06/01/2023
നിങ്ങൾക്ക് രാഷ്ട്രീയം വേണോ വേണ്ടയോ?
രാഷ്ട്രീയം, ഈ വാക്ക് പരിചയമില്ലാത്തവർ വിരളമാണ്. എന്നാൽ അതിന്റെ പ്രാധാന്യത്തെ പറ്റി അവബോധർ അല്ലാത്തവർ സുലഭവും.
ഒരു ആരോഗ്യപരമായ രാഷ്ട്രീയ സാഹചര്യത്തിന്റെ ഏറ്റവും അടിസ്ഥാന മൂലകം ജനങ്ങളുടെ രാഷ്ട്രീയ ബോധ്യം തന്നെയാണ്. ജനാധിപത്യം സാധ്യമാകുന്നത് അതിലൂടെ മാത്രവുമാണ്.
രാഷ്ട്രീയം തങ്ങളുടെ ഉത്തരവാദിത്ത പരിധിയിൽ വരുന്ന ഒന്നല്ല എന്നും തങ്ങളുടെ ജീവിതത്തിൽ അതിനു ഒരു സ്വാധീനവുമില്ല എന്നതിനേക്കാൾ വലിയ വിഡ്ഢിത്തം ഉണ്ടാവില്ല.
നിങ്ങൾക്ക് അഭിമാനപൂർവ്വം ഒരു ജോലി ചെയ്ത് ജീവിക്കുന്നതിൽ തുടങ്ങി നിങ്ങളുടെ വിദ്യാഭ്യാസ യോഗ്യതയ്ക്ക് അനുസരിച്ച് എത്രമാത്രം ജോലി സാധ്യത ലഭ്യമാണ് എന്ന് തീരുമാനിക്കപ്പെടുന്നതിൽ വരെ ചുറ്റുപാടിന്റെ രാഷ്ട്രീയത്തിന്റെയും, ഭരണത്തിലുള്ള രാഷ്ട്രീയ ആശയത്തിന്റെയും, രാഷ്ട്രീയ നേതൃത്വത്തിലുള്ള പ്രാപ്തിയും അത്യന്താപേക്ഷിതമായ ഒന്ന് തന്നെയാണ്.
നിങ്ങളുടെ ദൈനദിനം ജീവിതത്തിൽ ഉപയോഗിക്കുന്ന അടിസ്ഥാന ആവശ്യ വസ്തുക്കൾക്ക് മേൽ വർദ്ധിച്ചു വരുന്ന നികുതി നിങ്ങളുടെ നിത്യജീവിതത്തെ ബാധിച്ചു കൊണ്ടിരിക്കുന്ന രാഷ്ട്രീയമല്ലേ?
നിങ്ങൾ ധരിക്കുന്ന വസ്ത്രത്തിലും നിങ്ങൾ കഴിക്കുന്ന ഭക്ഷണത്തിൽ ഉൾപ്പെടെ രാഷ്ട്രീയം പ്രതിഫലിക്കുന്നില്ലേ?
നാം ഓരോരുത്തരുടെയും സ്വത്വവും, അഭിമാനപുരസരം അന്തസ്സോടെ ജീവിക്കാനുള്ള സ്വാതന്ത്ര്യവും ഒരു മനുഷ്യന്റെ അടിസ്ഥാന രാഷ്ട്രീയ അവകാശമാകുന്നതിലൂടെ നമ്മുടെ നിലനിൽപ്പ് കൂടി രാഷ്ട്രീയത്തിൽ തന്നെയാകുന്നില്ലേ?
കൃത്യമായ വോട്ടവകാശം എന്ന പൗരന്റെ ഉത്തരവാദിത്വം കൂടി നിർവഹിക്കാത്ത അവകാശ ലംഘനങ്ങളോടു സഹിഷ്ണു പുലർത്തുന്ന തലമുറയുടെ വളർച്ച ജനാധിപത്യ രാഷ്ട്രീയത്തിന്റെ മൂല്യച്യുതിയാണ്.
നിങ്ങളോട് നിങ്ങളുടെ വീട്ടിൽ തുടങ്ങി വിദ്യാഭ്യാസ സ്ഥാപനത്തിലും, സുഹൃത്ത് വലയങ്ങളിലും, മറ്റിടങ്ങളിലും രാഷ്ട്രീയം വിലക്കുന്നുണ്ടെങ്കിൽ നിങ്ങളുടെ സ്വത്വത്തെയും അവകാശങ്ങളെയും ബഹുമാനിക്കാൻ കഴിയാത്തതും ഭരണസംവിധാനങ്ങളിലെ വീഴ്ച മറച്ചുവയ്ക്കുവാനും അത് തിരുത്താൻ അധികാര വർഗ്ഗത്തിന്റെ താല്പര്യ കുറവിന്റെയും പ്രതിഫലനമാണ്.
" Democracy will only strengthen when you become intolerant towards the violation of your rights "
