07/08/2026
इंदिरानगर जॉगिंग ट्रॅक बोगद्याजवळ नागरिक त्रस्त; भरधाव आणि ओव्हरलोड वाहनांमुळे अपघाताची भीती
नाशिक (योद्धा एक्सप्रेस न्यूज लाईव्ह):
इंदिरानगर परिसरातील जॉगिंग ट्रॅक बोगद्याजवळ सध्या स्थानिक नागरिक आणि पादचाऱ्यांना मोठ्या त्रासाला सामोरे जावे लागत आहे. परिसरातील अवजड वाहतूक आणि प्रशासनाच्या दुर्लक्षामुळे दिवस-रात्र अवजड व ओव्हरलोड वाहनांची सर्रास वाहतूक सुरू आहे. यामुळे स्थानिक रहिवाशांचे जगणे हैराण झाले असून अपघाताची टांगती तलवार कायम आहे.
ग्राउंड रिपोर्टर प्रमोद सरकार यांनी प्रत्यक्ष जागेवर जाऊन पाहणी केली असता, अनेक धक्कादायक बाबी समोर आल्या आहेत. दिवस असो वा रात्र, या परिसरातून क्षमतेपेक्षा जास्त भार (ओव्हरलोड) वाहून नेणाऱ्या गाड्या भरधाव वेगाने धावत आहेत. जॉगिंग ट्रॅकचा वापर सकाळी आणि संध्याकाळी नागरिक, महिला व ज्येष्ठ नागरिक आरोग्यासाठी करतात. मात्र, या वाहनांच्या सततच्या फेऱ्यांमुळे प्रदूषणासह सुरक्षेचा गंभीर प्रश्न निर्माण झाला आहे.
मद्यधुंद चालक, दादागिरी आणि पोलीस प्रशासनाचे दुर्लक्ष
अनेकदा त्रस्त नागरिकांनी या वाहनांना थांबवून जाब विचारण्याचा प्रयत्न केला असता, धक्कादायक प्रकार उघडकीस आला आहे. अनेक गाड्यांचे चालक हे 'ड्रिंक अँड ड्राईव्ह' (मद्यप्राशन करून वाहन चालवणे) करत असल्याचे आढळून आले आहे. वाहनांवर ओव्हरलोड आणि चालक मद्यधुंद अशा अत्यंत धोकादायक स्थितीत ही वाहने चालवली जात आहेत. नागरिकांनी विरोध केल्यास किंवा विचारणा केल्यास उद्धट उत्तरे दिली जातात.
सर्वात गंभीर बाब म्हणजे या सर्व प्रकाराकडे पोलीस प्रशासन पूर्णपणे दुर्लक्ष करत असल्याचे दिसून येत आहे. पोलिसांच्या या निष्काळजीपणामुळे वाहनचालकांचे धाडस अधिकच वाढले आहे.
स्थानिक प्रशासन आणि वाहतूक पोलिसांनी या प्रकाराची तातडीने दखल घ्यावी, ओव्हरलोड वाहनांवर व मद्यधुंद चालकांवर कठोर कारवाई करावी, अशी तीव्र मागणी इंदिरानगर परिसरातील नागरिकांकडून केली जात आहे. अन्यथा तीव्र आंदोलन छेडण्याचा इशारा रहिवाशांनी दिला आहे.
योद्धा एक्सप्रेस न्यूज लाईव्ह
ग्राउंड रिपोर्टर: प्रमोद सरकार
मुख्य संपादक: प्रकाश दंडगव्हाण
(एक भारत, एक आवाज)
CMOMaharashtra ABP Majha Samir Sanadi Yoddha Express news live Kolhapur Press Club Nashik City Police Kiran Patil
