http://maraliterature.blogspot.com/

Mara Literature, Saiha (2025)

08/07/2025

CNA-TA CNDF AMA TLAHNAOPA VÂTA ABOHNA TLUAPA CHYHSA 700 HLEI MAWRÂH LÂ AMÂ VAW RÂ

Chin National Army (CNA)-zy chata Khihpa 6, Pahânoh khata Chin National Defence Force (CNDF) sup**a 'Camp Rihli' tlahnao ei ta, he vâna heta Myanmar tawhta chyhsa 700 hlei abohna tluapa ta Mawrâh lâ amâ vaw râ. Camp Rihli he Saikhumphai (Mawrâh, India) tawhta ahla tu leipa liata ypa a châ.

Biehnawh ta a palâsazie ta CNA he Chin Defence Force (CDF) nahta Myanmar pheisaih adyuh awpa ta paduapa Chinland Council-liata ahrialâhpa châ ei ta; CDF he hâta hmiatuapa chhâna lâchhâh liata Chin National Defence Force (CNDF)-ta Khawmawi nata a chheipâh liata ama yna su ama lapa hapazy kha ama châ.

08/07/2025

Châpaw|

[Eima reih, Mara reih eima pasâhsapa nata eima cheih lymâpa he chihro phohropazy ta miah ama vaw pasâhsa via tyh..he article he vaw reih la, Marapa na châ khiah Mara reih cheih la, chihropazy ta aru lâta ama cha pasâhsa via tahpa na pahno thei aw!]

MARA REIH

Rohtuhpa ~ J.Thangchungnunga

Palietuhpa ~
A.Thazi, Siaha

Mawrâh (Mizoram) liata pho hluh kawpa châ hlei leipa ta la, Mara nahzy he ama reih pabohsa thai kawpa ama châpa ta ei pahno.

He tlupo ta Mawreih cheihpa nahta apahlaopahlipa ta ama ypa chhao heta, ama yna lia maih ta, âmo hry liata cha Mara reih hmâh via chai lymâ ei ta, ahlâ zydua kha reipachhie vaw hlao ngâkaw tyh hra ei sala, ama tao pasu kaw tahpa he tlao â vaw lâ lymâ he zaw!

Mara tahpa heta pho nano nanopa khazie tlyma pahly ta, Naga-nahzy hawhta khi tota ama reih he â nano laih ta, châhrasala Mara reih p**a ama hmâh chaipa cha Tlôsaih - Siaha, Saikao rachhôh liata reih he a vaw châ.

Mara-nah he ama reih ama pabohsa pasa dâh he, he hawhpa lâchhâh ta amâ vaw hra patoh dâh he, khôtho lâ chyhsazy heta cha eima pahnokhei lei kaw thei.

Kô 1960 hmialâ syulyu a châpa ta pahno na ta; ama hla sâkha cha he hawh heta a châ:-

"Ei vaw pihkhei ei reih cheina,
Hy a lei awpa pasaih va na,
Pasô ei si â ngianazie he
Thyutlia eima daihti chyu ta."

Daihti khô chiehpa (liata) chho lâ chyhsa pasô ama hlao lei no chhao ta, he hawhpa palôh he â i kawpa ta ama vaw phaoh syulyu ha.

08/07/2025

US : TEXAS LIATA TILAIPA VÂTA HRONA PAHLEIPA ZIE CHA 104 AMA TLOH HA

Târi 4 Khihpa, 2025, US ta khotalaina a hmôna noh alyna daihti rachhôh liata Texas state liata athata vâsuahpa vâta tilaipa ta chhiena rarôh-ypa a tlôkheipa vâta hrona pahleipa zie cha, he thâtih pachhuahpanoh hai no taihna heta chyhsa 104 ama tloh ha.

08/07/2025

MARA HLA LIATA HLABIE/MACHÂ REIH HMÂ VIAPAZY

1.Bôhzyu lytlâh - Thina lytlâh, thina, thi.

