રાહકો સુધી પહોંચવાની યોજના જાહેર કરી હતી, મે 2023 સુધીમાં 1.5 મિલિયન ગ્રાહકો મેળવી લીધા છે!
સ્પેસએક્સ દ્વારા મે 2018માં જે પ્રોજેક્ટ બનાવવામાં આવ્યો હતો એ મુજબ, આ પ્રોજેક્ટનો અંદાજ ઓછામાં ઓછો 10 બિલિયન યુએસ ડોલરનો હતો. સ્પેસએક્સ તેના સેટેલાઇટ કાફલામાંથી 2025 સુધીમાં 30 બિલિયન ડોલરથી વધુ આવકની અપેક્ષા રાખે છે! સ્ટારલિંકનું લોન્ચિંગ હજુ તો 8 વર્ષ પહેલા જ જાન્યુઆરી 2015માં કરવામાં આવ્યું હતું. લોન્ચિંગ વખતે મસ્કે એવું કહ્યું હતું કે ઓછી કિંમતની બ્રોડબેન્ડ સેવાઓ માટે વિશ્વભરમાં ખુબ મોટી માગ છે અને તેની કંપની સ્ટારલિંક તમામ સ્થાનિક જરૂરિયાતના કોમ્યુનિકેશન ટ્રાફિકના 50% અને શહેરોના ઈન્ટરનેટ ટ્રાફિકના 10% પર કબજો કરવા માગે છે.
30,000 ચોરસ ફૂટ ભાડાપટ્ટે લીધેલી જગ્યામાં 60 એન્જિનિયરો સાથે આ કંપની મસ્કે શરૂ કરી હતી. ઓગસ્ટ 2018માં થોડો વિસ્તાર કરીને સ્પેસએક્સે પોતાનો આર એન્ડ ડી વિભાગ ઉભો કર્યો અને સેટેલાઇટ ઉત્પાદનને ટેકો આપવા માટે કોર્પોરેટ સેન્ટર ખાતે ત્રણ બિલ્ડીંગની મોટી સુવિધા ઉભી કરી હતી. આ બધું સૌપ્રથમ અમેરિકાના સિએટલ વિસ્તારથી શરૂ થઈ હતું. જુલાઇ 2016માં સ્પેસએકસએ કેલિફોર્નિયામાં વધારાની 8,000 ચોરસ ફૂટ જગ્યા હસ્તગત કરી હતી. આ ઓફિસ સેટેલાઇટ પ્રોગ્રામ માટે સિગ્નલ પ્રોસેસિંગથી લઈને વિવિધ ડેવલપમેન્ટના તબક્કામાં સામેલ છે. ધીમે ધીમે સ્ટારલિંક માટે સ્પેસએક્સનસ એક, બે નહીં હજારો સેટેલાઇટ અવકાશમાં છોડવાની કામગીરી મળી હતી.
જોકે, આ રીતે હજારો સેટેલાઇટ અવકાશમાં છોડવાની એલોન મસ્કની કંપનીની યોજના સામે અમેરિકા સહિત અલગ અલગ દેશના સાયન્ટિસ્ટ અને એન્વાયર્મેન્ટલિસ્ટ વિરોધ કર્યો હતો. તેઓનું કહેવું છે કે, સ્ટારલિંક દ્વારા કાર્યરત હજારો ઉપગ્રહો ભ્રમણકક્ષામાં તરત મૂકવામાં આવશે તો લાંબા ગાળે અવકાશના કાટમાળનો ખતરો પૃથ્વી પર પેદા થઈ શકે છે. ઉપરાંત સેટેલાઇટ અથડામણનું જોખમ પણ ઊભું થઈ શકે છે, જે સંભવિતપણે કેસલર સિન્ડ્રોમ તરીકે ઓળખાતી ઘટનાને ઉત્તેજિત કરી શકે છે. જોકે, બચાવમાં સ્પેસએક્સે જણાવ્યું હતું કે મોટાભાગના ઉપગ્રહો નીચી ઉંચાઈએ લોંચ કરવામાં આવે છે, અને કામ નહીં કરતા ઉપગ્રહોને પાંચ વર્ષ પછી પરત પૃથ્વી પર તેઓ ઉતારી લેવાની ક્ષમતા ધરાવે છે.
અગાઉ ચીની અધિકારીઓએ સંયુક્ત રાષ્ટ્રમાં ફરિયાદ નોંધાવી હતી, જેમાં જણાવ્યું હતું કે તેમના સ્પેસ સ્ટેશને તે વર્ષે સ્ટારલિંક ઉપગ્રહોને ટાળવા માટે ઘણા દાવપેચ કરવા પડ્યા હતા. ચાઇનીઝ પ્રતિનિધિઓએ જણાવ્યું હતું કે સ્ટારલિંક ઉપગ્રહોએ તેમના ઉપગ્રહો સાથે અથડામણનું જોખમ ઊભું કર્યું હતું. જુલાઈ અને ઓક્ટોબરમાં તેમના ઉપગ્રહો સાથેની બે અથડામણ થતાં રહી ગઈ હતી. ચાઇનીઝ ટિઆંગોંગ સ્પેસ સ્ટેશન પર સવાર અવકાશયાત્રીઓના જીવન અને આરોગ્ય માટે જોખમ પણ ઊભું કર્યું હતું. અલબત્ત, આવા અનેક વિવાદો વચ્ચે એલોન મસ્ક અવકાશમાં હજારો સેટેલાઇટ તરત મૂકીને દુનિયાના કમ્યુનિકેશન પર કબજો કરવાની પૂરી તૈયારી કરી લીધી છે.

