27/05/2026
दिल्लीतील महाराष्ट्र सदनातील प्रलंबित कामे तातडीने पूर्ण करा – मंत्री शिवेंद्रसिंहराजे भोसले यांची अधिकाऱ्यांना तंबी
नवी दिल्ली - प्रियंका सिंह
सार्वजनिक बांधकाम मंत्री शिवेंद्रसिंहराजे भोसले यांनी दिल्ली दौऱ्यादरम्यान नवीन व जुने महाराष्ट्र सदन येथील प्रलंबित विकासकामांचा आढावा घेत संबंधित अधिकारी व अभियंत्यांची बैठक घेतली. महाराष्ट्र सदनातील कामांमध्ये होणारी दिरंगाई खपवून घेतली जाणार नसल्याचे स्पष्ट करत त्यांनी कामे दर्जेदार व वेळेत पूर्ण करण्याचे निर्देश दिले. महाराष्ट्रातून दिल्ली येथे येणाऱ्या नागरिकांना अधिक चांगल्या सुविधा उपलब्ध व्हाव्यात, यासाठी शासन प्राधान्याने काम करत असल्याचे मंत्री भोसले यांनी सांगितले. तसेच अधिकारी व कर्मचाऱ्यांसाठी सुरू असलेली निवास व्यवस्था आणि इतर विकासकामे जलद गतीने पूर्ण करण्याच्या सूचना त्यांनी दिल्या.
बैठकीत दुरुस्ती, सुशोभीकरण, विद्युत व्यवस्था, कर्मचारी निवास, पायाभूत सुविधा उन्नतीकरण, सीसीटीव्ही यंत्रणा आणि अंतर्गत देखभाल या कामांचा सविस्तर आढावा घेण्यात आला. मंजूर कामांमध्ये होत असलेल्या विलंबाबद्दल त्यांनी नाराजी व्यक्त करत संबंधित अधिकाऱ्यांना कडक शब्दांत तंबी दिली.
कामांमध्ये गुणवत्ता व वेळेचे नियोजन राखण्याच्या सूचना देत, हलगर्जीपणा करणाऱ्यांवर जबाबदारी निश्चित करण्यात येईल, असा इशाराही मंत्री भोसले यांनी दिला.