Pamosana - Bôhzyu lytlâh miah khôsai ha hra la

Chhopasiana - Miah thisai/a pahâsai ha hra la.

2 . Nawhhly - Saw reina tlyma, hawtipa reina tlyma châta hmâpa a châ.

Pamosana - Nawhhly hawh pahneisilihpa ta akaokhoh pi.

Chhopasiana - Hawti/hawsaihpazy thapha alypa ta ama y tyhpa hawhta nâma nahta eima chareikhoh no kha thapha alypa ta pahneikhoh tyh hra pi.

3 . Chhôhso - Palôh, palôhrupa, palôh phaozie, palôh liata pachâna.

Pamosana - Chhôhso lia khâ cha rohpady tyh na

Chhopasiana - Ei palôhrupa liata khatinorai ta ei cha pachâ ngâthlâh ha tyh.

4 . Khihbôhpi - Khih, pahrâna su, yna khih.

Pamosana - Ei khihbôhpi lia lailâhzy nah pahneisilihna chô akaokhoh pi.

Chhopasiana - Eima khih liata ei viasazy nahta Aly thapha kawpa ta chareikhoh pi ta.

5 . Lyuhbie naizualuah - Reikah phapa.

Pamosana - Lyuhbie naizualuah na hlâ la kei lôh ly n'awpa ta.

Chhopasiana - Reikah pha kawpa ta bie nâ chho la Aly thaphapa ta ei y n'awpa ta.

6 . Mokuh ramâ khaih - A mô, mokuh pahâh kawpa ta a môpa.

Pamosana - Khataihlia ma mokuh ramâ na khaih ha tly lôh ei du chainô?

Chhopasiana - Ei khochaipa khataihlia ma mokuh pahâh kawpa ta nâ mô ha tly?.

7 . Molâh kithlaoh - Khih, khi hropa, maniahpa khih.

Pamosana - Molâh kithlaoh hry lia laphôh to thlu hr'eisi.

Chhopasiana - Maniah khih/khihro râhhropa liata bieto biezaw, thaina sona to achupa ta/reihpa ta y hra ei suh u.

8 . Khiahlôtlâh - Palôhtlâhpa reina.

Pamosana - Khiahlô rai za tlâh thei vei.

Chhopasiana - Palôh rai tlâh thei vei.

9 . Thângiahna - Vâna, y leipa vâna.

Pamosana - Na thângiah lôhlie raithlih palo laihna.

Chhopasiana - Ei cha vâ tu hapa vâta palôh a lie kawpa ei mothlih ei pathla tyh.

10 . Nohlychhiki - Noh chareih, Nohto.

Pamosana - Nohlychhiki akaokhoh ei sih.

Chhopasiana - Noh chareih, nohto ta chareikhoh/ykhoh/apakyh sih y.

11 . Thâlia - Thâtih.

Pamosana - Dinô na thâlia reih na ai vei.

Chhopasiana - Laihsa na thâtih rei na ai vei.

12 . Sâhmia pati - Akhohpa ta ahneipa.

Pamosana : Nâ nah kei Sâhmia pati châ tlôh pi.

Chhopasiana - Nâ nata keima la akhohpa ta ahneipa châ tlôh pi ta.

13 .Lailâh pawmaih - Richâh khapa laihsa, chanô viasa.

Pamosana - Lailâh pawmaihzy hry lia.

Chhopasiana - Richâh khapa, ei viasa chanô/laihsazy hry liata.

14 . Hâzo chhiki - Zâ chareih, zâ tota.

Pamosana - Hâzo chhiki châ ngiah tyh na.

Chhopasiana - Zâ chareih/zâ daihti a vaw tlôna maih cha vâ tyh na ta.

15 . Hrozô chhâ lia - Hrochhôh ta, hrochhôh daihti liata.

Pamosana - Hrozô chhâ lia ch'aw my aw vana.

Chhopasiana - Ei hrochhôh ta ch'aw my vana.

16 . Khôpheih - Rakhô.

Pamosana - Khôpheih chô tawh cha vaw rohpady na.

