01/06/2026
ભાવનગર જિલ્લામાં ઉંદર પકડવાની ગ્લુટ્રેપ જાળ પર પ્રતિબંધ
ભાવનગરના અધિક જિલ્લા મેજિસ્ટ્રેટશ્રી એન.ડી. ગોવાણીએ મળેલ સત્તાની રૂએ સમગ્ર ભાવનગર જિલ્લામાં ઉંદર પકડવા માટે ઉપયોગમાં લેવામાં આવતી ગ્લુટ્રેપ (Glue Trap) જાળના ઉત્પાદન, વેચાણ તથા ઉપયોગ પર પ્રતિબંધ ફરમાવ્યો છે.
જારી કરાયેલા જાહેરનામા મુજબ આ પ્રતિબંધ જાહેરનામું પ્રસિદ્ધ થયાની તારીખથી આગામી 60 દિવસ સુધી અમલમાં રહેશે. ગ્લુટ્રેપ જાળમાં પ્રાણીઓ ફસાઈ જવાથી તેમને ગંભીર પીડા અને ઇજા પહોંચતી હોવાને ધ્યાનમાં રાખી આ નિર્ણય લેવામાં આવ્યો હોવાનું જાણવા મળે છે.
જાહેરનામાનો ભંગ અથવા ઉલ્લંઘન કરનાર વ્યક્તિ સામે ભારતીય ન્યાય સંહિતા (BNS)-2023 ની કલમ 223 મુજબ કાયદેસરની કાર્યવાહી કરવામાં આવશે અને તે શિક્ષાને પાત્ર બનશે.
અધિક જિલ્લા મેજિસ્ટ્રેટશ્રીએ વધુમાં જણાવ્યું છે કે જાહેરનામાના અમલ અને તેના ભંગ બદલ જરૂરી પગલાં લેવા માટે હેડ કોન્સ્ટેબલથી નીચેના ન હોય તેવા ફરજ પરના પોલીસ અધિકારીઓને સત્તા આપવામાં આવી છે.
જિલ્લા વહીવટીતંત્ર દ્વારા નાગરિકોને જાહેરનામાનું પાલન કરવા અને પ્રતિબંધિત ગ્લુટ્રેપ જાળનો ઉપયોગ ન કરવા અનુરોધ કરવામાં આવ્યો છે.
🔹 ભાવનગર જિલ્લામાં ગ્લુટ્રેપ જાળના ઉત્પાદન, વેચાણ અને ઉપયોગ પર 60 દિવસનો પ્રતિબંધ
🔹 જાહેરનામાના ભંગ બદલ BNS કલમ-223 હેઠળ થશે કાર્યવાહી
