Pazhampuranams പഴമ്പുരാണംസ്

01/08/2025

ഈ കഥ നടക്കുന്ന വർഷവും കാലവും ഒന്നും ഓർക്കുന്നില്ല.. പക്ഷെ ഈ കേട്ട് കഥ നടക്കുമ്പോൾ തിരുവല്ല പോലീസ് സ്റ്റേഷനിൽ സബ് ഇൻസ്‌പെക്‌ടർ മോഹൻ ആയിരുന്നു എന്നതാണ് ഏക ക്ലൂ.

പൊടിയാടി ദേശത്തെ ഒരു ഓട്ടോറിക്ഷ ഡ്രൈവർ ആണ് കഥാനായകൻ. അന്നത്തെ ഓട്ടം ഒക്കെ അവസാനിപ്പിച്ചു, , മൊതലാളിക്കു അന്നത്തെ കാശും, ഓട്ടോയും ഒക്കെ കൊടുത്തു, അടുത്തുള്ള ഷാപ്പിൽ കയറി, നല്ല ഫിറ്റായി വീട്ടിലേക്ക് ആടിയുലഞ്ഞു പോകുന്ന വഴിയാണ് അങ്ങ് ദൂരേന്നു, ബ്രൈറ്റ് ലൈറ്റും ഒക്കെ ഇട്ടു, ഒരു വണ്ടി ആ വഴി വന്നത്.. കണ്ണിലേക്കു ശക്തമായ ലൈറ്റ് അടിച്ചപ്പോൾ, നമ്മുടെ കഥാ നായകൻ, ആ വണ്ടിക്കാരന്റെ മാതാപിതാക്കളെയും, പൂർവ്വീകരെയും ഒന്ന് സ്‌മരിച്ചു...

നിർഭാഗ്യവശാൽ അതൊരു ജീപ്പായിരുന്നതിനാൽ, കഥാനായകന്റെ ഈ സ്‌മരണ, തൽക്ഷണം ഡ്രൈവർ കേട്ടിട്ട്, ജീപ്പ് അവിടെ നിർത്തി ചാടി ഇറങ്ങി കഥാനായകന്റെ അടുത്തേക്ക് വന്നിട്ട് ഉച്ചത്തിൽ ചോദിച്ചു... ആരാടാ?? നിന്റെ വീട് എവിടാ??? എന്താടാ ഈ അസമയത്ത്??

ചോദ്യം കേട്ട് കഥാനായകൻ അതെ ഉച്ചത്തിൽ തിരിച്ചു ചോദിച്ചു... ഇതൊക്കെ ഷോദിക്കാൻ നീ ആഴാടാ??
സത്യം പറഞ്ഞാൽ കഥാനായകനിൽ നിന്നും ഇത്തരം ഒരു ചോദ്യം നമ്മുടെ SIയും കൂടെയുള്ള പോലീസുകാരും തീരെ പ്രതീക്ഷിച്ചില്ല. ഇത് കേട്ടതും കൂടെയുള്ള പോലീസുകാരൻ, കഥാനായകന്റെ കോളറിൽ പിടിച്ചിട്ടു ചോദിച്ചു... യൂണിഫോം കണ്ടിട്ട് മനസ്സിലായില്ലെടാ @@@@@@ മോനെ...
കഥാനായകൻ : - ആഹാ... തനിച്ചു മനസ്സിലായില്ലെടോ എന്റെ യൂണിഫോം കണ്ടിട്ട് ഞാൻ ആഴാണെന്ന്...
ഈ ചോദ്യം കൂടെ കേട്ടതും SI, ശരിക്കും SI ആയി.. കഥാനായകനെ ചുരുട്ടി കൂട്ടി അങ്ങ് മെതിച്ചു.. എന്നിട്ടു പോലീസുകാരോട് പറഞ്ഞു.. പൊക്കിയെടുത്ത് വണ്ടിയിൽ ഇടെടാ @@@@ മോനെ .. പറഞ്ഞു തീർന്നതും കഥാനായകൻ ജീപ്പിന്റെ പുറകിൽ സ്ഥാനം പിടിച്ചു..

പോകുന്ന വഴി കഥാ നായകന് വെളിവ് വീണു... അന്ന് പുഷ്‌പഗിരി ആശുപത്രിയിൽ ഉണ്ടായിരുന്ന കാർഡിയോളജിസ്റ്റിന്റെ, പേര് പറഞ്ഞിട്ട് പോലീസുകാരോട് പറഞ്ഞു... സാറന്മാരെ ഇന്നോടെ ഞാൻ തീർന്നു..പുസ്പഗിരിയിലെ ഹൃദയം നോക്കുന്ന ---- സാർ ഇന്നലെ കൂടെ എന്നോട് പഴഞ്ഞതാ.. ഇനി ഒരു അറ്റാക്ക് ഉണ്ടായാൽ ഞാൻ തീഴ്ന്നുന്ന്. ആ മുൻപിലിരിക്കുന്ന സാഴിന്റെ അറ്റാക്കോടെ ഞാൻ തീഴ്ന്നു... തീഴ്ന്നു... തീഴ്ന്നു...

ഇത് കേട്ടതും പോലീസുകാർ അന്യോന്യം നോക്കി.. എന്നിട്ടു വേഗം ഒരു പോലീസുകാരൻ കഥാനായകന്റെ പോക്കറ്റ് പരിശോധിച്ച്, ഡ്രൈവിംഗ് ലൈസൻസും പേഴ്‌സും പൊക്കി...(ഉണ്ടായിരുന്ന ചില്ലറ എടുത്തോ എന്നറിവില്ല.)

പിന്നെ ഡ്രൈവിങ് ലൈസൻസിൽ കണ്ട അഡ്രസിലേക്ക്, DHL കൊറിയർ എത്തിക്കുന്ന വേഗത്തിൽ ഈ പാഴ്‌സൽ, HANDLE WITH GREAT CARE ആയി, വീട്ടിലെത്തിച്ചു തിരുവല്ല പോലീസ് മാതൃകയായി.

