07/07/2026
ചെങ്ങന്നൂർ ചെറിയനാട് നിവാസി സുകുമാരക്കുറുപ്പിനെ പൊക്കാന് ചെന്നിത്തല!
42 വര്ഷത്തെ ഒളിവുജീവിതത്തിന് അന്ത്യമാകുമോ? ആഭ്യന്തരമന്ത്രിയുടെ കടുത്ത നിര്ദ്ദേശത്തില് പോലീസ് പ്രാഥമിക പരിശോധന തുടങ്ങി; മാവേലിക്കര കോടതിയിലെ ആ 'രഹസ്യ ഫയല്' വീണ്ടും തുറക്കുന്നു
കേരള പോലീസിന്റെ ചരിത്രത്തിലെ ഏറ്റവും വലിയ നാണക്കേടിന് അറുതിവരുത്താന് ആഭ്യന്തരമന്ത്രി രമേശ് ചെന്നിത്തല നേരിട്ട് കളത്തിലിറങ്ങുന്നു. 42 വര്ഷം മുന്പ് കേരളത്തെ നടുക്കിയ ചാക്കോ വധക്കേസിലെ ഒന്നാം പ്രതി, പിടികിട്ടാപ്പുള്ളി സുകുമാരക്കുറുപ്പിനെ കണ്ടെത്താന് പോലീസിന് ആഭ്യന്തരമന്ത്രിയുടെ കര്ശന നിര്ദ്ദേശം.
സഹോദരി ഭര്ത്താവിനെ വെട്ടിക്കൊലപ്പെടുത്തിയ ശേഷം 40 വര്ഷമായി ഒളിവിലിരുന്ന പ്രതിയെ കഴിഞ്ഞ ദിവസം കൊല്ലം പോലീസ് വലയിലാക്കിയിരുന്നു. ഈ അറസ്റ്റോടെയാണ്, '40 വര്ഷം ഒളിവിലിരുന്നവനെ പൊക്കാമെങ്കില് 42 വര്ഷമായി പോലീസിനെ വെട്ടിച്ച് നടക്കുന്ന സുകുമാരക്കുറുപ്പ് എവിടെ?' എന്ന ചോദ്യം പൊതുസമൂഹത്തില് വീണ്ടും ഉയര്ന്നത്. വിഷയം ഗൗരവമായി എടുത്ത ആഭ്യന്തരമന്ത്രി രമേശ് ചെന്നിത്തല, കുറുപ്പിനെക്കുറിച്ചുള്ള വിവരങ്ങള് ശേഖരിക്കാനും പ്രാഥമിക പരിശോധനകള് നടത്താനും ഉന്നത പോലീസ് ഉദ്യോഗസ്ഥര്ക്ക് അടിയന്തര നിര്ദ്ദേശം നല്കുകയായിരുന്നു.
ചെന്നിത്തലയുടെ അടുത്ത ലൈന്; കുറുപ്പ് ജീവിച്ചിരിപ്പുണ്ടോ?
പല ഉന്നത പോലീസ് ഉദ്യോഗസ്ഥരും തങ്ങളുടെ സര്വീസ് കാലയളവില് അന്വേഷിച്ചിട്ടും കണ്ടെത്താനാകാത്ത സുകുമാരക്കുറുപ്പ് ഫയല് തന്നെയാണ് ചെന്നിത്തല ഇപ്പോള് വീണ്ടും തുറപ്പിക്കുന്നത്. കുറുപ്പ് ജീവിച്ചിരിപ്പില്ലെന്ന നിഗമനത്തിലാണ് മുന്പ് അന്വേഷിച്ച പല ഉദ്യോഗസ്ഥരും എത്തിച്ചേര്ന്നത്. എന്നാല്, കേരള പൊലീസിന്റെ ഔദ്യോഗിക രേഖകളില് കുറുപ്പ് മരിച്ചതായി ഇതുവരെ രേഖപ്പെടുത്തിയിട്ടില്ല!
'42 വര്ഷമായിട്ടും കുറുപ്പ് മരിച്ചതിന് ശാസ്ത്രീയമായ തെളിവുകളൊന്നുമില്ല. അവന് എവിടെയെങ്കിലും വേഷം മാറി ജീവിക്കുന്നുണ്ടാകാം. നിയമത്തിന് മുന്നില് ആരും രക്ഷപ്പെടരുത്, ഫയലുകള് കൃത്യമായി പരിശോധിച്ച് അന്വേഷണം ഊര്ജ്ജിതമാക്കണം' എന്നാണ് ആഭ്യന്തരമന്ത്രി ആഭ്യന്തരവകുപ്പിലെ ഉന്നതര്ക്ക് നല്കിയ കര്ശനമായ സന്ദേശം.
