09/11/2019
#টেটঃ শোণিতপুৰ জিলা প্ৰশাসনৰ নিয়মাৱলী
১০ নবেম্বৰত ৰাজ্যৰ অন্যান্য জিলাৰ লগতে শোণিতপুৰ জিলাতো অনুষ্ঠিত হ’ব লগীয়া টেট পৰীক্ষাৰ সময়ত পৰীক্ষা গৃহৰ ভিতৰত মোবাইল ফোন, পেজাৰ, ব্লুটুথ, হেডফোন, টেবলেট আদি সামগ্ৰীৰ ব্যৱহাৰৰ ক্ষেত্ৰত শোণিতপুৰ জিলা প্ৰশাসনে বাধা আৰোপ কৰিছে৷ তদুপৰি জিলা প্ৰশাসনে কেলকুলেটৰ, কিতাপ, স্কেল, বেগ, পানীৰ বটল আৰু তেনেধৰণৰ আন সামগ্ৰী ব্যৱহাৰৰ ক্ষেত্ৰতো পৰীক্ষাগৃহৰ ভিতৰত নিষেধাজ্ঞা থাকিব বুলি উল্লেখ কৰিছে। একেদৰে কোনো পৰীক্ষাৰ্থীয়ে উল্লেখিত যিকোনো সামগ্ৰী লৈ পৰীক্ষা কেন্দ্ৰত উপস্থিত হ'লেও কেন্দ্ৰত এনে ধৰণৰ সামগ্ৰী জমা ৰখাৰ কোনো ব্যৱস্থা উপলব্ধ নহ'ব৷ অৱশ্যে পৰীক্ষাৰ্থীয়ে এডমিট কাৰ্ড আৰু পৰীক্ষাৰ অ’ এম আৰ উত্তৰ বহীত লিখিবলৈ ক’লা বা নীলা চিয়াহীৰ ড’ট কলম পৰীক্ষাগৃহৰ ভিতৰত ব্যৱহাৰ কৰিব পাৰিব আৰু পৰীক্ষা শেষ হোৱাৰ পাছত পৰিদৰ্শকক প্ৰশ্ন বহী আৰু অ’ এম আৰ উত্তৰ বহী জমা দিয়াৰ পূৰ্বে ৯ নং ফৰ্মত স্বাক্ষৰ কৰিব লাগিব বুলি জিলা প্ৰশাসনৰ তৰফৰ পৰা পৰীক্ষাৰ্থী সকলক জনোৱা হৈছে৷ আনহাতে, যদি কোনো পৰীক্ষাৰ্থীৰ এডমিট কাৰ্ডত সামান্য ভুল থাকে, তেন্তে তেনে পৰীক্ষাৰ্থীক আধাৰ কাৰ্ড, পেন কাৰ্ড, ড্ৰাইভিং লাইচেন্স আদি চৰকাৰীভাৱে জাৰি কৰা যিকোনো পৰিচয় পত্ৰ পৰীক্ষা কৰি পৰীক্ষাত অৱতীৰ্ণ হোৱাৰ অনুমতি প্ৰদান কৰিবলৈও পৰিক্ষা কেন্দ্ৰ সমূহৰ ভাৰপ্ৰাপ্ত বিষয়াসকলক নিৰ্দেশ জাৰি কৰা হৈছে৷
