22/08/2026
നോട്ടുകെട്ട് കണ്ടെത്തി നഗരസഭയിൽ ഏൽപ്പിച്ച ഹരിതകർമസേനാംഗത്തിന് ആദരം
പുനലൂർ: നഗരസഭാ കോമ്പൗണ്ടിൽ നിന്ന് 37,500 രൂപയുടെ നോട്ടുകെട്ട് കണ്ടെത്തി നഗരസഭാ അധികൃതരെ ഏൽപ്പിച്ച പുനലൂർ നഗരസഭയിലെ താമരപ്പള്ളി വാർഡിലെ ഹരിതകർമസേനാംഗം യമുനയെ സിപിഐ പുനലൂർ ഈസ്റ്റ് ലോക്കൽ കമ്മിറ്റിയുടെ നേതൃത്വത്തിൽ ആദരിച്ചു.
ജോലിയുടെ ഭാഗമായി നഗരസഭാ കോമ്പൗണ്ടിലെത്തിയപ്പോഴാണ് യമുനയ്ക്ക് പണം ലഭിച്ചത്. സാമ്പത്തിക ബുദ്ധിമുട്ടുകൾക്കിടയിലും ലഭിച്ച പണം സ്വന്തമാക്കാതെ അധികൃതരെ ഏൽപ്പിച്ച യമുനയുടെ സത്യസന്ധത മാതൃകാപരമാണെന്ന് ചടങ്ങിൽ പങ്കെടുത്തവർ പറഞ്ഞു.
പുനലൂർ എംഎൽഎ സി. അജയ പ്രസാദും സിപിഐ സംസ്ഥാന കൗൺസിൽ അംഗം അഡ്വ. കെ. രാജുവും ചേർന്നാണ് യമുനയെ ആദരിച്ചത്. സിപിഐ പുനലൂർ മണ്ഡലം സെക്രട്ടറി വി.പി. ഉണ്ണികൃഷ്ണൻ, ഈസ്റ്റ് ലോക്കൽ കമ്മിറ്റി സെക്രട്ടറി വിഷ്ണുദേവ് വി., നഗരസഭാ കൗൺസിലർ റാണി ജേക്കബ്, എബ്രഹാം ഡി. എന്നിവർ സംസാരിച്ചു.