બિટકોઈન્સ : ટ્રમ્પ, મસ્ક, માઇનિંગ અને ભારત -------------------------------- બિટકોઈન્સના ભાવમાં છપ્પરફાડ ઉછાળાનું કારણ શુ...
30/11/2024

બિટકોઈન્સ : ટ્રમ્પ, મસ્ક, માઇનિંગ અને ભારત
--------------------------------
બિટકોઈન્સના ભાવમાં છપ્પરફાડ ઉછાળાનું કારણ શું છે? ક્રિપ્ટોકરન્સી સંબંધિત દરેક પ્રશ્નના જવાબ
--------------------------------------------------
માઇનિંગ શબ્દ સાંભળતા આપણે એવું સમજીએ કે, જમીનમાંથી કિંમતી ખનીજ તત્વો બહાર કાઢવા માટે થતું ખોદકામ, પણ ડિજિટલ યુગમાં માઇનિંગનો મતલબ સમૂળગો બદલાઇ ગયો છે. આજકાલ દુનિયામાં બિટકૉઇન જેવી ક્રિપ્ટો કરન્સીની બોલબાલા છે. અમેરિકી રાષ્ટ્રપતિની ચૂંટણીમાં ડોનાલ્ડ ટ્રમ્પની જીત બાદ બિટકોઈનની કિંમત 80 હજાર ડોલર (લગભગ 67 લાખ રૂપિયા)થી ઉપર પહોંચી ગઈ છે. ચૂંટણી પ્રચાર દરમિયાન ટ્રમ્પે અમેરિકાને વિશ્વની 'ક્રિપ્ટો કેપિટલ' બનાવવાનું વચન આપ્યું હતું. વિશ્વની સૌથી મોટી ક્રિપ્ટોકરન્સી બિટકોઈનની કિંમતમાં આ વર્ષે 80 ટકાથી વધુનો વધારો થયો છે. માત્ર બિટકોઈન જ નહીં, પરંતુ ડોગેકોઈન જેવી અન્ય ક્રિપ્ટોકરન્સીમાં પણ મોટો વધારો જોવા મળ્યો છે, કારણ કે ટ્રમ્પ સમર્થક એલોન મસ્ક ડોગેકોઈનને પ્રોત્સાહન આપે છે.
બિટકૉઇનની વધતી જતી માગને પહોંચી વળવા માટે તેનું માઇનિંગ કરવામાં આવી રહ્યું છે. માઇનિંગ એટલે એક એવી પ્રોસેસ જયાં કમ્પ્યુટર પાવરનો ઉપયોગ કરીને ટ્રાન્જેકશન અને પ્રોસેસ કરવામાં આવે છે. એક ગણતરી મુજબ બિટકૉઇન માઇનિંગમાં થતાં વીજ વપરાશની દેશો સાથે સરખામણી કરવામાં આવે તો વિશ્વમાં 25મા ક્રમનો વીજ વપરાશ ફક્ત બિટકોઇન પ્રોસેસ માટે કરવામાં આવે છે. ક્રિપ્ટો કરન્સીના માઇનિંગ માટે સેંકડો કમ્પ્યૂટર લગાવવાથી ભારે વીજ વપરાશનો પર્યાવરણવાદીઓ પણ વિરોધ કરી રહ્યા છે.
અગાઉ કેમ્બ્રિજ યુનિવર્સિટીના એક સ્ટડીમાં જાણવા મળ્યું હતું કે બિટકૉઇન માઇનિંગ માટે વિશ્વમાં એક વર્ષમાં અંદાજે 150.21 ટેરાવૉટ અવર (ટીડબ્લ્યુએચ)વીજળી વપરાય છે. જો કે, બિટકૉઇનની જે રીતે માગ વધતી જાય છે તે જોતા હાલમાં માઇનિંગ માટે 165.41 ટેરાવૉટ અવરથી વધારે વીજળી વપરાઇ રહી હોવાનું માનવામાં આવે છે. હજુ પણ આ વીજ વપરાશમાં સતત વધારો થવાની શકયતા છે. એક ટેરાવૉટ અવરએ એનર્જીનું વિશાળ એકમ છે. જે એક કલાક માટે 1 ટ્રીલિયન વૉટનું ઉત્પાદન કરે છે. મોટા દેશના વાર્ષિક વીજ ઉત્પાદન અને વીજ વપરાશ માટે આ ટેરાવૉટ અવર એકમનો ઉલ્લેખ થાય છે. બિટકોઇન માઇનિંગમાં જેટલી એનર્જી વપરાય છે તે અનેક દેશોના વાર્ષિક ઉર્જા વપરાશ કરતા પણ વધારે છે.
જે લોકો કમ્પ્યુટર નેટવર્ક દ્વારા બિટકૉઇન કમાય છે તેને માઇનર્સ કહેવામાં આવે છે. બિટકૉઇનના માઇનિંગ માટે સેંકડો કમ્પ્યુટરને ક્રિપ્ટો કરન્સી નેટવર્ક સાથે જોડવામાં આવે છે. આ કમ્પ્યુટર પર જે લોકો બિટકૉઇન ખરીદી કે વેચી રહ્યા છે તેનું વેરિફાઇ કરવાનું કામ કરે છે. બિટકૉઇનની ખરીદી અને વેચાણનો પણ હિસાબ રાખવાનો હોય છે. આ કાર્ય દરમિયાન કોઇ ફ્રોડ કરીને બિટકૉઇન તફડાવીના લે તે માટે પઝલ સોલ્વ કરવાના પણ થાય છે. જેને પ્રૂફ ઓફ વર્ક પ્રોટોકોલ કહેવામાં આવે છે. એક વ્યકિત પાસેથી બીજી વ્યકિત પાસે બિટકૉઇન જાય ત્યારે કમ્પ્યુટર કોડમાંથી પસાર થવું પડે છે. આ એક કોડ તોડવા જેવી પ્રક્રિયા છે, જેમાં 1.7 અબજથી વધારે ગણના થાય છે. આ કમ્પ્યુટર પ્રક્રિયામાં પણ ખૂબ વીજળી વપરાય છે.
