10/09/2026
11 സെപ്റ്റംബർ 2026
അനുദിന വായന - സങ്കീർത്തനം - സുവിശേഷം
🧾 ഒന്നാം വായന
1 കോറി 9:16-19,22-27
എല്ലാവരേയും രക്ഷിക്കാന് വേണ്ടി ഞാന് എല്ലാവര്ക്കും എല്ലാമായി.
സഹോദരരേ, ഞാന് സുവിശേഷം പ്രസംഗിക്കുന്നെങ്കില് അതില് എനിക്ക് അഹംഭാവത്തിനു വകയില്ല. അത് എന്റെ കടമയാണ്. ഞാന് സുവിശേഷം പ്രസംഗിക്കുന്നില്ലെങ്കില് എനിക്കു ദുരിതം! ഞാന് സ്വമനസ്സാ ഇതു ചെയ്യുന്നെങ്കില് എനിക്കു പ്രതിഫലമുണ്ട്. അങ്ങനെയല്ലെങ്കില് മറ്റാരുടെയോ നിയോഗമനുസരിച്ചാണ് ചെയ്യുന്നത്. അപ്പോള് എന്താണ് എന്റെ പ്രതിഫലം? സുവിശേഷം നല്കുന്ന അവകാശം പൂര്ണമായി ഉപയോഗിക്കാതെ പ്രതിഫലമെന്നിയേ സുവിശേഷം പ്രസംഗിക്കുന്നതിലുള്ള സംതൃപ്തി മാത്രം.
ഞാന് എല്ലാവരിലുംനിന്നു സ്വതന്ത്രനാണെങ്കിലും വളരെപ്പേരെ നേടേണ്ടതിന് ഞാന് എല്ലാവരുടെയും ദാസനായിത്തീര്ന്നിരിക്കുന്നു. എല്ലാ പ്രകാരത്തിലും കുറെപ്പേരെ രക്ഷിക്കേണ്ടതിന് ഞാന് എല്ലാവര്ക്കും എല്ലാമായി. സുവിശേഷത്തില് ഭാഗഭാക്കാകുന്നതിനായി സുവിശേഷത്തിനുവേണ്ടി ഞാന് ഇവയെല്ലാം ചെയ്യുന്നു.
മത്സരക്കളത്തില് എല്ലാ ഓട്ടക്കാരും ഓടുന്നെങ്കിലും സമ്മാനാര്ഹനാകുന്നത് ഒരുവന് മാത്രമാണെന്നു നിങ്ങള്ക്ക് അറിഞ്ഞുകൂടേ? ആകയാല്, സമ്മാനം ലഭിക്കേണ്ടതിനായി നിങ്ങള് ഓടുവിന്. കായികാഭ്യാസികള് എല്ലാ കാര്യത്തിലും ആത്മനിയന്ത്രണം പാലിക്കുന്നു. അവര് നശ്വരമായ കിരീടത്തിനു വേണ്ടിയാണ് അപ്രകാരം ചെയ്യുന്നത്; നാം അനശ്വരമായതിനു വേണ്ടിയും. ഞാന് ഓടുന്നതു ലക്ഷ്യമില്ലാതെയല്ല. ഞാന് മുഷ്ടിപ്രയോഗം നടത്തുന്നത് വായുവില് പ്രഹരിക്കുന്നതുപോലെയല്ല. മറ്റുള്ളവരോടു സുവിശേഷം പ്രസംഗിച്ച ഞാന് തന്നെ തിരസ്കൃതന് ആകാതിരിക്കുന്നതിന് എന്റെ ശരീരത്തെ ഞാന് കര്ശനമായി നിയന്ത്രിച്ചു കീഴടക്കുന്നു.
കർത്താവിന്റെ വചനം.
ദൈവത്തിനു നന്ദി.
✠✠✠✠✠✠✠✠✠✠✠✠✠✠✠✠✠✠
🎼സങ്കീർത്തനം
സങ്കീ 84:2,3,4-5,11
സൈന്യങ്ങളുടെ കര്ത്താവേ, അങ്ങേ വാസസ്ഥലം എത്ര മനോഹരം!
എന്റെ ആത്മാവു കര്ത്താവിന്റെ
അങ്കണത്തിലെത്താന് വാഞ്ഛിച്ചു തളരുന്നു;
എന്റെ മനസ്സും ശരീരവും
ജീവിക്കുന്നവനായ ദൈവത്തിന് ആനന്ദഗാനമാലപിക്കുന്നു.
എന്റെ രാജാവും ദൈവവുമായ സൈന്യങ്ങളുടെ കര്ത്താവേ,
കുരികില്പ്പക്ഷി ഒരു സങ്കേതവും
മീവല്പ്പക്ഷി കുഞ്ഞിന് ഒരു കൂടും
അങ്ങേ ബലിപീഠത്തിങ്കല് കണ്ടെത്തുന്നുവല്ലോ.
സൈന്യങ്ങളുടെ കര്ത്താവേ, അങ്ങേ വാസസ്ഥലം എത്ര മനോഹരം!
എന്നേക്കും അങ്ങയെ സ്തുതിച്ചുകൊണ്ട്
അങ്ങേ ഭവനത്തില് വസിക്കുന്നവര് ഭാഗ്യവാന്മാര്.
അങ്ങയില് ശക്തി കണ്ടെത്തിയവര് ഭാഗ്യവാന്മാര്;
അവരുടെ ഹൃദയത്തില് സീയോനിലേക്കുള്ള രാജവീഥികളുണ്ട്.
അവര് കൂടുതല് കൂടുതല് ശക്തിയാര്ജിക്കുന്നു.
സൈന്യങ്ങളുടെ കര്ത്താവേ, അങ്ങേ വാസസ്ഥലം എത്ര മനോഹരം!
