05/09/2026
অৱসৰপ্ৰাপ্ত অধ্যাপক সোমনাথ ডেকাক বিশিষ্ট শিক্ষাব্ৰতী উমাচৰণ শীল জীৱনজোৰা সাধনা বঁটা প্ৰদান
প্ৰতিবেদক লাইভ, ৫ ছেপ্টেম্বৰ, ২০২৬
শিক্ষক দিৱসৰ সৈতে সংগতি ৰাখি আজি নলবাৰী জিলাৰ টিহু নিৱাসী, টিহু মহাবিদ্যালয়ৰ অৱসৰপ্ৰাপ্ত অধ্যাপক, বিশিষ্ট সমাজকৰ্মী সোমনাথ ডেকাক বিশিষ্ট শিক্ষাব্ৰতী তথা টিহু জাতীয় বিদ্যালয়ৰ প্ৰতিষ্ঠাপক প্ৰধান শিক্ষক উমাচৰণ শীল জীৱনজোৰা সাধনা বঁটা প্ৰদান কৰা হয় । এই উপলক্ষে টিহু জাতীয় বিদ্যালয়ত বিদ্যালয়খনৰ প্ৰধান শিক্ষক ধৰণী ডেকাৰ পৌৰোহিত্যত হোৱা এখন সভাত বঁটা গ্ৰহণ কৰি বাৰুকৈয়ে আৱেগিক হোৱা দেখা যায় অৱসৰপ্ৰাপ্ত অধ্যাপক সোমনাথ ডেকাক । বঁটা গ্ৰহণ কৰি শিক্ষাৰ্থীসকললৈ দিয়া ভাষণত তেওঁ বিশ্ববন্দিত দাৰ্শনিক পণ্ডিত সৰ্বেপল্লী ৰাধাকৃষ্ণনৰ জীৱন আৰু আদৰ্শেৰে আগবাঢ়িবলৈ আহ্বান জনায় ৷ যশস্বী শিক্ষক উমাচৰণ শীলৰ শৈক্ষিক জীৱনৰ বন্দনা কৰি টিহু মহাবিদ্যালয়ৰ নৈশ শাখাৰ প্ৰথম দলৰ শিক্ষাৰ্থী হিচাপে পোৱাৰ বিষয়ে কৈ তেওঁ স্মৃতিকাৰ হয় । তেওঁ কয় যে, আমি জীৱনত সফল হ’বলৈ কষ্ট কৰিবই লাগিব । বিনা কষ্টত কোনেও ভাল ফল পাব নোৱাৰে । সভাত টিহু মহাবিদ্যালয়ৰ প্ৰাক্তন ভাৰপ্ৰাপ্ত অধ্যক্ষ গিৰীন্দ্ৰনাথ শৰ্মায়ো প্ৰাসংগিক ভাষণ প্ৰদান কৰে । পূৰ্বাপৰ প্ৰদান কৰি অহা এই বঁটা প্ৰদান অনুষ্ঠান আৰু সভাখন আয়োজনৰ উদ্দেশ্য বিৱৰি কয় টিহু জাতীয় বিদ্যালয় ছাত্ৰ একতা সভাৰ সাধাৰণ সম্পাদক বিতোপন দাসে । ছাত্ৰ প্ৰধান মানস প্ৰতিম কলিতাই অনুষ্ঠানৰ আঁত ধৰি পৰিচালনা কৰে । শিক্ষক দিৱস উপলক্ষে বিদ্যালয়খনৰ প্ৰতি শ্ৰেণীৰ শিক্ষাৰ্থীয়ে নানা গীত, নাচ, কবিতা আবৃত্তি পৰিৱেশন কৰাৰ লগতে অসমীয়া, ইংৰাজী, হিন্দী আৰু সংস্কৃত ভাষাত সৰ্বেপল্লী ৰাধাকৃষ্ণন আৰু শিক্ষক দিৱসৰ বিষয়ে ভাষণ দি সকলোকে আপ্লুত কৰে । শিক্ষাৰ্থীসকলে শিক্ষাগুৰুসকলক সেৱা জনাই আশিস লয় । ইয়াৰ পূৰ্বে বিদ্যালয়খনৰ প্ৰধান শিক্ষক ধৰণী ডেকাই সৰ্বেপল্লী ৰাধাকৃষ্ণণৰ প্ৰতিচ্ছবিত শ্ৰদ্ধা নিৱেদন কৰি দিৱসৰ পাতনি মেলে ।
(ইতিবাচক আৰু গঠনমূলক প্ৰতিবেদনৰ বাবে প্ৰতিবেদক লাইভৰ পেজটি লাইক কৰি উৎসাহিত কৰে যেন ৷)
Protibedok Live: September 5, 2026