പിറ്റേന്ന് പൊടിയാക്കാർ കേട്ടത്, പോലീസ് വണ്ടിയിൽ SI മോഹൻ, എന്ന കില്ലാടി, ഒരു VIP യെ പോലെ വീട്ടിൽ കൊണ്ട് വന്നു വിട്ട അണ്ണന്റെ വീരഗാഥ... (അതും ഭാര്യ വക... )

പൊടിയാടിക്കാർ എന്നാ സുമ്മാവാ...

31/07/2025

കാനഡയിലെ ഒന്റേരിയോയിൽ കണ്ട "NO MULA" ലൈസൻസ് പ്ലേറ്റിനെ കടത്തി വെട്ടി കൊണ്ട് അങ്ങ് അമേരിക്കാവിലെ ജോർജിയയിൽ നിന്നും അവൻ വരുന്നു..

"KUNDANA" - കുണ്ടൻ...

വണ്ടി, തെലുങ്കന്റെ ആയതു ഭാഗ്യം.. വല്ല മലയാളിയുടെയും ആയിരുന്നേൽ, പണ്ട് ഒരു പാസ്റ്റർ പറഞ്ഞത് പോലെ, "നല്ല സൊകം ആയേനെ"...

30/07/2025

കാനഡയിൽ വന്നപ്പോൾ തൊട്ടു കാണാൻ തുടങ്ങിയതാണ് Personalized License പ്ലേറ്റുകൾ. സർക്കാർ തരുന്ന വാഹന നമ്പറുകൾ നമ്മൾക്ക് വേണ്ടായെങ്കിൽ ഒരു നിശ്ചിത തുക അടച്ചു 2 മുതൽ 8 വരെയുള്ള വാക്കുകൾ, അക്കങ്ങൾ ഒക്കെ വെച്ച് നമ്മൾക്ക് നമ്മുടെ സ്വന്തം നമ്പർ പ്ലേറ്റുകൾ ഉണ്ടാക്കാം. വണ്ടി കൈമാറ്റം ചെയ്‌താലും ഇങ്ങനെ സ്വന്തമാക്കിയ പ്ലേറ്റുകൾ നമ്മുടെ പുതിയ വാഹനത്തിനു ഉപയോഗിക്കാം. നാട്ടിലെ പോലെ ലക്ഷങ്ങൾ മുടക്കി, ലേലത്തിൽ പിടിച്ചിട്ടു വാഹനം വിൽക്കുമ്പോൾ ആ നമ്പർ പോകുന്നത് പോലെ ഇത്തരം Personalized License Plates ആണെങ്കിൽ പോവുകയില്ലായെന്നു സാരം. ഇത് നോർത്ത് അമേരിക്കയിലെ കാര്യമാണ് പറയുന്നത്

ഇവിടെ മലയാളികളുടെ എണ്ണം പെരുകിയപ്പോൾ മലയാള തനിമയുള്ള ലൈസൻസ് പ്ലേറ്റുകൾ ഇഷ്‌ടം പോലെ കാണാൻ സാധിക്കുന്നുണ്ട്. സഖാവ്, മമ്മൂക്ക, ലാലേട്ടൻ, കേരള 1, അച്ചായൻ, അഞ്ഞൂറാൻ തുടങ്ങിയ ലൈസൻസ് പ്ലേറ്റുകളുടെ ഫോട്ടോകൾ ഞാൻ പലപ്പോഴായി ഫേസ്‌ബുക്കിൽ പോസ്റ്റിയിട്ടുണ്ട്.

എന്നാൽ വളരെ യാദൃശ്ചികമായി കഴിഞ്ഞ ദിവസം കണ്ട ഒരു ലൈസൻസ് പ്ലേറ്റ് ആണിത് - NO MULA

ങേ ഇതെന്തു കഥ... ആ ബെൻസിനെ ഓവർടേക്ക് ചെയ്‌തു ഈ മുലയില്ലാത്ത ആൾക്ക് ഒരു Hi പറയാൻ ശ്രമിച്ചെങ്കിലും ആളുടെ മുഖം കണ്ടപ്പോഴേ ഇന്ത്യാക്കാരൻ പോലും അല്ലായെന്നു വ്യക്തമായതോടെ Hi പറയാൻ ഉയർത്തിയ കൈ തല ചൊറിഞ്ഞു താഴ്ത്തിയിട്ടു..

വീട്ടിൽ വന്നയുടനെ ഗൂഗിൾ അമ്മായിയോട് ഈ No Mula എന്നാൽ എന്താണെന്നു തിരക്കിയപ്പോൾ അമ്മായി പറയുകയാണ് - അമേരിക്കൻസ് കൂടുതലായി ഉപയോഗിക്കുന്നതാണത്രെ ഈ വാക്ക്.. അവരുടെ ഒരു സ്ലാങ് ആണത്രേ ഈ വാക്ക്.. No Mula എന്നാൽ കയ്യിൽ നയാ പൈസ ഇല്ലാ എന്ന് നമ്മൾ പറയുന്നത് പോലെയാണെന്ന്.

എന്നാലും ബെൻസും വാങ്ങി NO MULA എന്ന പ്ലേറ്റും വച്ച് നടക്കാൻ ലേശം പോലും ഉളുപ്പില്ലേ എന്റെ അമേരിക്കൻ നാറി നിനക്ക്...

ട്രംപ് വന്നതിൽ പിന്നെ അമേരിക്കക്കാർക്ക് പോലും No Mula ആയി...

29/07/2025

ഒരു ഓൺലൈൻ തട്ടിപ്പ്..

