30/08/2025
गोरुबथानमा ३४ औं नेपाली भाषा मान्यता दिवस ।
साँझा साहित्य सरंक्षण संस्था गोरुबथानले आज गोरुबथान सोमबारे बजार स्थित सद्भाव मण्डप भवनमा ३४ औं नेपाली भाषा मान्यता दिवस पालन गर्यो।
विलियम फिपनको अध्यक्षतामा सम्पन्न भएको कार्यक्रमको आरम्भ आजको प्रमुख अतिथि आर.बी.राईको बाहुलीबाट दीप प्रज्वलनबाट गरिएको थियो भने स्वागत वक्तव्य संस्थाको सचिव रुस्तम शर्माले राखे । आजको कार्यक्रमको मुख्य आकर्षण भनेको नै सम्बर्द्धना रहेको थियो जसमा साँझा साहित्य सरंक्षण संस्थाले पाँचौ आर.बी.राई पुरस्कार बरिष्ठ साहित्यकार तथा संगीतकार समिर राई शान्तिलाई प्रदान गरियो भने गोरूबथान नागरिक सम्मान बरिष्ठ पत्रकार अरुण कुमार राईलाई नागरिक सम्मानले जनायो ।
डा. सोनाम चुक्छे कृत मदिराको सभा लघुकथा संग्रह आजको प्रमुख अतिथि, साथै विशिष्ट अतिथिहरूको हातबाट बिमोचन गरियो ।
भाषा अनि आर.बी.राई माथि तिता मिठा अनुभवहरु बरिष्ठ साहित्यकार सुवास सोताङले राख्यो भने जीवनका विविध पाटाहरू , संघर्षहरू, राजनैतिक जीवन यात्रा खुबै रोचक प्रकारले आजको प्रमुख अतिथि श्री आर.बी.राई ज्यूले राख्नुभयो ।
आजको कार्यक्रममा अतिथि कवि सुरक्षा भुजेल ( सामसिङ ) ले कविता वाचन गरेको थियो भने कविता वाचनको क्रममा युद्धबीर उच्चतर माध्यमिक विद्यालयको छात्र आयुष राईले मिठो कविता वाचन गरेको थियो ।
आजको कार्यक्रममा प्रमुख अतिथिको रूपमा पूर्व सांसद भाषा संग्रामी, प्रगतिशील साहित्यकार आर.बी.राई उपस्थित थिए भने विशिष्ट अतिथिहरूमा श्री विलियम फिपन, ४३ नम्बर समष्टि सभासद रतन थापा, बरिष्ठ साहित्यकार समिर राई शान्ति, वरिष्ठ पत्रकार अरूण कुमार राई, बरिष्ठ साहित्यकार सुवास सोताङ , पञ्चायत समिति सभापति सूर्यमणी राई, श्री शिशिर चन्द्र राई , डा.सोनाम सेर्पा आदि उपस्थित थिए ।
