09/08/2026
🐍 ৪০০০
৪০০০ এটা সংখ্যা।কিন্তু আমাৰ বাবে এইটো কেৱল এটা সংখ্যা নহয়।এই ৪০০০টা সংখ্যাৰ আঁৰত আছে ৪০০০টা জীৱন,৪০০০টা পৰিয়াল,৪০০০টা আতংকিত মুহূৰ্ত,৪০০০টা মাতৃৰ চকুৰ পানী,৪০০০টা পিতৃৰ প্ৰাৰ্থনা আৰু ৪০০০টা ডিমৌ গ্ৰাম্য হাস্পতালৰ সমূহ স্বাস্থ্যকৰ্মীৰ অসংখ্য নিদ্ৰাহীন ৰাতি!
চলিত বৰ্ষৰ ৭ আগষ্ট তাৰিখে ডিমৌ গ্ৰাম্য হাস্পতালে ৪০০০ সংখ্যক সৰ্প দংশনত আক্ৰান্ত ভুক্তভোগীক চিকিৎসা আগবঢ়ায়।এইয়া এখন চৰকাৰী গ্ৰাম্য হাস্পতালৰ ওপৰত ৰাইজে ৰখা বিশ্বাসৰ উত্তৰ।কালিলৈ কি হ'ব আমি নাজানোঁ।কিন্তু এই মুহূৰ্তত আমাৰ দলে অত্যন্ত সুখী অনুভৱ কৰিছে।
কিন্তু এই যুঁজখন কেৱল সৰ্পৰ বিহৰ বিৰুদ্ধে নাছিল।এই যুঁজখন আছিল দৰিদ্ৰতাৰ বিৰুদ্ধেও।আমাৰ ৪০০০ জন ভুক্তভোগীৰ প্ৰায় ৯৬% আৰ্থিকভাৱে অতি দুৰ্বল পৰিয়ালৰ আছিল।তেওঁলোকৰ বাবে সৰ্প দংশন কেৱল জীৱনৰে বিপদ নাছিল,সেইয়া অত্যধিক চিকিৎসা ব্যয়ৰ এক নতুন আতংকও আছিল।কাৰণ ব্যক্তিগত চিকিৎসালয়ত ২০টা এণ্টীভেনমৰ মূল্য প্ৰায় ₹১৬,০০০।তাৰ পিছত ঔষধ,তেজৰ পৰীক্ষা,অন্যান্য চিকিৎসাৰ খৰচ!এদিনতেই বিল প্ৰায় ₹২৫,০০০ বা তাতকৈ অধিক হোৱাৰ অৱকাশ থাকে।এজন দৰিদ্ৰ মানুহৰ বাবে ₹২৫,০০০ মানে ₹২৫ লাখৰ সমান।ভুক্তভোগীৰ পৰিয়ালৰ বাবে সেই টকা যোগাৰ কৰিবলৈ হয়তো গৰু বিক্ৰী কৰিব লাগিব,মাটিৰ টুকুৰা বন্ধকত দিব লাগিব,ধাৰ কৰিব লাগিব বা কেতিয়াবা জীৱনজোৰা সঞ্চয় শেষ কৰিব লাগিব।এনে পৰিস্থিতিত সৰ্পদংশনৰ চিকিৎসাক ব্যক্তিগতকৰণ কৰাৰ প্ৰশ্নই নুঠে! আপাত-দৃষ্টিত আমাৰ দলে দুৰ্ভগীয়া ৪০০০ পৰিয়ালৰ গাঁঠিৰ ধনকো সুৰক্ষা দিছিল।
সৰ্প দংশনৰ চিকিৎসা কোনো বিলাসী চিকিৎসা নহয়।ই কোনো ধনী মানুহৰ বিশেষ অধিকাৰ নহয়।কোনো দুখীয়া মানুহৰ ভাগ্যৰ ওপৰত এৰি দিবলগীয়া বিষয়ো নহয়!সৰ্প দংশনৰ চিকিৎসা প্ৰতিজন মানুহৰ জীৱন ৰক্ষাৰ অধিকাৰ।
