08/09/2025
പുതുക്കുളങ്ങര വള്ളംകളി കാണുവാൻ ജനപ്രവാഹം.
ഉഴമലയ്ക്കൽ പുതുക്കുളങ്ങര മഞ്ചംമൂല കടവിലെ വള്ളംകളി കാണുവാൻ ജനപ്രവാഹം ആയിരുന്നു. എത്രത്തോളം ജനങ്ങൾ വന്ന് എത്തിച്ചേർന്നുവോ അത്രത്തോളം ജനങ്ങൾക്ക് കാണുവാനുള്ള അവസരവും സൗകര്യവും ഒരുക്കി സംഘാടകർ. ഇത് നാട്ടുകാരുടെ കൂട്ടായ്മ. ജനസേവ ചാരിറ്റബിൾ സൊസൈറ്റിയുടെ അമരക്കാരൻ അനിൽകുമാർ ഉൾപ്പെട്ട നാട്ടുകാരുടെ സംഘടന തീർത്ത വിസ്മയം.
കേരളത്തിൻ്റെ പൈതൃകവും ആവേശവും നിറഞ്ഞുനിന്ന ഒരു ദിവസമായിരുന്നു അത്. ഓണത്തിൻ്റെ നിറവിൽ കരമനയാറിൻ്റെ ഓളങ്ങളിൽ ആവേശം തീർത്ത് നടന്ന വള്ളംകളി കാണാൻ പുതുക്കുളങ്ങര മഞ്ചമൂല കടവിലേക്ക് ജനസാഗരം ഒഴുകിയെത്തി. വള്ളംകളി കേവലം ഒരു കളി മാത്രമല്ല, അതൊരു ജനതയുടെ സംസ്കാരവും, പാരമ്പര്യവും, കൂട്ടായ്മയുടെ ശക്തിയും വിളിച്ചോതുന്ന ആഘോഷമാണ്.
വിവിധ സ്പോൺസർ മാർ സ്പോൺസർ ചെയ്ത വള്ളങ്ങൾ തുഴഞ്ഞ് മുന്നോട്ട് കുതിക്കുമ്പോൾ കരയിൽ നിന്ന് ആർപ്പുവിളികളും ആരവങ്ങളും ഉയർന്നു. അത് കളിക്കാർക്ക് മാത്രമല്ല, കാണികൾക്കും ആവേശമായി മാറി. നാട്ടുകാർ സംഘടിപ്പിച്ച ഈ ഓണാഘോഷ വള്ളം കളി കാണാൻ ആളുകൾ ഒത്തുകൂടി. കാലങ്ങളായി മനസ്സിൽ കൊണ്ടുനടക്കുന്ന ഈ കലാസ്നേഹം നാടിൻ്റെ നന്മയെയും തനിമയെയും എത്രത്തോളം സ്നേഹിക്കുന്നു എന്നതിൻ്റെ നേർസാക്ഷ്യമാണ്.
ഓണത്തിൻ്റെ വരവോടെ നാട് കൂടുതൽ ഉണർവോടെയും ഉത്സാഹത്തോടെയും കാണപ്പെടുന്നു. ഒരുമയുടെയും സന്തോഷത്തിൻ്റെയും സന്ദേശം നൽകുന്ന ഈ ആഘോഷം, നാടിൻ്റെ പൈതൃകങ്ങളെയും ഓർമ്മകളെയും പുതുമയോടെ നിലനിർത്താൻ സഹായിക്കുന്നു. ഓരോ വള്ളംകളിയും ഒരോ തലമുറയിലേക്ക് കൈമാറുന്ന ചരിത്രത്തിൻ്റെയും, സംസ്കാരത്തിൻ്റെയും, സ്നേഹത്തിൻ്റെയും ഊർജ്ജമാണ്. നാടിൻ്റെ നന്മയിലും, നാടൻ തനിമയിലും വിശ്വസിച്ച് ഈ പാരമ്പര്യത്തെ നെഞ്ചിലേറ്റുന്ന ഓരോ മലയാളിക്കും ഈ വള്ളംകളി നൽകുന്ന ആവേശം ചെറുതല്ല.
@അസിസ്നെടുമങ്ങാട്