സാമൂഹ്യ മാധ്യമങ്ങളിൽ ആളുടെ പേര് - ലിയോണാ മാത്യു. വയസ്സ് - 30, അമേരിക്കയിലെ ടെക്‌സാസിൽ നേഴ്‌സായി ജോലി ചെയ്യുന്നു.. ലിയോണയുടെ മാതാപിതാക്കൾ ഒരു കാറപകടത്തിൽ മരിക്കുന്നു. പിന്നീട് ലിയോണയെ പഠിപ്പിച്ചതും, വളർത്തിയതും അമേരിക്കയിലുള്ള അങ്കിൾ ആണ്. (ഇതാണ് കഥ)

ലിയോണ സാമൂഹ്യ മാധ്യങ്ങളിൽ കൂടി നോർത്ത് അമേരിക്കയിൽ കൂടി പലർക്കും ഫ്രണ്ട് റിക്വസ്റ്റ് അയയ്ക്കുന്നു. സ്വീകരിച്ചു കഴിഞ്ഞാൽ ഉടനെ മെസഞ്ചറിൽ കൂടി സ്വയം പരിചയപ്പെടുത്തും. ആ കഥയാണ് മുകളിൽ പറഞ്ഞത്. എന്നിട്ടു പറയും നിങ്ങൾക്ക് എന്റെ പപ്പായുടെ നല്ല മുഖഛായ ഉണ്ട്. നിങ്ങളുടെ ഈ ഫോട്ടോ കണ്ടപ്പോൾ എന്റെ മരിച്ചു പോയ പപ്പായെ എനിക്ക് തിരികെ കിട്ടിയ ഫീൽ. ബാക്കി പറയണോ.. ഇത്രയും കേൾക്കുന്നതോടെ ആരും ഫ്ലാറ്റാക്കും.

ദിവസങ്ങൾ കൊണ്ട് ലിയോണ ജനിക്കാതെ പോയ മകളായി മാറും. പപ്പാ, മമ്മി എന്നൊക്കെയേ വിളിക്കൂ... ദിവസവും നമ്മളുമായി സംസാരിക്കും. ഫോണിൽ വിളിക്കും. അതിനിടയിൽ ലിയോണ പറയും... ഇന്ന് എനിക്ക് വേണ്ടി ഒന്ന് പ്രത്യേകം പ്രാർത്ഥിക്കണേ... എന്താണ് കാര്യം എന്ന് ചോദിക്കുമ്പോൾ പറയും; ഇന്ന് ഞാൻ ഒന്ന് ട്രേഡിങിന് ഇറങ്ങുന്നുണ്ട്.. നല്ല പ്രോഫിറ്റ് കിട്ടാൻ വേണ്ടി പ്രാർത്ഥിക്കണേ.. സ്വാഭാവികമായി എന്ത് ട്രേഡിങ് ആണെന്ന് തിരക്കും.. Bit Coin ൽ നിക്ഷേപിക്കുന്നതാണ് പരിപാടി. അങ്കിൾ ആണ് ഗുരു.. ഇന്ന് വരെ പത്തിന്റെ പൈസ ഈ പണിയിൽ കൂടി നഷ്ടപ്പെട്ടിട്ടില്ല. എന്നാലും പ്രോഫിറ്റ് കൂടാൻ പപ്പായും മമ്മിയും പ്രാർത്ഥിക്കുക..

പിറ്റേന്നു ഒരു സ്‌ക്രീൻ ഷോട്ട്- അതെ പപ്പാ മമ്മി... ചക്കര ഉമ്മ.. ദേ കണ്ടോ... 5000 ഡോളർ ആണ് ഇന്നലെ ഒറ്റ ദിവസം കൊണ്ട് മോൾക്ക് കിട്ടിയത്. ഞാൻ പറഞ്ഞില്ലേ പപ്പാ, മമ്മിയുടെ പ്രാർത്ഥന എനിക്ക് വല്യ ബലം ആണ്.. അതോടെ പപ്പയ്ക്കും മമ്മിയ്ക്കും സ്വാഭാവികമായി മോൾ ചെയ്യുന്ന ബിസിനസ്സിനെ പറ്റി അറിയാൻ ആഗ്രഹം ഉണ്ടാകും.

അങ്ങനെ ഇതിൽ നിക്ഷേപിപ്പിക്കുന്നു. ലിയോണ ഓൺലൈനിൽ വന്നു നമ്മളെ എന്താണ് ചെയ്യേണ്ടതെന്ന് പറഞ്ഞു പഠിപ്പിക്കുന്നു. ലാഭം കിട്ടുന്നു. പപ്പാ, ഇത് കുറച്ചു പൈസ ഉള്ളത് കൊണ്ടാണ് ഈ ആയിരം ഒക്കെ ലാഭം കിട്ടുന്നത്. നമ്മൾ ഏതായാലും മെനക്കെടുന്നുണ്ട്.. ഞാൻ നിങ്ങളുടെ കൂടെ ഉള്ളത് കൊണ്ട് നഷ്‌ടം ഒന്നും വരില്ല. ഒരു പതിനായിരം ഡോളർ ഇട്ടാൽ നമ്മൾക്കു നല്ല രീതിയിൽ ലാഭം കിട്ടും. അങ്ങനെ അവരെ കൊണ്ട് പിന്നെയും പതിനായിരം നിക്ഷേപിപ്പിക്കുന്നു. 3000 / 5000 ഡോളർ ഒക്കെ ലാഭം കിട്ടുന്നു. അതിനിടയിൽ ലിയോണ ഇങ്ങനെ പറഞ്ഞു ..നമ്മുടെ ട്രംപ് സത്യപ്രതിജ്ഞ ചെയുന്ന അന്ന് ഈ വിപണി കത്തും.. അന്ന് ഒരു ഒരു ലക്ഷം ഡോളർ ഇട്ടാൽ ഒറ്റയടിക്ക് അത് രണ്ടു ലക്ഷം ആകും.. ഞാൻ അതിനുള്ള ഓട്ടത്തിൽ ആണ്... എന്റെ കൈയിൽ അത്രയും ഒന്നും ഇല്ല.. മമ്മി പ്രത്യേകം ഒന്ന് പ്രാർത്ഥിക്കണേ...

