26/01/2026
مظفرآباد (کے۔آئی۔نیوز) آج بھارت کے نام نہاد یومِ جمہوریہ پر ریاست جموں کشمیر میں یومِ سیاہ منایا گیا ۔ پاسبانِ حریت جموں کشمیر کی اپیل پر دارالحکومت میں سینکڑوں شہری سڑکوں پر نکل آئے۔ بھارت کیخلاف شدید نعرہ بازی ۔ بھارت جمہوری نہیں بلکہ دہشت گرد ملک ہے ۔ مقررین کا ہندوستان مخالف ریلی سے خطاب
تفصیلات کے مطابق بھارت کے نام نہاد یوم جمہوریہ کے موقع پر ریاست جموں کشمیر کے دونوں اطراف یوم سیاہ یوم احتجاج کے طور پر منایا گیا ۔ دارالحکومت مظفرآباد کے برہان وانی شہید چوک میں سینکڑوں شہریوں نے بھارت کیخلاف مظاہرے میں شرکت کی۔ کشمیری مظاہرین نے سیاہ جھنڈے لہرا کر بھارت کے خلاف احتجاج کیا اور سیاہ پٹیاں باندھی ۔ کشمیری مظاہرین نے قومی اور ریاستی پرچم بھی تھام رکھے تھے۔ کشمیری مظاہرین کی جانب سے بھارت مخالف شدید نعرے بازی کی گئی۔ “بھارتی جمہوریت ہائے ہائے، ڈھونگ جمہوریت ہائے ہائے” "بھارت کو جمہوری کہنا جمہوریت کی توہین ہے" کے نعروں سے شہر گونجتا رہا۔
بھارت مخالف مظاہرین نے “ہم کیا چاہتے آزادی" ، "ہے حق ہمارا آزادی” بھارت سے لیں گے آزادی" کے فلک شگاف نعرے لگائے گئے۔ مظاہرین نے بینرز اور کتبے اٹھا رکھے تھے جن پر بھارت مخالف نعرے درج تھے۔ یوم سیاہ ریلی کی قیادت چیئرمین پاسبانِ حریت عزیر احمد غزالی ، ترجمان وزیراعظم آزاد کشمیر شوکت جاوید میر دیگر سیاسی ، مذہبی جماعتوں کے قائدین نے کی ۔ ہند مخالف مظاہرے سے خطاب کرتے ہوئے عزیر احمد غزالی نے کہا کہ کشمیری عوام سے انکی ریاست ، انسانی ، سماجی ، جمہوری اور مذہبی حقوق چھین کر بھارت کو جمہوری ملک کہتا ہے جو دنیا کا ایک بڑا جھوٹ ہے ۔ منانا دنیا میں بڑا جھوٹ ہے۔ انہوں نے کہا کہ جموں کشمیر کے متنازعہ خطے میں دس لاکھ فوجیوں کو مسلط کرکے بھارت شہریوں کے بنیادی حقوق چھین رہا ہے ۔ انہوں نے سوال اٹھایا کہ کیا بھارت جمہوری ملک ہے جس نے 1989 کے بعد سوا لاکھ کشمیری شہریوں کو شہید کیا ، دسیوں ہزار شہریوں کو گرفتار کیا انہیں تشدد اور بربریت کا نشانہ بنایا ، 7500 شہریوں کو گمنام قبروں میں دفن کیا ، افضل گورو اور مقبول بٹ کو بغیر جرم کے پھانسی دی ، 6000 ہزار کشمیری بچوں کو پیلٹ گنز سے زخمی کیا ، کالے قوانین AFSPA POTA TADA UAPA PSA کے زریعے شہریوں کے بنیادی حقوق چھین لیئے ہیں ۔ جس ملک نے کشمیری عوام سے زمینیں اور جائیدادوں کو چھیننے کیلئے دلی کی ایجنسیز NIA , SIU CIK بہت بڑے اقدامات اٹھا رہی ہیں ، ہزاروں کشمیری قیدی آج بھی ہندوستان کی جیلوں میں بند رکھے گئے ہیں۔ عزیر احمد غزالی نے کہا کہ سچ یہ ہیکہ بھارت جموں کشمیر میں انسانیت کے خلاف بدترین جرائم کا مرتکب ہو رہا ہے ۔ انہوں نے کہا کہ اقوام متحدہ کی یہ آئینی زمہ داری ہے کہ سلامتی کونسل کشمیر مسئلہ کے حل کیلئے اقدامات اٹھائے ۔ ترجمان وزیراعظم آزاد کشمیر شوکت جاوید میر نے کہا کہ کشمیری عوام سے ریاست و سیاست چھیننے والا بھارت جمہوریت کا سب سے بڑا قاتل ہے بھارت جمہوری نہیں بلکہ دہشت گرد ملک ہے ۔ بھارت جان لے جموں کشمیر کے عوام آزادی تک اپنی مزاحمت جاری رکھیں گے۔ ریلی سے خطاب کرتے ہوئے نائب امیر مہاجرین راجہ محمد عارف خان نے کہا کہ بھارتی مظالم کیخلاف دنیا کو آواز اٹھانی چاہئیے۔ بھارت مقبوضہ کشمیر میں انسانیت کے خلاف دہشت گردی کا مرتکب ہو رہا ہے ۔ وائس چیئرمین پاسبان حریت عثمان علی ہاشم نے کہا کہ کشمیر میں خواتین پر حملے کرنے والا ، بچوں پر تشدد کرنے والا ملک کیسے جمہوری ہو سکتا ہے ۔ ہند خلاف مظاہرے سے خطاب کرتے ہوئے ادریسہ بٹ نے کہا کہ بھارت نے کشمیری خواتین کو قید کر رکھا کنن پوش پورہ ، شوپیان اور پٹھان کوٹ میں عفت مآب بہنوں اور بیٹیوں کو جنسی تشدد کا نشانہ بنایا ۔ پاسبان حریت جموں کشمیر کے زیرِ اہتمام بھارت کے نام نہاد یوم جمہوریہ پر یوم سیاہ منانے کیلئے سینکڑوں شہریوں نے دارالحکومت کی مرکزی شاہراہ پر مارچ کیا۔ ریلی سے مہاجرین راہنماؤں چوہدری فیروز الدین ، منظور اقبال بٹ ، شیخ رشید احمد ، چوہدری محمد مشتاق ، اقبال یاسین اعوان ، فیاض جگوال ، خواجہ محمد اقبال ، محمد اقبال میر ، عرفان احمد بٹ ، شاکر الاسلام ، سجاد احمد بٹ ، راجہ فضاکت خان ، سید عبدالرحیم شاہ ، بلال احمد فاروقی ، محمد یونس میر ، راجہ سجید خان ، راجہ رشید خان ، جاوید احمد قریشی ، اسحاق شاہین ، اسماعیل جگوال ، قاضی محمد افتخار،سردار خورشید اعوان،چوہدری محمد شکور اور دیگر راہنماؤں نے خطاب کیا ۔۔۔۔۔
