http://www.singarayakondaupdates.blogspot.com/

Singarayakonda Updates, Singarayakonda (2026)

09/09/2026

మన ఊరు - మన వార్తలు
నేటి సింగరాయకొండ వార్తలు :: September 9, 2026

#సింగరాయకొండ #అప్డేట్స్
Singarayakonda Updates

08/09/2026

పేద విద్యార్థుల ఆహారంలో అవకతవకలకు పాల్పడితే కఠిన చర్యలు: ఏపీ ఫుడ్ కమిషన్ చైర్మన్ విజయ్ ప్రతాప్ రెడ్డి

సింగరాయకొండలో గురుకులాలు, హాస్టల్, రేషన్ షాపుల్లో ఆకస్మిక తనిఖీలు

సింగరాయకొండ, సెప్టెంబర్ 8: పేద, బడుగు, బలహీన వర్గాల పిల్లల కోసం ప్రభుత్వం అమలు చేస్తున్న పౌష్టికాహార పథకాల్లో అక్రమాలు, అలసత్వానికి తావులేదని ఏపీ రాష్ట్ర ఫుడ్ కమిషన్ చైర్మన్ విజయ్ ప్రతాప్ రెడ్డి స్పష్టం చేశారు. నిర్ణయించిన మెనూ ప్రకారం నాణ్యమైన ఆహారం అందించకపోతే బాధ్యులైన అధికారులపై కఠిన చర్యలు తీసుకుంటామని హెచ్చరించారు.

మంగళవారం సింగరాయకొండ మండలంలో పర్యటించిన ఆయన ముందుగా డాక్టర్ బి.ఆర్. అంబేడ్కర్ గురుకుల బాలికల పాఠశాలను ఆకస్మికంగా తనిఖీ చేశారు. తరగతి గదులు, వంటశాల, స్టోర్ రూమ్‌లను పరిశీలించడంతో పాటు విద్యార్థినులతో నేరుగా మాట్లాడి భోజనం, వసతి, తాగునీటి సౌకర్యాల గురించి తెలుసుకున్నారు.

సుమారు 700 మంది విద్యార్థినులు ఉన్న గురుకులంలో ఆహారం, వసతులు బాగున్నాయని విద్యార్థినులు చెప్పడంతో ఆయన సంతృప్తి వ్యక్తం చేశారు. స్టాక్ రిజిస్టర్లు, సరుకుల నిర్వహణ పారదర్శకంగా ఉండటాన్ని అభినందించారు. వంటశాలకు మరికొన్ని ఆధునిక పరికరాలు అవసరమని గుర్తించి, ప్రభుత్వం దృష్టికి తీసుకెళ్లి నిధుల మంజూరుకు కృషి చేస్తామని తెలిపారు.

అనంతరం సింగరాయకొండలోని రెండు చౌక ధరల దుకాణాలను తనిఖీ చేసి సరుకుల నిల్వలు, పంపిణీ తీరును పరిశీలించారు. చిల్లర సమస్య లేకుండా రేషన్ దుకాణాల్లో PhonePe లేదా ఇతర QR స్కానర్ల ద్వారా డిజిటల్ చెల్లింపులను ప్రోత్సహించాలని సూచించారు. లబ్ధిదారుల నుంచి అదనంగా ఒక్క రూపాయి వసూలు చేసినా, బియ్యానికి బదులుగా నగదు ఇచ్చే అక్రమాలకు పాల్పడినా క్రిమినల్ చర్యలు తప్పవని హెచ్చరించారు.

అంగన్‌వాడీ కేంద్రాల పనితీరును సమీక్షించిన ఆయన, గతంతో పోలిస్తే నిర్వహణ మెరుగుపడిందని పేర్కొన్నారు. అయితే సిబ్బంది కేంద్రాలకు రాకుండా హాజరు నమోదు చేయడం వంటి చర్యలను సహించేది లేదన్నారు. చిన్నారులు, గర్భిణులు, బాలింతలకు పరిశుభ్రమైన, పోషక విలువలతో కూడిన ఆహారాన్ని మెనూ ప్రకారం అందించాలని ఆదేశించారు.

చివరగా ప్రభుత్వ సాంఘిక సంక్షేమ శాఖ బాలుర వసతి గృహాన్ని సందర్శించి వసతి, విద్యుత్, తాగునీరు, భోజన నాణ్యతను పరిశీలించారు. హాస్టల్ నిర్వహణ, ఆహార నాణ్యతపై సంతృప్తి వ్యక్తం చేశారు. అంతకుముందు కొండేపి గురుకుల పాఠశాలను కూడా ఆయన తనిఖీ చేశారు.

