14/07/2025
എറണാകുളം ജില്ലാ നാലമ്പല ദർശനത്തിനായി ദാശരഥീ ക്ഷേത്രങ്ങൾ ഒരുങ്ങി...
പിറവം: കർക്കിടകത്തിലെ നാലമ്പല തീർത്ഥാടനത്തിനായി ദാശരഥീ ക്ഷേത്രങ്ങൾ ഒരുങ്ങി.
രാമായണ പുണ്യവുമായി വീണ്ടുമൊരു കർക്കിടകം കടന്നു വരുന്നു. 41 ദിവസം ഭജനവും, ഗണപതി ഹോമവും, സുദർശന ഹോമവും, ഭഗവതി സേവയും ചില സ്ഥലങ്ങളിൽ ശ്രീചക്ര പൂജയും ചണ്ഡികാഹോമവും രാമായണ പാരായണവും ഈ മാസത്തിൽ നിറഞ്ഞു നിൽക്കുന്നു.
എറണാകുളം ജില്ലയിലെ നാലമ്പലങ്ങളില്‍ കര്‍ക്കടക പുലരികളില്‍ ഭക്ത ജനങ്ങളേകൊണ്ട് നിറയും.
ദശരഥ പുത്രന്മാരായ ശ്രീരാമൻ, ഭരതൻ, ലക്ഷ്മണൻ, ശത്രുഘ്നൻ എന്നിവരുടെ ക്ഷേത്രങ്ങൾ കർക്കിടക മാസത്തിൽ ഒരേ ദിവസം സന്ദർശിക്കുന്നത് പുണ്യമായാണ് ഭക്തർ കരുതുന്നത്. ത്രേതായുഗത്തില്‍ മനുഷ്യര്‍ക്കുവേണ്ടി മനുഷ്യരായി അവതരിച്ച നാല് മാതൃകാ സഹോദരന്മാരെയും അവര്‍ ജനിച്ച അതേ ക്രമത്തില്‍ തന്നെ അവരവരുടെ ക്ഷേത്ര സങ്കേതങ്ങളില്‍ പോയി ദര്‍ശനം നടത്തുന്നതാണ് നാലമ്പല തീര്‍ത്ഥയാത്ര.
മാമലശ്ശേരി ശ്രീരാമസ്വാമി ക്ഷേത്രം, മേമ്മുറി ശ്രീഭരത സ്വാമി ക്ഷേത്രം,
മുളക്കുളം ശ്രീലക്ഷമണ സ്വാമി ക്ഷേത്രം, മാമ്മലശ്ശേരി നെടുങ്ങാട്ട് ശ്രീശത്രുഘ്ന സ്വാമി ക്ഷേത്രം എന്നീ ക്രമത്തില്‍ ദര്‍ശനം നടത്തി അവസാനം മാമ്മലശ്ശേരി ശ്രീരാമസ്വാമി ക്ഷേത്രത്തില്‍ തന്നെ തിരിച്ചെത്തി നാലമ്പലദര്‍ശനചക്രം പൂര്‍ത്തിയാക്കുന്ന വിധമാണ് ക്ഷേത്രങ്ങളില്‍ സജ്ജീകരണങ്ങള്‍ ഒരുക്കിയിട്ടുള്ളത്.
നാലമ്പലം ദര്‍ശനം ഒരേ ദിവസം ഉച്ചപൂജയ്ക്കു മുമ്പ് പൂര്‍ത്തിയാക്കുന്നത് ദോഷ പരിഹാരത്തിനും ഇഷ്ടസന്താന ലബ്ദിക്കും ഉത്തമമാണെന്നാണ് വിശ്വാസം.
ജൂലൈ 17 മുതൽ ആഗസ്റ് 16 വരെയാണ് ഈ വർഷത്തെ തീര്‍ത്ഥാടന കാലം. എറണാകുളം ജില്ലാനാലമ്പല തീർത്ഥാടന സമിതിയുടെയും തിരുവിതാംകൂർ ദേവസ്വ൦ ബോർഡിന്റെയും സഹകരണത്തോടെ 16 ന് ബുധനാഴ്‌ച വൈകിട്ട് 6 ന് മാമ്മലശ്ശേരി ശ്രീരാമസ്വാമി ക്ഷേത്രാങ്കണത്തില്‍ നടക്കുന്ന നാലമ്പല തീര്‍ത്ഥാടന സമാരംഭ സമ്മേളനം പന്തളം കൊട്ടാരം നിർവാഹക സംഘം മുൻ കാര്യദർശിയും ശബരിമല അയ്യപ്പസേവാസമാജം സംസ്ഥാന പ്രസിഡന്റുമായ പുണർതം തിരുനാൾ നാരായണ വർമ്മ ഉദ്ഘാടനം ചെയ്യും. നാലമ്പലസമിതി പ്രസിഡന്റ് എൻ. രഘുനാഥ് അധ്യക്ഷത വാഹിക്കും. തന്ത്രി ബ്രഹ്മശ്രീ മനയത്താറ്റ് അനിൽ ദിവാകരൻ നമ്പൂതിരി നാലമ്പല സന്ദേശം നൽകും. ക്ഷേത്രം മേൽശാന്തി ബ്രഹ്മശ്രീ അരുൺ ശർമ്മൻ അനുഗ്രഹ പ്രഭാഷണം നടത്തും. മുൻ ഡി.ജി.പി ഡോ.അലക്‌സാണ്ടർ ജേക്കബ് മുഖ്യ പ്രഭാഷണം നടത്തും.
പിറവം നഗരസഭാ ചെയർപേഴ്സൺ അഡ്വ. ജൂലി സാബു, രാമമംഗലം ഗ്രാമപഞ്ചായത്ത് പ്രസിഡന്റ് പി.വി സ്റ്റീഫൻ, പാമ്പാക്കുട ഗ്രാമപഞ്ചായത്ത് പ്രസിഡന്റ് ശ്രീകാന്ത് നന്ദനൻ, മുളക്കുളം ഗ്രാമപഞ്ചായത്ത് പ്രസിഡന്റ് വാസുദേവൻ നായർ, നാലമ്പലസമിതി സെക്രട്ടറി പി.പി സുരേഷ് കുമാർ, നാലമ്പലസമിതി ട്രഷറർ ഇ.കെ മോഹൻ, നെടുങ്ങാട്ട് ശ്രീ ശത്രുഘ്‌ന സ്വാമി ക്ഷേത്രം ട്രസ്റ്റ് പ്രസിഡന്റ് കെ.എസ്. ജയപ്രകാശ് തുടങ്ങിയവർ പങ്കെടുക്കും. കർക്കിടക മാസം പുണ്യദിനങ്ങളാക്കുന്ന നാലമ്പല തീർഥാടനത്തിനു ഒരുക്കങ്ങൾ പൂർത്തിയായതായി നാലമ്പല ദർശന സമിതി ഭാരവാഹികൾ അറിയിച്ചു.
അന്വേഷണങ്ങൾക്ക്
നാലമ്പലസമിതി
പ്രസിഡന്റ് എൻ. രഘുനാഥ്
9301823282
സെക്രട്ടറി പി.പി സുരേഷ് കുമാർ
9605366121
ട്രഷറർ ഇ.കെ മോഹൻ മാമ്മലശ്ശേരി
9806604636