അങ്ങനെ ഒരു ദിവസം പപ്പായയും മമ്മിയും കൂടി പറഞ്ഞു മോളെ നമ്മൾക്ക് ട്രംപ് സത്യപ്രതിജ്ഞ ചെയ്യുന്ന അന്ന് 100000 ഡോളർ നിക്ഷേപിച്ചാലോ.. കിട്ടുന്നതിന്റെ പാതി മോളും എടുത്തോ... അയ്യോ പപ്പാ, മമ്മി എന്തിനാ ഇങ്ങനെ പറയുന്നത്. എന്നെ നിങ്ങൾ അങ്ങനെ ആണോ കണ്ടത്.. എനിക്ക് അഞ്ചിന്റെ പൈസ വേണ്ട.. എനിക്ക് ഏതായാലും 100000 ഒന്നും നിക്ഷേപിക്കാൻ ഇല്ല. പകുതി ആയിട്ടുണ്ട്. ഞാൻ അന്ന് അതും കൊണ്ട് ഇറങ്ങുകയാണ്.

അങ്ങനെ പപ്പായും മമ്മിയും ലിയോണ പറഞ്ഞതു പോലെ 100000 അയയ്ക്കുന്നു. ട്രംപ് സത്യാ പ്രതിജ്ഞ ചെയ്‌ത അന്ന് ട്രേഡിങ് നടത്തി രണ്ടര ലക്ഷം ലാഭം ഉണ്ടാക്കി കൊടുക്കുന്നു. എല്ലാവര്ക്കും ഹാപ്പി...

മോളെ നമ്മൾക്ക് ഈ പൈസ പിൻവലിച്ചു നാട്ടിലേക്ക് ഒന്ന് അയയ്ക്കണം.. പിന്നെ എന്താ പപ്പാ.... നോ പ്രോബ്ലം. ഞാൻ നാളെ രാവിലെ അതിനെ പറ്റി പറയാം..

പിറ്റേന്നു നേരം വെളുത്തു പപ്പാ, മമ്മി സാധാരണ വരുന്നത് പോലെ ലിയോണ മോളുടെ മെസ്സേജ്ജ് കാണാഞ്ഞതിനെ തുടർന്ന് നോക്കിയപ്പോഴാണ് അത് മനസിലായത്.. അവരെ ബ്ലോക്കാക്കി ലിയോണ മുങ്ങി. കാനഡ പോലീസിൽ കേസും കൊടുത്ത് കാത്തിരിക്കുന്നു.

ഈ സംഭവം എന്നോട് പറഞ്ഞപ്പോൾ ഞാൻ ഇത് അത്ര കാര്യമാക്കിയില്ല. കഴിഞ്ഞ ദിവസം മറ്റൊരു ദമ്പതികൾ ഒരു വല്യ സംഭവം പറയാം. ഞങ്ങളുടെ കുറച്ചു പൈസ പോയി.. എന്ന് പറഞ്ഞു കഥ പറഞ്ഞപ്പോൾ അതിലെ നായികയും ഈ ലിയോണ തന്നെ.

കാനഡയിലെ രണ്ടു കുടുംബത്തിൽ ഉണ്ടായ ഈ നഷ്ടത്തിന്റെ കഥ കേട്ടപ്പോൾ ഇതേ പോലെ ഇത് ഇവിടെ പലർക്കും സംഭവിച്ചിരിക്കാം എന്ന് തോന്നുന്നു. നാളെ ഇനി ഇവർ പേര് മാറി വന്നേക്കാം. രണ്ടിലേയും ആൾ ഒന്നായതു കൊണ്ടും, തട്ടിപ്പ് രീതി ഒന്നായതു കൊണ്ടും രണ്ടാളും അയയ്ച്ചു തന്ന ഫോട്ടോ ഒന്നായതു കൊണ്ടും ഇതിവിടെ കൊടുക്കുന്നു.

ഇനി ഓൺലൈൻ ട്രേഡിങ്, ബിറ്റ് കോയിൻ, ക്രൂഡ് ഓയിൽ, ഗോൾഡ് ഡിപ്പോസിറ്റ് തുടങ്ങിയ പരിപാടികളിൽ ഒന്നും പോയി ആരും തല വെച്ച് കൊടുക്കരുത്.. മോളാണ് മോനാണ് എന്നൊക്കെ പറഞ്ഞാലും അവരുടെ ചക്കര വാക്കുകളിൽ മയങ്ങരുത്.

28/07/2025

പൊടിയാടിയിൽ ആണെങ്കിൽ പൊടിയാടിക്കാരനെ പോലെ... റോമിൽ ചെന്നാൽ റോമാക്കാരനെ പോലെ എന്നൊക്കെ ആളുകൾ പറയുമെങ്കിലും, കാനഡയിൽ വന്നു നാളിത്ര ആയിട്ടും ഞാൻ ഇന്നും ആ പഴയ പൊടിയടിക്കാരൻ തന്നെയാണ്.

പാരഗൺ ചെരുപ്പും, കിറ്റക്‌സ് ലുങ്കിയും (ഉം.. അത് തന്നെ.. ആരും കുരു പൊട്ടിക്കേണ്ട ) , ഒക്കെ ഇപ്പോഴും ഉപയോഗിക്കുന്ന ഞാൻ നമ്മുടെ വീട്ടിലെ ഭക്ഷണ രീതിയിലും യാതൊരു വിധ മാറ്റവും വരുത്തിയിട്ടില്ല. കാച്ചി മോരും, തേങ്ങാ കൊത്തിട്ട ബീഫ് ഫ്രൈയും, കുടംപുളി ഇട്ട, കാശ്‌മീരി മുളകിൽ ഉണ്ടാക്കിയ മീൻ കറിയും, ചീര തോരനും, ഒക്കെയായി ഇന്നും ജീവിക്കുന്ന ഒരു മലയാളി കുടുംബം തന്നെയാണ് നമ്മുടേത്.