એક માહિતી મુજબ બિટકૉઇનના એક લેણદેણ દરમિયાન અમેરિકાના 9 ઘરમાં 24 કલાક વીજળી ખર્ચાય તેટલો વીજ વપરાશ થાય છે. ક્રિપ્ટો કરન્સીમાં જેટલો નફો વધશે તેમ માઇનિંગ માટે વધુને વધુ કમ્પ્યુટર જોડવામાં આવશે, જે પર્યાવરણ માટે જોખમી માનવામાં આવે છે. ટેસ્લા કંપનીના સીઇઓ એલોન મસ્કે શરુઆતમાં બિટકોઇનમાં ખૂબ રોકાણ કર્યુ હતું. ટેસ્લાથી લઇને પોતાની પ્રાઇવેટ હોલ્ડિંગમાં પણ બિટકૉઇનથી ખરીદી કરી હતી. ટેસ્લા કંપની માટે 1.5 બિલિયન ડોલર ખરીદવાની જાહેરાત કરી હતી. ત્યાર પછી 1 બિટકૉઇનનો ભાવ 65000 ડોલર સુધીની સપાટીએ પહોંચ્યો હતો. એલોન મસ્કના આ પગલાનો વિરોધ થયો હતો, કારણ કે તેઓ ઉર્જા બચત અને સ્વચ્છ ઉર્જાના સ્ત્રોતમાં કામ કરે છે. છેવટે મસ્કે ટવીટ કરીને બિટકોઇનમાં ટેસ્લા કારોનું પેમેન્ટ લેવાના પોતાના નિર્ણય ફેરવી તોળ્યો હતો. મસ્કની ટવીટથી બિટકૉઇનનો ભાવ ગગડીને 30,000 ડોલર આસપાસ આવી ગયો હતો.
ક્રિપ્ટો કરન્સી માઇનિંગ અત્યંત ખર્ચાળ છે, પરંતુ ક્રિપ્ટો કરન્સીમાં રસ ધરાવનારા માઇનર્સ અને રોકાણકારો તેને આજે સોનાની ખાણ સમજે છે. એક સમયે કોઇ ભાવ પણ પૂછતું ન હતું એ ક્રિપ્ટો કરન્સીની બોલબાલા વધી છે. કેટલાક બિટકૉઇન માઇનર્સ માઇનિંગ ખર્ચ ઘટાડવા આઇસલેન્ડ જેવા સ્થળે જતાં રહે છે. અહીં વીજળી સરળતાથી અને સસ્તા દરે મળી રહે છે. સાનુકૂળ હવામાન સિસ્ટમને ઠંડી રાખવામાં મદદ કરે છે.
બિટકૉઇન જેવી બીજી કેટલીક કરન્સીઓના ભાવ તળિયે છે તે ગમે ત્યારે ઉચકાશે એમ માનીને ક્રિપ્ટો કરન્સીના માઇનિંગમાં રસ લઇ રહ્યા છે. મધ્ય એશિયાના યુક્રેન અને મધ્ય અમેરિકાના અલ સાલ્વાડોર જેવા દેશમાં તો સરકારે સંસદમાં ઠરાવ પસાર કરીને ક્રિપ્ટો કરન્સીને માન્યતા આપીને લીગલ ટેન્ડર બનાવી નેશનલ કરન્સી બનાવવાની વાત કરી છે.
આજે પણ દુનિયાના અનેક દેશોમાં બિટકૉઇન કાયદેસર નથી અને ગેરકાયદેસર પણ નથી, એવી ત્રિશંકુ સ્થિતિમાં છે. ભારતની વાત કરીએ તો ક્રિપ્ટો કરન્સી બિઝનેસ સંપૂર્ણ રીતે કાયદેસર નથી. ટ્રેડિંગ થઇ શકે છે, પરંતુ માઇનિંગનું કામ મુશ્કેલ છે. ભારતમાં બિટકૉઇન માઇનિંગને લીગલ અને રેગ્યુલેટ નહીં કરવા માટે વીજ વપરાશ પણ મહત્વનું કારણ માનવામાં આવે છે. આ અંગે કોઇ ડેટા કે સર્વે થયો નથી. ભારતમાં હજુ પણ દરેક ઘરોમાં પૂરતી વીજળી મળતી નથી ત્યારે આવા સંજોગોમાં આટલો વીજળી વ્યય પોષાય તેમ નથી. જો કે, છેલ્લા થોડાં વર્ષમાં ક્રિપ્ટો કરન્સીના રોકાણમાં ભારતમાં 600 ટકા જેટલો ઉછાળો જોવા મળ્યો છે. છેલ્લા આંકડા મુજબ ભારતમાં નવેમ્બર-2023 સુધીમાં 2 કરોડ લોકોએ ક્રિપ્ટોમાં રોકાણ કર્યું છે. રોકાણનો આ આંકડો 10 બિલિયન ડોલરથી વધુ છે.
છેલ્લે એ પણ સમજી લઈએ ભારતમાં બિટકોઇન્સ ક્યાંથી, કેવી રીતે ખરીદશો? ક્યાં રાખશો?
ભારતમાં બિટકોઈનમાં કેવી રીતે રોકાણ કરવું તે નવા રોકાણકારો માટે મુંઝવતો પ્રશ્ન છે. ચાલો સરળ રીતે સમજીએ.
પ્રથમ, રોકાણકારોએ આધાર કાર્ડ અને પાન કાર્ડ સહિત આવશ્યક દસ્તાવેજો સબમિટ કરવા પડે છે. તે પછી, તેઓએ KYC પ્રક્રિયાને સંપૂર્ણ રીતે પૂર્ણ કરવી પડે છે. વ્યક્તિએ તેમની ખરીદી માટે ક્રિપ્ટોકરન્સી એક્સચેન્જ પર ઓર્ડર આપવો પડે છે. એકવાર ઓર્ડર આપવામાં આવે ટાયર પછી રોકાણકારોએ ચૂકવવાપાત્ર રકમ તેમના બેંક ખાતામાંથી ક્રિપ્ટો એક્સચેન્જમાં ટ્રાન્સફર કરવાની હોય છે. પેમેન્ટની વૈકલ્પિક પદ્ધતિઓમાં RTGS, NEFT, ડેબિટ અથવા ક્રેડિટ કાર્ડ્સ અને નિયમિત વ્યવહારો માટે ઉપયોગમાં લેવાતી અન્ય ડિજિટલ ચુકવણી પદ્ધતિઓનો સમાવેશ થાય છે.
