14/07/2026
"પ્રકૃતિ એ જ પરમાત્મા" ના દિવ્ય સંકલ્પ સાથે પાટણમાં 'જગન્નાથ પ્રકૃતિ વન'નું ભવ્ય નિર્માણ:
જિલ્લા કલેક્ટરના હસ્તે વૃક્ષારોપણ સાથે શુભારંભ
ભગવાન જગન્નાથજીના પૂજન-આરતી અને પવિત્ર સેવાયજ્ઞમાં પાટણના અગ્રણીઓ તેમજ ધર્મપ્રેમી જનતાની પ્રેરણાદાયી ઉપસ્થિતિ
પાટણ | ૧૪ જુલાઈ
ઐતિહાસિક નગરી પાટણમાં ભગવાન શ્રી જગન્નાથજીની ૧૪૪મી પરંપરાગત પાવન રથયાત્રાના મંગલ અનુસંધાને આજે એક અનોખો અને પર્યાવરણલક્ષી પવિત્ર કાર્યક્રમ ભક્તિસભર વાતાવરણમાં સંપન્ન થયો હતો. "પ્રકૃતિ એ જ પરમાત્મા છે" અને "છોડમાં રણછોડ" ના દિવ્ય સંકલ્પને સાકાર કરવા માટે શ્રી જગન્નાથજી મંદિર ટ્રસ્ટ-પાટણ તથા આર્યવ્રત નિર્માણ ચેરિટેબલ ટ્રસ્ટના સંયુક્ત ઉપક્રમે "જગન્નાથ પ્રકૃતિ વન" ના નિર્માણનો પ્રેરણાદાયી વૃક્ષારોપણ મહાયજ્ઞ યોજાયો હતો.
જિલ્લા કલેક્ટરશ્રીના હસ્તે ઉદ્ઘાટન અને પ્રભુ પૂજન
આ પવિત્ર સેવાયજ્ઞનું ભવ્ય ઉદ્ઘાટન માનનીય પાટણ જિલ્લા કલેક્ટરશ્રીના વરદહસ્તે પ્રથમ વૃક્ષનું વાવેતર કરીને કરવામાં આવ્યું હતું. આ અવસરે કલેક્ટરશ્રીએ પર્યાવરણ જતનની આ અદ્ભુત પહેલને બિરદાવી હતી. વૃક્ષારોપણ પૂર્વે માનનીય કલેક્ટરશ્રીએ જગન્નાથજી મંદિરમાં ભગવાન શ્રી જગન્નાથજીના વિશેષ પૂજન-અર્ચન તેમજ મંગલ આરતીમાં પરમ શ્રદ્ધાપૂર્વક ભાગ લઈ નગરની સુખાકારી અને શાંતિ માટે પ્રાર્થના કરી હતી.
મહાનુભાવો અને સંસ્થાઓની ગરિમામય ઉપસ્થિતિ
આ પાવન પ્રસંગે શ્રી જગન્નાથજી મંદિરના ટ્રસ્ટી અગ્રણી આચાર્ય પિયુષભાઈ તથા ટ્રસ્ટી શ્રી કાંતિભાઈ, રથયાત્રા સમિતિના મોભી અને અગ્રણી આગેવાન શ્રી મયંકભાઈ પટેલ, શ્રી જીતુભાઈ ગુપ્તા, શ્રીમતી માનસીબેન ત્રિવેદી તેમજ જગન્નાથ મંદિરના પૂજારી શ્રી કનુભાઈ મહારાજ વિશેષ રૂપે ઉપસ્થિત રહ્યા હતા. તેમના માર્ગદર્શન હેઠળ ઉપસ્થિત સૌ મહાનુભાવો અને સંગઠનો દ્વારા વિવિધ ઔષધીય અને છાયાપ્રદ વૃક્ષોનું વાવેતર કરવામાં આવ્યું હતું.
આ કાર્યક્રમમાં રથયાત્રા સમિતિના હોદ્દેદારો, કર્મકાંડી બ્રાહ્મણ મંચના ઉત્સાહી કાર્યકરો, સ્થાનિક વહીવટી તંત્રના અધિકારીશ્રીઓ, પદાધિકારીઓ તેમજ બહોળી સંખ્યામાં ધર્મપ્રેમી નગરજનોએ સમયસર ઉપસ્થિત રહીને ઉત્સાહભેર વૃક્ષારોપણ કર્યું હતું.
પ્રકૃતિ સેવા એ જ પ્રભુ સેવા
આ પ્રસંગે ઉપસ્થિત અગ્રણીઓએ જણાવ્યું હતું કે, એક વૃક્ષનું વાવેતર અને ઉછેર એટલે સાક્ષાત્ પ્રકૃતિની સેવા છે, અને પ્રકૃતિની આ સેવા જ ભગવાન શ્રી જગન્નાથજીની સાચી ભક્તિ છે. આજના આ ભગીરથ કાર્યથી નિર્માણ પામનારું 'જગન્નાથ પ્રકૃતિ વન' આગામી સમયમાં પાટણ નગરના પર્યાવરણને શુદ્ધ અને હરિયાળું રાખવામાં મહત્વનું યોગદાન આપશે. સમગ્ર કાર્યક્રમ 'જય જગન્નાથ'ના ભક્તિમય નાદ અને પર્યાવરણના સંકલ્પ સાથે સંપન્ન થયો હતો.