Chhopasiana - Rakhô chô tawhta cha vaw pachâ tyh na ta.

17 . Lôhhiah - Palôh pasa, palôhtlâhleipa.

Pamosana - Lôhhiahna chô na thâ eimâ ngiah tyh

Chhopasiana - Palôh pasa kawna chôta eima cha vaw vâ kaw tyh/eima cha vâ kaw tyh.

18 . Mythâpaw châ sala - Vaw my thlâh ha bâ lahvâ na, vaw my ha bâ lahvâ na.

Pamosana - Lôhdunô kha la mythâpaw châ bâ sala.

Chhopasiana - Ei khonô, ei vâ-iapa kha tlâ my thlâh ha bâ lahvâ na.

19 . Vâpiati - Vâsuapa, vâ za suahpa.

Pamosana - Raithlih vâpiati hawh a loh.

Chhopasiana - Ei mothlih vâ suapa hawh a loh/a tla (Parawpachawna).

20 . Ei châ ti awpa tlai - Ei cha hnei awpa tlai.

Pamosana - Thyudyupaw nah araoh mawh sihla ei châ ti awpa tlai.

Chhopasiana - Chanô hawti kaw chypa/thyudyupa châ ha vei mawh la cha, (â richâhkhapa châ ha mawh sihla) cha ei cha hnei h'awpa tlai.

21 . Mohtlei - Moh rei awpa a y khao leipa, dyhchâsai hapa, hmia pahno beih leipa hawhta a y hapa.

Pamosana - Khazia motleih eina châsai chi.

Chhopasiana - Khazia hmia pahno beih leipa hawhta eina ysai chi, Khazia dyh hro eina châsai chi.

22 . Lâ tlei - Khopa hropa hneisai, achhaih.

Pamosana - Lâ eina tleisai ha tawh chi khazia lyuhbie ei n'aw hlâ heih chi?

Chhopasiana - Khazia einâ chhaih/khopa hropa eina hneisai tawh chi ta, bie einâ vaw chho heih chi.

23 . Lyuhbie - Bie, bie phapa.

Pamosana - Nâ nah kei lyuhbie hlâ aryh khao vei.

Chhopasiana - Nâ nata keima la bie achho awpa pathaih khao vei/achho thei awpa châ khao ma pi.

24 . Lôh châ d**a - Cha khohpa/cha khotuhpa.

Pamosana - Apalai tu kha y hy laihsa, lôh châ d**a rai y vei ei.

Chhopasiana - Apalai tu kha y hy laihsa, cha khohtuhpa/nâma cha khohpa rai y vei ei.

25 . Valâzoh - Sievawh laih, akhiekhâ/ahlaihlâ, khitlyh.

Pamosana - Valâ ei zohna maih na hnazô atyh awpa y tlôh vâ.

Chhopasiana - Ei khiekhâna/chareina/khitlyhna lia maih, na hmia hmô awpa y tlôh vâ.

26 . Lâpôh lyuhbie chho - Lâpi/lâthlôh liata bie a chho.

Pamosana - Lâpôh lyuhbie dei he ma ei tovyuh.

Chhopasiana - Khiliah/lâpi/lâthlôh liata bie eimâ chhopa dei he mâ keima châta â daih/ei tovyuh.

27 . Pheiliah hai - Sie, phei ta chakâpa.

Pamosana - Lôhdu pheiliah a haina lâ valâ ei zoh aw.

Chhopasiana - Ei khopa chareina lâ/Siena lâ ei khiekhâ/ei vawh ha hra aw.

28 . Meihkia - Lochona, hmiphana, thyutlia pawphana.

Pamosana - Meihkia lo ta hnazô tleih khai ha hrasala.

