30/08/2025
ডিমৌত মাদক দ্ৰব্য সেৱন বিৰোধী অভিযান, বাল্য বিবাহ আৰু গৰ্ভৱতী কিশোৰীৰ সামাজিক সমস্যা সন্দৰ্ভত সজাগতা সভা সম্পন্ন।
শিৱসাগৰ জিলা প্ৰশাসনৰ উদ্যোগত, ডিমৌ সংহত শিশু উন্নয়ন প্ৰকল্প বিষয়াৰ কাৰ্যালয়ৰ পৃষ্ঠপোষকতাত তথা স্বাস্থ্য বিভাগ, জিলা শিশু সুৰক্ষা বিষয়াৰ কাৰ্যালয় আৰু জিলা সমাজ কল্যাণ বিভাগৰ সহযোগত মাদক দ্ৰব্য সেৱন বিৰোধী অভিযান, বাল্য বিবাহ আৰু গৰ্ভৱতী কিশোৰীৰ সামাজিক সমস্যা সন্দৰ্ভত আজি শিৱসাগৰ জিলাৰ ডিমৌ স্থিত জ্যোতি-বিষ্ণু সাংস্কৃতিক প্ৰকল্পৰ প্ৰেক্ষাগৃহত এক সজাগতা সভা অনুষ্ঠিত হয়।
অনুষ্ঠানত অংশগ্ৰহণ কৰি অতিৰিক্ত জিলা আয়ুক্ত (সমাজ কল্যাণ) লুকুমণি বড়াই তেওঁৰ বক্তব্যত গৰ্ভৱতী তথা প্ৰসূতি মাতৃৰ লগতে শিশুৰ বাবে স্বাস্থ্য তথা চিকিৎসা সেৱাৰ লগতে পৰিপুষ্টিৰ প্ৰয়োজনীয়তা সম্পৰ্কে সজাগ-সচেতন থকাটো নিতান্তই অপৰিহাৰ্য বুলি উল্লেখ কৰে। গৰ্ভৱতী মহিলাৰ বাবে প্ৰয়োজনীয় পুষ্টিকৰ খাদ্যাভ্যাস, স্বাস্থ্যৰ যতন তথা নিয়মীয়া স্বাস্থ্য পৰীক্ষা সম্পৰ্কে তৃণমূল পৰ্যায়ত অসকৰ্মিসকলক সজাগতা বৃদ্ধিৰ পদক্ষেপ অব্যাহত ৰাখিবলৈও তেওঁ আহ্বান জনায়। নিজ বক্তব্যত তেওঁ বাল্য বিবাহ আৰু কিশোৰী অৱস্থাত গৰ্ভধাৰণৰ ভয়াবহতাৰ বিষয়েও অবগত কৰে। আনহাতে সমাজত বৰ্ধিত ধঁপাত বা অন্যান্য মাদক দ্ৰৱ্য সেৱনৰ প্ৰাদুৰ্ভাৱ দূৰীকৰণৰ দিশতো সকলোকে আগবাঢ়ি আহিবলৈ তেওঁ উৎসাহিত কৰে।
আজিৰ অনুষ্ঠানত আদৰণি বক্তব্য আগবঢ়ায় ভাৰতীয় প্ৰশাসনিক সেৱাৰ বিষয়া তথা সহকাৰী আয়ুক্ত কে. এন. চন্দনা জাহ্নবীয়ে।
আজিৰ অনুষ্ঠানত আলোচ্য বিষয়বস্তুসমূহৰ আধাৰত নিৰ্মিত কেইবাখনো দৃশ্য-শ্ৰাৱ্য প্ৰস্তুতি পৰিবেশন কৰা হয়।
বিভিন্ন বিভাগৰ আমন্ত্ৰিত সমল ব্যক্তিসকলে আজিৰ সজাগতা সভাত আলোচ্য বিষয়সমূহৰ ওপৰত অভিজ্ঞতাপুষ্ট অবলোকন দাঙি ধৰে।আনহাতে অনুষ্ঠানৰ অংশস্বৰূপে কেইবাগৰাকী আশাকৰ্মী, অংগনৱাড়ী কৰ্মী, কৃষিসখীয়ে কৰ্মক্ষেত্ৰত অৰ্জন কৰা নিজ নিজ অভিজ্ঞতা তথা ভাৱ ব্যক্ত কৰে। লগতে স্থানীয় চিকিৎসক আৰু চিকিৎসাকৰ্মী সকলৰ সহযোগিতাত এখনি বিনামূলীয়া স্বাস্থ্য পৰীক্ষণ শিবিৰৰো আয়োজন কৰা হয়।
আজিৰ অনুষ্ঠানত ডিমৌ সম-জিলাৰ সহকাৰী আয়ুক্ত পৰিস্মিতা দিহিঙ্গীয়া, ডিমৌ পৌৰসভাৰ কাৰ্যবাহী বিষয়া মৃত্যুঞ্জয় ভৰালী, জিলা শিশু সুৰক্ষা বিষয়া ডঃ বিকাশ ৰঞ্জন কোঁৱৰ, ডিমৌ আৰক্ষী চকীৰ ভাৰপ্ৰাপ্ত বিষয়া বিছাদু চিংফু, ডিমৌ ছোৱালী উচ্চ মাধ্যমিক বিদ্যালয়ৰ প্ৰধান শিক্ষক উদয় দত্ত, অসম ৰাজ্যিক গ্ৰামীণ জীৱিকা অভিযান, ডিমৌৰ খণ্ড প্ৰকল্প প্ৰবন্ধক মনোজ বৰুৱা, ডিমৌ আদৰ্শ চিকিৎসালয়ৰ উপ-অধীক্ষক ডাঃ ৰূপম বৰকাকতি, ডিমৌ খণ্ড প্ৰাথমিক স্বাস্থ্য কেন্দ্ৰৰ মহকুমা স্বাস্থ্য আৰু চিকিৎসা বিষয়া ডাঃ বিজিত বড়া প্ৰমুখ্যে বিভিন্ন চৰকাৰী বিভাগৰ বিষয়া-কৰ্মচাৰী, স্থানীয় ছাত্ৰ সংগঠনৰ প্ৰতিনিধি বৰ্গ, সংবাদসেৱী, আশাকৰ্মী, অংগনৱাড়ী কৰ্মী, কৃষিসখী, জীৱিকা সখী, গৰ্ভৱতী মহিলা আৰু গৰিষ্ঠসংখ্যক স্থানীয় ৰাইজ উপস্থিত থাকে।
