01/04/2026
ഭൂമി ആനുകൂല്യമല്ല, പാവപ്പെട്ടവൻ്റെ അവകാശമാണ് : കുമ്മനം രാജശേഖരൻ പാവങ്ങളുടെ അത്താണി
പത്തനംതിട്ട: അധികാരത്തിൻ്റെ ശീതളച്ഛായയിൽ രാഷ്ട്രീയക്കാർ അഭിരമിക്കുമ്പോൾ, മണ്ണിൽ പണിയെടുക്കുന്നവനും സ്വന്തമായി ഒരിഞ്ച് ഭൂമിയില്ലാത്തവനും വേണ്ടി പോരാടിയ സമരഭൂമികളുടെ ചരിത്രം ഓർമ്മപ്പെടുത്തി കുമ്മനം രാജശേഖരൻ തിരഞ്ഞെടുപ്പ് പ്രചാരണത്തിൽ. കേരളം കണ്ട ഏറ്റവും വലിയ ഭൂസമരങ്ങളിലൊന്നായ ചെങ്ങറ സമരത്തിൽ പട്ടിണി കിടന്ന പാവങ്ങൾക്കൊപ്പം പാറാവുകാരനായി നിന്ന പഴയ ആ ആക്ടിവിസ്റ്റ് നേതാവിനെ വൈകാരികമായാണ് ആറന്മുളയിലെ വോട്ടർമാർ വരവേൽക്കുന്നത്. വർഷങ്ങൾക്ക് മുൻപ് ചെങ്ങറ ഹാരിസൺ പ്ലാന്റേഷൻ ഭൂമിയിൽ ആയിരക്കണക്കിന് ദളിത്-ആദിവാസി കുടുംബങ്ങൾ കുടിൽ കെട്ടി സമരം തുടങ്ങിയപ്പോൾ, അവരെ ഉപരോധിച്ചും പട്ടിണിക്കിട്ടും തോൽപ്പിക്കാൻ ശ്രമിച്ച ഭരണകൂട സംവിധാനങ്ങളെ വെല്ലുവിളിച്ച് ആദ്യമെത്തിയത് കുമ്മനമായിരുന്നു. അന്ന് സമരഭൂമിയിലേക്ക് ഭക്ഷണമെത്തിക്കാൻ അദ്ദേഹം നടത്തിയ പോരാട്ടം ഇന്നും ആ കുടുംബങ്ങളുടെ മനസ്സിലുണ്ട്. "ഭൂമി ജന്മാവകാശമാണ്, അത് നൽകാൻ സർക്കാർ തയ്യാറാകണം" എന്ന അദ്ദേഹത്തിന്റെ പ്രഖ്യാപനം വെറുമൊരു രാഷ്ട്രീയ മുദ്രാവാക്യമായിരുന്നില്ല, മറിച്ച് ഒരു ജനതയുടെ അതിജീവനമായിരുന്നു.
കേരളത്തിൽ മിച്ചഭൂമി ഇല്ലാത്തതല്ല, മറിച്ച് അത് അർഹരായവർക്ക് വിതരണം ചെയ്യാത്തതാണ് പ്രശ്നമെന്ന് അദ്ദേഹം വാദിക്കുന്നു. ഹാരിസൺ പ്ലാന്റേഷൻ പോലുള്ള വൻകിട കമ്പനികൾ കാലാവധി കഴിഞ്ഞിട്ടും കൈവശം വെച്ചിരിക്കുന്ന ഭൂമി സർക്കാർ പിടിച്ചെടുത്ത് ചെങ്ങറയിലെ സമരക്കാർക്ക് നൽകണമെന്നതായിരുന്നു അദ്ദേഹത്തിൻ്റെ പ്രധാന ആവശ്യം. രാഷ്ട്രീയത്തിനപ്പുറം ഒരു സാമൂഹിക പ്രവർത്തകൻ എന്ന നിലയിലാണ് ചെങ്ങറക്കാർ അദ്ദേഹത്തെ കണ്ടിരുന്നത്. സമര നേതാവ് ളാഹ ഗോപാലനുമായി അദ്ദേഹം അടുത്ത വ്യക്തിബന്ധം പുലർത്തിയിരുന്നു. സമരഭൂമിയിലെ കുടിലുകളിൽ നേരിട്ടെത്തി അവിടുത്തെ ദുരിതാവസ്ഥ പഠിക്കുകയും അത് കേന്ദ്ര സർക്കാരിൻ്റെയും ദേശീയ മനുഷ്യാവകാശ കമ്മീഷൻ്റെയും ശ്രദ്ധയിൽപ്പെടുത്താൻ ശ്രമിക്കുകയും ചെയ്തു. 