جامعہ محمدیہ قاسم العلوم. Jamia Mohammadia Qasim Ul Uloom

13/05/2025

السلام علیکم ورحمتہ اللہ وبرکاتہ
اعلان
جمیع طلباء جامعہ ہذا کو اطلاع دی جاتی ہیکہ ہے حالیہ کشیدگی کی وجہ سے جو تعطیلات کی گئی تھیں، اب حالات بہتر ہونے کی وجہ سے تعطیلات ختم ہو چکیں ہیں
فلہذا تمام طلباء 16 مئ 2025 جمعہ شام تک جامعہ میں حاضر ہوجائیں،
بعد گزرنے میعاد مقررہ تادیبی کاروائی عمل میں لائی جاسکتی ہے،
والسلام

12/05/2025

07/05/2025

جامعہ ضیاء العلوم پونچھ کے شعبۂ حفظ وقرأت کے موقر استاذ،اورقاری فاروق احمد صاحب استاذ جامعہ محمدیہ قاسم العلوم کے برادر مکرم،ساکن بائیلہ آج جامِ شہادت نوش فرما گئے - انا لله وانا اليه راجعون۔

مرحوم صالح، حلیم الطبع شخصیت کے مالک تھے - سرحدی کشیدگی کے موقع پر گولہ باری کے دوران شدید زخمی ہوئے اور اسی اثناء میں اللہ کو پیارے ہو گئے -

جامعہ محمدیہ قاسم العلوم سہڑی خواجہ کےجمیع اساتذۂ کرام وملازمین مرحوم کےخاندان کے ساتھ اظہار تعزیت کرتے ہوئے دعا گو ہیں کہ اللہ پاک مرحوم کی بال بال مغفرت فرمائے اور جنت الفردوس میں اعلیٰ مقام عطا فرمائے آمین،