રોકાણકારો માટે આગળનું પગલું ક્રિપ્ટોકરન્સી એક્સચેન્જ દ્વારા આપવામાં આવેલા બિટકોઈન્સને સુરક્ષિત રીતે સંગ્રહિત કરવાનું છે. નોંધનીય બાબત એ છે કે અહીંના કોઈપણ વ્યવહારની સાર્વજનિક ખાતાવહીમાં એન્ટ્રી હોય છે અને ટ્રાન્ઝેક્શન કરેલા બિટકોઈન વિક્રેતાઓ અથવા માલિકોના નામને બદલે તેમના વોલેટ આઈડી સાથે નોંધાયેલા હોય છે.
ક્યાંથી ખરીદવું? : ક્રિપ્ટોકરન્સી એક્સચેન્જની વાત કરીએ તો, કોઈપણ વ્યક્તિ સિનડેસ્ક, ઝેબપે અથવા કોઈનબેઝ જેવા ડિજિટલ પ્લેટફોર્મ પરથી ખરીદી શકે છે.
આ ડિજિટલ એક્સચેન્જ રોકાણકારોને વર્તમાન બજાર કિંમતે બિટકોઈન્સ ખરીદવાની સુવિધા આપે છે. આ ઉપરાંત, આ ડિજિટલ એક્સચેન્જ પર બિટકોઇન્સ ખરીદવા માટે આંતરરાષ્ટ્રીય ક્રેડિટ કાર્ડનો ઉપયોગ કરી શકાય છે.
કેટલાક ક્રિપ્ટોકરન્સી એક્સચેન્જ ડાઉનલોડ કરી શકાય તેવી મોબાઇલ એપ્લિકેશન ઓફર કરે છે, જે Android તેમજ iOS ફોનમાં ચાલે છે. તેથી, રોકાણકારો તેમના બેંક ખાતાઓને તેમના સ્માર્ટફોન સાથે સરળતાથી લિંક કરી શકે છે અને ઈમિડિએટ ટ્રાન્ઝેક્શન અને ટ્રાન્સફર માટે આ લિંકનો ઉપયોગ કરી શકે છે.
યાદ રાખો કે બિટકોઈન્સમાં વેપાર કરતા પહેલા વ્યક્તિએ મૂળભૂત KYC પ્રક્રિયામાંથી પસાર થવું જોઈએ. તેથી, રોકાણકારો ભારતમાં પાન કાર્ડ વિના બિટકોઈન ખરીદી શકતા નથી. વધુમાં, રોકાણકારોના પાન કાર્ડ તેમના બેંક ખાતા સાથે જોડાયેલા હોવા જોઈએ, જેનો ઉપયોગ ફોટો ઉપાડવા અને ક્રિપ્ટોકરન્સી એક્સચેન્જમાંથી ફંડ ટ્રાન્સફર કરવામાં આવે છે.
આ ઉપરાંત, કોઈપણ વ્યવહારો શરૂ કરતા પહેલા બિટકોઈન માટે જરૂરી ન્યૂનતમ રોકાણ વિશે પણ શીખવું જોઈએ.
બિટકોઈન્સમાં રોકાણની ન્યૂનતમ રકમ કેટલી છે? : જેમ શેરોમાં રોકાણ માટે કોઈ લઘુત્તમ મર્યાદા નથી, તેવી જ રીતે ભારતમાં બિટકોઈન ખરીદવા માટે કોઈ નિર્ધારિત લઘુત્તમ રકમ નથી. એક તફાવત છે - જો રોકાણકાર આખી ક્રિપ્ટોકરન્સી ખરીદવા માગતાં ન હોય તો નાના એકમો ખરીદી શકે છે.
રજિસ્ટર્ડ વ્યક્તિઓ તેમના વોલેટમાં પૈસા ઉમેરી શકે છે અને આ રકમનો ઉપયોગ બિટકોઈન ઓર્ડર કરવા માટે કરી શકે છે. ભારતમાં રોકાણકાર રૂ.100ની લઘુત્તમ મૂડી સાથે ભારતીય રૂપિયામાં બિટકોઇન ખરીદી શકે છે. આ મર્યાદા વિવિધ ક્રિપ્ટો એક્સચેન્જો વચ્ચે બદલાઈ શકે છે.
તેમ છતાં, બિટકોઈનનો વેપાર એ કહાનીની એક બાજુ છે; ખરીદી કર્યા પછી તેને સુરક્ષિત રીતે સંગ્રહિત કરવું એ સૌથી મહત્ત્વનું છે.
બિટકોઈન કેવી રીતે સ્ટોર કરશો? : બિટકોઈન્સ સ્ટોર કરવા માટે બ્લોકચેન વોલેટનો ઉપયોગ થાય છે. કરન્સી સંગ્રહિત કરવાની સાથે, ક્રિપ્ટો વૉલેટ વ્યવહારોને સક્ષમ કરવા, એન્ક્રિપ્ટ કરવા અને ડિજિટલ હસ્તાક્ષર કરવા માટે પિન જનરેટ કરે છે, જે તમામ ફંડને સુરક્ષિત રાખવા માટે હોય છે.
ક્રિપ્ટન વૉલેટ બે પ્રકારના હોય છે:
કોલ્ડ વોલેટ્સ: આ ક્રિપ્ટો વોલેટ્સ યુઝર્સની પ્રાઈવેટ કીને ઓફલાઈન સ્ટોર કરે છે. તેઓ કોઈના કમ્પ્યુટર પર સોફ્ટવેર સાથે મેચ થવામાં કામ કરે છે. અલબત્ત, તેમાં તમારા પાસવૉર્ડ, પિન ડિજિટલ રીતે સેવ થતાં નથી, કોલ્ડ વોલેટ્સ ઉચ્ચ સ્તરની સુરક્ષા છે.
બીજું છે હોટ વોલેટ્સ: હોટ વોલેટ્સ ઇન્ટરનેટ કનેક્ટિવિટી સાથે કામ કરે છે. તેઓ યૂઝર્સને ઈન્ટરનેટ ટોકન્સ મોકલવા અને મેળવવાની મંજૂરી આપે છે, જે મૂળભૂત વ્યવહારોની સુવિધા આપે છે. વધુમાં સૉફ્ટવેર વપરાશના આધારે હોટ વૉલેટના પણ 3 પ્રકાર છે - ડેસ્કટોપ વોલેટ્સ, વેબ વૉલેટ્સ, મોબાઇલ વોલેટ્સ.