Chhopasiana - Lochona/ thyutliana/hmiphana zy vaw y khao leipa ta eima hmisâ zy vaw machâ khai ha hrasala

08/07/2025

Châpaw|

MARA REIH LIATA H NATA Â

Rohtuhpa ~
HC Malsawmthanga

Mara reih liata pazao nata pazao lei awpa he bua chai pi ta, he he cha eima hnôh lâ kha ei thaina rakha ta ei vaw roh ha khawh. *'H'* nata *'Â'* hmâna chhao he eima bua via heihpa miakha a châpa ei pahno. Mara reih liata cha peimawh ha tlôh ei ta, thata eimâ chu via chyu â ngiah kaw.

Pazao awpa nata pazao lei awpa he cha, Grammar achupasia ta thai awpa nata pahno awpa â ngiah. Machâ A. Zakia ta a ropa Mara Grammar Bu reih hluh via chyu awpa ta ei cha hrua ei.

Reih (language) he thai awpa ta cha thata achu ta, pahno ta, avao ta ngia awpa â ngiah.

Mara reih he a aony siezie ta 'H' bai pi ta, 'A' luh eima chhô tyh. Chavâta, Mara reih eima ro nota cha Common Language Tlôsaih reih he eima palôhrupa liata parosana chôta eima roh awpa a châ. Eima kaokâh reih chyu parosana chôta eima roh thlâh ha khiahta cha bai lei n'awpa liata bai aw pi ta, bai n'awpa liata eima bai lei thei. Cha hawh pyly ta, 'A' luh chhôh awpa liata chhô thei pi ta, chhô lei awpa liata chhô a nao kaw hra aw. Bie eima reipa liata ahnai bohbi leipa liata 'H' baipa eima hluh kaw. Pamosana ta:

1. Châ ei *roh*.
2. Châ *rona* bu.
3. He bie he ei *pyh*.
4. He bie he *apypa* a châ.
5. Ei *khoh* kaw.
6. *Khona* ei hnei.
7. Eimâ *tlyh*.
8. *Atlyna* eima hnei.
9. Pavaw ei *siah*.
10. Pavaw *siapa* a châ.
11. Film eima *moh*.
12. Film *mo* pha kawpa a châ.

He a chô liata biezy he pakhâta ta eima moh khiahta cha, biesâ miakhapa nairu liata eima aony parosazie hawhta 'H' bai â ngiahna nata ngiah lei daihti a y. Aony parosana liata ahnai bohbi leipa lia taihta 'H' he eima bai thlâh ha tyh.

Rev. Dr Laiu Fachhai ta a reipa hawhta, biekawh (syllable) 2/3/4 etc liata 'H' thata eima bai tyhpa, 'H' apakaoh ngâ tyhpa thokhazy he cha angiah leipa hawhta pachâna ei hnei hra. Pakhâta ta aony parosana dâh eima nahthlie khiahta cha khahawhpa hluhpi kha cha 'H' vaw bai ngâkaw awpa chi a châpa ta pahno va na. Pamosana ta:

1. Rôhnah - *rônah* tahpa ta tlâ ei roh tyh.
2. Hmeihseih - *Hmeiseih* tlâ ei tah tyh.
3. Khihnahrâh - *Khinarâh* tahpa ta ei roh tyh.

Anodeikua, aony liata ahnai bawlaw thlâh hapa, 'H' nata hawrawh hropa â vaw pakaoh nahta parosa chhei rainao kawpa thokha y ta, thokha ta he hawhpa liata la *a buabâ* tahpa eima y. He deikua apykhei hlei va na. He hawhpazy cha â ngiah ha tawhta cha parosana dâh tlâ ngia laih hr'awpa a châ. Pamosana ta:

1. Hriakhohna
2. Khaihna
3. Palôhrupa
4. Angiahna etc

Tawhla, 'H' sâno â pakaoh awpa â ngiahna daihti a y hra. Â pakaohpa hrohrâ ta chhyhthai leipa, *H a hluh* tahpa chhao eima y. English lia cha *S* sâno apakaohpa a hluh kaw. *A buabâ* tah ngâkaw hlei veih ei. Pamosana ta:

1. Râhhmâhpa
2. Lyurâhhripa etc

*Noun* liata la 'H' bai byuh vei, atahpa eima hluh kaw. Eima bai leipa Official Name ta sie hapazy he la pei leipa ta, moh eimâ bi thiehpazy liata deikua la bai thlâh ha ei sih la pha a tahzie Machâ A. Zakia chhaota eina chho; ei pachâna a châ hra. A aony siezie hawhta tlâ siepa he â thlâzi chai. 'Â' nata 'Ô' chhao tlâ hmâh laih ei sih la a phapa ta ei pahno. Pamosana ta:

1). Beicho nata Beichô.
2). Chavah nata Chava.
3). Pasâhsa nata Pasasa.
4). Zotha nata Zôthâh.
5). Pawzô nata Pawzoh etc

Rei chhei a nao ha. He vâ heta Idol zy liata chyhsa moh ama phuah tita ama phuah chhei hluh kaw. Noun liata 'H' bai lei awpa nata 'Â', 'Ô' luhchhôpazy hmâ lei awpa, tahpa ta BML ta vaw pathlu beih vei.

'Â' he hmâh hluh tu ha pi ta, hmâ lei n'awpa liata thata eima hmâh pâ tyh. Pamosana ta:

1. *Achhyna-O* tah awpa liata Âchhyna-O.
2. *A vy mah y* tah awpa liata Â vy mah y.
3. *Ahneina* tah awpa liata Âhneina.
4. *Akhohna* tah awpa liata Âkhohna.
5. *Angia* tah awpa liata Ângia.
6. *Arâpasua* tah awpa liata Ârâpasua etc

He hawhpa liata *'Â*' he hmâ awpa a châ:

1. *Â ngia* kaw.
2. *Â râ* haw.
3. *Kho â pao* kaw.
4. *Â dopa* ta tao teh.

A tlâhp**a ta Prefix (biesâ hmia liata pakaohpa) châta eima hmâna liata *Â* he hmâna a sôh kaw.

08/07/2025

HLÂNO MARAPA KHIHTLÂH

Marapa liata pho eima tahpa he O chhôhkhaohkha phozy tawhta avaw thaopa châ ei ta. Marapa khihtlâh he 'Chapaw ryureina/Patriarchal' ta siepa a châ hapa vâta, chanô pho avaw hly beih veih ei. Chapaw chi pathlazy cha âmo apathlatuhpa pho amâ vaw hly lymâ tyhpa a châ.

Pho paduahna kyh liana heta dyutlaina nata dyutlai leina heta yzie a hnei pasih kawpa avaw châ. Chanô ta pho padua thei vei. A vahpa pho kha â hly tyh. Chapaw pathlazy cha ama vaw pôh via lymâ na ta, pathlazy ama vaw châ lymâ. Ama pathlatuhpa moh cha ama pho châta vaw hmâh lymâpa ta, ano pathla, ano pathla tahpa cha daihti avaw sie lymâpa hawhta, pho lâta avaw pua hapa a vaw châ.

Hlâno Mara Khihtlâh/Society liana khata, khihsa tôtuhna, dyutlaina nata tlai leina nata, hmotaotheina mopâpa ta pho cha chhaih 3 (Hierarchical Order) lâta vaw pachhaih ei ta. Chazy cha :

1. Abei Pho
2. Machhie Pho
3. Sei

tahpazy a châ.

1. ABEI PHO :
Abei pho athaona cha 'Hneirôna nata Hmotaotheina' vâta a châ. Chariah-Sahrâ adyuhna kyh liata vâtlâh apahniehna a châpazy cha Khihtlâh ta mo pasâhpa ta, ama chôta ryureituhpa hawhta mona vaw y ta. Cha chata dusawta ta ama chô liata ryureina raihriatuhpa lâta pachâsapa ta, Abei tahpa ta pahnopa ama vaw châ haw. He hleikhôna heta, hlâno Marapazy khata Khih thiehpa ama paduana daihti liata ama hry tawhta dyutlai kawpa ama y lei khiahta cha, khih hro râh hro liatahpa, Abei châta ama hrua/la tyh. Mararâh liata Abei Pho, Ti nata râh a hneipazy hry liata : Hlychho, Chozah, Bôhia, Nôhro-zy he a lai viapa ama châ.

