27/07/2025
*ঘিলামৰাৰ নিৱাসী অৱসৰপ্ৰাপ্ত পশুপালন বিভাগৰ সহকাৰী সঞ্চালক ডাঃ কেশৱ চন্দ্ৰ গগৈ মৃত্যু।*
*বিভিন্ন দল সংগঠনৰ শোক প্ৰকাশ।*
ঘিলামৰাঃ ২৭ জুলাই :-ঘিলামৰা নিবাসী বিশিষ্ট সমাজ কৰ্মী, পশুপালন বিভাগৰ অৱসৰপ্ৰাপ্ত সহকাৰী সঞ্চালক ডাঃ কেশৱ চন্দ্ৰ গগৈ(৭২) আজি বিয়লি ১-৩০ বজাত গুৱাহাটীত চিকিৎসাধীন অৱস্থাত মৃত্যু হয়। ১৯৫৩চনত জন্ম গ্ৰহণ কৰা কেশৱ চন্দ্ৰ গগৈয়ে আনুষ্ঠানিক শিক্ষা গ্ৰহণ কৰি পশুপালন বিভাগৰ এগৰাকী চিকিৎসক হিচাপে কৰ্মজীৱনৰ পাতনি মেলে। চাকৰি কালত চিকিৎসক গৰাকীয়ে অসম বিভিন্ন ঠাইত জনপ্ৰিয় চিকিৎসক হিচাপে খ্যাতি অৰ্জন কৰিছিল। লখিমপুৰ, ধেমাজি আৰু মাজুলী জিলাত চিকিৎসা সেৱা আগবঢ়োৱা অন্তত ২০১৩ চনত লখিমপুৰ জিলাৰ আজাদত থকা পশুপালন বিভাগৰ সহকাৰী সঞ্চালক আৰু জিলা পশুপালন বিভাগৰ বিষয়া হিচাপে কাৰ্যনিৰ্বাহ কৰি অৱসৰ গ্ৰহণ কৰে। অৱসৰী সময়ছোৱাত জ্যেষ্ঠ নাগৰিক হিচাপে কাৰ্যনিৰ্বাহ কৰাৰ লগতে ঘিলামৰা শাখা সাহিত্য সভা সভাপতি নিৰ্বাচিত হৈ ঘিলামৰা শাখা সাহিত্য সভা খনক শতদল শাখা হিচাপে স্বীকৃতি লাভ কৰাত যথেষ্ট অৱদান আগবঢ়াইছিল। আনহাতে মৃত্যু সময়লৈকে চিকিৎসক গৰাকীয়ে ঘিলামৰা ক্ৰীড়া সন্থাৰ সভাপতি, ঘিলামৰা কেন্দ্ৰীয় ৰঙালী বিহু সন্মিলন উপ সভাপতি, ঘিলামৰা বেচৰকাৰী শিক্ষানুষ্ঠান সংকল্প একাডেমী পৰিচালনা সমিতিৰ সভাপতি, ঘিলামৰা উন্নয়ন সমিতি উপ সভাপতি, ঘিলামৰা নাট্য গোষ্ঠীৰ ইংগিত শুভ চিন্তকৰ লগতে ঘিলামৰা অঞ্চলৰ কেইবাটাও জাতীয় সংগঠনৰ লগত জড়িত হৈ আছিল। চিকিৎসক জনৰ মৃত্যু বাতৰি পোৱাৰ লগে লগে ঘিলামৰা কলেজ ৰোডত থকা বাসভৱনত অসংখ্য গুণমুগ্ধ উপস্থিত হয় আৰু শোক সন্তপ্ত পৰিয়ালৰ বৰ্গ সমবেদনা জ্ঞাপন কৰে। আনহাতে পৰিয়ালৰ বৰ্গ ফালৰ পৰা জানিব পৰা মতে সুদুৰ গুৱাহাটী পৰা চিকিৎসক জনৰ নশ্বৰ দেহ নিজা বাসভৱনত ঘিলামৰা উপস্থিত হোৱাত পলম হোৱাত কাইলৈ ২৮জুলাই পূৱা ভাগত অন্তোষ্টিক্ৰিয়া সম্পন্ন কৰা হ'ব পৰিয়ালৰ বৰ্গইবুলি সদৰি কৰে। ঘিলামৰা সমাজ জীৱনৰ বিভিন্ন দল সংগঠনৰ লগত জড়িত হৈ পৰা দল সংগঠন উপৰিও ঘিলামৰা প্ৰেছ ক্লাব, ঘিলামৰা শাখা সাহিত্য সভা, ঘিলামৰা উন্নয়ন সমিতি, ঘিলামৰা ক্ৰীড়া সন্থাৰ, ঘিলামৰা আঞ্চলিক জ্যেষ্ঠ নাগৰিক সন্মিলন, আৰু পেঞ্চনা সন্থাৰ, ঘিলামৰা কেন্দ্ৰীয় ৰঙালী বিহু সন্মিলন, ঘিলামৰা ইংগিত নাট্য গোষ্ঠী, ঘিলামৰা সচেতন নাগৰিক মঞ্চ,ঘিলামৰা আঞ্চলিক ছাত্ৰ সন্থাৰ লগতে অসম জাতীয়তাবাদী যুৱ পৰিষদ লক্ষীমপুৰ জিলা সমিতিৰ সাধাৰণ সম্পাদক টুলটুল ভৰালী আদি য়ে অৱসৰী চিকিৎসক গৰাকী মৃত্যুত গভীৰ শোক প্ৰকাশ কৰিছে আৰু শোক সন্তপ্ত পৰিয়ালৰ বৰ্গ লৈ সমবেদনা জ্ঞাপন কৰিছে। আনহাতে মৃত্যু সময়ত বিশিষ্ট ব্যক্তি গৰাকীয়ে তিনিজন পুত্ৰ সন্তান বোৱাৰী আৰু নাটি নাটিনী আৰু
পৰিয়ালৰ অন্যান্য সকলৰ এৰি যায়।