ઉંમર 13 વર્ષ, IPL કોન્ટ્રેક્ટ 1.10 કરોડ!--------------------------------સિદ્ધિ એમને એમ નથી મળતી, પીડા સખત હોય છે : દીકરા...
30/11/2024

ઉંમર 13 વર્ષ, IPL કોન્ટ્રેક્ટ 1.10 કરોડ!
--------------------------------
સિદ્ધિ એમને એમ નથી મળતી, પીડા સખત હોય છે : દીકરાને ક્રિકેટર બનાવવા પિતાએ ઘર, જમીન પણ વેચી દીધાં!
---------------------------------------------
બિહારના સમસ્તીપુર જિલ્લાના આઠમા ધોરણના વિદ્યાર્થી વૈભવ સૂર્યવંશીને રાજસ્થાન રોયલ્સે 1 કરોડ 10 લાખ રૂપિયામાં ખરીદ્યો હતો અને તે આઈપીએલ કોન્ટ્રાક્ટ મેળવનાર સૌથી યુવા ખેલાડી બની ગયો છે. આઈપીએલ મેગા ઓક્શનમાં 1.10 કરોડ રૂપિયામાં ખરીદાયા બાદ યુવા ક્રિકેટર વૈભવ સૂર્યવંશીના પરિવાર અને ગામમાં ઉજવણીનો માહોલ છે. આ છોકરાએ પુખ્ત વય પહેલાં ક્રિકેટની દુનિયામાં આ સ્થાન હાંસલ કર્યું હોય તો તેની પાછળ તેના પિતાની વર્ષોની મહેનત અને સંઘર્ષ છે. આપણે આ ઘટનાને એક ન્યૂઝ ગણી ભૂલી જઈશું, પણ આ સિદ્ધિ મેળવવા માટે વૈભવ અને તેનાં પિતાએ આપેલો ભોગ કેવો અને કેટલો પીડાદાયક હતો, તેને ફીલ પણ નહીં કરી શકીએ.
બિહારના વૈભવે માત્ર 13 વર્ષની ઉંમરે આઈપીએલ ઓક્શન માટે શોર્ટલિસ્ટ થયેલા સૌથી યુવા ખેલાડી તરીકે ઈતિહાસ રચ્યો હતો. હવે તેને એક ટીમ પણ મળી ગઈ છે. ગૌરવ માટે રાજસ્થાન અને દિલ્હી કેપિટલ્સ વચ્ચે મુકાબલો થયો હતો, પરંતુ રાજસ્થાનનો વિજય થયો હતો. સૌથી નાની ઉંમરે આટલી મોટી રકમમાં વેચાયેલો વૈભવ ભવિષ્યમાં એક મહાન ક્રિકેટર બનવાની ક્ષમતા ધરાવે છે. તેની મૂળ કિંમત 30 લાખ રૂપિયા હતી. વૈભવે માત્ર 5 વર્ષની ઉંમરે ક્રિકેટ રમવાનું શરૂ કર્યું હતું અને પોતાની મહેનત અને સમર્પણથી ક્રિકેટની દુનિયામાં પોતાની ઓળખ બનાવી છે.
વૈભવના પિતા સંજીવ સૂર્યવંશીએ જણાવ્યું હતું કે, તેમના પુત્રને અહીં સુધી પહોંચવા માટે તેણે ઘણી સમસ્યાઓનો સામનો કરવો પડ્યો છે, પરંતુ વૈભવ પાસે રહેલી ક્ષમતા અને તેની ક્રિકેટ માટેની ભૂખ જોઈને તે હંમેશા હિંમત રાખતા હતા. એક સમય એવો આવ્યો હતો જ્યારે આર્થિક સમસ્યાઓના કારણે વૈભવને કોચિંગ અપાવવા પરિવારની કેટલીક જમીન વેચવી પડી હતી! જો કે, વૈભવ હાલમાં અંડર-19 અને એશિયા કપ રમી રહ્યો છે, પરંતુ તે ખૂબ જ જલ્દી ભારતની મુખ્ય ટીમનો ભાગ બનવા માગે છે.
વૈભવ સૂર્યવંશીના કાકા રાજીવ સૂર્યવંશીએ જણાવ્યું હતું કે, બાળપણથી જ વૈભવને રમતગમતનો શોખ હતો. 3 વર્ષની ઉંમરે તે બેટ લઈને દોડવા લાગ્યો હતો. વૈભવના પિતા સંજીવ સૂર્યવંશી પણ ક્રિકેટર રહી ચૂક્યા છે, પરંતુ તેમના પુત્રને નેશનલ લેવલનો ખેલાડી બનાવવા માટે તેઓ દિવસ-રાત મહેનત કરી રહ્યા છે. પુત્ર વૈભવને જરૂરી તમામ વસ્તુઓ પૂરી પાડી રહ્યા છે. વૈભવમાં પ્રતિભા છે અને અમને બધાને પૂરો વિશ્વાસ છે કે એક દિવસ તે દેશ માટે પણ રમશે.
વૈભવની દાદીએ કહ્યું હતું કે, તેનો પૌત્ર નાનપણથી જ તોફાની હતો. તે ઇચ્છતો હતો કે તેનો પૌત્ર આઈએએસ કે આઇપીએસ બને, પરંતુ તેને બાળપણથી જ રમતગમતનો શોખ હતો. ઘણી વખત વૈભવને ક્રિકેટ રમવા જતો રોકવા તેની પાછળ દોડતી હતી, પરંતુ તેના પુત્ર સંજીવ તેને હંમેશા એવું કેવાની ના પડતા હતા. આ પછી તેણે તેના પૌત્રને રમવા માટે ઠપકો આપવાનું બંધ કર્યું હતું. આજે વૈભવની દાદી પૌત્રની સફળતા જોઈને સૌથી વધુ ખુશ છે.
