30/08/2025
सोक्पे जूनियर हाई स्कूलमा शिक्षक–अभिभावक बैठक, स्वर्ण जयन्ती समारोहको तयारी तिव्र
लिङी–सोकपे :
सोक्पे जूनियर हाई स्कूलको मिटिङ हल आज अभिभावक र शिक्षकहरूको उत्साहपूर्ण उपस्थितिले भरिभराउ देखिएको थियो। विद्यालय र समुदायलाई एकै मञ्चमा जोड्ने शिक्षक–अभिभावक बैठक आज अत्यन्तै सफलतापूर्वक सम्पन्न भयो।
सभामा लिङी–सोकपे ग्राम पंचायतका सभापति श्री भगिरथ तिवारी, पंचायत निरीक्षक श्री दिपक अधिकारी, सुम्सी वार्डका पन्चायत श्री डम्बर गुरुङ, मैडम पंचायत सुश्री सोम माया राई, १६औं तूमिन–लिङी CLC अध्यक्ष तथा महासचिव, पूर्व जिल्ला पंचायत सदस्य, अवकाशप्राप्त समाजसेवी व्यक्तित्वहरू, विद्यालयका शिक्षक–शिक्षिका, तथा अभिभावकहरूको बाक्लो उपस्थिति रहेको थियो।
बैठकमा दुई मुख्य मुद्दाहरूलाई केन्द्रमा राखेर गम्भीर र जीवन्त छलफल गरियो—
👉 पहिलो, विद्यार्थीहरूको पढाइ, अनुशासन र भविष्य निर्माणबारे।
👉 दोस्रो, विद्यालयको गौरवपूर्ण ५०औँ वर्षगाँठ अर्थात् स्वर्ण जयन्ती समारोह सम्बन्धी तयारीबारे।
स्वर्ण जयन्तीलाई ऐतिहासिक र भव्य बनाउनका लागि आजकै दिन एक ऐड–हक समिति गठन गरिएको छ। यस समितिले विद्यालयको आगामी कार्यक्रमलाई व्यवस्थित बनाउने निर्णय गरेको छ। साथै, (२७ सेप्टेम्बर २०२५) अर्को विस्तारित सभा आयोजना गर्ने निर्णयसमेत गरिएको छ, जसमा उत्सवको रूपरेखा र कार्यक्रम सूचि तय गरिनेछ।
विद्यालयका शिक्षकमात्र होइन, गाउँले, पूर्वजिल्ला पंचायत सदस्यदेखि नयाँ पुस्तासम्म सबैको चाख र सहभागिताले आजको बैठकलाई विशेष बनाएको सहभागीहरूले बताएका छन्। अभिभावकहरूले आफ्ना नानी–बाबुहरूको पढाइमा देखिएको सुधार र विद्यालयको प्रगतिप्रति खुशी व्यक्त गर्दै, स्वर्ण जयन्ती समारोहलाई ऐतिहासिक बनाउन पूर्ण सहयोग गर्ने प्रतिबद्धता जाहेर गरेका छन्।
सोकपे जूनियर हाई स्कूलको स्वर्ण जयन्ती समारोहलाई समुदायकै साझा पर्वको रूपमा मनाउने तयारीसँगै, विद्यालयले अझ उज्ज्वल भविष्यतर्फ अग्रसर हुने विश्वास सबैले व्यक्त गरे।
Golden Jubilee