Hlâno Beizy khata lahpinô pakha hlâta hluh viapa vaw hnei tyh ei ta. Anodeikua, lahpinô hmeiseihpa ta rei thei awpa cha pakha dei ama châ tyh. Ahropazy cha Nôtho tahpa châ ei ta; Nôtho sawzy he cha Abei tlâh ato theipa hawhta pachâpa châ veih ei. Hlâno Abeizy maohphaona kha a sâh ngaita kaw ta, chariah, sahrâ hmia liata Khihsawzy châta abohna nata thlahlôhna châ ei ta. Chakâh-chaphaona kyh liata maohphaohna ama la lymâ tyh. Biebua hlabuapa zydua kha âmo ta pachiapa ta, khihsawzy mohôhtuh chaipa ama châ tahpa ta chhao eima reih thei aw. He vâna heta Khihsawzy chhao ta za ei ta, Chhie, Abei tovyuh ama vaw pie tyhpa a vaw châ.

Hlâno Marapazy khata Abei hnohta chhie vaw pie tyh ei ta, cha zy cha :

'Râhpaw' : Lyurâh a hneipa Beizy ta ama khei tyh. Sâh lâta piepa a châ.

Sabai : Lyurâh a hnei leipa Beizy chhao ta ama khei tyh hra.

Sahaw : Lyurâhsa a kapa maihta sapalaih ama pie tyh.

2. MACHHIE PHO :
Machhie tahpa yzie cha Vâtlâh zawpi tahna a châ. Abeizy hnohta, Râhpaw, Sabai nata Sahaw a piepa maih cha Machhie Pho tahpa ama châ. Machhie pho ta khih thieh râh thieh padua sala, râh tlypa liata khih a padua khiahta cha Abei a châ thei hra. Machhie Pho liana chhao heta hneirôna nata dyutlaina nata tlai leina mopa ta, Machhie Pho phapa nata Pho a hnaipa ama y heih tyh hra.

3. SEI :
Pho athaona liata Sei tahpa he y leipa ta, Sei ta a vaw pihpa chhao y taraw veih ei. Adyuhna liata ama patupazy, Leibâh athô thei leipazy, Nie nata do awpa aphahlana vâta Abei-O angiapazy, Abei sawchanô a parao tlamawpazy cha SEI ama vaw tah tyhpa a châ.

Sei nairu liana chhao heta Pho 2 ta y heih ei ta, Abei Ochhôh liata a ypa Sei nata Abei- O chhôh tawhta Ochâ a chôpa Sei, 'Seiza' ama tahpazy ama châ. 'Seiza' he a duahmo â sâh viapa ta reipa a châ.

Hlâno Marapa Khihtlâh liata Seizy kha ama duahmo a hnai leipa ta, anodeikua, Chanô Sei cha Chapaw sei hlâta a duahmo â sâh via. Hlâno Mara bei hryta pakha a thi nota, a sei chapaw pakha cha a thlâ liata a hrohpa tlai ta pabu hra ei ta, thlâ chhôh liata Viadawh cha Noh 9 chhôh a tô tahpa ta ama rei.

Nothlahpa : Mara beizy

08/07/2025

Mara reih rozie|

AW NATA AWH

Eima châropa liata eima hmâ kawpa, â hlao leipa ta bietlohpa (Sentence) patlô thei awpa a châ tyh leipa hry liata biesâ alâluah kawpa cha 'AW' he a châ. Anodeikua, he he chyhsa hluhpi ta roh pado thei to mâh leipa pi ta, 'AW' tahna awpa liata 'AWH' eima hmâh ha tyh. He he pakhâta ta eima moh heih tua aw.

AW

'AW' he daihti vaw tlô mâh leipa, avaw y awpa 'Future Tense' reina châta hmâ tyhpa châ ta; hmotaopa (verb) châta chhao hmâpa a châ hra.

