02/04/2020
ਸਿੱਖ ਪੰਥ ਦੇ ਸਿਰਮੌਰ ਤੇ ਚੂੜਾਮਣੀ ਕੀਰਤਨੀਏ, ਭਾਈ ਨਿਰਮਲ ਸਿੰਘ ਖਾਲਸਾ ਦੇ ਅਕਾਲ ਚਲਾਣੇ ਦੀ ਸਦਮੇ ਭਰੀ ਖ਼ਬਰ ਨੇ ਸਮੁੱਚੀ ਸਿੱਖ ਕੌਮ ਨੂੰ ਗੰਭੀਰ ਰੂਪ ਵਿੱਚ ਪਰਭਾਵਿਤ ਕੀਤਾ ਹੈ। ਸ੍ਰੀ ਦਰਬਾਰ ਸਾਹਿਬ ਦੇ ਸਾਬਕਾ ਹਜ਼ੂਰੀ ਰਾਗੀ ਭਾਈ ਨਿਰਮਲ ਸਿੰਘ , ਵਿਸ਼ਵ ਪ੍ਰਸਿੱਧ ਗਾਇਕ ਜਨਾਬ ਗੁਲਾਮ ਅਲੀ ਸਾਹਿਬ ਦੇ ਸ਼ਾਗਿਰਦ ਸਨ। ਉਨ੍ਹਾਂ ਨੂੰ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਿੱਚ ਨਿਰਧਾਰਤ ਸਮੂਹ ਰਾਗਾਂ ਦੀ ਵਿਧਾ ਅਨੁਸਾਰ, ਗੁਰਬਣੀ ਦਾ ਕੀਰਤਨ ਕਰਨ ਉੱਤੇ ਕਮਾਲ ਦੀ ਮੁਹਾਰਤ ਹਾਸਲ ਸੀ।ਇੰਜ ਜਾਪਦਾ ਸੀ ਜਿਵੇਂ ਸਿਰਜਨਹਾਰ ਨੇ , ਉਨ੍ਹਾਂ ਦੇ ਗਲੇ ਨੂੰ ਸਪਤਕ ਨਾਲ ਨਿਵਾਜ ਕੇ ਹੀ, ਸੰਸਾਰ ਵਿੱਚ ਕੇਵਲ 'ਸ਼ਬਦ ਕੀਰਤਨ' ਦੀ ਰਿਆਜ਼ਤ ਕਰਨ ਅਤੇ ਇਸੇ ਸ਼ਰੀਣੀ ਨੂੰ ਪੂਰੇ ਸੰਸਾਰ ਵਿੱਚ ਵੰਡਣ ਲਈ ਭੇਜਿਆ ਸੀ। ਉਨ੍ਹਾਂ ਦੇ ਮੁਖਾਰਬਿੰਦ ਤੋਂ ਸ਼ਬਦ ਕੀਰਤਨ ਸ਼੍ਰਵਣ ਕਰਨ ਦਾ ਇੱਕ ਆਪਣਾ ਹੀ ਵਿਸਮਾਦੀ ਅਨੰਦ ਸੀ। ਇਸੇ ਕਾਰਨ ਦੇਸ਼-ਵਿਦੇਸ਼ ਵੱਸਦੇ, ਸਮੁੱਚੇ ਸਿੱਖ ਭਾਈਚਾਰੇ ਦੇ ਉਹ ਬੇਹਦ ਪਸੰਦੀਦਾ ਰਾਗੀ ਸਨ। ਬੜੇ ਦੁੱਖ ਦੀ ਗੱਲ ਹੈ ਕਿ ਅੱਜ ਸਮੁੱਚਾ ਸਿੱਖ ਜਗਤ, ਗੁਰੂ ਰਾਮ ਦਾਸ ਪਾਤਸ਼ਾਹ ਦੇ ਇਸ ਦਰਬਾਰੀ ਰਾਗੀ, ਪਦਮ ਸ਼੍ਰੀ, ਭਾਈ ਨਿਰਮਲ ਸਿੰਘ ਜੀ ਖਾਲਸਾ ਦੀ ਸੁਰੀਲੀ ਆਵਾਜ਼ ਰਾਹੀ ਸ਼ਬਦ ਕੀਰਤਨ ਦੀ ਪ੍ਰਸਤੁਤੀ ਦੇ ਅਨੰਦ ਤੋਂ ਸਦੈਵ ਕਾਲ ਲਈ ਮਹਿਰੂਮ ਹੋ ਗਿਆ ਹੈ। ਕਦੇ ਚਿੱਤ-ਚੇਤਿਆਂ ਵਿੱਚ ਵੀ ਨਹੀਂ ਸੀ ਸੋਚਿਆ ਕਿ ਸਿੱਖ ਕੌਮ ਦੇ ਵਡਮੁੱਲੇ ਹੀਰੇ ਤੇ ਮਹਾਨ ਕੀਰਤਨੀਏ ਵੀ, ਇਸ ਨਾਮੁਰਾਦ ਕਰੋਨਾ-ਵਾਇਰਸ ਦੀ ਮਹਾਂਮਾਰੀ ਦੀ ਭੇਂਟ ਚੜ੍ਹ ਜਾਣਗੇ, ਪਰ ਸ਼ਾਇਦ ਵਾਹਿਗੁਰੂ ਨੂੰ ਇੰਜ ਹੀ ਮਨਜ਼ੂਰ ਸੀ, ਉਸ ਦੀ ਰਜ਼ਾ ਅੱਗੇ ਕਿਸੇ ਦਾ ਕੀ ਜ਼ੋਰ ? ਵਾਹਿਗੁਰੂ ਉਨ੍ਹਾਂ ਦੀ ਰੂਹ ਨੂੰ ਸਦੀਵਤਾ ਦੀ ਗੋਦ ਵਿੱਚ ਆਰਾਮ ਬਖਸ਼ਣ ਅਤੇ ਸਮੁੱਚੀ ਸਿੱਖ ਕੌੰਮ ਅਤੇ ਭਾਈ ਸਾਹਿਬ ਭਾਈ ਨਿਰਮਲ ਸਿੰਘ ਖਾਲਸਾ ਜੀ ਦੇ ਸਮੂਹ ਪਰਿਵਾਰ ਤੇ ਸੰਗੀਆਂ-ਸਾਥੀਆਂ ਨੂੰ ਭਾਣਾ ਮੰਨਣ ਦੀ ਬਲ-ਬੁੱਧੀ ਬਖਸ਼ਿਸ਼ ਕਰਨ।
ਬੀਰ ਦਵਿੰਦਰ ਸਿੰਘ
ਸਾਬਕਾ ਡਿਪਟੀ ਸਪੀਕਰ