ఈ పర్యటనలో డీఎస్‌వో పద్మశ్రీ, సాంఘిక సంక్షేమ శాఖ డీడీ లక్ష్మానాయక్తో పాటు వివిధ శాఖల అధికారులు పాల్గొన్నారు.

#సింగరాయకొండ

08/09/2026

𝗣𝗿𝗶𝗺𝗲𝟵 𝗡𝗲𝘄𝘀 - ప్రకాశం జిల్లా సింగరాయకొండలో కోట్ల రూపాయలు వెచ్చించి ట్రాంక్ రోడ్డు నిర్మాణం చేపట్టినప్పటికీ రోడ్లకు ఇరువైపులా ఉన్న ఆక్రమణల కారణంగా చిన్నపాటి వర్షాలకె రోడ్డుపై నీరు నిలువ ఉండి వాహన చోదకులు, పాదాచారులు అనేక వ్యవస్థలను ఎదుర్కొంటున్నారు.

08/09/2026

మన ఊరు - మన వార్తలు
నేటి సింగరాయకొండ వార్తలు :: September 8, 2026

#సింగరాయకొండ #అప్డేట్స్
Singarayakonda Updates

07/09/2026

వినాయక మండపాలకు పోలీసుల అనుమతి తప్పనిసరి.. DJలకు అనుమతి లేదు

పాకల సముద్రతీరంలో సాయంత్రం 7 గంటల్లోపే నిమజ్జనం పూర్తి చేయాలి: సింగరాయకొండ పోలీసులు

సింగరాయకొండ: వినాయక చవితి ఉత్సవాల సందర్భంగా సింగరాయకొండ సర్కిల్ పరిధిలో ఏర్పాటు చేసే వినాయక మండపాలకు పోలీసుల అనుమతి తప్పనిసరి అని పోలీసులు తెలిపారు. నిబంధనలు పాటిస్తూ ఉత్సవాలను భక్తిశ్రద్ధలతో, ప్రశాంత వాతావరణంలో నిర్వహించాలని సూచించారు.

ఉన్నతాధికారుల ఆదేశాల మేరకు వినాయక మండపాల వద్దగానీ, వినాయక విగ్రహాల ఊరేగింపుల్లోగానీ DJలు ఏర్పాటు చేసేందుకు ఎటువంటి అనుమతి లేదని స్పష్టం చేశారు. నిర్వాహకులు DJలు ఏర్పాటు చేయాలనే ఆలోచనను విరమించుకోవాలని, ఇప్పటికే DJల కోసం అడ్వాన్స్ చెల్లించిన వారు తిరిగి తీసుకోవాలని సూచించారు.

అలాగే పాకల సముద్రతీరంలో వినాయక నిమజ్జనానికి సాయంత్రం 7 గంటల్లోపే అనుమతి ఉంటుందని తెలిపారు. నిర్వాహకులు నిర్ణీత సమయాన్ని పాటించి పోలీసులకు సహకరించాలని కోరారు.

పండుగ సందర్భంగా ఎటువంటి అవాంఛనీయ సంఘటనలకు తావులేకుండా ప్రతి ఒక్కరూ పోలీసు శాఖకు సహకరించి, ఆనందంగా, ప్రశాంత వాతావరణంలో వినాయక చవితి ఉత్సవాలను జరుపుకోవాలని సింగరాయకొండ ఎస్సై లేళ్ల సుధీర్ కుమార్ కోరారు.

సీఐ వై. శ్రీహరి ఆధ్వర్యంలో సింగరాయకొండ సర్కిల్ పరిధిలో నిబంధనల అమలుపై ప్రత్యేక దృష్టి సారిస్తున్నట్లు తెలిపారు.

#సింగరాయకొండ

07/09/2026

వారం రోజులలో తౌషిక్ కుటుంబానికి న్యాయం చేయకపోతే పోరాటానికి సిద్ధం: బీసీవై పార్టీ బోడే రామచంద్ర యాదవ్

సింగరాయకొండ అప్డేట్స్: సింగరాయకొండలోని శ్రీ చైతన్య నవోదయ స్కూల్‌లో సుమారు ఆరు నెలల క్రితం అనుమానాస్పదంగా మృతి చెందిన ఆరో తరగతి విద్యార్థి సయ్యద్ తౌషిక్ కుటుంబాన్ని బీసీవై పార్టీ అధినేత బోడే రామచంద్ర యాదవ్ పరామర్శించారు. బాధిత తల్లిదండ్రులతో మాట్లాడి ఘటనకు సంబంధించిన వివరాలను అడిగి తెలుసుకున్న ఆయన, కుటుంబానికి అండగా ఉంటామని భరోసా ఇచ్చారు.