കാനഡയിൽ മിക്ക ആളുകളും, വൈകിട്ട് ആറു മണിക്ക് അത്താഴം കഴിക്കുക എന്നതാണ് പതിവ് . അത്താഴം കഴിച്ച ശേഷം കുറച്ചു ഒന്ന് നടക്കാൻ പോകും, പിന്നെ ഒരു എട്ടു മണിക്ക് ഫ്രൂട്ട്സ് എന്തെങ്കിലും കഴിച്ചു ഒൻപതു മണി ആകുമ്പോഴേയ്ക്കും കട്ടിലിൽ കിടന്നിരിക്കും. തിങ്കൾ മുതൽ വെള്ളി വരെ ഇതായിരിക്കും അവരുടെ ചിട്ടവട്ടം. ശനിയാഴ്ച്ച വൈകിട്ട് പാർട്ടിയും ഒക്കെയായി അടിച്ചു കയറ്റി, അത് ദഹിക്കാൻ രണ്ടെണ്ണവും വീശി കിടന്നുറങ്ങും.

ഓരോ ദിവസവും പ്രായം കൂടി കൂടി വരികയെല്ലേ.. ചിട്ടയോടു കൂടിയ ഇവരുടെ ഭക്ഷണ രീതിയും, ദിനചര്യകളും ഒന്ന് അവലംബിക്കാൻ ഞാനും തീരുമാനിച്ചു. അതിന്റെ ആദ്യ പടിയായി, രാത്രിയിൽ പത്തിനും, പതിനൊന്നിനും പൊറോട്ടയും, ബീഫും ഒക്കെ കഴിച്ചു, നേരെ കട്ടിലിൽ കയറുന്ന രീതികൾ മാറ്റാൻ ഞാനും തീരുമാനിച്ചു... ഈ വിവരം ബെറ്റിയോട് പറഞ്ഞപ്പോൾ അവൾക്കും സന്തോഷം.

അങ്ങനെ ഞങ്ങൾ രണ്ടാളും, കഴിഞ്ഞ ഞായറാഴ്ച്ച, ആറു മണിക്ക് അത്താഴം കഴിച്ചു കനേഡിയൻസ് ആയി. അതിനു ശേഷം വെളിയിലെ പുല്ലു എല്ലാം വെട്ടി. എട്ടു മണിക്ക് കുളിച്ചു കുട്ടപ്പനായി അൽപ നേരം ടിവി ഒക്കെ കണ്ടിരുന്നിട്ട് പത്തര ഒക്കെ ആയപ്പോൾ കിടക്കാൻ പോയി..

രാത്രി പന്ത്രണ്ടു ആയപ്പോൾ ഉറക്കത്തിൽ നിന്നും വിശപ്പു സഹിക്കാതെ ഞാൻ ഞെട്ടി ഉണർന്നു. ചിൽ സെനു ചിൽ, കമോൺട്ര സെനു... സെനു യൂ കാൻ എന്നൊക്കെ പറഞ്ഞിട്ടും IELTS പാസാകാത്ത വയറിനു ഒരു ചുക്കും മനസ്സിലായില്ല. ഒടുക്കം ഞാൻ ശബ്‌ദമുണ്ടാക്കാതെ അടുക്കള ലക്ഷ്യമാക്കി നടന്നു. അവിടെ ചെന്നപ്പോൾ എന്നെക്കാൾ മുൻപേ വയറിന്റെ ശല്യം സഹിക്കാനാവാതെ മൈക്രോവേവിൽ ഭക്ഷണം ചൂടാക്കുന്ന ബെറ്റിയെ കണ്ടപ്പോഴാണ് എനിക്കും വയറിനും തെല്ല് ആശ്വാസമായത്..

2026 ജനുവരി ഒന്നിനു പുതിയ ജീവിത ശൈലിയുമായി ഞങ്ങൾ വരും. അത് വരെ ആ പഴയ പൊടിയാടിക്കാരനായി അങ്ങ് ജീവിക്കാം..

25/07/2025

ഇന്നലെ മെസഞ്ചറിൽ വന്ന ഒരു മെസ്സേജ്ജ് ആണിത്..

ബ്രോ, സീരിയസ് ആണ്.. ശരിക്കും വായിച്ചു തുടങ്ങിയതും. പിന്നെ ഇടയ്ക്ക് കോമഡിയായി തോന്നിയെന്നത് സത്യം.

പക്ഷെ വായിച്ച ശേഷം പയ്യൻസിന്റെ ഫോൺ നമ്പർ വാങ്ങി വിളിച്ചു സംസാരിച്ചു. ആൾ സീരിയസ്സാണ്. B.Com ക്കാരൻ ആണ്, നാട്ടിൽ ഏക്കര് കണക്കിന് ഭൂസ്വത്തുണ്ട്. അവിടെ കൃഷി ഉണ്ട്.. ആദായം ഉണ്ട്. എന്നാൽ ആൾ സംതൃപ്‌തനല്ല. ആൾക്ക് കാനഡയ്‌ക്കോ, ആസ്ട്രേലിയായ്‌ക്കോ വല്ലോം പോകണം. സ്റ്റുഡന്റ് വിസയിൽ ഒന്നും പോയി കഷ്ടപ്പെടാൻ താത്‌പര്യം ഇല്ല.

അത് കൊണ്ട് മാത്രമാണ് ഈ വഴി നോക്കുന്നത്.. പയ്യൻ ഇടയ്ക്കിടെ കമ്പനി കൂടുമ്പോൾ മദ്യപിക്കും, സിഗരറ്റ് വലിക്കും.. പക്ഷെ ഇതൊക്കെ പെണ്ണ് വേണ്ടെന്ന് പറഞ്ഞാൽ നിർത്തുകയും ചെയ്യും.