05/05/2025

عہد ساز شخصیت ،مولانا غلام محمد وستانوی کا انتقال
دینی و علمی حلقوں میں غم کی لہر، سوگواروں کی موجودگی میں دیر شب مکرانی گاؤں قبرستان میں خادم قرآن کی تدفین
اکل کوا۔۴؍ مئی: (نمائندہ خصوصی) جامعہ اشاعت العلوم، اکل کوا (مہاراشٹر) کے بانی، دارالعلوم دیوبند کے سابق مہتمم، ممتاز عالم دین اور متعدد تعلیمی و فلاحی اداروں کے سرپرست، خادم قرآن حضرت مولانا غلام محمد وستانوی طویل علالت کے بعد اتوار کو ۷۵ برس کی عمر میں دارِ فانی سے کوچ کرگئے۔ انا للہ وانا الیہ راجعون۔ مولانا مرحوم کی نمازِ جنازہ انہی کے قائم کردہ ادارے، جامعہ اشاعت العلوم میں اتوار کی شب ساڑھے بارہ بجے ادا کی گئی، جس میں ہزاروں افراد نے شرکت کی۔ تدفین مکرانی گاؤں قبرستان میں ہوئی۔ وہ دو صاحبزادگان مولانا حذیفہ وستانوی (موجودہ مہتمم جامعہ اشاعت العلوم) اور مولانا اویس وستانوی کو سوگوار چھوڑ گئے۔ ان کے تیسرے بیٹے مولانا سعید وستانوی کا انتقال دو سال قبل ہو چکا تھا۔ مولانا وستانوی کا شمار ملک کے اُن چند بااثر علما میں ہوتا ہے جنہوں نے دینی و عصری تعلیم کو یکجا کر کے نئی نسل کے لیے ہمہ گیر ترقی کا دروازہ کھولا۔ انھوں نے ۱۹۷۹ میں مہاراشٹر کے اکل کوا گاؤں میں جامعہ اشاعت العلوم کا آغاز ایک چھوٹے سے مکتب سے کیا تھا، جو آج ایک عظیم الشان تعلیمی، تربیتی و فلاحی ادارہ بن چکا ہے۔ اس کے تحت دینی مدارس، اسکول، بی ایڈ، ڈی ایڈ کالج، انجینئرنگ، فارمیسی اور ایم بی بی ایس کالج جیسے عصری ادارے بھی کامیابی کے ساتھ چل رہے ہیں۔ جامعہ اشاعت العلوم کا میڈیکل کالج مہاراشٹر کا پہلا مسلم اقلیتی ایم بی بی ایس کالج ہے جو میڈیکل کونسل آف انڈیا سے منظور شدہ ہے۔ مولانا غلام محمد وستانوی یکم جون ۱۹۵۰کو کوساڑی، ضلع سورت، گجرات میں پیدا ہوئے۔ ۱۹۵۲ ء یا۱۹۵۳ء میں ان کا خاندان وستان منتقل ہوا، جس کی طرف نسبت کرتے ہوئے وہ وستانوی لکھا کرتے تھے، مولانا وستانوی نے ابتدائی تعلیم اپنے وطن گجرات میں حاصل کی۔ بعد ازاں دارالعلوم فلاح دارین، ترکیسر سے فضیلت کی سند حاصل کی اور مظاہر العلوم سہارنپور میں تخصص کیا۔ ان کا تعلق حضرت مولانا زکریا کاندھلویؒ اور حضرت مولانا قاری صدیق باندویؒ جیسے اکابر سے رہا۔ انہوں نے سلوک و احسان، اصلاح معاشرہ، تعلیم و تربیت، تبلیغ دین اور رفاہِ عامہ کے میدان میں گراں قدر خدمات انجام دیں۔ مولانا وستانوی کو ۱۹۹۸میں دارالعلوم دیوبند کی مجلسِ شوریٰ کا رکن منتخب کیا گیا، حضرت مولانا مرغوب الرحمان کے وصال کے بعد مہتمم کے عہدے پر بھی فائز ہوئے، مگر چند اسباب کی بنا پر انہیں جلد ہی مستعفی ہونا پڑا، لیکن تادم حیات شوری کے رکن رہے۔ دیوبند جیسا عالمی ادارہ ان کی علمی و انتظامی صلاحیتوں کا ہمیشہ معترف رہا۔مرحوم کا قرآن کریم سے خاص شغف تھا۔ انہوں نے قرآن فاؤنڈیشن، مسابقہ حفظ قرآن، قرآنی مکاتب اور دیگر کئی منصوبوں کے ذریعہ ملک بھر میں قرآنی تعلیم کے فروغ کو یقینی بنانے میں اہم کردار ادا کیا۔ ان کے ذریعہ قائم کیے گئے مکاتب و مدارس، خاص طور پر پسماندہ و قبائلی علاقوں میں علم کی روشنی پھیلانے کا ذریعہ بنے۔ مولانا غلام محمد وستانوی کی وفات پر ملک بھر کے علمی، دینی اور ملی حلقوں میں گہرے رنج و غم کا اظہار کیا گیا ہے۔ دارالعلوم دیوبند کے مہتمم مولانا مفتی ابوالقاسم نعمانی، صدرجمعیۃ مولانا سید ارشد مدنی، مہتمم دارالعلوم وقف مولانا سفیان قاسمی، آل انڈیا ملی کونسل، جمعیۃ علماء ہند ، جماعت اسلامی سمیت کئی اداروں اور شخصیات نے ان کی وفات کو ملت کا عظیم نقصان قرار دیا ہے۔ مرحوم کی دینی و تعلیمی خدمات کو ہمیشہ یاد رکھا جائے گا۔ وہ ایک ایسی شخصیت تھے جنہوں نے علم، عمل، اخلاص اور امت کی اصلاح کو اپنی زندگی کا مشن بنایا۔ ان کی وفات سے جو خلا پیدا ہوا ہے، اسے پُر کرنا آسان نہ ہوگا۔اس دکھ کی گھڑی میں
آج بروز پیر 06 ذوالقعدہ 1446ھجری بمطابق 05 مئ 2025 ء کو، جامعہ ہذامیں حضرت مولانا غلام محمد وستانوی رح کی وفات پر تعزیتی نشست اور قرآن خانی کی مجلس قائم کی گئی،
اس نسشت میں ابناۓ جامعہ اسلامیہ اشاعت العلوم اکل کوا اور ابناۓجامعہ ہذا ودیگر مؤقر شخصیات اساتذہ وطلباء جامعہ ہذا نے کثیر تعداد میں شرکت کی اور قرآن خانی کے بعد بعض حضرات نے اپنے تعزیتی کلام اور مرثیہ پیش کیا۔
اللہ تعالیٰ حضرت کی مغفرت فرمائے اور پسماندگان کو صبر جمیل عطا فرمائے اور ان کا نعم البدل عطا فرمائے

05/05/2025

*ایک عہد ساز عالم کا سانحہ ارتحال*
(حضرت مولانا غلام محمد وستانوی رحمۃ اللّٰہ علیہ)

علم و عمل، اخلاص و للہیت، دینی حمیت اور تعلیمی بیداری کا پیکر، حضرت مولانا غلام محمد وستانویؒ اس دنیاے فانی سے رخصت ہوگئے۔

*انا للّٰہ وانا الیہ راجعون*

یہ سانحہ نہ صرف علمی و دینی حلقوں کے لیے ایک بڑا صدمہ ہے بلکہ پوری ملت اسلامیہ ہندیہ کے لیے ناقابلِ تلافی نقصان ہے۔ ایسے افراد صدیوں میں پیدا ہوتے ہیں جو قوموں کے فکری اور تعلیمی مزاج کی تشکیل میں اپنا کردار ادا کرتے ہیں۔

حضرت مولانا غلام محمد وستانویؒ نے جامعہ فلاح دارین ترکیسی اور ہندوستان کی مشہور دینی درس گاہ مظاہر العلوم سہارنپور سے تعلیم حاصل کی۔ آپ کے اندر عزم و حوصلہ، علم کی گہرائی، فکر کی پختگی، اور عمل کی سچائی نمایاں تھی۔ وہ ان افراد میں شامل تھے جنہوں نے نہ صرف قال اللہ و قال الرسول کی صدائیں بلند کیں، بلکہ قوم کو عملی میدان میں ترقی کے راستے پر بھی گامزن کیا۔

1980 میں آپ نے جامعہ اسلامیہ اکل کوا کی بنیاد رکھی، جو بیک وقت دینی و عصری تعلیم کا حسین امتزاج ہے۔ اس ادارے کے زیر سایہ آج ہزاروں طلبہ تعلیم و تربیت حاصل کر رہے ہیں۔ یہ ادارہ محض ایک جامعہ نہیں بلکہ ایک تحریک ہے، جو مولانا کی دینی بصیرت، تعلیمی شعور اور عملی تدبیر کی زندہ علامت ہے۔

آپ نے وقت کی نزاکت کو سمجھتے ہوئے نہ صرف دینی مدارس قائم کیے بلکہ عصری تعلیمی ادارے بھی قائم کیے، جن میں ایم بی بی ایس کالج، بی یو ایم ایس، انجینئرنگ، فارمیسی، بی ایڈ اور ڈی ایڈ، پالی ٹیکنیک، آئی ٹی آئی کالج شامل ہیں۔ یہ سب ادارے قوم کو اس بات کا پیغام دیتے ہیں کہ دینی حمیت اور عصری فہم کا امتزاج ہی ترقی کا راستہ ہے۔

دارالعلوم دیوبند کی مجلس شوریٰ میں آپ کی شمولیت اور کچھ وقت کے لیے دارالعلوم دیوبند کے اہتمام کے منصب پر فائز ہونا، اس بات کی دلیل ہے کہ آپ کو نہ صرف قومی بلکہ بین الاقوامی سطح پر بھی اعتماد اور احترام حاصل تھا۔

حضرت مولانا غلام محمد وستانویؒ کی وفات ایک ایسے درخت کے گرنے کے مترادف ہے جس کی چھاؤں میں نسلیں پروان چڑھتی تھیں۔ آج لاکھوں لوگ ان کے لیے دعائیں کر رہے ہیں اور ان کی خدمات کو خراجِ عقیدت پیش کر رہے ہیں۔

ہم حضرت مولانا کے اہل خانہ، تلامذہ، متعلقین سے تعزیت کا اظہار کرتے ہیں، اور بارگاہِ ایزدی میں دعا گو ہیں کہ:

*اللہ تعالیٰ مرحوم کی مغفرت فرمائے، ان کے درجات بلند کرے، اور ان کے چھوڑے ہوئے تعلیمی اداروں کو تا دیر قائم و دائم رکھے۔ آمین۔*

*آسماں تیری لحد پر شبنم افشانی کرے