മാവേലിക്കര കോടതിയിലെ 'എല്.പി 22/84' ഫയല് പൊടിതട്ടുന്നു
1984 ജനുവരി 22-നായിരുന്നു കേരളത്തെയാകെ നടുക്കിയ ആ ക്രൂരമായ കൊലപാതകം നടന്നത്. സുകുമാരക്കുറുപ്പിന്റെ പേരിലുള്ള ലക്ഷങ്ങളുടെ ഇന്ഷുറന്സ് തുക തട്ടിയെടുക്കാന് വേണ്ടി, കുറുപ്പിനോട് രൂപസാദൃശ്യമുള്ള ചാക്കോ എന്ന ഫിലിം റെപ്രസന്റേറ്റീവിനെ കാറിനുള്ളിലിട്ട് ശ്വാസം മുട്ടിച്ച് കൊലപ്പെടുത്തിയ ശേഷം കത്തിക്കുകയായിരുന്നു.
കേസിലെ മറ്റ് പ്രതികളായ ഭാസ്കരപിള്ള, പൊന്നപ്പന് എന്നിവരെ ജീവപര്യന്തം തടവിന് വിധിക്കുകയും സരസമ്മ, തങ്കമണി എന്നിവരെ തെളിവില്ലാത്തതിനാല് വിട്ടയക്കുകയും ചെയ്തു. എന്നാല് ഒന്നാം പ്രതിയായ കുറുപ്പിനെ അറസ്റ്റ് ചെയ്യാന് പോലീസിന് കഴിഞ്ഞിരുന്നില്ല. മാവേലിക്കര ജുഡീഷ്യല് ഒന്നാംക്ലാസ് മജിസ്ട്രേട്ട് കോടതിയില് 'മാവേലിക്കര പിഎസ് ക്രൈം നമ്പണ് 22/84' എന്ന കേസ് ഫയല് ഇപ്പോഴും ലോങ് പെന്ഡിങ് (LP) പട്ടികയിലാണുള്ളത്. പുതിയ എന്തെങ്കിലും തെളിവ് ലഭിച്ചാല് ഈ ഫയല് വീണ്ടും തുറക്കാമെന്ന വ്യവസ്ഥയുണ്ട്. ഇതാണ് ഇപ്പോള് ചെന്നിത്തലയുടെ നിര്ദ്ദേശപ്രകാരം പോലീസ് ലക്ഷ്യമിടുന്നത്.
പിടിയിലാകുമോ കുറുപ്പ്? അതോ വീണ്ടും പോലീസ് നാടകമോ?
കേരളത്തില് മാത്രം മുന്പ് സുകുമാരക്കുറുപ്പിനോട് സാമ്യമുള്ള 32 പേരെ പോലീസ് സംശയത്തിന്റെ പേരില് അറസ്റ്റ് ചെയ്തിട്ടുണ്ട്. വിദേശത്തും അന്യസംസ്ഥാനങ്ങളിലും ലക്ഷങ്ങള് പൊടിച്ച് അന്വേഷണം നടത്തിയിട്ടും പോലീസിന് ഒന്നും കിട്ടിയില്ല. എന്നാല് പുതിയ സാങ്കേതികവിദ്യകളുടെയും സൈബര് ഫോറന്സിക് വിദ്യകളുടെയും സഹായത്തോടെ കുറുപ്പിന്റെ ബന്ധുക്കളുടെ വിദേശയാത്രകളും സാമ്പത്തിക സ്രോതസ്സുകളും വീണ്ടും നിരീക്ഷിക്കാനാണ് പോലീസിന്റെ നീക്കം.
ആഭ്യന്തരമന്ത്രിയുടെ കടുത്ത നിര്ദ്ദേശം വന്നതോടെ ക്രൈംബ്രാഞ്ച് സംഘം പ്രാഥമിക പരിശോധനകള് ആരംഭിച്ചുകഴിഞ്ഞു. വി.ഡി. സതീശന് സര്ക്കാരിന്റെ കാലത്ത് ഈ 42 വര്ഷത്തെ നിഗൂഢതയ്ക്ക് അറുതിയാകുമോ, അതോ പഴയതുപോലെ അന്വേഷണം വഴിമുട്ടുമോ എന്ന് വരും ദിവസങ്ങളില് കാണാം.