ఒంగోలులో ఓ కార్యక్రమానికి హాజరయ్యేందుకు పుంగనూరు నుంచి ఒంగోలు వెళ్తున్న బోడే రామచంద్ర యాదవ్‌ను, మార్గమధ్యంలో బీసీవై పార్టీ ప్రకాశం జిల్లా మైనారిటీ అధ్యక్షుడు నజీర్ బాషా ఆధ్వర్యంలో సింగరాయకొండ హైవేపై కలిసి తౌషిక్ కుటుంబం ఎదుర్కొంటున్న పరిస్థితిని ఆయన దృష్టికి తీసుకెళ్లారు. అనంతరం బాధిత కుటుంబాన్ని కలిసిన రామచంద్ర యాదవ్, తౌషిక్ తల్లిదండ్రుల నుంచి ఘటనకు సంబంధించిన వివరాలను తెలుసుకున్నారు.

ఈ సందర్భంగా “మీరు ధైర్యంగా ఉండండి.. మీకు జరిగిన నష్టాన్ని ఎవరూ పూడ్చలేరు. కానీ జరిగిన అన్యాయానికి న్యాయం జరిగేలా మీకు అండగా ఉంటాను” అంటూ కుటుంబానికి భరోసా ఇచ్చారు.

అనంతరం మీడియాతో మాట్లాడిన రామచంద్ర యాదవ్, ఘటన జరిగి ఆరు నెలలు గడుస్తున్నా బాధిత కుటుంబానికి న్యాయం జరగలేదని ఆరోపించారు. న్యాయం కోసం పోరాడుతున్న తల్లిదండ్రులకు అండగా నిలవాల్సింది పోయి వారిని భయపెట్టే ప్రయత్నాలు జరుగుతున్నాయని విమర్శించారు. రాష్ట్రంలో శాంతిభద్రతల పరిస్థితిపైనా ఆయన ఆందోళన వ్యక్తం చేశారు.

శ్రీ చైతన్య నవోదయ కోచింగ్ సెంటర్ హాస్టల్‌కు అవసరమైన అనుమతులు లేవని ఆరోపించిన ఆయన, దీనిపై విద్యాశాఖ అధికారులు వెంటనే విచారణ జరిపి చర్యలు తీసుకోవాలని డిమాండ్ చేశారు. అనుమతులు లేకుండా హాస్టల్ నిర్వహిస్తున్నట్లు తేలితే విద్యాసంస్థతో పాటు బాధ్యత వహించాల్సిన సంబంధిత అధికారులపైనా చర్యలు తీసుకోవాలని కోరారు.

“తౌషిక్ మృతికి సంబంధించి బాధ్యులెవరో గుర్తించి వారం రోజుల్లో చర్యలు తీసుకోవాలి. హాస్టల్ అనుమతుల అంశంపైనా విద్యాశాఖ అధికారులు స్పందించాలి. లేకపోతే బాధిత కుటుంబం తరఫున బీసీవై పార్టీ తీవ్రంగా స్పందించి పోరాటం చేస్తుంది” అని బోడే రామచంద్ర యాదవ్ హెచ్చరించారు.

#సింగరాయకొండ

07/09/2026

సింగరాయకొండ అంబేడ్కర్ గురుకులంలో ‘అనంత అరణ్య మోడల్’ ప్లాంటేషన్

విద్యాసంస్థలను పర్యావరణ హిత క్యాంపస్‌లుగా తీర్చిదిద్దాలి: మంత్రి డోలా

సింగరాయకొండ, సెప్టెంబర్ 6: ప్రభుత్వ సంక్షేమ విద్యాసంస్థల్లో పచ్చదనాన్ని పెంపొందించి, విద్యార్థులకు ఆహ్లాదకరమైన, ఆరోగ్యకరమైన వాతావరణాన్ని అందించాలని రాష్ట్ర సాంఘిక సంక్షేమ శాఖ మంత్రి డా. డోలా శ్రీ బాల వీరాంజనేయ స్వామి అన్నారు.

సింగరాయకొండ గ్రామ పంచాయతీ పరిధిలోని డాక్టర్ బి.ఆర్. అంబేడ్కర్ గురుకుల పాఠశాలలో ‘నెట్ జీరో హెల్త్ క్యాంపస్’ ప్రాజెక్టులో భాగంగా ‘అల్ట్రా హై డెన్సిటీ ప్లాంటేషన్ – అనంత అరణ్య మోడల్’ కార్యక్రమాన్ని ఆదివారం మంత్రి ప్రారంభించి మొక్కలు నాటారు.

