22/04/2014
LUAN MAKAI MADAI (24) BO TAKUM MADUI
LIANGMAI NAGA COUNCIL, MANIPUR
THALON, KAREHIU (FEB) 2014
1. Manipur Film Dev. Corporation (Ltd) niu organised thiubo gu Film Festival ga “SPECIAL JURY AWARD” 2014 daolubo jengniu ‘Chun Chun Film’ tu LNC-M niu felicitation kam khai-e.
2. Liangmai ruang ga napon keng thubo:
(a) Manu. Amon Kashing, Oklong (b) Manu. Disubou, U/Dikiuram
Npiumai - 7 Npiumai - 7
Npuimai - 7 Npuimai - 6
14 13
Haibo piu kania tudi tathon pikhaide.
3. Jengtung 20/02/2014 bonai Tamei Private Centre ga HSLC Examination 2014 khai bam maitu LNC team, Acting President niu majang lujiu phui khaide.
CHAMSUI
Wangkhaibo riak: 139
Madui suraleng Mn. K. Ranglung Court Member LNC(M) niu mathiu malin thiujiu Tingwang ga thoidam kheng khai lujiu, wang bam mai paron ronna paju len khaibo wan tatkiulu (Self introduction) Mn. M. Anoibou, Acting President niu kadunbo progress madu pat khaijiu Mn. W. Normal, Assembly Speaker tu madui gu agenda thin suraleng pawan sinkhaide.
Mn. W. Normal, Assembly Speaker niu makhiam thiu rabo lam khatdi karaibo madui gu Chamsui mathiu suang ga madu pat khaijiu chamsui makhiam sude.
Chamsui riak 01: Liangmai jat tudi kamtam jiu jusi khaira (affiliation) tachun ngutjiu makhiam wangboga, wangbam mai mathiuniu UNC ga Liangmai jat tudi pi kamtamjiu jusi khaira Liangmai mathiu tachun nchamjiu nkhane chiujiu chapkhaide.
Chamsui Riak 02: Lianglad gasu class VI-X ariak liang patra: Liangmai nam hina Lianglad gasu class VI-X ariak liang pat raleng nkha khaira mathiuniu lunijiu chapkhaide. Siga kaleh kaikhat (100) gasu nri lam bambo nam hina Rk. 10,000/- (Sangkariu) pira-e khatdi kaleh kaikhat nhang lam bambo nam hinaniu Rk. 5,000/- (sang ma-ngiu) pira chap khaide. Pikhai makhabo nam hina kalangbo lung ga kaleh riak masanjiu pikhai kam miradi, sisan khai-e. LNC (Manipur) Central niu kha lujiu Liangmai Test Book Production Committee khuga pikhai mira din katin khai lanne. Palamra Text Book printing hai Kaphihiu (June) 2014 lung ga sumirabo jengniu LNC(M) Central tu thainai gu madui gasu malin khai mide. Masuang kha lumibo rangkang tasen chalan di mathiuniu malum khai mibo Auditors mai nai aruang lujiu audit kam milo chiujiu chap khaide.
Chamsui riak 03: LNC(M) gu maduiky (office) thiumaksai sakami jengniu pawan ngutjiu makhiam wangboga mathiuniu tasen chalan wan phui lujiu, thiumi sulo chiujiu chamsui khaide.
Chamsui riak 04: LNC Manipur gu kaleh kha 2014 (fund) hai zone zone gu bampi (Chairman) khatdi pakangmai (members) niu khaimi sulo chiujiu chap khaide. Chakhaa hai kaleh khat ga Rk. 50/- (per household) lune, siga Zone leng Rk. 30/- khatdi Central leng Rk. 20/- chiujiu lura mathiuniu suikhaide. Kha lubo rangkang tasen chalan hai chak (audit) masan lujiu central ga pira-e chiujiu sisan khai-e. 2012 khatdi 2013 gu kaleh kha ra Rk. 30/- lurabo-e.
