15/10/2026
कामगारांच्या हितासाठी नेहमीच त्यांच्या पाठीशी उभा राहीन : मंगेश झोले
कामगार चळवळीतील योगदानाबद्दल आडम मास्तर यांचा सन्मान; विडी कामगारांच्या किमान वेतनाच्या अंमलबजावणीसाठी आंदोलनाची गरज असल्याचे प्रतिपादन
सोलापूर : प्रतिनिधी
सोलापूर जिल्ह्यात विविध क्षेत्रांमध्ये मोठ्या संख्येने कामगार कार्यरत आहेत. या कामगारांना राज्य व केंद्र शासनाच्या योजनांचा लाभ मिळवून देण्यासाठी तसेच त्यांना न्याय मिळवून देण्यासाठी आपण नेहमीच त्यांच्या पाठीशी उभे राहू, असा निर्धार सहाय्यक कामगार आयुक्त मंगेश झोले यांनी व्यक्त केला.
हिंद मजदूर पंचायतच्या वतीने आयोजित कार्यक्रमात कामगार चळवळीतील योगदानाबद्दल ज्येष्ठ कामगार नेते आडम मास्तर यांचा सन्मान करण्यात आला. आशिया खंडातील सर्वांत मोठा घरकुल प्रकल्प उभारून ३० हजार कामगारांना हक्काची घरे मिळवून दिल्याबद्दल आडम मास्तर यांचे यावेळी कौतुक करण्यात आले. कार्यक्रमाच्या अध्यक्षस्थानी हिंद मजदूर पंचायतचे प्रदेशाध्यक्ष साथी बशीर अहमद होते.
यावेळी बोलताना सहाय्यक कामगार आयुक्त मंगेश झोले यांनी कामगारांसाठी असलेल्या शासनाच्या विविध योजनांची प्रभावी अंमलबजावणी करण्यावर भर दिला. सर्वच क्षेत्रांतील कामगारांना न्याय मिळवून देण्यासाठी प्रयत्नशील राहण्याची ग्वाहीही त्यांनी दिली.
किमान वेतनाच्या अंमलबजावणीसाठी आंदोलनाची गरज
सत्काराला उत्तर देताना आडम मास्तर म्हणाले की, गेल्या ३० वर्षांपासून असंघटित आणि विडी कामगारांना न्याय मिळवून देण्यासाठी आपण सातत्याने संघर्ष करीत आहोत. राज्य शासनाने विडी कामगारांसाठी प्रतिदिन ३७९ रुपये किमान वेतन जाहीर करून त्यासंदर्भात शासन निर्णयही काढला आहे. मात्र, या निर्णयाची प्रत्यक्ष अंमलबजावणी होण्यासाठी पुन्हा आंदोलन करण्याची वेळ येत असल्याचे त्यांनी सांगितले.
माझा हा सन्मान म्हणजे सोलापूर शहरासह राज्यातील सर्व क्षेत्रांतील कामगारांचा गौरव आहे. या सन्मानामुळे माझी जबाबदारी वाढली असून, नव्या जोमाने काम करण्याची प्रेरणा मिळाली आहे, अशी भावना आडम मास्तर यांनी व्यक्त केली.
मान्यवरांची उपस्थिती
कार्यक्रमाला ज्येष्ठ कम्युनिस्ट नेते अॅड. रा. गो. म्हेत्रस, मौलाना आझाद महामंडळाचे माजी जिल्हा व्यवस्थापक सी. ए. बिराजदार, सरकारी कामगार अधिकारी जयदीप मगर, नदाफ पतसंस्थेचे अध्यक्ष सलीम नदाफ, अर्जुन सलगर, पत्रकार सल्लाऊद्दीन शेख, माजी नगरसेविका नलिनी कलबुर्गी आणि मार्क्सवादी कम्युनिस्ट पक्षाचे जिल्हा सरचिटणीस कॉम्रेड युसूफ मेजर आदी उपस्थित होते.
प्रारंभी साथी बशीर अहमद यांनी प्रास्ताविक करून उपस्थितांचे स्वागत केले. हिंद मजदूर पंचायतीच्या वतीने प्रमुख पाहुण्यांचा सत्कार करण्यात आला.
कार्यक्रमाच्या यशस्वितेसाठी कॉम्रेड एजाज शेख, चंद्रशेखर बदलापूरे, फरीदा गोट्यालकर, छगन पंढरे, दौला शेख, शरणू गुडीयवरु, कॉम्रेड निहाल शेख, लक्ष्मी देवकर, यास्मीन अन्सारी, इम्रान मंगलगिरी, जहीर शेख, मुशताक शेख, बाबा बागवान आणि अशपाक शेख यांनी परिश्रम घेतले. सूत्रसंचालन सिद्धार्थ बोराडे यांनी केले, तर शंकर तुम्मा यांनी आभार मानले. कार्यक्रमाला महिला व पुरुष कामगार मोठ्या संख्येने उपस्थित होते.
