14/06/2026
डुवर्सेली गोर्खा भवन निर्माणले पायो नयाँ गति, मन्त्री विशाल लामा र विधायक लछुमण लिम्बुद्वारा सहयोगको प्रतिबद्धता
सिलगढी, चम्पासारी–मिलनमोडस्थित एक होटलमा आज डुवर्सेली गोर्खा भवन निर्माण समितिको वार्षिक सभा भव्य रूपमा सम्पन्न भएको छ। सभामा पूर्व, मध्य तथा पश्चिम डुवर्ससहित सिलगढी–तराई क्षेत्रमा बसोबास गर्ने डुवर्सेली सर्जक, समाजसेवी तथा कार्यकारिणी सदस्यहरूको उल्लेखनीय उपस्थिति रहेको थियो।
बिहान १०:३० बजेदेखि सुरु भएको सभामा हालै निर्वाचित पाँचै जना गोर्खा विधायकहरूलाई सम्मान गर्न निमन्त्रणा गरिएको थियो। कार्यक्रममा राज्य मन्त्री श्री विशाल लामा, खरसाङका विधायक श्री सोनाम लामा तथा मदारीहाट विधानसभा क्षेत्रका विधायक श्री लछुमण लिम्बुको विशेष उपस्थिति रहेको थियो।
सम्बोधनका क्रममा राज्य मन्त्री श्री विशाल लामाले आफू लामो समयदेखि डुवर्सेली गोर्खा भवन निर्माण समितिसँग आबद्ध रहेको उल्लेख गर्दै भवन निर्माण कार्यलाई पूर्ण सहयोग गर्ने प्रतिबद्धता व्यक्त गर्नुभयो। त्यसैगरी विधायक श्री लछुमण लिम्बुले पनि निर्माण अभियानमा आफ्नो पूर्ण समर्थन र सहयोग रहने विश्वास दिलाउनुभयो।
सभामा डुवर्सेली गोर्खा भवन निर्माण समितिको कार्यकारिणी समितिलाई पुनर्गठन समेत गरिएको छ। अध्यक्ष श्री दावा बोम्जनले नयाँ पदाधिकारीहरूको नाम घोषणा गर्दै जयगाउँका सर्जक तथा समाजसेवी श्री पेमा रोइकालाई सचिव, श्री सुवर्ण क्षेत्रीलाई कोषाध्यक्ष तथा श्री मनोज प्रधानलाई प्रवक्ताको जिम्मेवारी प्रदान गरिएको जानकारी दिनुभयो।
त्यसैगरी वीरपाडा दलमोरका श्री स्वागन थापालाई मुख्य संयोजक चयन गरिएको छ भने पूर्व, मध्य र पश्चिम डुवर्सबाट क्रमशः श्री जगन्नाथ उपाध्याय, श्री सुरज भुजेल र श्रीमती मीरा विश्वकर्मालाई उपसभापति चयन गरिएको छ। साथै श्री सञ्जय तामाङ, सुश्री रचना थापा, श्री भोजराज भुजेल, श्री उदिप राणा तथा डेनियल छेत्रीलाई कार्यकारिणी समितिमा समावेश गरिएको छ।
कार्यक्रममा डा. जीवन राणा, डा. असुधा मंगर, डा. सुदास लामा, श्री पंकज लामा लगायत विभिन्न क्षेत्रका विशिष्ट व्यक्तित्वहरूको पनि उपस्थिति रहेको थियो। नवगठित कार्यकारिणी समितिले आगामी योजना तथा भवन निर्माण कार्यलाई तीव्र रूपमा अगाडि बढाउने विषयमा विस्तृत छलफल गरेको जनाएको छ।
यसअघि सांसद श्री राजु बिष्ट तथा श्री मनोज तिग्गाले समेत डुवर्सेली गोर्खा भवन निर्माण समितिलाई आर्थिक सहयोग उपलब्ध गराउने घोषणा गरिसकेका छन्। अब थप आर्थिक स्रोत संकलन गरी चाँडै भवनको लागि निर्धारित जमिनको पञ्जीकरण प्रक्रिया पूरा गरेर निर्माण कार्य अघि बढाउने सहमति भएको महासचिव श्री प्रभात थापा मंगरले विज्ञप्तिमार्फत जानकारी दिनुभएको छ।
