12/08/2025
୧୨ ଅଗଷ୍ଟ, ୨୦୨୫ : ‘ଆଜି ସତ୍ୟବାଦୀ ଦିବସ’
୧୧୬ ବର୍ଷ ତଳେ ଗୁପ୍ତବୃନ୍ଦାବନ ନାମରେ ନାମିତ ସାକ୍ଷୀଗୋପୀନାଥଙ୍କ ଉପାସନା ପୀଠ ନିକଟସ୍ଥ ଛୁରିଅନା ବକୁଳବନରେ ଏହି ତାରିଖରେ ପ୍ରତିଷ୍ଠା ହୋଇଥିଲା ସତ୍ୟବାଦୀ ବନବିଦ୍ୟାଳୟ । ଏହା ଥିଲା ବ୍ୟକ୍ତିରୁ ଓଡ଼ିଆ ଜାତି ନିର୍ମାଣର ଅଭିନବ ଶିକ୍ଷାନୁଷ୍ଠାନ । ପୁଣ୍ୟାତ୍ମା ଗୋପବନ୍ଧୁ, ନୀଳକଣ୍ଠ, ଗୋଦାବରୀଶ ପ୍ରମୁଖଙ୍କ ଅକ୍ଳାନ୍ତ ଉଦ୍ୟମରେ ଫଳବତୀ ହୋଇଥିଲା ଜାତୀୟ ଆକାଂକ୍ଷା । ଆଜି ବକୁଳବନ ଅଛି କିନ୍ତୁ ଅବଲୁପ୍ତ ବନବିଦ୍ୟାଳୟ । ସେହି ସ୍ମୃତିରେ ଏବେ ଗଢି ଉଠିଛି ଓଡ଼ିଆ ବିଶ୍ୱବିଦ୍ୟାଳୟ । ବନବିଦ୍ୟାଳୟର ସ୍ମୃତି, ପଞ୍ଚସଖାଙ୍କ ସାଧନା, ସାହିତ୍ୟ ଓ ସଂସ୍କୃତି ଉପରେ ଚର୍ଚ୍ଚା ନିମନ୍ତେ ଆଜି ଆୟୋଜିତ ହୋଇଥିଲା ଏକ ସ୍ଵତନ୍ତ୍ର ସଂପାନ । ଓଡ଼ିଆ ବିଶ୍ୱବିଦ୍ୟାଳୟର କୁଳପତି ପ୍ରଫେସର ସବିତା ପ୍ରଧାନଙ୍କ ଅଧ୍ୟକ୍ଷତାରେ ଏହି ସଂପାନର ମୁଖ୍ୟ ଅତିଥି ଭାବରେ କବି ଡ. ଶତ୍ରୁଘ୍ନ ପାଣ୍ଡବ ଏବଂ ମୁଖ୍ୟ ବକ୍ତା ଭାବରେ ରେଭେନ୍ସା ବିଶ୍ୱବିଦ୍ୟାଳୟର ଓଡ଼ିଆ ବିଭାଗର ପ୍ରାଧ୍ୟାପକ ଡ. ଜ୍ଞାନୀ ଦେବାଶିଷ ମିଶ୍ର ଯୋଗଦେଇ ଗୋପବନ୍ଧୁଙ୍କ କବିତା ଓ ଗଦ୍ୟ ସାହିତ୍ୟ ଉପରେ ବିଶେଷ ଚର୍ଚ୍ଚା କରିଥିଲେ । ମଞ୍ଚାସୀନ ଥିଲେ ସ୍ନାତକୋତ୍ତର ପରିଷଦର ଅଧ୍ୟକ୍ଷ ଡ. ପ୍ରଦ୍ୟୁମ୍ନ କୁମାର ମିଶ୍ର । ଆଜିର ଏ କାର୍ଯ୍ୟକ୍ରମ ଥିଲା ଆମ ବିଶ୍ୱବିଦ୍ୟାଳୟ ପାଇଁ ଗୌରବର ବିଷୟ ।
#ଓଡ଼ିଆବିଶ୍ୱବିଦ୍ୟାଳୟ