આ યુવા ક્રિકેટરના ગામ લોકોનું પણ માનવું છે કે તેના પિતા સંજીવ સૂર્યવંશીએ વૈભવના ક્રિકેટ કરિયર માટે ઘણું બલિદાન આપ્યું છે. વૈભવની પ્રેક્ટિસમાં કોઈ સમસ્યા ન આવે તે માટે કોરોનાના સમયગાળા દરમિયાન તેણે તેના ઘરની સામે નેટ (પ્રેક્ટિસ એરિયા) બનાવ્યો હતો. ગામના કેટલાક બાળકોને બોલાવી તેની પાસે બોલિંગ કરાવતા હતા. ગામ લોકોને પુરેપુરો વિશ્વાસ છે કે વૈભવ એક દિવસ મહાન ક્રિકેટર બનશે. રાજસ્થાન રોયલ્સના મુખ્ય કોચ રાહુલ દ્રવિડનું માનવું છે કે તેમની ટીમ 13 વર્ષના વૈભવ રઘુવંશીને ઈન્ડિયન પ્રીમિયર લીગની આગામી સિઝનમાં ખીલવા માટે સારું વાતાવરણ પૂરું પાડી શકશે. દ્રવિડે કહ્યું હતું કે, મને લાગે છે કે તેની પાસે ટેલેન્ટ છે. રમત વિશે પરિપક્વ છે. તે અમારા ટ્રાયલમાં આવ્યો હતો અને અમે તેને રમતો જોઈને ખૂબ જ ખુશ થયા હતા.
હરાજીમાં સૂર્યવંશીની મૂળ કિંમત 30 લાખ રૂપિયા જ હતી અને દિલ્હી કેપિટલ્સે પ્રથમ બોલી લગાવી હતી. રાજસ્થાને દિલ્હીને પછાડીને લાંબી ચાલેલી બોલીમાં આ ખેલાડીને ખરીદ્યો હતો. સૂર્યવંશીએ તાજેતરમાં જ ચેન્નાઈમાં ઓસ્ટ્રેલિયાની અંડર-19 ટીમ સામે ભારતની અંડર-19 ટીમ માટે યુવા ટેસ્ટમાં સદી ફટકારી હતી. તે આ ક્રેડિટ હાંસલ કરનારો સૌથી યુવા ખેલાડી પણ બન્યો હતો. એ મેચમાં સૂર્યવંશીએ 62 બોલમાં 104 રન બનાવ્યા હતા.
ગત શનિવારે રાજસ્થાન સામે સૈયદ મુશ્તાક અલી ટ્રોફીમાં બિહાર માટે ટી20 ડેબ્યૂ કર્યું હતું અને છ બોલમાં 13 રન બનાવ્યા હતા. જુનિયર સર્કિટ પર સમાચારમાં રહેલા સૂર્યવંશીએ ફર્સ્ટ ક્લાસ ક્રિકેટમાં કોઈ મોટી ઇનિંગ્સ રમી નથી. તેણે પાંચ મેચમાં 10ની એવરેજથી રન બનાવ્યા છે. બિહારના સમસ્તીપુરના રહેવાસી સૂર્યવંશીએ 2023-24 રણજી ટ્રોફી સિઝનમાં મુંબઈ સામે ડેબ્યૂ કર્યું હતું, જ્યારે સત્તાવાર રેકોર્ડ મુજબ તે 12 વર્ષ 284 દિવસનો હતો, જેનાથી તે ટુર્નામેન્ટના ઈતિહાસમાં સૌથી યુવા ખેલાડી બન્યો હતો.
12 વર્ષની ઉંમરે તેણે બિહાર માટે વિનુ માંકડ ટ્રોફી રમી હતી અને પાંચ મેચમાં 400ની નજીક રન બનાવ્યા હતા. દ્રવિડે કહ્યું હતું કે, હરાજીમાં તેનું લક્ષ્ય બોલરો હતા. રોયલ્સે ઝડપી બોલર આકાશ માધવાલ, જોફ્રા આર્ચર, તુષાર દેશપાંડે, ફઝલહક ફારૂકી, અશોક શર્મા અને ક્વેના મફાકાને ખરીદ્યા હતા, પણ વૈભવની બોલી લાગતા અમે તેને ખરીદવા લલચાયા હતા.
13 વર્ષની ઉંમરે કરોડપતિ બનેલા વૈભવએ પોતાના ફેવરિટ ક્રિકેટર વિશે જણાવ્યું ત્યારે લોકો અચરજમાં પડી ગયા છે. સોશિયલ મીડિયા પર વાયરલ થયેલા વીડિયોમાં બિહારના વૈભવે તેના ફેવરિટ બેટ્સમેન વિશે વાત કરી છે. વૈભવ સૂર્યવંશી વિરાટ કોહલી અને સચિન તેંડુલકરને પોતાના ફેવરિટ ક્રિકેટર નથી માનતો. વૈભવે આપેલો જવાબ સોશિયલ મીડિયા પર વાયરલ થઈ રહ્યો છે. એક 13 વર્ષીય યુવા ભારતીય ક્રિકેટરે મહાન દિગ્ગજ બ્રાયન લારાને પોતાનો ફેવરિટ ક્રિકેટર ગણાવ્યો છે.
વૈભવની કહાની અહીં અટકતી નથી. તેણે બિહાર ક્રિકેટ એસોસિએશન (બીસીએ) હેઠળ રણધીર વર્મા અંડર-19 વનડે ટૂર્નામેન્ટની મેચમાં 332 રન બનાવ્યા હતા. આ મેચના દિવસે તેની ઉંમર 13 વર્ષ અને 197 દિવસ હતી.ગયા વર્ષે વૈભવે બિહાર માટે પહેલીવાર ફર્સ્ટ ક્લાસ મેચ રમી રહ્યો હતો ત્યારે તેની ઉંમરને લઈને ઘણી ચર્ચાઓ થઈ હતી. ઇન્ટરનેટ પર ઉપલબ્ધ એક વીડિયોમાં તે પોતે કહેતા સાંભળવા મળ્યો આવ્યો હતો કે તે સપ્ટેમ્બર 2023માં 14 વર્ષનો થઈ જશે. જ્યારે સત્તાવાર રેકોર્ડ મુજબ વૈભવનો જન્મ 2011માં થયો હતો. બીસીસીઆઈ અને બિહાર ક્રિકેટ એસોસિએશને હજુ સુધી આ મામલે કોઈ ટિપ્પણી કરી નથી.
વૈભવ ડાબોડી ઓપનર બેટ્સમેન છે. આગળ જણાવ્યું તેમ તે બ્રાયન લારાને પોતાનો આઈડલ માને છે. તેને મળવાની પણ ઈચ્છા છે. વૈભવે વધુમાં જણાવ્યું હતું કે, હું લારાને મળીશ ત્યારે હું તેને તેની રમવાની ટેક્નિક વિશે પૂછવા માગું છું. વૈભવના કોચ પણ તેના પિતા જ છે. ત્રણ ભાઈઓમાં બીજા નંબરે વૈભવ હવે આઈપીએલ રમવા જઈ રહ્યો છે. જો કે તેના ભાઈઓને ક્રિકેટ પસંદ નથી, પરંતુ હવે કદાચ તેના બે ભાઈઓને વૈભવની આ સિદ્ધિ ચોક્કસપણે ક્રિકેટના મેદાનમાં ખેંચશે.

