28/07/2025
চৰাইদেউত বিশ্ব হেপাটাইটিছ দিৱস উদযাপন,
স্বাস্থ্য পৰীক্ষা শিবিৰ, তেজৰ নমুনা সংগ্ৰহ।।
সোণাৰি, ২৮ জুলাইঃ চৰাইদেউ জিলা স্বাস্থ্য বিভাগৰ উদ্যোগত ঘোঁৰাজান চাহ বাগিচাত উদযাপন কৰা হয়। চৰাইদেউ জিলা যুটীয়া স্বাস্থ্য সেৱা সঞ্চালক ডাঃ জ্যোতিৰ্ময় শৰ্মা বৰুৱাৰ সভাপতিত্বত আয়োজিত সভাখনত হেপাটাইটিছ সম্পৰ্কে বিষদ আলোচনা আগবঢ়োৱা হয়। ভাষণ প্ৰসংগত যুটীয়া স্বাস্থ্য সেৱা সঞ্চালকগৰাকীয়ে কয় যে হেপাটাইটিছ হৈছে ভাইৰেল সংক্ৰমণৰ ফলত হোৱা যকৃতৰ ৰোগ। এ, বি, চি, ডি আৰু ই এই পাঁচটা মুখ্য হেপাটাইটিছ ভাইৰাছ বিদ্যমান। বিশেষকৈ মাতৃৰ পৰা সন্তানলৈ হেপাটাইটিচ বিৰ সংক্ৰমণ ৰোধ কৰাৰ প্ৰয়োজন। গৰ্ভৱতী মহিলাই হেপাটাইটিছ বি পৰীক্ষা কৰাব লাগে। জন্মৰ ২৪ ঘন্টাৰ ভিতৰত নৱজাতৰসকলক হেপাটাইটিছ বি ভেকচিন প্ৰদান কৰিব লাগে। আনহাতে এই ৰোগৰ সংক্ৰমণৰ প্ৰকাকসমূহ যেনে অসুৰক্ষিত বেজী আৰু নিডলৰ পুনঃব্যৱহাৰ,ব্যক্তিগত ব্যৱহৃত সামগ্ৰী যেনে ৰেজৰ, ব্লেড, নেইল ক্লিপাৰ আদি একাধিকজনে ব্যৱহাৰ কৰা, অসুৰক্ষিত তেজ গ্ৰহণ ইত্যাদি বুলি উল্লেখ কৰে। এই সভাত প্ৰসৱ পূৰ্বক পৰীক্ষা, বাহকজনিত ৰোগ, শিশুৰ ডায়েৰীয়া, পৰিয়াল পৰিকল্পনা, বিষাক্ত কাঠফুলা, সৰ্প দংশন আদিৰ বিষয়েও আলোচনা কৰা হয়। সভাৰ পাছতেই উপস্থিত ৰাইজৰ স্বাস্থ্য পৰীক্ষা শিবিৰ অনুষ্ঠিত হয় আৰু তেজৰ নমুনা সংগ্ৰহ কৰা হয়। আজিৰ সভাত জিলা নিৰীক্ষণ বিষয়া ডাঃ দ্বাৰিকা চাহু, সাপেখাটি খণ্ড প্ৰাথমিক স্বাস্থ্য কেন্দ্ৰৰ মহকুমা স্বাস্থ্য বিষয়া আৰু চিকিৎসক ডাঃ চন্দন বৰবৰা, চৰাইদেউ জিলা ৰাষ্ট্ৰীয় স্বাস্থ্য অভিযানৰ প্ৰকল্প পৰিচালনা গোটৰ জিলা গণমাধ্যম বিশেষজ্ঞ দীপজ্যোতি দত্ত, জিলা কমিউনিটি মবিলাইজাৰ ৰফিক আহমেদ, ৰাষ্ট্ৰীয় বাল স্বাস্থ্য কাৰ্যক্ৰমৰ জিলা সমন্বয়ক মেঘালী ফুকন, জিলা মাইক্ৰবায়লজিষ্ট চৈয়দা তামান্ন য়াচমিন প্ৰমুখ্য কৰি সাপেখাটি খণ্ড প্ৰকল্প পৰিচালনা গোটৰ বিষয়াসকল, আতালপথাৰ আয়ুষ্মান আৰোগ্য মন্দিৰৰ বিষয়-ববীয়া আৰু স্থানীয় অৰ্ধশতাধিক ৰাইজ উপস্থিত থাকে।
NHM Charaideo
