28/09/2025
लुप्त होईत "मिथिला"
_____________________
शामा, कौनी,मरुआ, मौनी
ढकना,सरबा भेलै विलुप्त।
अल्हुआ अभागल घर सऽभागल
चिक्कस,चाउर सब भेलै लुप्त।।
बाबाक पैंना,दायक बैना
कोठी-भरली गेलै फुईट ।
सिक्का,सिक्की,चंगेरा-चंगेरी
उख्खड़ि,समाठ सब गेलै टुईट।।
घैला,तौला,दहीक मटकुरी
शनै: शनै: सब भेलै गायब।
ढ़ेका-ढ़ेकी,ढ़किया,पथिया
ई सगरो नहिं कतौ पायब।।
पौती,पेटारी ,बाबाक बखारी
महफा,कहार के भेलै विदाई ।
टारा,टारी,डाली-हारी
चित्ति सुपाड़ी ने आब कियो खाई।
बड़दक आंती,जाड़क गांती
केथरी,चेथरी गेल पड़ाई ।
नवकी कनिया देहक अंगिया
शाम-चकेवा गेल हेराई ।।
खापड़ि-खुड़पी,सिड़की-सुड़की
जट-जटिन आब भेलै विरान।
अरुआ,फरुआ,तरुआ,भरुआ
आब ने कतौ तिलकोरक मान।।
तौनी,दौनी,पौनी,पसारी
मेह,खुंटा ने कतौ कड़ाम।
कनिया-पुतरा,चटिया-खटिया
आब ने कतौ भेटय खड़ाम।।
बौआ-बुच्ची,लुच्चा-लुच्ची
खुरलुच्ची के भेल अभाव।
नांगट,भांगठ,सांकट ने कियो
सगरो छोड़ल अपन स्वभाव।।
बुड़बक, काबिल,माझिल,साझिल
आब ने कतौ भेटय अमोट।
बिन आमिल तरकारी छमकै
'बड़ी' दिन-दिन भेलय छोट।।
ककरो घर ने जांत भेटय छै
लोड़ही-सिलौट भेलै सुकुमार।
चटगर-चटनी सौउस बनल छै
सर-समाज में पड़ल दड़ार।।
गोनैर-डोरी,पेन्टक छोंड़ी
सिपटीपीन आब गेलय चुईक।
डिबिया-बाती,पिटै छाती
मटियो तेल आब गेलय हुईक।।
हर-पालो आ लागनि टुटल
संगहि छिटकल जोति-कनैल।
बान्हल बड़द बौउख गेलय आब
साउर-चड़क वा होई वो कैयल।।
कुसियारक ने रस चुबै छै
दुद्धी भेटय ने कोनो ठाम।
लबका-लबका आईटम भेटय
जहड़क पुड़िया गामे-गाम।।
बथुआ-बिड़िया बातें सोन्हगर
कुम्हरौरी के भेलय तालाक।
चड़-चड़ौरी,बड़, अदौरी
सबटा मनोरथ भेलय खाक।।
ठांऊ-पिड़ही,पाहुन-पड़क आ
बाट-बटोही भेलय गौण।
शेर-पशेरी,कनमा, शोरे
लबादुआ ने जोखै मोन।।
ओरिका,तामा,दाईब दैईब गेल
रह्हि रहि गेल ठारहि-ठाड़।
नेना-भुटका भेलय अगत्ती
डाबा,कोहा के फोड़ल कपाड़।।
ओरियानी,ओसारा हटलै
खाम्ह,बड़ेड़ी करय किलोल।
कोरो-बाती,बन्हन बाजल
घर-दुआरि में छै बड्ड झोल।।
गोड़ा-गोड़हा,लोड़हा-ओड़हा
सागक-भक्खा खाईथ आईर।
सजबी-दहीक खौर पौड़ल अछि
कलहा के सब परहैन गाईड़।।
बोगली,बटुआ,बिष्टी,धरिया
डोरर,लंगोटी,नांगट भेल।
डराडोईर ने डांर धरै आब
अपनेहि में सब झंझट कयल।।
हेहर-थेथर,आगर-बागर
छागर के फाटल छछनार।
पाठा-पाठीक पीठ सैट गेल
नार-पुआर आब भेल बीमाड़।।
चुल्ही,जाड़ैन,लाड़ैन लड़ि गेल
मुरही संग भागल कंसार।
बीचहि बांट में लाई भेट गेल
जा बैसल सब हाट-बाजार।।
परतानक ने तान सुनै छी
सुनी पराती नहिं भोरे-भोर।
दाई-माई नहिं सांझ गबै छथि
सगरो 'मिथिला' ढ़ारथि नोर
सुन्दर प्रस्तुति। के थिकाह जे अपना लोकनिक विलुप्त भए रहल हेरायल भोतिएल लौकिक शब्दावलीक, खोंचारि खोंचारि, खोंइचा छोरा रचना केने छथि। रचनाकार कें बहुत बहुत धन्यवाद। मोन परै छथि साहित्यकार काञ्चीनाथ झा किरण आ हरिमोहन झा एवं रविन्द्र, महेन्द्र क जोड़ी जे ई सब एहने एहने शब्दक पाछू पड़ल रहै छलाह आ मैथिली कें जियौने रहलाह। एहि ह्वाटसैप ग्रुपक सदस्य सब सँ आग्रह जे अपन अपन परिवार मे खास कए नेना भुटका एवं नवतुरिया कें एहि शब्द सब सं परिचय कराबी आ मैथिलीक रक्षा करी। अंतत:,
चुल्हा चुल्ही बिड़ले देखी,
लुत्ती भांजब ने कखनो सीखी ।
लारनि खापरि लावाक योग
छांछी पौड़ल दहीक भोग ।
जय मिथिला जय मैथिली