રોલ્સ રૉયસ : જન્મ, સ્ટેટ્સ, ઇતિહાસ અને પુનર્જન્મ!!-----------------------------------------વિશ્વભરના ધનિકોના સ્ટેટ્સ વિશ...
30/11/2024

રોલ્સ રૉયસ : જન્મ, સ્ટેટ્સ, ઇતિહાસ અને પુનર્જન્મ!!
-----------------------------------------
વિશ્વભરના ધનિકોના સ્ટેટ્સ વિશે ઘણી કહાનીઓ સાંભળી હશે અને આ બધા અમીરોમાં એક કોમન છે - રોલ્સ રોયસ. આ નામ એટલું પાવરફૂલ છે કે તેની આગળ કાર લખવાની જરૂર જ નથી. જે વ્યક્તિ રોલ્સ રોયસનો માલિક છે તે તેની આર્થિક સ્થિતિનો સૌથી મજબૂત માપદંડ છે. આવા અમીરોમાં ફરક એટલો જ છે કે એક પાસે રોલ્સ રોયસ ફેન્ટમ છે અને બીજા પાસે રોલ્સ રોયસ ઘોસ્ટ છે. - પણ શું તમને ખબર છે વાસ્તવમાં આજની આ કંપની કોઈ વાસ્તવિક રોલ્સ રોયસ નથી! અર્થ, રોલ્સ રોયસ તેના સમૃદ્ધ ઇતિહાસ સાથે લાંબા સમયથી ઇતિહાસમાં દર્જ થઈ ચૂકી છે. હાલની રોલ્સ રોયસ કંપની માત્ર 21 વર્ષ જૂની છે. ચાલો આખી કહાની સમજીએ.
વર્ષ 1904માં જઈએ, જ્યારે ચાર્લ્સ રોલ્સ અને સર હેનરી રોયસ એકબીજાને મળ્યા હતા અને વિશ્વની સૌથી ઝડપી કાર બનાવવાનું સ્વપ્ન જોયું હતું. 1877માં જન્મેલા ચાર્લ્સ રોલ્સે ટ્રિનિટી કોલેજ, કેમ્બ્રિજમાં મિકેનિકલ એન્જિનિયરિંગનો અભ્યાસ કર્યો હતો. આ વ્યક્તિ કાર ધરાવનાર પ્રથમ કોલેજ અંડરગ્રેજ્યુએટ હતી. આ કારમાં તેનો રસ એટલો વધી ગયો કે તે એન્જિન સાથે પોતાનું ભેજું જોડીને ભવિષ્યને જોવા લાગ્યઓ હતો. આ અંડરગ્રેજ્યુએટ એટલો ફેમસ થઈ ગયો કે તેને 'ડર્ટી રોલ્સ' અને 'પેટ્રોલ્સ' જેવા ઉપનામ પણ મળ્યા હતા.
1903માં તેમણે 83mph (133 કિલોમીટર પ્રતિ કલાક)ની ઝડપે કાર ચલાવીને નવો રેકોર્ડ બનાવ્યો હતો. જો કે, પુરાવાના અભાવે સરકારે તેનો સ્વીકાર કર્યો ન હતો, પરંતુ રોલ્સ એક મોટું નામ બની ગયું હતું.
બીજી બાજુ સર હેનરી રોયસ હતા, જેનો જન્મ 1863માં થયો હતો. તેઓ ખૂબ જ ગરીબ પરિવારમાંથી આવતા હતા. પોતાની આજીવિકા કમાવવા માટે તેણે અખબારો વેચ્યા હતા અને ટેલિગ્રાફ વિભાગમાં પણ કામ કર્યું હતું. તે 14 વર્ષના થયા ત્યારે તેને તેની કાકીની મદદથી ગ્રેટ નોર્ધન રેલવે વર્ક્સમાં કામ શીખવાની તક મળી હતી. તેણે આ તક જવા દીધી નહીં અને ઇલેક્ટ્રિકલ એન્જિનિયરિંગ શીખ્યા હતા. આ સાથે તેણે ફ્રેન્ચ ભાષા પર પણ પ્રભુત્વ મેળવ્યું હતું. પોતાની પ્રતિભાના આધારે રોયસે તેના મિત્ર અર્નેસ્ટ ક્લેરમોન્ટ સાથે મળીને એક કંપની બનાવી હતી. કાર પ્રત્યેના તેના શોખને કારણે તેણે ફ્રેન્ચ ડેકોવિલે નામની કાર બ્રિટનમાં આયાત કરી હતી અને તેની ઘણી ખામીઓ પણ શોધી કાઢી હતી. તેઓ પોતાની પસંદગીની કાર ઇચ્છતા હતા. જ્યારે તેમને તેમની પસંદગીની કાર ન મળી ત્યારે તેમણે પોતે જ વર્ષ 1903માં રોયસ 10hp નામની કાર બનાવી એસેમ્બલ કરીને બનાવી હતી. તેનું નામ પણ તેની કારની ઝડપની જેમ વિશ્વભરમાં ફેલાઈ ગયું હતું.
અહીં ચાર્લ્સ રોલ્સ થોડી ચિંતા અનુભવી રહ્યા હતા. વાસ્તવમાં તેઓ હજુ પણ પોતાની કાર બનાવી શક્યાં ન હતા અને ન છૂટકે જર્મન કાર આયાત કરી રહ્યા હતા.
દરમિયાન, રોયસની કંપનીના શેરહોલ્ડર હેનરી એડમન્ડ્સે રોલ્સને રોયસ સાથે મર્જ કરી હતી. 4 મે, 1904ના દિવસે દસ મિનિટની બેઠક અને તે પછી જે થયું તે ઈતિહાસ છે. રોલ્સ-રોયસનો જન્મ એક એવી કંપની તરીકે કરવામાં આવ્યા જે કંપનીએ ત્યાર પછી 67 વર્ષ સુધી વિશ્વના ધનિકોના દિલ પર રાજ કર્યું હતું. આ જ કંપની દ્વારા કારની સાથે એરોપ્લેન એન્જિન પણ બનાવવામાં આવ્યા હતા.
