Aajorri cuisine, Sibsagar (2026)

15/08/2026

Happy Independence Day

14/08/2026

শিয়াল আৰু বান্দৰৰ সাধু
------------------------------
বহুত দিনৰ আগৰ কথা। এখন ডাঙৰ হাবিত এটা শিয়াল আৰু এটা বান্দৰ আছিল। দুয়োৰে মাজত আছিল বৰ বন্ধুত্ব। এদিন দুয়ো লগ লাগি একেলগে খেতি কৰাৰ কথা ভাবিলে।
প্ৰথম বছৰৰ খেতি:
প্ৰথমে দুয়ো লগ লাগি কুঁহিয়াৰ খেতি কৰিলে। খেতি বৰ ভাল হ'ল। যেতিয়া কুঁহিয়াৰবোৰ পকিল, টেঙৰ শিয়ালটোৱে বান্দৰটোক ক'লে, "মিত্ৰ, তুমি কুঁহিয়াৰ গছৰ আগৰ অংশটো লোৱা, মই গুৰিৰ অংশটো ল'ম।"
নিৰ্বোধ বান্দৰটোৱে ভাবিলে, গছৰ আগৰ সেউজীয়া পাতবোৰ দেখিবলৈ ধুনীয়া, সেয়ে সি আগৰ অংশটো ল'বলৈ মান্তি হ'ল। ফলত শিয়ালটোৱে ৰসাল আৰু মিঠা কুঁহিয়াৰবোৰ খাবলৈ পালে আৰু বান্দৰটোৰ ভাগত কেৱল শুকান পাতবোৰহে পৰিল। বান্দৰটোৱে বৰ দুখ পালে আৰু আক্ষেপ কৰিলে।
দ্বিতীয় বছৰৰ খেতি:
পিছৰ বছৰ দুয়ো লগ লাগি ধান খেতি কৰিলে। ধানবোৰ পকি সোণোৱালী হৈ পৰিল। এইবাৰ বান্দৰটোৱে ভাবিলে যে সি আগৰবাৰৰ দৰে কেতিয়াও ঠগ নাখায়। সি শিয়ালক আগতেই ক'লে, "মিতা, এইবাৰ কিন্তু মই গছৰ গুৰিৰ অংশটো ল'ম, তুমি আগৰ অংশটো ল'বা।" শিয়ালে মিচিকিয়াকৈ হাঁহি সন্মতি দিলে।
যেতিয়া ধান কটাৰ সময় হ'ল, বান্দৰটোৱে ধান গছৰ গুৰিৰ অংশ অৰ্থাৎ নৰা আৰু খেৰবোৰ কাটি লৈ গ'ল। আনহাতে, শিয়ালে গছৰ আগৰ অংশ অৰ্থাৎ পকা ধানৰ থোকবোৰ লৈ গ'ল। ঘৰলৈ গৈ বান্দৰটোৱে দেখিলে যে তাৰ ভাগত কেৱল খেৰহে পৰিল, খাবলৈ একো নাই! আনপিনে শিয়ালে মজা কৰি ধানৰ পৰা চাউল উলিয়াই সুন্দৰকৈ ভাত খাবলৈ ধৰিলে।
তেতিয়াহে বান্দৰটোৱে বুজি পালে যে তাৰ নিজৰ মূৰ্খামিৰ বাবেই সি দুবাৰকৈ ঠগ খালে।
নীতিকথা: কোনো কাম কৰাৰ আগতে বা কোনো সিদ্ধান্ত লোৱাৰ আগতে ভালদৰে ভাবি-চিন্তি লোৱা উচিত। নহ'লে মূৰ্খামিৰ বাবে আনৰ হাতত ঠগ খাবলগীয়া হয়।

#সাধু