24/04/2026
ଜଗତସିଂହପୁର ଜିଲ୍ଲା ସଦର ଥାନା କାଠିଆପଡ଼ା ଅଞ୍ଚଳର ଯୁବତୀ ସସ୍ମିତା ଦାସଙ୍କ ହତ୍ୟା ଘଟଣାର ମୁଖ୍ୟ ଅଭିଯୁକ୍ତ ସୂର୍ଯ୍ୟକାନ୍ତ ସ୍ୱାଇଁ ଓରଫ ପୁପୁକୁ ଗିରଫ କରିଛି ପୁଲିସ। ବୁଧବାର ରାତିରେ ତାଙ୍କୁ ଜାମସେଦପୁରରୁ ଗିରଫ କରିଛି ଜଗତସିଂହପୁର ପୁଲିସର ସ୍ପେଶାଲ ସ୍କ୍ୱାଡ୍।
ସୂର୍ଯ୍ୟକାନ୍ତ ସ୍ୱାଇଁ ଓରଫ ପୁପୁ ହେଉଛନ୍ତି ସସ୍ମିତାଙ୍କ ପ୍ରେମିକ। ତାଙ୍କ ଘର କୁଳ ମୁଣ୍ଡିଲୋ ଗାଁରେ। ସୂଚନା ଅନୁଯାୟୀ, ସୂର୍ଯ୍ୟକାନ୍ତ ଜଣେ ବିବାହିତ ବ୍ୟକ୍ତି। ତାଙ୍କର ୪ ଜଣ ସନ୍ତାନ ଅଛନ୍ତି। ତଥାପି ସସ୍ମିତାଙ୍କ ସହିତ ତାଙ୍କର ପ୍ରେମ ସଂପର୍କ ଗଢ଼ି ଉଠିଥିଲା।
ସୂର୍ଯ୍ୟକାନ୍ତ ପ୍ରାୟ ପ୍ରତିଦିନ ସସ୍ମିତାଙ୍କ ଘରକୁ ଆସୁଥିଲେ। ସେଠାରେ ରହୁଥିଲେ ମଧ୍ୟ। ସେ ସସ୍ମିତାଙ୍କୁ ଅନେକ ଉପହାର ଦେଇଥିଲେ। ତାଙ୍କ ନାଁରେ ଜମି ମଧ୍ୟ କିଣି ଥିଲେ। ପରବର୍ତ୍ତୀ ସମୟରେ ତାଙ୍କର ପରକୀୟା ପ୍ରୀତି ଧରାପଡ଼ିଯାଇଥିଲା। ତାଙ୍କ ସ୍ତ୍ରୀ ଏ ସଂପର୍କରେ ଜାଣିବା ପରେ ସସ୍ମିତାଙ୍କୁ ଗାଳିଗୁଲଜ କରିଥିଲେ। କଥା ଥାନା ପର୍ଯ୍ୟନ୍ତ ଯାଇଥିଲା। ଏସବୁ ଘଟଣାକୁ ନେଇ ସୂର୍ଯ୍ୟକାନ୍ତଙ୍କଠାରୁ ଦୂରେଇ ଅନ୍ୟତ୍ର ବିବାହ କରିବାକୁ ସ୍ଥିର କରିଥିଲେ ସସ୍ମିତା।
ସୂଚନା ଅନୁଯାୟୀ, ସସ୍ମିତାଙ୍କ ଏହି ନିଷ୍ପତ୍ତିରେ ଖୁସି ନଥିଲେ ସୂର୍ଯ୍ୟକାନ୍ତ। ସେଥିପାଇଁ ସେ ସସ୍ମିତାଙ୍କୁ ଦେଇଥିବା ସମସ୍ତ ଜିନିଷ ଫେରାଇ ଦେବାକୁ କହିଥିଲେ। ଏମିତିକି ତାଙ୍କ ନାଁରେ କିଣି ଥିବା ଜମିର ମାଲିକାନା ମଧ୍ୟ ବଦଳାଇ ଦେଇଥିଲେ।
ସସ୍ମିତାଙ୍କ ମା’ ଗତକାଲି କହିଥିଲେ ଯେ ତାଙ୍କ ଝିଅର ନିଷ୍ପତ୍ତିରେ ସୂର୍ଯ୍ୟକାନ୍ତଙ୍କ ସହମତି ଥିଲା। କିନ୍ତୁ ସୂର୍ଯ୍ୟକାନ୍ତ ଉପରକୁ ସେହିଭଳି ବ୍ୟବହାର କରୁଥିବା ବେଳେ ଭିତରେ ଭିତରେ ରାଗି ନିଆଁ ହୋଇଯାଇଥିଲା।
ଏପ୍ରିଲ ୧୯ ତାରିଖରେ ସସ୍ମିତାଙ୍କର ନିର୍ବନ୍ଧ ହୋଇଥିଲା। ଏପ୍ରିଲ ୨୦ ତାରିଖ ସନ୍ଧ୍ୟାରେ ସୂର୍ଯ୍ୟକାନ୍ତ ଫୋନ୍ କରି ସସ୍ମିତାଙ୍କୁ ଡାକିଥିଲା। ଗାଁ ନିକଟସ୍ଥ ମୁଗ ବିଲରେ ସେ ସସ୍ମିତାଙ୍କୁ ଗଳା କାଟି ହତ୍ୟା କରିଥିଲା ବୋଲି ଜଣାପଡ଼ିଛି।
ସୂର୍ଯ୍ୟକାନ୍ତଙ୍କୁ ଗିରଫ କରାଯାଇଥିବା ବେଳେ ତାଙ୍କ ସହିତ ଆଉ କେହି ଥିଲେ କି ନାହିଁ, ସେ ନେଇ ପୁଲିସ ତଦନ୍ତ କରୁଛି। ଆଜି ସନ୍ଧ୍ୟାରେ ଜଗତସିଂହପୁର ଏସ୍ପି ଏକ ସାମ୍ବାଦିକ ସମ୍ମିଳନୀ କରିବେ। ସେଥିରେ ପୂରା ଘଟଣା ସ୍ପଷ୍ଟ ହୋଇଯିବ।