Future Tense -

'Ei tao aw'
'Ei nie aw'
'Ei sie aw'
'Ei charei aw' etc.

Verb châta -

'Lailai kha vaw aw tua'
'Siasia aw chaimâh na ta thei vei' etc.

AWH

Future Tense 'AW' liata 'H' baipa ta 'AWH' tahpa ta eima roh khiahta cha 'daihti vaw tlô awpa reina' (Future tense) châ khao leipa ta, 'Noun' nata 'Verb' a vaw châ ha tahna châ ta; he hleikhôta H eima baipa vâta aony pahnaipa ta rei awpa a châ.

Noun - 'Awhkhypa'
Verb - 'Tlâh ama awh', 'Athata awh tyh'

He biesâ miano AW (Future Tense ngiana, verb châta chhao â hmâh thei) nata AWH (eima hmâna reizie ta Noun nata Verb a châ theipa)-zy he chyhsa hluhpi ta eima pahlaopahli thlâh ha chy. Pahlaopahli khao lei awpa a châ.

08/07/2025

CH'AW MY BEIH AW MA PI 😭

Vaili nô, Vaili Paw nata Vaili ❤️

Khazohpa nata Mara chipho châta ama hu chhâna taihta aduahpa ta, ama hu a chhâ tawhta chhao he râh nata chipho he khâ miah ama ypâ... 🙏

08/07/2025

REIH MACHÂPA

1. Mie lahmô bâ ta bâ :

Hmotao a saomâ, chatliechakohpa reina.

2. My kha ti doh lei :

Hmo tlyuh leipa, adaih parei leipa.

3. Syhiah via u bawh :

'Nie mah y' ama tah ngâ nota khoh leipa hawhta apa-ysa ta, khoh kaw tlôhpa.

4. Awhtih hawhta chymih :

Pilâhpa unawh tlyma, thyulâhpa tlyma a hnei leipa, pakha deipa reina.

5. Awh ama pai chy ta amâ pachu tyh :

Py tlyma, chhôhkha tlyma ama kei awpa chy, ama paipatla awpa chy zy ta amâ hryuh/tahthai tyh leipa reina.

6. Awhhroh pathlie :

Zawpi ta tlyma, chyhsa pano pathôh ta hria awpa rai tlyma hmotao awpa tlyma pakha deita ta taopa/hriapa reina.

7. Biakô pazao :

Bierei pahâh kawpa nata pachawparaw kawpa reina.

8. Beihtyu phiahtyu :

Khâpa hmahta tao/hria leipa ta atyuh chhôhmoh kawpa ta a tyuh thlâh hapa reina.

9. Bykheihpa hawh :

A hmo hneipa uasa leipa ta chyhsa hmô hneipazy achhuhrao laihpa reina.

10. Bie nata thlih :

Biereipazy a pathâh/â hiezawh chatliezie reina.

08/07/2025

HE RÂHSA HE A MOH NA PAHNO MA?

📸K.Lalmuansanga

07/07/2025

PAWMAIH DINÔZY CHAREINA SIAHA KHIHPI TAWHTA MY PHA.... 😄

Noh hmâ pha u sy..

📸Wild_traveller

07/07/2025

GOVERNOR RYUREINA RY LIATA CADC SOH

Chakma Autonomous District Council (CADC) sawhkhâna sie haipa cha, rairuna nata atymâna, chhôh lâ atymâna vâta ryureina phathipa siekhei theipa ta ama y leipa vâta, Mawrâh Governor biehneina ry (Governor's Rule) liata sopa a châ.

Mara Literature

08/07/2025

08/07/2025

08/07/2025

08/07/2025

08/07/2025

08/07/2025

08/07/2025

08/07/2025

08/07/2025

08/07/2025

07/07/2025

07/07/2025

Address

Website

Alerts

Contact The Business

Shortcuts

Share

Category

Miah vaw charei tyh hra ma y