ഇനി ഞാനായിട്ട് ഇത്ര നല്ല ഒരു പയ്യന്സിന്റെ വിവരം പൂഴ്ത്തി വെച്ചു എന്ന് നാളെ ആരും പറയരുത്.

മോനെ.... ആൾ ദി ബെസ്റ്റ് !!!

ണണ്ണായി ബാ !!!

23/07/2025

ഗയ്‌സ് - ഞാൻ ആകെ പെട്ടിരിക്കുക ആണ് ഗയ്‌സ്, പെട്ടിരിക്കുകയാണ്...

പണ്ട് സോളാർ സരിത ചേച്ചിയുടെ വീഡിയോ ക്ലിപ്‌സ് പ്രചരിച്ച കാലം.. അന്ന് ഞാനും എല്ലാവരെയും പോലെ ചേച്ചിയുടെ ആറു ക്ലിപ്പും കണ്ടു സീൻ ബൈ സീൻ ആയി കാണാപാഠം പഠിച്ചിരുന്ന ആ സമയത്താണ് ആ ഞെട്ടിക്കുന്ന വാർത്ത കൈരളി ചാനൽ ബ്രേക്ക് ചെയ്‌തത്‌.. അതായത് ചേച്ചിയുടെ വീഡിയോ ആരൊക്കെ കണ്ടോ അവരെയെല്ലാം പ്രതിയാക്കി കേസെടുക്കാൻ പോകുന്നത്രേ..

ഞാൻ പേടിച്ചു പോയി. ഞാൻ അപ്പോൾ തന്നെ ആ വീഡിയോ എല്ലാം ഡിലീറ്റ് ആക്കി വേദപുസ്‌തകവും വായിച്ചു ഇരുപ്പായി. അന്ന് വൈകിട്ട് ഞാൻ നോക്കിയപ്പോൾ കണ്ട ഒരു ട്രോൾ, ടെന്ഷന് ഇടയിലും എന്നെ ചിന്തിപ്പിച്ചു... ആ ട്രോൾ ഇങ്ങനെ ആയിരുന്നു. വെടിക്കെട്ട് കടയ്ക്ക് തീ പിടിച്ചതിനു കേസില്ല.. പക്ഷെ ശബ്‌ദം കേട്ടവർക്കും, ലൈവ് കണ്ടവർക്കുമെതിരെ കേസ് എന്നത് പോലെയാണല്ലോ ഇത് എന്നും, ആളുകളെ കുത്തി നിറച്ച നിലയിൽ ഒരു ട്രെയിനിന്റെ ഫോട്ടോ കൊടുത്ത്, സരിതയുടെ വീഡിയോ കണ്ടവരെ അറസ്റ്റ് ചെയ്‌തു പോലീസ് കൊണ്ട് പോകുന്ന വാർത്ത എന്നുമൊക്കെ ട്രോൾ പ്രചരിച്ചപ്പോൾ ആണ് , പുല്ല് ഡിലീറ്റ് ആക്കേണ്ടായിരുന്നു എന്നോർത്തത് തന്നെ..

അതെ പോലെ ഒന്നാണ് ഇപ്പോൾ പറ്റിയിരിക്കുന്നത്.. വിമാന ടിക്കറ്റ് ബുക്കിങ് മറവിൽ പണം തട്ടി - ട്രാവൽ ഏജൻസി മാനേജർ അറസ്റ്റിൽ, ഉടമയ്ക്ക് എതിരെ കേസെടുത്തു എന്ന മാതൃഭൂമി ദിനപത്രത്തിൽ വന്ന ബോക്‌സ് ന്യൂസ് ഞാൻ ഒന്ന് പോസ്റ്റ് ചെയ്‌തിരുന്നു.. കാരണം ഇമ്മാതിരി തട്ടിപ്പ് കാനഡയിലും നടന്നിട്ടുണ്ടെന്നും, പണം പോയി എന്നും പലരും പറഞ്ഞതിനെ തുടർന്നു നാളെ ആരും ഇത്തരം തട്ടിപ്പിൽ പോയി തല വെയ്‌ക്കെരുതെന്ന ചിന്തയിൽ ആണ് പോസ്റ്റ് ചെയ്‌തത്‌ .

ഏതായാലും 24 മണിക്കൂറിൽ ഞാൻ ചെയർ ചെയ്‌ത ആ വാർത്ത ഡിലീറ്റ് ചെയ്യണമെന്നും പറഞ്ഞു ആ കമ്പനിയുടെ പേരിൽ ഒരു ഇംഗ്ലീഷ് ലെറ്റർ (ചാറ്റ് ജി.പി.റ്റി) വന്നു.. എനിക്ക് മാത്രമല്ല എന്റെ പോസ്റ്റിനു കമന്റ് ഇട്ടവർക്കെല്ലാം ആ ലെറ്റർ കോപ്പി പേസ്റ്റ് ചെയ്‌തു എന്റെ അധികം പേര് കാണാതെ ഇരുന്ന പോസ്റ്റിനു റീച്ച് കൂട്ടി തന്നിട്ടുണ്ട്.

24 മണിക്കൂറിനു ഇനിയും സമയം ഉള്ളതിനാൽ കാണാത്ത ആളുകൾ കൂടി എത്രയും വേഗം വന്നു കാണാൻ അഭ്യർത്ഥിച്ചു കൊണ്ട്... നാളെയാണ് നാളെ ആണ് നാളെ....

കായംകുളം കൊച്ചുണ്ണി മരിച്ചത് നന്നായി.. ഇല്ലായിരുന്നെങ്കിൽ പുള്ളിയും ഇമ്മാതിരി കേസ് ഒക്കെ കൊടുത്തേനെ...