আমাৰ চৰকাৰী গ্ৰাম্য হাস্পতালত কৃত্ৰিম শ্বাস-প্ৰশ্বাসৰ সম্পূৰ্ণ সুবিধা নথকাৰ বাবে ৪০০০ জনৰ ভিতৰত মাত্ৰ ৪ জনকহে ওচৰৰ ব্যক্তিগত চিকিৎসালয়লৈ স্থানান্তৰ কৰিবলগীয়া হৈছিল।অৰ্থাৎ,অধিকাংশ ক্ষেত্ৰতে,সৰ্প দংশনৰ চিকিৎসা চৰকাৰী গ্ৰাম্য চিকিৎসালয়তেই সম্ভৱ হৈছিল।
আমাৰ ৰাইজে মনত ৰখা উচিত যে অসমৰ সকলো গ্ৰাম্য হাস্পতাল,জিলা হাস্পতাল আৰু চিকিৎসা মহাবিদ্যালয়সমূহত সৰ্প দংশনৰ চিকিৎসাৰ সু-ব্যৱস্থা আছে।৪% আৰ্থিকভাৱে স্বচ্ছল ভুক্তভোগীয়ে চৰকাৰী চিকিৎসালয়ৰ বিভিন্ন অজুহাত দেখুৱাই ব্যক্তিগত চিকিৎসালয়ত ভৰ্তি হ’বলৈ আমাক প্ৰায়ে হেঁচা প্ৰয়োগ কৰা আমি প্ৰত্যক্ষ কৰিছিলোঁ,যিটো আমাৰ পক্ষে একেবাৰে সম্ভৱ নাছিল।
সেয়েহে অসমৰ ৰাইজে এটা কথা মনত গভীৰভাৱে সোমাই দিয়ক।সৰ্পই দংশন কৰিলে,প্ৰথম গন্তব্য স্থান সদায় ওচৰৰ চৰকাৰী চিকিৎসালয়!
আপুনি ধনী হওক বা দুখীয়া হওক।আপোনাৰ হাতত টকা থাকক বা নাথাকক।সৰ্প দংশনৰ পিছত ওচৰৰ চৰকাৰী চিকিৎসালয়লৈ যাওক।অন্ততঃ ২৪ ঘণ্টা চিকিৎসালয়ত পৰ্যৱেক্ষণত থকাটো অতিকৈ জৰুৰী।সৰ্প দংশনৰ পাছত সময় অতিকৈ মূল্যবান।হাস্পতালে হাস্পতালে ঢপলিয়াব নালাগে।দূৰৰ হাস্পতাললৈ বুলি কেতিয়াও ঢাপলি মেলিব নালাগে!
টকা নথকাৰ বাবে কোনো ৰাইজৰ সৰ্প দংশনৰ চিকিৎসাত যেন বাধা নাহে! প্ৰাণ যেন হেৰুৱাব লগাত নপৰে তাৰেই আমি আশা ৰাখিলোঁ।আমাৰ ৪০০০টা যুঁজৰ প্ৰতিটো মুহূৰ্তই আমাক এটাই কথাই শিকাইছে—সৰ্প দংশনৰ চিকিৎসা মানুহৰ জীৱন বচোৱাৰ বিষয়!
৪০০০টা জীৱনৰ যুঁজত ডিমৌ গ্ৰাম্য হাস্পতালৰ স্বাস্থ্যকৰ্মীসকলৰ প্ৰতিজন যোদ্ধালৈ আমাৰ আন্তৰিক কৃতজ্ঞতা থাকিল।
আমাৰ এই দলগত 'এঘড়ী যুঁজ' চলি থাকিব—
ধন্যবাদেৰে -
ডাঃ সুৰজিত গিৰি
সৰ্প দংশনৰ সামাজিক কৰ্মকৰ্তা
সদস্য,ৰাষ্ট্ৰীয় কাৰিকৰী পৰামৰ্শদাতা
স্বাস্থ্য মন্ত্ৰালয়,ভাৰত চৰকাৰ
ডিমৌ গ্ৰাম্য চিকিৎসালয়
শিৱসাগৰ
ফ'ন: ৯৪৩৫০৫৬৬২৭