2009-ൽ വി.എസ്. അച്യുതാനന്ദൻ സർക്കാർ പ്രഖ്യാപിച്ച 'ചെങ്ങറ പാക്കേജ്' വെറും കബളിപ്പിക്കലാണെന്ന് അദ്ദേഹത്തിന്റെ വാദം യാഥാർഥ്യ ബോധമുള്ളതാണ്. പാറപ്പുറത്തും വാസയോഗ്യമല്ലാത്ത ചതുപ്പുനിലങ്ങളിലും ഭൂമി നൽകി പാവപ്പെട്ടവരെ ഒതുക്കാനാണ് സർക്കാർ ശ്രമിക്കുന്നതെന്നും സമരക്കാരെ പുനരധിവസിപ്പിക്കുന്നത് അന്തസ്സുള്ള രീതിയിലായിരിക്കണമെന്ന് അദ്ദേഹം നിരന്തരം ആവശ്യപ്പെട്ടു.
ചെങ്ങറയിൽ പാവപ്പെട്ടവന് വേണ്ടി ശബ്ദമുയർത്തിയ അതേ കുമ്മനം രാജശേഖരൻ ഇന്ന് ആറന്മുളയിൽ വോട്ട് തേടുമ്പോൾ മുന്നോട്ട് വയ്ക്കുന്നത് 'സാമൂഹിക നീതി' എന്ന ആശയമാണ്. നവീൻ ബാബുവിന്റെ കുടുംബത്തെ സന്ദർശിച്ചപ്പോഴും, പാവപ്പെട്ടവന്റെ ഭൂമിക്ക് വേണ്ടി വാദിക്കുമ്പോഴും അദ്ദേഹത്തിന്റെ വാക്കുകളിൽ നിറയുന്നത് അടിച്ചമർത്തപ്പെട്ടവനോടുള്ള ഐക്യദാർഢ്യമാണ്.
"പാവപ്പെട്ടവൻ ഈ മണ്ണിൽ ജനിച്ചവനാണ്, അവന് ഇവിടെ കൃഷി ചെയ്യാനും കിടന്നുറങ്ങാനും സ്വന്തമായൊരിടം വേണം. വൻകിട കമ്പനികൾ അനധികൃതമായി കൈവശം വച്ചിരിക്കുന്ന ഭൂമി പിടിച്ചെടുത്ത് ഭൂരഹിതർക്ക് വിതരണം ചെയ്യുക എന്നതാണ് യഥാർത്ഥ സാമൂഹിക നീതി എന്നതാണ് കുമ്മനം രാജശേഖരന്റെ എക്കാലത്തെയും വാദം. ചെങ്ങറ മുതൽ നവീൻ ബാബുവിന്റെ മരണം വരെയുള്ള സംഭവങ്ങൾ വിരൽ ചൂണ്ടുന്നത് ഈ വ്യവസ്ഥിതിയുടെ ജീർണ്ണതയിലേക്കാണ്."
തിരഞ്ഞെടുപ്പ് ചൂടിലും വോട്ടിനുപരിയായി താൻ എന്നും നിലകൊണ്ട ജനവിഭാഗങ്ങളുടെ നീതിക്ക് വേണ്ടി നിലകൊള്ളുന്ന കുമ്മനം രാജശേഖരൻ, ആറന്മുളയുടെ മണ്ണിൽ ഒരു പുതിയ മാറ്റത്തിനായുള്ള പോരാട്ടത്തിലാണ്. പാവപ്പെട്ടവന്റെ കണ്ണീരൊപ്പുന്ന, മണ്ണും മനുഷ്യനും ഒന്നാകുന്ന വികസന കാഴ്ചപ്പാടാണ് അദ്ദേഹത്തിന്റെ കരുത്ത്.
Aranmula