ലീഗൽ നോട്ടീസ് കാണാൻ,

ആരൊക്കെ കമന്റ് ഇട്ടോ, അവർക്കു എല്ലാം അടിയിൽ പോയി ലീഗൽ നോട്ടീസ് എന്ന പേരിൽ കൊണ്ട് പതിച്ചിട്ടുണ്ട്. കമന്റ് കാണാൻ ആകുന്നില്ലെങ്കിൽ നിങ്ങൾ ഈ പേജ് ഓപ്പൺ ആക്കുമ്പോൾ കമന്റ്സ് സെക്ഷനിൽ ALL COMMENTS എന്നാക്കിയിട്ടു നോക്കുക..

22/07/2025

🚲🚲പിച്ച വെച്ച് നടക്കാൻ തുടങ്ങിയപ്പോൾ കിട്ടിയതാണ് ഒരു മൂന്ന് ചക്രമുള്ള സൈക്കിൾ. പിന്നീട് വീടിനകത്ത് ഫുൾ അതിലായിരുന്നു ഹോം ടൂർ..

അൽപം കൂടി മുതിർന്നപ്പോൾ ആഗ്രഹം വല്യ സൈക്കിളിനോടായി. ആരും കാണാതെ വീട്ടിലെ വല്യ സൈക്കിളിൽ ഒക്കെ പോയി പിടിക്കുമ്പോഴേയ്ക്കും അത് നമ്മുടെ നെഞ്ചത്തേക്ക് മറിഞ്ഞു വീഴും. എന്നാലും എന്നെങ്കിലും അതിൽ സ്വന്തമായി കയറി പറക്കാനുള്ള ആഗ്രഹം കൂടി കൂടി വന്നു.

സൈക്കിൾ പിടിച്ചു ഉരുട്ടാനുള്ള ആരോഗ്യം കിട്ടിയപ്പോൾ മുതൽ ഇട ചവിട്ട് പഠിക്കാൻ തുടങ്ങി. നമ്മൾ ക്രോസ്ബാറിന്റെ ഇടയിൽ കൂടി കാലിട്ട് പൊങ്ങുമ്പോഴേയ്ക്കും, സൈക്കിൾ നമ്മളെയും കൊണ്ട് മറിയും. കാൽ ക്രോസ്ബാറിന്റെ ഇടയിൽ ആയ കാരണം, കരച്ചിൽ കേട്ട് ആരെങ്കിലും വന്നു വേണം ഇതിനകത്ത് നിന്ന് നമ്മളെ രക്ഷിച്ചെടുക്കാൻ.

ലൈഫ് ബോയ് സോപ്പ് തേച്ചുള്ള ആരോഗ്യപൂർണ്ണമായ കുളി കൊണ്ട് ഞാനും ആരോഗ്യത്തോടെ വളർന്നു. ഞാനും സൈക്കിൾ കയറ്റം പഠിച്ചു. ആ പഠിത്തത്തിനിടയിൽ എത്ര തവണ ഉരുണ്ടു വീണിട്ടുണ്ടെന്നോ, എത്ര മുള്ളു വേലിയിൽ നിക്കർ കുരുങ്ങി കിടന്നിട്ടുണ്ടെന്നോ ഒന്നും ചോദിക്കരുത്.. അങ്ങനെ വീണും, എഴുന്നേറ്റതും, കരഞ്ഞും പിഴിഞ്ഞും ഞാനും സൈക്കിൾ കയറ്റം പഠിച്ചു.

സൈക്കിൾ പോകുമ്പോൾ സ്‌പീഡിൽ പറക്കാനായി, സീറ്റിൽ നിന്നെഴുന്നേറ്റ് ഒരു ചവിട്ട് ഉണ്ട്.. ഒരു സ്‌പെഷ്യൽ ചവിട്ട്... ആ ചവിട്ടിൽ നമ്മുടെ കണക്കു കൂട്ടലുകൾ പിഴച്ചു, കാലുകൾ പെടലിൽ നിന്നും മാറി ഒരു പോക്ക് അങ്ങ് പോകും. അതോടെ ബാലൻസ് തെറ്റിയ നമ്മളുടെ മർമ്മ സ്ഥാനം പോയി ക്രോസ്ബാറിൽ പോയി ഒരു ഇടി ഇടിക്കും... ആ ഒറ്റ ഇടിയിൽ നമ്മുടെ റിലേ അങ്ങോട്ട് പോയിട്ട്..... എന്റെ പൊന്നു സാറേ 💫💫💫💫💫..പിന്നെ ചുറ്റുമുള്ളതൊന്നും കുറെ നേരത്തേക്ക് കാണാൻ പറ്റാതെ, സകല ദൈവങ്ങളെയും വിളിച്ചു ഒരു നിൽപ്പുണ്ട്... Ho Ho Ho....

ഇതേ പോലെ സൈക്കിളിൽ പറക്കുന്ന നേരം ചെയിൻ കക്കുന്ന ഒരു ഇടപാട് ഉണ്ട്. നല്ല പെണ്ണുങ്ങൾ കൂട്ടത്തോടെ വരുമ്പോഴേ സാധാരണ ഈ ചെയിൻ കക്കൂകയുള്ളു. ആ കക്കലിലും ഇതേ പോലെ മർമ്മത്തിനു ഇടി കിട്ടും... 💫💫💫

ഇത്രയൊക്കെ ത്യാഗങ്ങൾ സഹിച്ചിട്ടാണ് ഞാൻ സൈക്കിൾ ചവിട്ട് പഠിച്ചത്.. ഇപ്പോഴത്തെ പിള്ളേർക്ക് സപ്പോർട്ടിങ് വീലുള്ള സൈക്കിളിൽ കസർത്ത് നടത്തുമ്പോൾ, അവർക്കു വല്ലതും അറിയാമോ നമ്മൾ അനുഭവിച്ച വേദനകൾ.

