31/05/2026
ধন-সম্পত্তি, বিলাসীতা, ক্ষমতা, জনপ্ৰিয়তা আৰু জীৱনৰ বাস্তৱতা।
ক্ষমতা, ধন-সম্পত্তি আৰু জনপ্ৰিয়তা মানৱ জীৱনত কেতিয়াও চিৰস্থায়ী নহয়।
এসময়ত যিজন ব্যক্তি হেজাৰ হেজাৰ মানুহৰ আস্থা আছিল, যাৰ সিদ্ধান্তই এটি অঞ্চলৰ ৰাজনৈতিক অৰ্থনৈতিক আৰু সামাজিক পৰিৱেশ প্ৰভাৱিত হৈছিল, আজি তেওঁ বাৰ্ধক্য, অসুস্থতা আৰু দুৰ্বলতাৰ সন্মুখীন হৈ বিচনাত চটফটাই আছে। এয়াই হৈছে জগতৰ চিৰন্তন নীতি।
এসময়ত তেওঁ অসম বিধানসভাৰ এজন গুৰুত্বপূৰ্ণ মন্ত্ৰী আৰু এজন প্ৰভাৱশালী নেতা আছিল। বৰাক উপত্যকাৰ ৰাজনীতি তেওঁৰেই নেতৃত্বত আছিল। অসংখ্য মানুহ তেওঁৰ দুৱাৰমুখত সহায় আৰু পৰামৰ্শ বিচাৰি আহযাহ কৰিছিল। ক্ষমতা, সন্মান, প্ৰভাৱ আৰু ধন-সম্পত্তিৰ অভাৱ নাছিল। কিন্তু আজি তেওঁ বিচনাত পৰি আছে। জীৱনৰ এই পৰিৱৰ্তনে আমাৰ বাবে এক গভীৰ শিক্ষা দাঙি ধৰে।
এই দৃশ্যই আমাক মনত পেলাই দিয়ে যে এজন ব্যক্তিৰ প্ৰকৃত পৰিচয় তেওঁৰ শক্তি বা ধন-সম্পত্তি নহয়, বৰঞ্চ তেওঁৰ সৎকৰ্ম, সু-চৰিত্ৰ আৰু মানুহৰ বাবে এৰি যোৱা অৱদান।
যি শক্তিৰ বাবে মানুহে গৌৰৱ কৰে, যি সম্পদৰ বাবে মানুহে আনক তুচ্ছজ্ঞান ভাৱে, সেই ধন এদিন হেৰাই যায়।
সময়ৰ চকা কেতিয়াও কাৰো বাবে ৰৈ নাথাকে।
ইতিহাস সাক্ষী, বিশ্বৰ বহু সম্ৰাট, ৰজা, মন্ত্ৰী , শক্তিশালী আৰু প্ৰভাৱশালী ব্যক্তিয়ে আজি কেৱল স্মৃতিৰ পৃষ্ঠাতহে স্থান পাইছে। তেওঁলোকৰ শক্তি, ৰাজপ্ৰসাদ, বিলাসীতা সাহস ক্ষমতা ইত্যাদি একোয়েই স্থায়ী হৈ থকা নাই। তেওঁলোকৰ ভাল কাম বা বেয়া কামৰ স্মৃতিহে স্থায়ী আৰু স্মৰণীয়।
গতিকে ক্ষমতা আৰু সম্পদক দুৰ্বল শ্ৰেণীৰ মানুহৰ ওপৰত অপব্যৱহাৰ কৰা উচিত নহয়। কাৰণ অৱশেষত এজন ব্যক্তিক তেওঁৰ উপাধিৰ দ্বাৰা নহয়, তেওঁৰ কৰ্মৰ দ্বাৰাহে স্মৰণ কৰা হয়। আজি শক্তিশালীজন হয়তো কাইলৈ দুৰ্বল হৈ পৰিব। আজিৰ নেতাজন হয়তো কাইলৈ সাধাৰণ মানুহৰ দৰে অসহায় হৈ পৰিব।
জীৱনৰ এই বাস্তৱতাই আমাক নম্ৰ হ’বলৈ শিকায়, মানুহক সন্মান কৰিবলৈ শিকাই আৰু সোঁৱৰাই দিয়ে যে পৃথিৱীৰ সকলো বস্তুৱেই সাময়িক। যদি স্থায়ী কিবা আছে তেন্তে সেয়া হ’ল মানুহৰ সৎকৰ্ম, মানৱতা আৰু মহান সৃষ্টিকৰ্তাৰ প্ৰতি তেওঁৰ জবাবদিহিতা।
ক্ষমতা ধন-সম্পত্তি মাথোঁ এটা নিৰ্দিষ্ট সময়ৰ বাবেহে , কিন্তু মানৱতা আৰু ভাল কামেই হৈছে এজন ব্যক্তিৰ প্ৰকৃত পৰিচয়।
(বিঃদ্ৰঃ) BTAD ৰ গোষ্ঠী সংঘৰ্ষৰ সময়ত তেখেতে জাতি আগত দল পিছত বুলি কৈ মুছলমানৰ সুৰক্ষা বিচাৰি দাবী উত্থাপন কৰিছিল, লগে লগে মুছলমানৰ চিৰ শত্ৰু কংগ্ৰেছ দলে তেখেতক মন্ত্ৰীত্বৰ পৰা অপসাৰণ কৰিছিল।
আপোনাৰ এই ত্যাগ অসমৰ মুছলমান সমাজত চিৰস্মৰণীয় হৈ থাকিব আজীৱন।
আপোনাৰ দীৰ্ঘায়ু কামনাৰে মহান সৃষ্টিকৰ্তাই আপোনাক সুস্থতা নচিব কৰক, এয়াই কামনা কৰিলোঁ।
সকলোৱে দোৱা কৰিব।
