15/06/2025
ਪੰਜਾਬ ਸਰਕਾਰ ਨੇ ਜੋ ਚੋਣਾਂ ਵਿੱਚ ਵਾਅਦੇ ਕੀਤੇ ਸਨ ਉਨ੍ਹਾਂ ਵਿੱਚ ਇੱਕ ਇਹ ਵੀ ਸੀ ਕਿ ਪੰਜਾਬ ਨੂੰ ਨਸ਼ਾ ਮੁਕਤ ਕੀਤਾ ਜਾਵੇਗਾ ਉਸ ਦੇ ਤਹਿਤ ਪੰਜਾਬ ਸਰਕਾਰ ਨੇ ਹੁਣ ਪੂਰੇ ਜ਼ੋਰ ਸੋ਼ਰ ਨਾਲ ਇਹ ਮੁੰਹਿਮ ਸ਼ੁਰੂ ਕੀਤੀ ਹੈ ਜਿਸ ਤਹਿਤ ਪੁਲਿਸ ਅਫਸਰਾਂ ਦੀ ਜ਼ਿਮੇਵਾਰੀ ਤਹਿ ਕੀਤੀ ਗਈ ਹੈ ਕਿ ਜਿਹੜੇ ਅਫਸਰ ਦੇ ਇਲਾਕੇ ਵਿੱਚੋਂ ਕਿਸੇ ਪ੍ਰਕਾਰ ਦਾ ਨਸ਼ਾ ਵਿਕਦਾ ਹੋਵੇਗਾ ਉਸ ਦਾ ਜ਼ਿਮੇਵਾਰ ਉਸ ਪੁਲਿਸ ਅਫਸਰ ਨੂੰ ਹੀ ਠਹਿਰਾਇਆ ਜਾਵੇਗਾ ਇਸ ਦੇ ਨਾਲ ਹੀ ਪੁਲਿਸ ਨੂੰ ਸਪੈਸ਼ਲ ਪਾਵਰਾ ਦਿੱਤੀਆਂ ਗਈਆਂ ਹਨ ਜਿਸ ਤਹਿਤ ਪੰਜਾਬ ਪੁਲਿਸ ਨੇ ਕਰਵਾਈ ਕਰਦਿਆਂ ਹਜ਼ਾਰਾਂ ਐਫਆਈਆਰ ਦਰਜ ਕੀਤੀਆਂ ਹਨ ਪਰ ਇਨ੍ਹਾਂ ਹਜ਼ਾਰਾਂ ਐਫਆਈਆਰਜ ਵਿੱਚ ਕੋਈ ਇੱਕ ਦੋ ਪ੍ਰਤੀਸ਼ਤ ਹੀ ਅਜਿਹੇ ਕੇਸ ਦਰਜ ਹੋਏ ਹੋਣਗੇ ਜਿਸ ਤੋਂ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ ਕਿ ਪੁਲਿਸ ਪੰਜਾਬ ਨੂੰ ਕਿੰਨਾ ਕੁ,ਨਸ਼ਾ ਮੁਕਤ ਕਰਨ ਵੱਲ ਤੁਰੀ ਹੈ ਇਹ ਗੱਲ ਲੋਕ ਆਮ ਕਰਦੇ ਹਨ ਕਿ ਪੁਲਿਸ ਵੇਚਣ ਵਾਲਿਆਂ ਨੂੰ ਘੱਟ ਤੇ ਨਸ਼ੇ ਕਰਨ ਵਾਲਿਆਂ ਨੂੰ ਜ਼ਿਆਦਾ ਫੜਕੇ ਆਪਣੀ ਖ਼ਾਨਾ ਪੂਰਤੀ ਕਰ ਰਹੀ ਹੈ।
ਨਸ਼ਾ ਆਦਿ ਕਾਲ ਤੋਂ ਚੱਲਿਆ ਆ ਰਿਹਾ ਹੈ ਇਤਿਹਾਸ ਮੁਤਾਬਕ ਜਿਵੇਂ ਸ਼ੁਰੂ ਵਿੱਚ ਭੰਗ ਦੇ ਨਸ਼ੇ ਦੀ ਵਰਤੋਂ ਕੀਤੀ ਜਾਂਦੀ ਸੀ ਉਸ ਤੋਂ ਬਾਅਦ ਜਿਵੇਂ ਜਿਵੇਂ ਸਮਾਂ ਬਦਲਦਾ ਗਿਆ ਉਸੇ ਤਰ੍ਹਾਂ ਨਸ਼ੇ ਦੇ ਰੂਪ ਵੀ ਬਦਲਦੇ ਗਏ ਪਰ ਨਸ਼ਾ ਬੰਦ ਕਦੇ ਨਹੀਂ ਹੋਇਆ ਹੁਣ ਜਿਵੇਂ ਜੇ ਅੱਜ ਤੋਂ ਕੁੱਝ ਦਹਾਕੇ ਪਿੱਛੇ ਨਜ਼ਰ ਮਾਰੀਏ ਤਾਂ ਅਫੀਮ ਦੇ ਨਸ਼ੇ ਦਾ ਸੇਵਨ ਹੋਣਾ ਸ਼ੁਰੂ ਹੋਇਆ ਅਤੇ ਪੰਜਾਬ ਵਿੱਚ ਅਫ਼ੀਮ ਦੇ ਠੇਕੇ ਵੀ ਹੁੰਦੇ ਸਨ ਜਿਵੇਂ ਹੁਣ ਸ਼ਰਾਬ ਦੇ ਠੇਕੇ ਹਨ। ਅਫ਼ੀਮ ਤੋਂ ਬਾਅਦ ਉਸ ਦੀ ਰਹਿੰਦ ਡੋਡਿਆਂ ਦੇ ਨਸੇ਼ ਦਾ ਸੇਵਨ ਕਰਨ ਵਾਲਿਆਂ ਲੋਕਾਂ ਦੀ ਗਿਣਤੀ ਵਧੀ ਕਿਉਂਕਿ ਅਫ਼ੀਮ ਮਹਿੰਗੀ ਹੋਣ ਕਰਕੇ ਹਰ ਬੰਦਾ ਉਹ ਨਸ਼ਾ ਨਹੀਂ ਕਰ ਸਕਦਾ ਸੀ ਤੇ ਇਹ ਨਸ਼ਾ ਕਰਕੇ ਲੋਕ ਆਪਣੇ ਕੰਮ ਕਰਦੇ ਸਨ ਕੰਮ ਦੇ ਲਾਲਚ ਵਿੱਚ ਹੀ ਕਈ ਵਾਰ ਇਸ ਤਰ੍ਹਾਂ ਹੁੰਦਾ ਸੀ ਕਿ ਇੱਕ ਪਿਓ ਆਪਣੇ ਪੁੱਤਰਾਂ ਨੂੰ ਨਸ਼ਾ ਕਰਨ ਲਈ ਕਹਿ ਦਿੰਦੇ ਸਨ ਕਿਉਂਕਿ ਜਦੋਂ ਕੋਈ ਸਖ਼ਤ ਕੰਮ ਹੋਣਾ ਤਾਂ ਕਹਿ ਦਿੰਦੇ ਕਿ ਅੱਜ ਖਾ ਲਓ ਭੋਰਾ ਤਕੜੇ ਹੋਕੇ ਕੰਮ ਕਰੋਗੇ ਤੇ ਇਸ ਤਰ੍ਹਾਂ ਕੰਮ ਦੇ ਲਾਲਚ ਵਿੱਚ ਹੀ ਬਹੁਤ ਸਾਰੇ ਲੋਕ ਇਨ੍ਹਾਂ ਨਸ਼ਿਆਂ ਦੀ ਦਲਦਲ ਵਿੱਚ ਫਸੀ ਗਏ ਪਰ ਇਹ ਸੱਚ ਹੈ ਕਿ ਅਜਿਹਾ ਨਸ਼ਾ ਕਰਕੇ ਲੋਕ ਕੰਮ ਬਹੁਤ ਕਰਦੇ ਸਨ ਪੁਰਾਣੇ ਸਮਿਆਂ ਵਿੱਚ (ਮੈਂਰਿਆ) ਜਾਣੀ ਖੇਤਾਂ ਵਿੱਚ ਖੜ੍ਹੇ ਮਲਿਆ ਕਰੀਰਾਂ ਅਤੇ ਹੋਰ ਇਸ ਤਰ੍ਹਾਂ ਦੇ ਜੰਗਲ ਵਰਗੇ ਖੇਤਾਂ ਨੂੰ ਜਰਖੇਜ਼ ਜ਼ਮੀਨ ਬਣਾਉਣ ਲਈ ਬਹੁਤ ਮਿਹਨਤ ਕਰਨੀ ਪੈਂਦੀ ਤਾਂ ਲੋਕ ਨਸ਼ੇ ਦਾ ਆਸਰਾ ਲੈਕੇ ਸਵੇਰ ਤੋਂ ਸ਼ਾਮ ਤੱਕ ਕੋਡੀ ਢੂਹੀ ਕੰਮ ਕਰਦੇ ਕੁੱਝ ਲੋਕਾਂ ਦਾ ਕਹਿਣਾ ਹੁੰਦਾ ਕਿ ਬੰਦਾ ਨਹੀਂ ਏਨੀ ਮਿਹਨਤ ਕਰਕੇ ਜ਼ਮੀਨਾਂ ਜਰਖੇਜ਼ ਬਣਾ ਸਕਦਾ ਸੀ ਇਹ ਅਫ਼ੀਮ ਜਾਂ ਭੁੱਕੀ ਦੀ ਮਿਹਰਬਾਨੀ ਹੈ ਕਿ ਸਵੇਰ ਤੋਂ ਲੈਕੇ ਸ਼ਾਮ ਤੱਕ ਕਹੀਂ ਵਾਹੀ ਜਾਂਦੇ ਅਤੇ ਢੂਹੀ ਸਿਧੀ ਨਾ ਕਰਦੇ ਅਫੀਮ ਠੇਕਿਆਂ ਤੋਂ ਮਿਲਣ ਕਰਕੇ ਕੰਮ ਦੇ ਲਾਲਚ ਵਿੱਚ ਲੋਕ ਅਫ਼ੀਮ ਜਾਂ (ਪੋਸਤ) ਡੋਡਿਆਂ ਦੀ ਵਰਤੋਂ ਕਰਨ ਲੱਗ ਪਏ ਤੇ ਪੰਜਾਬ ਦੀਆਂ ਜ਼ਮੀਨਾਂ ਨੂੰ ਆਬਾਦ ਕਰਕੇ ਦੇਸ਼ ਦੇ ਅਨਾਜ ਦੇ ਭੰਡਾਰ ਭਰੇ ਪਰ ਇੱਕ ਸਮਾਂ ਆਇਆ ਸਰਕਾਰ ਨੇ ਪੰਜਾਬ ਵਿੱਚੋਂ ਅਫ਼ੀਮ ਦੇ ਠੇਕੇ ਬੰਦ ਕਰ ਦਿੱਤੇ ਅਤੇ ਉਨ੍ਹਾਂ ਲੋਕਾਂ ਨੂੰ ਬਹੁਤ ਔਖਾ ਹੋਗਿਆ ਜਿਹੜੇ ਕੰਮ ਕਰਨ ਦੇ ਲਾਲਚ ਵਿੱਚ ਨਸ਼ੇ ਦੇ ਆਦੀ ਹੋ ਚੁੱਕੇ ਸਨ।
ਉਸ ਤੋਂ ਬਾਅਦ ਫੇਰ ਸਰਕਾਰੇ ਦਰਬਾਰੇ ਪਹੁੰਚ ਰੱਖਣ ਵਾਲੇ ਲੋਕ ਦੂਜੇ ਸੂਬਿਆਂ ਵਿੱਚੋਂ ਨਸ਼ਾ ਲਿਆਕੇ ਵੇਚਣ ਲੱਗ ਪਏ ਕਿਉਂਕਿ ਉਨ੍ਹਾਂ ਨੂੰ ਇਸ ਬਾਰੇ ਤਾਂ ਪਤਾ ਹੀ ਸੀ ਕਿ ਜਿਹੜੇ ਬੰਦੇ ਇਸ ਨਸ਼ੇ ਦੇ ਆਦੀ ਹੋ ਗਏ ਉਨ੍ਹਾਂ ਦਾ ਹੁਣ ਇਸ ਇਸ ਨਸ਼ੇ ਬਿਨਾਂ ਗੁਜ਼ਾਰਾ ਨਹੀਂ ਹੋਣਾ ਜਦੋਂ ਅਫ਼ੀਮ ਦੇ ਰੇਟਾਂ ਵਿੱਚ ਵਾਧਾ ਹੁੰਦਾ ਗਿਆ ਤਾਂ ਲੋਕ ਅਫ਼ੀਮ ਤੋਂ ਬਦਲਕੇ ਡੋਡਿਆਂ ਨੇ ਨਸ਼ੇ ਵੱਲ ਰੁਚਿਤ ਹੋਣ ਲੱਗ ਪਏ ਤੇ ਹੁਣ ਜਦੋਂ ਡੋਡੇ ਵੀ ਗਰੀਬ ਬੰਦੇ ਦੀ ਪਹੁੰਚ ਵਿੱਚੋਂ ਬਾਹਰ ਹੋਏ ਤਾਂ ਇਨ੍ਹਾਂ ਨਸ਼ਿਆਂ ਦੀ ਥਾਂ ਮੈਡੀਕਲ ਨਸ਼ਿਆਂ ਨੇ ਲੈ ਲਈ। ਪੁਰਾਣੇ ਨਸ਼ਾ ਕਰਨ ਵਾਲੇ ਦੱਸਦੇ ਹਨ ਕਿ ਜਦੋਂ ਸ਼ਰੀਰ ਨਸ਼ੇ ਤੇ ਹੀ ਨਿਰਭਰ ਹੋਗਿਆ ਤਾਂ ਹੁਣ ਨਸ਼ੇ ਬਿਨਾਂ ਕੰਮ ਨਹੀਂ ਕਰ ਸਕਦੇ ਮੈਡੀਕਲ ਨਸ਼ਾ ਥੋੜਾ ਸਸਤਾ ਹੋਣ ਕਰਕੇ ਲੋਕ ਇਸ ਤੇ ਨਿਰਭਰ ਹੋ ਗਏ ਹਰ ਗ਼ਰੀਬ ਬੰਦਾ ਦਸ ਰੁਪਏ ਦੀਆਂ ਦੋ ਗੋਲੀਆਂ ਲੈਕੇ ਤਿੰਨ ਸੌ ਰੁਪਏ ਦੀ ਦਿਹਾੜੀ ਲਾ ਆਉਂਦਾ ਪਰ ਇਸ ਦੇ ਰੇਟ ਵੀ ਹੌਲੀ ਹੌਲੀ ਵੱਧਦੇ ਗਏ ਇਹ ਇੱਕ ਰੁਪਏ ਦੀ ਗੋਲੀ ਪਹਿਲਾਂ ਪੰਜ ਰੁਪਏ ਤੋਂ ਚੱਲਕੇ ਇਹ ਵੀ 20/25 ਰੁਪਏ ਦੀ ਹੋ ਗਈ ਕਿਉਂਕਿ ਸਰਕਾਰਾਂ ਜਿਵੇਂ ਜਿਵੇਂ ਸਖ਼ਤ ਹੁੰਦੀਆਂ ਗਈਆਂ ਉਸੇ ਤਰ੍ਹਾਂ ਨਸ਼ਿਆਂ ਦੇ ਰੇਟ ਵਧਦੇ ਗਏ ਪਹਿਲੀਆਂ ਸਰਕਾਰਾਂ ਵਿੱਚ ਇਹ ਗ਼ਰੀਬ ਲੋਕਾਂ ਦੇ ਆਦੀ ਹੋਣ ਵਾਲ਼ਾ ਮੈਡੀਕਲ ਜਾਂ ਡੋਡੇ ਵਗੈਰਾ ਮਿਲ਼ਦੇ ਰਹੇ ਅਤੇ ਲੋਕਾਂ ਦਾ ਕੰਮ ਚੱਲੀ ਗਿਆ ਇਹ ਨਸ਼ੇ ਮਾਰੂ ਨਹੀਂ ਸਨ।
ਜਿਵੇਂ ਜਿਵੇਂ ਨਸ਼ਿਆਂ ਵਿੱਚ ਤਬਦੀਲੀ ਆਈ ਉਸੇ ਤਰ੍ਹਾਂ ਨਸ਼ੇ ਘਾਤਕ ਹੁੰਦੇ ਗਏ ਹੁਣ ਪਿੱਛਲੇ ਦੋ ਦਹਾਕਿਆਂ ਤੋਂ ਜਿਸ ਨਸ਼ੇ ਦਾ ਪ੍ਰਚਲਣ ਹੋਇਆ ਹੈ ਇਹ ਜਾਨਲੇਵਾ ਤੇ ਮਹਿੰਗਾ ਵੀ ਹੈ ਜਿਸ ਤੇ ਸਮੇਂ ਰਹਿੰਦਿਆਂ ਸਰਕਾਰਾਂ ਨੇ ਜ਼ਿਆਦਾ ਗੌਰ ਨਹੀਂ ਕੀਤੀ ਜੇ ਸਰਕਾਰਾਂ ਗੌਰ ਵੀ ਕਰਦੀਆਂ ਤਾਂ ਥੱਲੜੇ ਪੁਲਿਸ ਅਫਸਰਾਂ ਦੀ ਮਿਲੀਭੁਗਤ ਨਾਲ ਇਹ ਸਭ ਕੁੱਝ ਚੱਲੀ ਜਾਂਦਾ ਸੀ ਹੁਣ ਸਰਕਾਰ ਦੇ ਸਖ਼ਤੀ ਕਰਨ ਨਾਲ ਪੁਲਿਸ ਵਾਲੇ ਵੀ ਨਸ਼ੇ ਦੇ ਧੰਦੇ ਵਿੱਚ ਲੱਗੇ ਫ਼ੜੇ ਜਾਣ ਲੱਗੇ ਇਸ ਨਸ਼ੇ ਨੂੰ ਜ਼ਿਆਦਾ ਨੌਜਵਾਨ ਪੀੜ੍ਹੀ ਵਰਤ ਦੀ ਹੈ ਇਹ ਨਸ਼ਾ ਮਾਰੂ ਹੋਣ ਕਰਕੇ ਨੌਜ਼ਵਾਨੀ ਦਾ ਵੱਡੇ ਪੱਧਰ ਤੇ ਘਾਂਣ ਹੋ ਰਿਹਾ ਹੈ ਪਹਿਲਾਂ ਇਹ ਨਸ਼ਾ ਧੂੰਏਂ ਰਾਹੀਂ ਲਿਆ ਜਾਂਦਾ ਸੀ ਤੇ ਜਿਆਦਾ ਰੌਲਾ ਨਹੀਂ ਪਿਆ ਸੀ ਹੁਣ ਨਸ਼ੇ ਦੇ ਜ਼ਿਆਦਾ ਆਦੀ ਹੋਣ ਕਰਕੇ ਜਿਨ੍ਹਾਂ ਨੂੰ ਧੂੰਏਂ ਨਾਲ ਨਸ਼ਾ ਘੱਟ ਆਉਂਦਾ ਸੀ ਉਹ ਚਿੱਟੇ ਨੂੰ ਘੋਲਕੇ ਨਾੜਾਂ ਵਿੱਚ ਟੀਕੇ ਲਗਾਉਣ ਲੱਗ ਪਏ ਜੋ ਬਹੁਤ ਘਾਤਕ ਸਿੱਧ ਹੋ ਰਿਹਾ ਹੈ ਕਈਆਂ ਦੇ ਤਾਂ ਸੂਈ ਲੱਗੀ ਹੀ ਰਹਿ ਜਾਂਦੀ ਹੈ ਤੇ ਮੌਤ ਹੋ ਜਾਂਦੀ ਹੈ ਲੋੜ ਹੈ ਅਜਿਹੇ ਨਸ਼ੇ ਨੂੰ ਜਲਦੀ ਤੋਂ ਜਲਦੀ ਰੋਕਣ ਦੀ ਪਰ ਸਰਕਾਰ ਨੇ ਜਦੋਂ ਤੋਂ ਇਸ ਖ਼ਿਲਾਫ਼ ਮੁਹਿੰਮ ਵਿੱਢੀ ਹੈ ਤਾਂ ਕਈ ਪੁਲਿਸ ਵਾਲੇ ਹੀ ਇਸ ਨੂੰ ਵੇਚਦੇ ਤੇ ਪੀਂਦੇ ਫੜੇ ਗਏ।