കഴിഞ്ഞ ദിവസം, ഒരു പാർക്കിൽ പോയപ്പോൾ, മോണോ സൈക്കിളിൽ ഒരാൾ പോകുന്നത് കണ്ടപ്പോൾ, രണ്ടു വീലുള്ള സൈക്കിളിൽ നിന്നും എത്രയോ തവണ തലകുത്തി മറിഞ്ഞ ഞാൻ ഇവന്റെ സ്ഥാവര ജംഗമ വസ്‌തുക്കളുടെ ഗതി ഓർത്തു തരിച്ചു നിന്ന് പോയി... 🚲🚲

21/07/2025

വിപ്ലവ സൂര്യൻ (VS) അസ്തമിച്ചു.

ലാൽ സലാം !!!

21/07/2025

കാനഡയിലെ കുറെ ആളുകൾ ടിയാന്റെ ചതിക്കുഴിയിൽ വീണ് ഡോളർ കളഞ്ഞിട്ടുണ്ട്. ഈ ഏജൻസി വഴി പണം പോയവർ വേഗം നാട്ടിലേക്ക് വണ്ടി വിട്ടോ

18/07/2025

18/07/2025

എന്റെ സഹപ്രവർത്തക , അവരുടേതായ പല കാര്യങ്ങളിലും എന്നോട് അഭിപ്രായം ചോദിക്കും.

ഉദാഹരണത്തിനു - വീട്ടിലെ ഡിഷ് വാഷർ കുറെ പഴക്കം ആയി. പുതിയ ഒരെണ്ണം വാങ്ങാൻ ആഗ്രഹമുണ്ട്.. ഏതു ബ്രാൻഡാണ് നല്ലത്??

മകന് കാർ ഇൻഷുറൻസിനു ക്വോട്ട് എടുത്തപ്പോൾ ഭയങ്കര കത്തി.. സെനുവിന്റെ ഫ്രണ്ട്സ് ആരേലും ഇൻഷുറൻസ് ചെയ്യുന്നവർ ഉണ്ടോ??

പുതിയ ഒരു ലാപ്പ് വാങ്ങണം. നല്ലൊരെണ്ണം സജസ്റ്റ് ചെയ്യാമോ?? തുടങ്ങിയ തരം കാര്യങ്ങൾക്കാണ്‌ എന്നെ സമീപിക്കുന്നത്..

ഇന്നലെയും ഞങ്ങൾ തമ്മിൽ സീരിയസ്സായി സംസാരിക്കുന്നത് കണ്ടു എന്റെ മറ്റൊരു സഹപ്രവർത്തക വന്നു എന്നോട് ചോദിച്ചു.... ഇന്നത്തെ കുമ്പസാരം കഴിഞ്ഞോ??

ആ ചോദ്യം കേട്ട് ഞാൻ ചിരിച്ചപ്പോൾ, പുള്ളിക്കാരി എന്നോട് പറഞ്ഞു.. പണ്ട് ഞങ്ങളോട് ആയിരുന്നു അവൾ ഇത്തരം കാര്യങ്ങളിൽ അഭിപ്രായങ്ങൾ തേടിയിരുന്നത്. പിന്നീട് ഞങ്ങൾക്ക് ഒരു കാര്യം ബോദ്ധ്യമായി.. ഇവൾ നമ്മളോട് വെറുതെ ഒരു നേരമ്പോക്കിന് ചോദിക്കുന്നതാണ്. നമ്മളോട് ചോദിക്കുന്നതിന് മുൻപ് തന്നെ അവൾക്കു അവളുടേതായ പ്ലാനുകൾ ഉണ്ട്. നമ്മൾ വെറുതെ ഇല്ലാത്ത സമയം മെനക്കെടുതി, ഇവളോട് കാര്യങ്ങൾ പറയും. ഒടുക്കം അവൾ തോന്നിയത് പോലെ കാര്യങ്ങൾ നടത്തും. ഇത് ഒരു തവണ അല്ല.. പല തവണ സംഭവിച്ചപ്പോൾ നമ്മൾ ഈ കുമ്പസാരവും, കുശുകുശുപ്പും അങ്ങ് നിർത്തി.. എന്ത് ചോദിച്ചാലും ഒറ്റ ഉത്തരം.. I don't know അല്ലെങ്കിൽ let me check... അതിൽ നിർത്തും. അത് കൊണ്ട് നീയും ഈ പണി നിർത്തിക്കോ.. വെറുതെ സമയം കളയാനായിട്ട്...

അത് കൊണ്ട് തന്നെ നമ്മുടെ ഇടയിൽ അവൾക്കൊരു പേരുണ്ട്..."ആസ്‌ക്ക് ഹോൾ"..

ആസ്‌ക്ക് ഹോളോ.... ഞാൻ ആശ്ചര്യത്തോടെ ചോദിച്ചു... അവൾ പറഞ്ഞു.. അതെ ആസ്‌ക്ക് ഹോൾ തന്നെ.. നമ്മളോട് ഓരോന്ന് ചോദിച്ചു.. അവൾക്ക് തോന്നുന്നത് പോലെ ചെയ്യുന്ന അവളെ പിന്നെ ആസ്‌ക്ക് ഹോൾ എന്നല്ലാതെ മറ്റെന്തു പേരിട്ടു വിളിക്കാൻ ആകും.. ഓരോരോ "ആസ്‌ക്ക് ഹോൾസ്"

അങ്ങനെ പുതിയ ഒരു ഇംഗ്ലീഷ് വാക്ക് കൂടി ഞാൻ പഠിച്ചു കഴിഞ്ഞിരിക്കുന്നു.

നിങ്ങൾക്കും ഇത് പോലെയുള്ള ആസ്‌ക്ക് ഹോൾസിനെ അറിയാമെങ്കിൽ അവരെ വെറുതെ ഒന്ന് സ്‌മരിച്ചോളൂ

വാൽ കഷ്‌ണം : ഈ ചിത്രത്തിൽ കാണുന്നത് കുഴിയിൽ വീണ "A ഫോർ....