Bhairavi's creation

18/03/2024

सकाळच्या स्वयंपाकातलं काय उरलंय
संध्याकाळी काय करायचंय
त्यात दुसऱ्या दिवशी नाश्त्याला, डब्याला काय करायचंय याची मनातल्या मनात सांगड घालत असते,
कोणाला काय आवडतं, कोणाला काय चालत नाही,
याची बेरीज वजाबाकी एकीकडे डोक्यात करत असते,
कधी स्वयंपाकी, कधी डायटीशियन, कधी न्युट्रिशनिस्ट असते,
मी तर कायमच Work from Home करत असते.

ट्रॉलीचा सैल झालेला खिळा घट्ट बसवते,
कोणाला काही न सांगता गेलेला बल्ब बदलते,
गळक्या नळाचा वॉशर बदलते, एक अख्खी भिंतच स्वतः रंगवून टाकते,
कधी सुतार, कधी प्लंबर, कधी इलेक्ट्रिशियन, कधी पेंटर असते,
मी तर कायमच Work from Home करत असते.

घरात आलेल्या चिमणीला घरटं बनवायला जागा करून देते,
रोज हक्काने खिडकीत येणाऱ्या कावळोबांसाठी त्यांची पोळी राखून ठेवते,
कुंडीतल्या धण्यांना कोंब फुटलेले पाहून मनोमन हरखते,
बागेतली झाडांना खतपाणी घालताना जणू आपल्याच मुलांना जेवू घातल्याचं सुख अनुभवते,
कधी पक्षीतज्ञ, कधी माळीण, कधी झूओलॉजिस्ट, कधी बॉटनिस्ट असते,
मी तर कायमच Work from Home करत असते.

कधी बॉसचा ओरडा खायच्या तयारीत जाते,
कधी ती कलीग टोमणे मारेल का,
कधी तो कलीग परत "तसंच" आपल्याकडे बघेल का,
कधी आपली टीम सरळ वागेल ना या चिंतेत जाते,
कधी या महिन्यात तरी पगार वेळेवर होईल या चिंतेत असते
हे सगळे विचार घरातून डोक्यात घोळवतच ऑफिसला जाते,
मी तर कायमच Work from Home करत असते.

कॅरम, पत्ते, चेस, बॅडमिंटन खेळते,
कधी पळायला जाते,
फक्त मुलांना आवड लागावी म्हणून त्यांच्याबरोबर पोहायला जाते,
हलकेच एखादी लकेर घेते, एखादी "खास" फर्माईश होते म्हणून गाते,
येत नसतानाही अंगाई गाते,
भीती जावी म्हणून पाठीवरून हात फिरवते,
दीर्घ श्वास घ्यायला शिकवते
कधी क्रिकेटपटू असते, कधी जिम्नॅस्ट असते, कधी गायिका असते , कधी योगशिक्षिका असते,
मी तर कायमच Work from Home करत असते.

कधी या तारेवरच्या कसरतीला कंटाळते
सगळीकडून लादलेल्या अपेक्षांना मुरड घालायचा प्रयत्न करते
कधी जिंकते,
कधी हरते,
कधी परत उभारी घेते,
कधी नव्याने डाव मांडते,
कधी सगळ्यातून बाहेर पडून मोकळा श्वास घेते,
कधी झळाळते,
कधी झाकोळते,
कधी स्वतःशी,
कधी जगाशी लढत राहते, आपल्या जन्माचं नेमकं सार्थक कशात आहे हे शोधत राहते,
कामं करता करता एकीकडे माझ्या विचारांची लढाई कायम जुंपलेली असते,

तरीही एक सत्य मात्र कधीच बदलत नाही,

मी तर कायमच Work For Home करत असते!!
©गौरी ब्रह्मे