19/07/2026
ബഹുമാനപ്പെട്ട ആരോഗ്യ മന്ത്രിയോട് ഒന്നേ പറയാനുള്ളൂ... ആശുപത്രികളിൽ ആദ്യം വേണ്ടത് ജീവൻ രക്ഷിക്കാനുള്ള മരുന്നുകളാണ് സാറേ... പിന്നെ കൂട്ടിരിപ്പുകാർക്ക് ഒന്നു നടുനിവർത്താൻ ഒരു കിടക്കയെങ്കിലും ഉറപ്പാക്കൂ...
അതൊക്കെ കഴിഞ്ഞിട്ട് പോരേ ഫുഡ് കൊടുക്കും എന്നുള്ള വെല്ലുവിളി...?
കാരണം, വിശപ്പിന്റെ വിളി വന്നാൽ പാവപ്പെട്ട രോഗികളെ അന്നമൂട്ടാൻ ഇവിടെ കേരളത്തിന്റെ യുവജന സംഘടനകളുണ്ട്...
അതാണ് കേരളത്തിന്റെ യഥാർത്ഥ സൗന്ദര്യവും...
വിശക്കുന്ന വയറുകൾക്ക് മുന്നിൽ മുടങ്ങാതെ പൊതിച്ചോറുമായി എത്തുന്നവർ...
ജീവൻ പിടയുമ്പോൾ ജാതിയോ മതമോ നോക്കാതെ രക്തം നൽകാൻ ഓടിയെത്തുന്നവർ...
ചുട്ടുപൊള്ളുന്ന വേനലിൽ ദാഹജലവുമായി കാത്തുനിൽക്കുന്നവർ...
കോവിഡ് മഹാമാരിയിൽ നാട് വിറങ്ങലിച്ചപ്പോൾ ജീവൻ പണയം വെച്ച് മരുന്നുകളുമായി ഓടിയെത്തിയവർ...
കമ്മ്യൂണിറ്റി കിച്ചണുകളിൽ വിയർപ്പൊഴുക്കിയവർ...
പ്രളയം വന്നപ്പോൾ സ്വന്തം ജീവൻ നോക്കാതെ പ്രക്ഷുബ്ധമായ വെള്ളത്തിലേക്ക് എടുത്തുചാടി രക്ഷാപ്രവർത്തനം ഏകോപിപ്പിച്ചവർ ... ചികിത്സാസഹായ നിധികളിലൂടെ ആയിരങ്ങൾക്ക് കാവലായവർ...
അതെ, കൊടികളുടെ നിറം ഏതുമാകട്ടെ, സേവാഭാരതിയും, ഡിവൈഎഫ്ഐയും, യൂത്ത് കോൺഗ്രസ്സും, യൂത്ത് ലീഗും ഉൾപ്പെടെയുള്ള ഈ നാട്ടിലെ യുവജനങ്ങളാണ് കേരളത്തിന്റെ യഥാർത്ഥ ഹൃദയമിടിപ്പ്....
മഹാദുരന്തങ്ങൾക്ക് മുന്നിൽപ്പോലും പതറാതെ, തോൽവി സമ്മതിക്കാതെ പൊരുതിയവരാണ് ഈ നാട്ടിലെ ചെറുപ്പക്കാർ. അങ്ങനെയുള്ളവരെ ആണോ ഒരു മന്ത്രിയുടെ വാക്കുകൾ തോൽപ്പിക്കുന്നത്...?
ഒരിക്കലുമില്ല!
മനുഷ്യത്വത്തിന്റെ ഈ കരുതൽ ഇവിടെ തുടരുക തന്നെ ചെയ്യും....