అతి తక్కువ స్థలంలో, తక్కువ సమయంలోనే దట్టమైన అడవిని తలపించేలా ఈ ప్లాంటేషన్‌ను అభివృద్ధి చేయనున్నట్లు తెలిపారు. దీని ద్వారా క్యాంపస్‌లో పచ్చదనం, ఆక్సిజన్ స్థాయిలు పెరిగి విద్యార్థులకు స్వచ్ఛమైన గాలి, ఆహ్లాదకరమైన వాతావరణం లభిస్తుందని మంత్రి పేర్కొన్నారు.

“పాఠశాలలు కేవలం చదువు చెప్పే కేంద్రాలుగానే కాకుండా విద్యార్థుల శారీరక, మానసిక వికాసానికి దోహదపడే పచ్చని నిలయాలుగా మారాలి” అని మంత్రి అన్నారు. మొక్కలు నాటడంతోనే బాధ్యత ముగియదని, వాటి సంరక్షణలో విద్యార్థులు, ఉపాధ్యాయులు భాగస్వాములు కావాలని సూచించారు. చిన్నతనం నుంచే పర్యావరణ పరిరక్షణపై అవగాహన పెంపొందించాలని పేర్కొన్నారు.

కార్యక్రమంలో ఒంగోలు ఆర్డీవో చంద్రశేఖర్ నాయుడు, డ్వామా పీడీ జోసెఫ్, తహసీల్దార్ రాజేష్, పాఠశాల ప్రిన్సిపాల్, ఉపాధ్యాయులు, అధికారులు, సిబ్బంది, విద్యార్థులు పెద్ద సంఖ్యలో పాల్గొని మొక్కలు నాటారు.

#సింగరాయకొండ

07/09/2026

పాకలలో 1,547 మంది రైతులకు పట్టాదారు పాసు పుస్తకాల పంపిణీ

రాజముద్రతో నూతన పాసు పుస్తకాలు అందజేసిన మంత్రి డోలా

సింగరాయకొండ, సెప్టెంబర్ 6: సింగరాయకొండ మండలం పాకల గ్రామంలో 1,547 మంది రైతులకు అధికారిక రాజముద్రతో కూడిన నూతన పట్టాదారు పాసు పుస్తకాల పంపిణీ కార్యక్రమాన్ని ఆదివారం నిర్వహించారు. రాష్ట్ర సాంఘిక సంక్షేమ శాఖ మంత్రి డా. డోలా శ్రీ బాల వీరాంజనేయస్వామి ముఖ్య అతిథిగా పాల్గొని రైతులకు పాసు పుస్తకాలను అందజేశారు.

ఈ సందర్భంగా మంత్రి మాట్లాడుతూ గత ప్రభుత్వ హయాంలో పట్టాదారు పాసు పుస్తకాలపై నాటి ముఖ్యమంత్రి చిత్రాలను ముద్రించడం ద్వారా ప్రచారానికి ప్రాధాన్యత ఇచ్చారని విమర్శించారు. ప్రస్తుతం రైతులకు పూర్తి గౌరవం ఇస్తూ ఎలాంటి వ్యక్తిగత ప్రచారం లేకుండా ఆంధ్రప్రదేశ్ ప్రభుత్వ అధికారిక రాజముద్రతో పాసు పుస్తకాలను అందిస్తున్నట్లు తెలిపారు.

ప్రకాశం జిల్లాలో మొత్తం 516 గ్రామాలు ఉండగా, సర్వేకు అనుకూలమైన 497 గ్రామాల్లో ఇప్పటివరకు 287 గ్రామాల్లో రీ-సర్వే పూర్తయిందని మంత్రి వెల్లడించారు. ఆగస్టు వరకు 201 గ్రామాలకు సంబంధించి 94,676 పాసు పుస్తకాలు పంపిణీ చేసినట్లు తెలిపారు.

కొండపి నియోజకవర్గంలో ఆగస్టు వరకు 16,876 పాసు పుస్తకాలు, సింగరాయకొండ మండలంలో 2,329 పాసు పుస్తకాలు పంపిణీ చేసినట్లు చెప్పారు. తాజాగా పాకలలో 1,547 మంది రైతులకు హక్కు పత్రాలు అందిస్తున్నామని, మిగిలిన గ్రామాల్లోనూ షెడ్యూల్ ప్రకారం పంపిణీ పూర్తి చేస్తామని పేర్కొన్నారు.