ਪੁਲਿਸ ਦੀ ਨਸ਼ਾ ਵੇਚਣ ਵਾਲਿਆਂ ਵਿੱਚ ਸ਼ਮੂਲੀਅਤ ਹੋਣ ਦੇ ਨਾਲ ਨਾਲ ਕਈ ਸਿਆਸੀ ਪਾਰਟੀਆਂ ਦੇ ਆਗੂਆਂ ਦੇ ਨਜ਼ਦੀਕੀਆਂ ਦੇ ਨਾਂਮ ਵੀ ਇਸ ਵਿੱਚ ਬੋਲਣ ਲੱਗੇ ਕੁੱਝ ਵੀ ਹੋਵੇ ਅਜਿਹੇ ਨਸ਼ੇ ਸਰਕਾਰੀ ਸਹਿ ਤੋਂ ਬਿਨਾਂ ਨਹੀਂ ਵਿਕ ਸਕਦੇ ਇਹ ਮਹਿੰਗਾ ਨਸ਼ਾ ਜਦੋਂ ਕਿਸੇ ਗਰੀਬ ਬੰਦੇ ਤੋਂ ਫੜਿਆ ਜਾਂਦਾ ਹੈ ਤਾਂ ਲੋਕ ਆਮ ਹੀ ਕਹਿੰਦੇ ਸੁਣੇ ਜਾਂਦੇ ਹਨ ਕਿ ਇਹ ਬੰਦਾ ਏਨਾ ਮਹਿੰਗਾ ਨਸ਼ਾ ਕਿਥੋਂ ਲੈ ਆਇਆ ਇਹ ਜਾਂ ਤਾਂ ਕਿਸੇ ਪੁਲਿਸ ਅਫਸਰ ਨਾਲ ਜਾਂ ਕਿਸੇ ਲੀਡਰ ਨਾਲ ਮਿਲਿਆ ਹੋਵੇਗਾ।
ਇੱਕ ਹੋਰ ਸਭ ਤੋਂ ਵੱਡੀ ਗੱਲ ਜਿਹੜੀ ਪੰਜਾਬ ਦੇ ਸੁਹਿਰਦ ਲੋਕਾਂ ਦਾ ਧਿਆਨ ਮੰਗਦੀ ਹੈ ਕਿ ਨਸ਼ੇ ਦਾ ਰੌਲਾ ਪੂਰੇ ਭਾਰਤ ਵਿੱਚੋਂ ਸਿਰਫ਼ ਪੰਜਾਬ ਵਿੱਚ ਹੀ ਕਿਉਂ ਪੈ ਰਿਹਾ ਹੈ ਅਤੇ ਨਸ਼ਾ ਵੇਚਣ ਵਾਲੇ ਏਨੇ ਨਿੱਧੜਕ ਹੋਕੇ ਕਿਵੇਂ ਨਸ਼ਾ ਵੇਚੀ ਜਾਂਦੇ ਹਨ ਇਹ ਕਿਤੇ ਕੋਈ ਸਰਕਾਰੀ ਚਾਲ ਹੀ ਤਾਂ ਨਹੀਂ ਕਿ ਪੰਜਾਬ ਦੀ ਜਵਾਨੀ ਨੂੰ ਬਰਬਾਦ ਕਰਨ ਲਈ ਸਰਕਾਰਾਂ ਹੀ ਪੰਜਾਬ ਵਿੱਚ ਅਜਿਹਾ ਨਸ਼ਾ ਵਕਾਈ ਜਾ ਰਹੀਆਂ ਹਨ ਕਿੰਨੇ ਹੀ ਪੁਲਿਸ ਵਾਲੇ ਨਸ਼ਾ ਵੇਚਣ ਦੇ ਦੋਸ਼ਾਂ ਵਿੱਚ ਫੜ੍ਹੇ ਗਏ ਹਨ ਜੇ ਫੜ੍ਹੇ ਗਏ ਪੁਲਿਸ ਕਰਮਚਾਰੀਆਂ ਤੇ ਛੋਟੇ ਅਧਿਕਾਰੀਆਂ ਤੋਂ ਪੰਜਾਬ ਪੁਲਿਸ ਤੋਂ ਬਿਨਾਂ ਹੋਰ ਕੋਈ ਨਿਰਪੱਖ ਪੁੱਛਗਿੱਛ ਕਰੇ ਤਾਂ ਸ਼ਾਇਦ ਵੱਡੇ ਪੁਲਿਸ ਅਧਿਕਾਰੀਆਂ ਦੇ ਨਾਮ ਵੀ ਸਾਹਮਣੇ ਆ ਜਾਣ। ਪਰ ਕੁੱਝ ਵੀ ਹੋਵੇ ਪੰਜਾਬ ਦੇ ਲੋਕਾਂ ਨੂੰ ਕਿਸੇ ਤੋਂ ਵੀ ਇਹ ਉਮੀਦ ਨਹੀਂ ਕੀਤੀ ਜਾ ਸਕਦੀ ਕਿ ਪੰਜਾਬ ਲਈ ਕੋਈ ਵੀ ਏਜੰਸੀ ਨਿਰਪੱਖਤਾ ਨਾਲ ਪੜਚੋਲ ਕਰੇਗੀ ਜਿਸ ਨਾਲ ਅਸਲ ਨਸ਼ੇ ਦੇ ਵਪਾਰੀਆਂ ਤੱਕ ਪਹੁੰਚਿਆਂ ਜਾ ਸਕੇ ਜਿਨ੍ਹਾਂ ਸਮਾਂ ਉਨ੍ਹਾਂ ਵੱਡੇ ਵੱਡੇ ਮਹਾਂਰਥੀਆਂ ਨੂੰ ਕੋਈ ਹੱਥ ਨਹੀਂ ਪਾਉਂਦਾ ਉਨ੍ਹਾਂ ਸਮਾਂ ਪੰਜਾਬ ਦੇ ਨਸ਼ੇ ਮੁਕਤੀ ਦੀ ਗੱਲ ਅਜੇ ਦੂਰ ਜਾਪਦੀ ਹੈ ਕਿਉਂਕਿ ਅਜਿਹੀਆਂ ਸਖਤਾਈਆ ਲੋਕ ਦਿਖਾਵੇ ਲਈ ਪਹਿਲੀਆਂ ਸਰਕਾਰਾਂ ਨੇ ਵੀ ਕੀਤੀ ਹੈ ਪਰ ਥੋੜੇ ਸਮੇਂ ਬਾਅਦ ਹੀ ਪ੍ਰਨਾਲਾ ਆਪਣੇ ਥਾਂ ਤੇ ਹੀ ਹੁੰਦਾ ਹੈ।
ਉਹ ਲੋਕ ਕਿਹੋ ਜਿਹੀ ਸੋਚ ਦੇ ਮਾਲਕ ਹੋਣਗੇ ਜਿਹੜੇ ਲੋਕਾਂ ਦੇ ਘਰ ਉਜਾੜਕੇ ਆਪਣੇ ਘਰ ਵਸਾਉਣ ਚਾਹੁੰਦੇ ਹਨ ਤੇ " ਯੁੱਧ ਨਸ਼ਿਆਂ ਵਿਰੁੱਧ, ਚੱਲਣ ਤੋਂ ਬਾਅਦ ਵੀ ਉਹ ਮਾਰੂ ਨਸ਼ੇ ਵੇਚਣ ਵਾਲੇ ਲੋਕ ਤਾਂ ਸਿਰਫ਼ 2/3% ਲੋਕ ਹੀ ਫੜ੍ਹੇ ਹੋਣਗੇ ਜਦ ਕਿ ਹੋਰ ਨਸ਼ਿਆਂ ਵਿੱਚੋਂ ਜਿਵੇਂ ਅਫ਼ੀਮ,ਚੂਰਾ ਪੋਸਤ (ਡੋਡੇ) ਜਾ ਮੈਡੀਕਲ ਨਸ਼ਿਆਂ ਵਾਲੇ ਹੀ ਪੁਲਿਸ ਨੇ ਜ਼ਿਆਦਾ ਫੜ੍ਹੇ ਹਨ ਇਸ ਨਾਲ ਸਾਡੀ ਬਹੁਤ ਵੱਡੀ ਤ੍ਰਾਸਦੀ ਜੁੜੀ ਹੋਈ ਹੈ ਕਿ ਜਿਹੜੇ ਬੰਦੇ ਅੱਜ 70/80 ਸਾਲਾਂ ਦੇ ਹੋ ਗਏ ਹਨ ਅਤੇ ਉਨ੍ਹਾਂ ਨੂੰ ਇਹ ਨਸ਼ੇ ਕਰਦਿਆਂ ਨੂੰ ਘੱਟੋ ਘੱਟ 45/50 ਸਾਲ ਹੋ ਗਏ ਹਨ ਉਨ੍ਹਾਂ ਵਾਸਤੇ ਬਹੁਤ ਵੱਡੀ ਸਮੱਸਿਆ ਖੜ੍ਹੀ ਹੋ ਗਈ ਹੈ ਕਿਉਂਕਿ ਨਸ਼ਾ ਉਹ ਛੱਡ ਨਹੀਂ ਸਕਦੇ ਤੇ ਸਰਕਾਰ ਵੱਲੋਂ ਸਖ਼ਤੀ ਕਰਨ ਤੇ ਨਸ਼ਾ ਬੰਦ ਨਹੀਂ ਹੋਇਆ ਸਗੋਂ ਮਹਿੰਗਾ ਹੋਇਆ ਹੈ ਜਿਹੜੇ ਗਰੀਬ ਬੰਦੇ ਨਸ਼ਾ ਲਏ ਤੋਂ ਬਗੈਰ ਸਵੇਰ ਵੇਲੇ ਮੰਜੇ ਤੋਂ ਨਹੀਂ ਉੱਠ ਸਕਦੇ ਉਹ ਸਾਰਾ ਦਿਨ ਕੰਮ ਕਰਨ ਲਈ ਦਿਹਾੜੀ ਕਿਵੇਂ ਲਾ ਲੈਣਗੇ ਇਹ ਉਹ ਲੋਕ ਹਨ ਜਿਨ੍ਹਾਂ ਦੇ ਘਰਾਂ ਵਿੱਚ ਇਨ੍ਹਾਂ ਦੀ ਦਿਹਾੜੀ ਕਰਨ ਨਾਲ ਹੀ ਚੁੱਲ੍ਹੇ ਵਿੱਚ ਅੱਗ ਮੱਚਦੀ ਹੈ ਅੱਜ ਦੇ ਸਮੇਂ ਵਿੱਚ ਉਹ ਲੋਕ ਮੰਜਿਆਂ ਵਿੱਚ ਪੈ ਗਏ ਹਨ ਤੇ ਹੁਣ ਉਨ੍ਹਾਂ ਘਰਾਂ ਦੇ ਚੁੱਲ੍ਹੇ ਠੰਡੇ ਹੋਣ ਲੱਗੇ ਹਨ ਉਹ ਬੰਦੇ ਕਿਸੇ ਕੀਮਤ ਤੇ ਵੀ ਨਸ਼ਾ ਨਹੀਂ ਛੱਡ ਸਕਦੇ ਕਿਉਂਕਿ ਉਨ੍ਹਾਂ ਦੀ ਸਾਰੀ ਉਮਰ ਨਸ਼ਾ ਕਰਦਿਆਂ ਹੀ ਬੀਤੀ ਹੈ ਹੁਣ ਨਸ਼ਾ ਛੱਡ ਉਹ ਸਕਦੇ ਨਹੀਂ ਕਿਉਂਕਿ ਜਦੋਂ ਕੋਈ ਵੀ ਬੰਦਾ ਨਸ਼ਾ ਛੱਡਦਾ ਹੈ ਤਾਂ ਉਸ ਨੂੰ ਅਰਾਮ ਦੀ ਲੋੜ ਹੁੰਦੀ ਹੈ ਉਨ੍ਹਾਂ ਲੋਕਾਂ ਕੋਲ ਅਰਾਮ ਕਰਨ ਦਾ ਤਾਂ ਸਮਾਂ ਹੀ ਨਹੀਂ ਕਿਉਂਕਿ ਜਿਹੜੇ ਪੈਸੇ ਉਨ੍ਹਾਂ ਨੇ ਦਿਹਾੜੀ ਲਾਕੇ ਕਮਾਕੇ ਲਿਆਉਣੇ ਹਨ ਉਨ੍ਹਾਂ ਦਾ ਚੁੱਲ੍ਹਾ ਤਾਂ ਉਸੇ ਨਾਲ ਹੀ ਤੱਪਣਾਂ ਹੈ ਸੋ ਇਸ ਕਰਕੇ ਪੰਜਾਬ ਨੂੰ ਨਸ਼ਾ ਮੁਕਤ ਹੋਣਾ ਮਹਿੰਗਾ ਪੈ ਰਿਹਾ ਹੈ ਇਸ ਲਈ ਸਰਕਾਰ ਨੂੰ ਚਾਹੀਦਾ ਹੈ ਕਿ ਜਿਹੜੇ ਬੰਦੇ 50/60 ਸਾਲਾਂ ਤੋਂ ਨਸ਼ਾ ਖਾਕੇ ਆਪਣਾ ਅਤੇ ਆਪਣੇ ਪਰਿਵਾਰ ਦਾ ਜੀਵਨ ਬਸਰ ਕਰ ਰਹੇ ਹਨ ਉਨ੍ਹਾਂ ਬਾਰੇ ਸਰਕਾਰ ਨੂੰ ਕੁੱਝ ਸੋਚਣਾਂ ਚਾਹੀਦਾ ਹੈ ਜਾਂ ਤਾਂ ਉਨ੍ਹਾਂ ਦਾ ਪੂਰੀ ਬਰੀਕੀ ਨਾਲ ਨਰੀਖਣ ਕਰਕੇ ਉਨ੍ਹਾਂ ਦੇ ਕਾਰਡ ਬਗੈਰ ਬਣਾਵੇ ਤੇ ਜਾਂ ਕੋਈ ਉਨ੍ਹਾਂ ਲਈ ਕੋਈ ਹੋਰ ਰਸਤਾ ਕੱਢੇ ਤਾਂ ਕਿ ਉਹ ਆਪਣਾ ਅਤੇ ਆਪਣੇ ਪਰਿਵਾਰ ਦਾ ਪਾਲਣ ਪੋਸ਼ਣ ਕਰ ਸਕਣ। ਮੈਡੀਕਲ ਨਸ਼ੇ ਜਾਂ ਚੂਰਾ ਪੋਸਤ ਹੀ ਖਾਂਦੇ ਹਨ ਜਿਹੜਾ ਹੁਣ ਨਸ਼ਾ ਮਹਿੰਗਾ ਹੋਣ ਕਰਕੇ ਇਹ ਵੀ ਉਨ੍ਹਾਂ ਦੀ ਪਹੁੰਚ ਤੋਂ ਬਾਹਰ ਹੁੰਦਾ ਜਾ ਰਿਹਾ ਹੈ ਅਜਿਹੇ ਲੋਕਾਂ ਦਾ ਸਰਕਾਰ ਨੂੰ ਜ਼ਰੂਰ ਕੋਈ ਪ੍ਰਬੰਧ ਕਰਨਾ ਚਾਹੀਦਾ ਹੈ ਜਿਸ ਨਾਲ ਉਹ ਜ਼ਿੰਦਗੀ ਦੇ ਰਹਿੰਦਾ ਅਖੀਰਲਾ ਸਮਾਂ ਸੌਖਾ ਬਤੀਤ ਕਰ ਲੈਣ । ਨਸ਼ੇ ਪੰਜਾਬ ਦੀ ਜਵਾਨੀ ਤੇ ਕਲੰਕ ਤੇ ਮਾਂਰੂ ਹਨ ਨਵੇਂ ਨੌਜਵਾਨ ਨਵੀਂ ਪੀੜ੍ਹੀ ਹੁਣ ਨਸ਼ਾ ਕਰਨਾ ਸ਼ੁਰੂ ਨਾ ਕਰ ਸਕਣ ਤੇ ਪੁਰਾਣੇ ਲੋਕਾਂ ਜੋ ਨਸ਼ਿਆਂ ਦੀ ਦਲਦਲ ਵਿੱਚ ਬਹੁਤ ਡੂੰਘੇ ਧਸ ਗਏ ਹਨ ਉਨ੍ਹਾਂ ਵਾਸਤੇ ਸਰਕਾਰ ਨੂੰ ਆਪਣੇ ਪੱਧਰ ਤੇ ਕੋਈ ਵਿਉਂਤ ਬੰਦੀ ਕਰਨੀ ਚਾਹੀਦੀ ਹੈ।
ਨਸ਼ਾ ਆਦਿ ਕਾਲ ਤੋਂ ਲੈਕੇ ਨਾ ਤਾਂ ਬੰਦ ਹੋਇਆ ਤੇ ਨਾ ਹੋਵੇ ਪਰ ਇਹ ਉਪਰਾਲਾ ਸਰਕਾਰ ਦਾਂ ਬਹੁਤ ਸ਼ਲਾਘਾਯੋਗ ਹੈ ਜੇ ਇਸ ਤੇ ਪੰਜਾਬ ਪੁਲਿਸ ਪੂਰੀ ਇਮਾਨਦਾਰੀ ਨਾਲ ਕੰਮ ਕਰੇ ਪਰ ਇਹ ਸੰਭਵ ਨਹੀਂ। ਬੇਸ਼ੱਕ ਪੰਜਾਬ ਪੁਲਿਸ ਵਿੱਚ ਬਹੁਤ ਥੋੜ੍ਹੇ ਬੰਦੇ ਨਸ਼ਿਆਂ ਦੇ ਕੰਮ ਵਿੱਚ ਗਲਤਾਨ ਹਨ ਅਤੇ ਉਹ ਇਸ ਦਲਦਲ ਵਿਚੋਂ ਬਾਹਰ ਵੀ ਨਹੀਂ ਨਿਕਲਣਾਂ ਚੁਹੁੰਦੇ ਹਨ ਇਸ ਨਾਲ ਉਹ ਕਹਾਵਤ ਸਿੱਧ ਹੁੰਦੀ ਹੈ ਕਿ " ਇੱਕ ਮੱਝ ਲਿਬੜੀ ਸਾਰੀਆਂ ਨੂੰ ਲਬੇੜ ਦਿੰਦੀ ਹੈ, ਭਾਵੇਂ ਪੁਲਿਸ ਵਿੱਚ ਬਹੁਤ ਥੋੜ੍ਹੇ ਬੰਦੇ ਅਜਿਹੇ ਹਨ ਜੋ ਨਸ਼ਾ ਆਪ ਵੀ ਕਰਦੇ ਹਨ ਅਤੇ ਨਸ਼ਾ ਵੇਚਣ ਵਾਲਿਆਂ ਨੂੰ ਵੀ ਹੱਲਾਸ਼ੇਰੀ ਦਿੰਦੇ ਹਨ ਉਨ੍ਹਾਂ ਥੋੜ੍ਹੇ ਜਿਹੇ ਬੰਦਿਆਂ ਕਾਰਨ ਸਾਰੀ ਪੰਜਾਬ ਪੁਲਿਸ ਦਾ ਅਕਸ ਖਰਾਬ ਹੋ ਰਿਹਾ ਹੈ ਚੰਗੇ ਪੁਲਿਸ ਅਧਿਕਾਰੀਆਂ ਨੂੰ ਅਜਿਹੇ ਕਰਮਚਾਰੀਆਂ ਤੇ ਅਧਿਕਾਰੀਆਂ ਤੇ ਉੱਚੇਚੀ ਨਜ਼ਰ ਰੱਖਕੇ ਉਨ੍ਹਾਂ ਦਾ ਪਰਦਾਫਾਸ਼ ਕਰਨਾ ਚਾਹੀਦਾ ਹੈ ਤਾਂ ਕਿ ਲੋਕਾਂ ਦੇ ਦਿਲਾਂ ਵਿੱਚੋਂ ਪੁਲਿਸ ਪ੍ਰਤੀ ਪੈਦਾ ਹੋਈ ਨਫ਼ਰਤ ਨੂੰ ਉਨ੍ਹਾਂ ਦੇ ਦਿਲਾਂ ਵਿੱਚੋਂ ਕੱਢਿਆ ਜਾਵੇ।
ਦਲਜੀਤ ਸਿੰਘ ਦੁੱਲੇਵਾਲਾ
ਫੋਨ ਨੰਬਰ 9417168368