Chamsui riak 05: Tacheng tajai (Constitution) khuan kam kalira Amendment Committee tu malum khaibo kumjiu, kam kali khaibose committee mai niu mathiu suang ga madu pat khaide chiudi amendment committee nai central executive mai aruang lujiu phui katin lan lujiu Approval leng nkiu (Special) madui kulujiu kamne chiujiu chamsui khaide.
Chamsui riak 06: Dikiuram Marketing Centre lamga pawan thengjiu makhiam wangboga mathiu chun chamjiu Dikiuram Marketing Centre leng rangkang pikhai masan mimai hina leng Kanahiu (March) 2014 lung ga mou makjiu Ch. Dithinbou, Ex. President LNC(M), Dikiuram Chairman khatdi LNC(M) Central Executive mai aruang lujiu kadi hai madat lujiu pimilo chiujiu chap khaide.
Chamsui riak 07: (a) Arts and Culture Pakhangpi (President) leng mathiuniu lunijiu Mn. Adibou Newmai tu kada khaide. Arts and Culture gu Raosui/Secretary(ies) khatdi pakangmai (members) lengra paniu pagu level lamsu kakhan milo chiujiu chamsui khai mide. LACA gu files khatdi record hinase LNC niu karaibo gu Pakhangpi khuga khoi lujiu tuhoi Pakhangpi khuga pikhai ra-e. Sikatin khaibo niu LACA hai Govt. Registered Society-e. Siniu, Govt. gu tajai sai suijiu tatien thiubam mi sulo chiujiu chap khaide.
Chamsui riak 07:
(b) LNC Tamei Zone Bampi (Chairman) kakhan raleng Mn. Ab. Akubou, Chairman Machengluang khatdi Mn. P. Lungpatbou, Chairman Chiang tu mathiu niu lunijiu Convenor khatdi Co-Convenor leng kada khaide. Haise Kanahiu (March) 2014 lung ga kakhan milo chiujiu chap khaide.
(c) Liangmai Frontal Organisations hina pagu gu office ga tad kiu mak kasa hina (office bearer elections) ra tatkiu misulo chiudi approval leng LNC (M) ga phung wangra-e chiujiu mathiuniu lunijiu chap khaide. Wanglanbo madui ga Liangmai Organisations hina pagu gu audit statement khatdi progress report phungwang ra wang bam mai mathiuniu masen ne chiujiu din katin khai lanne.
(d) Madui Raosui (Assembly Secretary) leng Mn. Takambou Pamai, Statistics & Land Record Secretary, LNC tu mathiuniu masenbo bam mijiu kada khaide.
(e) Auditors pageng bam mijiu mathiuniu malumjiu Mn. Ab. Adin, Tamei, Mn. Dm. Wanjengdin, Tamenglong khatdi Mn. Sh. Hutanbou, Ariang tu kada khaide.
Chamsui riak 08: Liangmai Manid rabo tingmik
(a) Jengtung 15 Karamhiu (May) hai Liangmai Dialect Recognised Day khatdi Jengtung 09 Chabamhiu (January) hai Liangmai Tribe Modification Day chiujiu manid ne chiu chamsui khaide.
(b) Liangmai Radio Programme leng Liangmai wakasi kangou mai mathiu matanjiu kamkhailo chiujiu chap khaide.
Chamsui riak 09: LNC(M) gu Pakhangpi (President) lamga makhiam minjiu makhiam wangboga mathiuniu masenjiu kalangbo lung ga Court Committee tu Makhan/Makhen gu tathu chara (Case) se kam masan milo chiujiu chamsui khaide. haibo tathu chara kam masanlubo sai niu ladjan sai suijiu Pakhangpi (President) gu pumtan (Power & functions) Mn. Ml. John tu pira bolamse Central Executive niu npao milo chiujiu mathiuniu chun khat thiujiu chap khaide.
Mn. Dm. Jonkamang, Pastor Thalon Baptist Church niu kanambo rathoi, Rapiu ga kakhengbo dam mathiu malin lukhaijiu madui loi khaide.
