20/05/2026
“एक घर-एक झाड” अभियानातून ५ हजार रोपांचे मोफत वाटप; हरित सोलापूरसाठी डॉ. कोठे यांचा पुढाकार
सोलापूर ग्रीन मिशनच्या वतीने “एक घर – एक झाड” हा महत्त्वाकांक्षी उपक्रम राबविण्यात येत असून, शहरातील नागरिकांना वृक्षलागवडीस प्रोत्साहन देण्यासाठी तब्बल ५ हजार रोपांचे मोफत वितरण करण्यात येणार आहे. सोलापूर ग्रीन मिशनचे संस्थापक डॉ. सुर्यप्रकाश कोठे यांनी पत्रकार परिषदेत ही माहिती दिली. वाढते तापमान, प्रदूषण आणि पाणीटंचाईच्या पार्श्वभूमीवर हरित व पर्यावरणपूरक सोलापूर घडविण्याचा या अभियानामागील मुख्य उद्देश असल्याचे त्यांनी सांगितले.
या उपक्रमाचा शुभारंभ गुरुवार, २१ मे रोजी सकाळी १० वाजता गव्हर्नमेंट पॉलीटेक्निक कॉलेज परिसरातील वॉकिंग ट्रॅक, पाणी टाकी चौक, अक्कलकोट रोड येथे होणार आहे. कार्यक्रमाला आमदार सचिन कल्याणशेट्टी, आमदार देवेंद्र कोठे, महापौर विनायक कोंड्याल, सभागृहनेते नरेंद्र कोळे तसेच महापालिका आयुक्त सचिन ओम्बासे यांची प्रमुख उपस्थिती राहणार आहे.
“प्रत्येक घरात किमान एक झाड” हा संकल्प प्रत्यक्षात आणून स्वच्छ, सुंदर आणि प्रदूषणमुक्त सोलापूर निर्माण करण्याचा निर्धार या अभियानातून करण्यात आला आहे. या पर्यावरणपूरक चळवळीत नागरिक, युवक, स्वयंसेवक आणि सामाजिक संस्थांनी मोठ्या संख्येने सहभागी व्हावे, असे आवाहन डॉ. सुर्यप्रकाश कोठे यांनी केले. पत्रकार परिषदेस व्यंकटेश चिलका, वासुदेव इप्पलपल्ली, राजमहेंद्र कमटम आणि प्रा. डॉ. प्रशांत चाबुकस्वार उपस्थित होते.