రైతుల సంక్షేమమే ప్రభుత్వ ప్రధాన లక్ష్యమని, ‘అన్నదాత సుఖీభవ’ ద్వారా ప్రతి రైతు కుటుంబానికి ఏడాదికి రూ.20 వేల పెట్టుబడి సాయం అందిస్తున్నట్లు మంత్రి తెలిపారు. నాణ్యమైన ఎరువులు, విత్తనాలతో పాటు సబ్సిడీపై వ్యవసాయ యంత్ర పరికరాలు, అధునాతన డ్రోన్లను రైతులకు అందుబాటులోకి తీసుకొస్తున్నట్లు చెప్పారు.

మారుతున్న వాతావరణ పరిస్థితులు, ఎల్‌నినో ప్రభావంపై గ్రామస్థాయిలో రైతులకు అవగాహన కల్పించాలని వ్యవసాయ అధికారులను మంత్రి ఆదేశించారు.

కార్యక్రమంలో ఆర్డీవో చంద్రశేఖర్ నాయుడు, తహసీల్దార్ రాజేష్, స్థానిక ప్రజాప్రతినిధులు, అధికారులు, పెద్ద సంఖ్యలో రైతులు పాల్గొన్నారు.

#సింగరాయకొండ #పాకల

07/09/2026

మన ఊరు - మన వార్తలు
నేటి సింగరాయకొండ వార్తలు :: September 7, 2026

#సింగరాయకొండ #అప్డేట్స్
Singarayakonda Updates

06/09/2026

స్థానిక సంస్థల ఎన్నికల కోసం జనసేన కమిటీలో ఐనాబత్తిన రాజేష్‌కు చోటు

ఒంగోలు పార్లమెంట్ పరిధి సపోర్ట్ టీమ్ సభ్యుడిగా నియామకం

సింగరాయకొండ అప్డేట్స్: రానున్న స్థానిక సంస్థల ఎన్నికల నిర్వహణకు జనసేన పార్టీ ఏర్పాటు చేసిన పార్లమెంట్ నియోజకవర్గాల వారీ సమన్వయ కమిటీలో సింగరాయకొండకు చెందిన జనసేన నాయకుడు ఐనాబత్తిన రాజేష్‌కు కీలక బాధ్యత లభించింది.

జనసేన పార్టీ కేంద్ర కార్యాలయం సెప్టెంబర్ 5న విడుదల చేసిన వివరాల ప్రకారం, ఒంగోలు పార్లమెంట్ నియోజకవర్గానికి ఏర్పాటు చేసిన సపోర్ట్ టీమ్‌లో ఐనాబత్తిన రాజేష్‌ను సభ్యుడిగా నియమించారు. స్థానిక సంస్థల ఎన్నికల కోసం పార్లమెంట్ నియోజకవర్గాల వారీగా సమన్వయ కమిటీలను పార్టీ అధినేత, రాష్ట్ర ఉప ముఖ్యమంత్రి పవన్ కళ్యాణ్ నియమించినట్లు ప్రకటనలో పేర్కొన్నారు.

ఒంగోలు, నెల్లూరు పార్లమెంట్ నియోజకవర్గాలకు తమ్మిరెడ్డి శివశంకర్ సమన్వయకర్తగా నియమితులయ్యారు. ఒంగోలు సమన్వయ బృందంలో పెదపూడి విజయ్ కుమార్, రాయపాటి అరుణ, వరికూటి నాగరాజు, వేములపాటి అజయ కుమార్ ఉండగా, సపోర్ట్ టీమ్‌లో వరికుర్తి అనిల్, లంకా నరసింహారావు, గుత్తి మహిత్ కుమార్, ఐనాబత్తిన రాజేష్, నూనె వెంకట సురేష్ బాబు, కటకం చైతన్య, పాతకోట వెంకట్రావులకు అవకాశం కల్పించారు.

సింగరాయకొండ మండల జనసేన మాజీ అధ్యక్షుడిగా పనిచేసిన ఐనాబత్తిన రాజేష్‌కు ఇప్పుడు ఒంగోలు పార్లమెంట్ పరిధి స్థానిక సంస్థల ఎన్నికల సపోర్ట్ టీమ్‌లో చోటు దక్కింది..

#సింగరాయకొండ

Singarayakonda Updates

09/09/2026

08/09/2026

08/09/2026

08/09/2026

07/09/2026

07/09/2026

07/09/2026

07/09/2026

07/09/2026

06/09/2026

Address

Website

Alerts

Contact The Business

Shortcuts

Share

Category

Listing takedown request