જો કે, તેમના માર્કેટિંગ મેનેજર ક્લાઉડ જોન્સનનો પણ કંપનીની સફળતામાં ઘણો મોટો ફાળો હતો. તેણે પોતાની એક કારની જાહેરાતમાં લખ્યું હતું - છ સિલિન્ડર રોલ્સ રોયસ – શ્રેષ્ઠમાંની એક નહીં, પરંતુ વિશ્વની શ્રેષ્ઠ કાર. બધું બરાબર ચાલી રહ્યું હતું, પરંતુ પછી આવ્યું વર્ષ 1971.
1971માં પેટ્રોલની અછતને કારણે વૈભવી કાર નિર્માતાના એરક્રાફ્ટ એન્જિન વિભાગને ગંભીર સમસ્યાઓનો સામનો કરવો પડ્યો હતો. કંપની આકાશમાંથી સીધી જમીન પર આવી ગઈ હતી. બ્રિટિશ સરકારે કંપનીના આ વિભાગનું રાષ્ટ્રીયકરણ પણ કરવું પડ્યું હતું. જેની સીધી અસર કાર વિભાગ પર પણ પડી હતી.
1973માં રોલ્સ-રોયસ મોટર્સ નામથી નવી કંપનીની રચના કરવામાં આવી હતી. જો કે, તેની અસર ત્યારે દેખાઈ ન હતી, પરંતુ તે જ સમયે લોન્ચ કરાયેલી કોર્નિશે લક્ઝરી કાર માટે લોકોનો ક્રેઝ વધ્યો હતો. વર્ષ 1980 સુધીમાં કંપનીની ગતિ ધીમી પડવા લાગી હતી. આ સમયે કંપનીને વિકર્સ નામના જૂથે ખરીદી હતી. માર્કેટમાં ટકી રહેવા માટે કંપનીએ ઘણા નવા પ્રયોગો પણ કર્યા હતા. ઉદાહરણ તરીકે, જો ગ્રાહકો ઇચ્છે તો તેઓ ગુલાબી રંગમાં ટાઇગર પ્રિન્ટવાળી કાર પણ ખરીદી શકે છે. આ પહેલા બ્રિટિશ કંપની પોતાના નિયમો અનુસાર કાર બનાવતી હતી.
એ પછીના દાયકામાં કંપનીની સ્થિતિ વધુ ખરાબ થઈ ગઈ હતી અને 1998માં ફોક્સવેગન ગ્રૂપે રોલ્સ-રોયસનું કાર ડિવિઝન ખરીદી લીધું હતું. જો કે, અહીં બીએમડબ્લ્યુ કંપનીએ ગેમ કરી નાખી હતી! ફોક્સવેગનને ફેક્ટરીથી લઈને માર્કેટ સુધી બધું જ ખરીદી લીધું, પરંતુ રોલ્સ રોયસનું નામ અને તેનો અસલી લોગો બીએમડબ્લ્યુ પાસે આવી ગયો હતો! મતલબ કે, ફોક્સવેગનને લોગો પર કબજો કરી લીધી, પણ તેનો ઉપયોગ કર્યો નહીં. તે બેન્ટલી જેવી તેની મોટી બ્રાન્ડની કાર વેચવા માગતા હતા, જેને રોલ્સ રોયસ જેવો દરજ્જો મળ્યો ન હતો. રોલ્સ રોયસ માર્કેટમાંથી ગુમ થઈ જાય તો કદાચ તેઓ તેમાં કામિયાબ થશે, એવી તેની ધારણા હતી.
એ પછી 1 જાન્યુઆરી, 2003ના રોજ બીએમડબ્લ્યુ અને ફોક્સવેગન વચ્ચે એક કરાર પર હસ્તાક્ષર કરવામાં આવ્યા હતા અને બીએમડબ્લ્યુની માલિકી હેઠળ એક નવી કંપનીની રચના કરવામાં આવી હતી. આ જ કંપનીએ તે જ વર્ષે રોલ્સ રોયસ, ફેન્ટમ લોન્ચ કરી હતી. 2009માં ઘોસ્ટ મોડેલ આવ્યું હતું. 2013માં રેથ અને 2015માં ડૉન મોડેલ લોન્ચ કરાયા હતા. વર્ષ 2018માં કંપનીએ અલ્ટ્રા-લક્ઝરી એસયુવી સેગમેન્ટમાં પણ પ્રવેશ કર્યો હતો. આજે કંપની તેની જૂના સ્ટેટ્સ પર પાછી આવી તો ગઈ છે, પરંતુ એ પણ સાચું છે કે ઓરિજિનલ રોલ્સ રોયસ ઇતિહાસમાં ક્યાંક ખોવાઈ ગઈ છે.

Happiest Birthday to The Maharani Of Baroda Radhikaraje Gaekwad
19/07/2023

Happiest Birthday to The Maharani Of Baroda Radhikaraje Gaekwad

16/04/2023

અતિ(ક)નો અંત!!
16 સેકેન્ડમાં 10 રાઉન્ડ ફાયરિંગ!
3 હુમલાખોરોએ ત્યાં સુધી ફાયરિંગ કર્યું, જ્યાં સુધી બંનેના મોત ન થયા

પ્રયાગરાજમાં અતીક અને તેના ભાઈ અશરફની પોઇન્ટ રેન્જથી ગોળી મારી હત્યા

મેડિકલ ટેસ્ટ માટે લઈ જતાં સમયે 3 હુમલાખોરોએ માથામા ગોળી મારી પછી આત્મસમર્પણ કર્યું

CM યોગીએ હાઇલેવલ મિટિંગ બોલાવી

Address

Mumbai
Mumbai
390008

Website

Alerts

Be the first to know and let us send you an email when FalDee News and Updates posts news and promotions. Your email address will not be used for any other purpose, and you can unsubscribe at any time.

Contact The Business

Send a message to FalDee News and Updates:

Shortcuts

Share

Category