ദൈവമായ കര്ത്താവു സൂര്യനും പരിചയുമാണ്;
അവിടുന്നു കൃപയും ബഹുമതിയും നല്കുന്നു;
പരമാര്ഥതയോടെ വ്യാപ രിക്കുന്നവര്ക്ക്
ഒരു നന്മയും അവിടുന്നു നിഷേധിക്കുകയില്ല.
സൈന്യങ്ങളുടെ കര്ത്താവേ, അങ്ങേ വാസസ്ഥലം എത്ര മനോഹരം!
✠✠✠✠✠✠✠✠✠✠✠✠✠✠✠✠✠✠
✝ സുവിശേഷം
ലൂക്കാ 6:39-42
കുരുടനു കുരുടനെ നയിക്കുവാന് സാധിക്കുമോ?
അക്കാലത്ത്, യേശു തന്റെ ശിഷ്യന്മാരോട് ഒരു ഉപമ പറഞ്ഞു: കുരുടനു കുരുടനെ നയിക്കുവാന് സാധിക്കുമോ? ഇരുവരും കുഴിയില് വീഴുകയില്ലേ? ശിഷ്യന് ഗുരുവിനെക്കാള് വലിയവനല്ല. എന്നാല്, എല്ലാം പഠിച്ചു കഴിയുമ്പോള് അവന് ഗുരുവിനെപ്പോലെ ആകും. നിന്റെ സഹോദരന്റെ കണ്ണിലെ കരട് നീ കാണുകയും സ്വന്തം കണ്ണിലെ തടിക്കഷണത്തെ ഗൗനിക്കാതിരിക്കുകയും ചെയ്യുന്നതെന്ത്? സ്വന്തം കണ്ണിലെ തടിക്കഷണം കാണാതിരിക്കേ, സഹോദരാ, നിന്റെ കണ്ണിലെ കരട് ഞാന് എടുത്തുകളയട്ടെ എന്നുപറയാന് നിനക്ക് എങ്ങനെ കഴിയും? കപടനാട്യക്കാരാ, ആദ്യമേ നിന്റെ കണ്ണിലെ തടിക്കഷണം എടുത്തുമാറ്റുക. അപ്പോള് നിന്റെ സഹോദരന്റെ കണ്ണിലെ കരട് എടുത്തുകളയാന് കഴിയത്തക്കവിധം നിന്റെ കാഴ്ച തെളിയും.
കർത്താവിൻ്റെ സുവിശേഷം.
ക്രിസ്തുവേ അങ്ങേയ്ക്കു സ്തുതി.
✠✠✠✠✠✠✠✠✠✠✠✠✠✠✠✠✠✠
അനുദിന വിശുദ്ധ/ൻ/ർ:
*വിശുദ്ധ പഫ്നൂഷിയസ്*
വിശുദ്ധ പഫ്നൂഷിയസിന്റെ ആദ്യകാല ജീവിതത്തെക്കുറിച്ച് യാതൊരു രേഖകളും നിലവിലില്ല. എന്നാല് അറിവായിട്ടുള്ള വിവരങ്ങളുടെ അടിസ്ഥാനത്തില് തന്റെ കാലഘട്ടത്തിലെ മറ്റ് അനേകം യുവാക്കളെപ്പോലെ പഫ്നൂഷിയസും, ഒരു സന്യാസസമൂഹത്തെ നയിക്കുകയും, ആശ്രമജീവിത സമ്പ്രദായത്തിന് തുടക്കമിടുകയും ചെയ്ത ഒരാളാണ്. വിശുദ്ധ അന്തോനീസിന്റെ മേല്നോട്ടത്തില് നിരവധി വര്ഷങ്ങള് കര്ക്കശമായ സന്യാസ ചര്യകള് പാലിച്ചുകൊണ്ട് ജീവിച്ചതിനു ശേഷം, കാലക്രമേണ പഫ്നൂഷിയസ് തെബൈഡിന്റെ ഉന്നത പ്രദേശങ്ങളിലെ മെത്രാനായി തിരഞ്ഞെടുക്കപ്പെട്ടു.
305 - 313 കാലയളവില് റോമന് സാമ്രാജ്യത്തിന്റെ ഈജിപ്തിലേയും, സിറിയയിലേയും ഭരണാധികാരിയായിരുന്ന മാക്സിമിനൂസ് ദയ്യയും വിശുദ്ധനും തമ്മില് ശക്തമായ വാഗ്വാദങ്ങളുണ്ടായി. ആ പ്രദേശങ്ങളില് മാക്സിമിനൂസ് ക്രിസ്ത്യാനികള്ക്കെതിരെ മതമര്ദ്ദനം അഴിച്ചുവിട്ടു. ക്രിസ്തുമതത്തെ ഇല്ലാതാക്കുവാന് വിജാതീയരുടെ പ്രവര്ത്തികളെ ശക്തിപ്പെടുത്തി കൊണ്ടിരുന്ന കാലമായിരുന്നു അത്. ക്രൂരനായ ഭരണാധികാരിയുടെ ഭരണത്തിന് കീഴില് പഫ്നൂഷിയസിന്റെ കത്തോലിക്കാ വിശ്വാസത്തെ ഇല്ലാതാക്കുവാനുള്ള ശ്രമങ്ങള് ഉണ്ടായി. ഈ ശ്രമങ്ങളില് വിശുദ്ധന്റെ ഇടത് കാലിന് അംഗഭംഗം വരുത്തുകയും, വലത് കണ്ണ് ചൂഴ്ന്നെടുക്കുകയും ചെയ്തുവെങ്കിലും അവരുടെ ശ്രമങ്ങള്ക്ക് വിജയം കണ്ടില്ല.
ക്രൂരമായ ഈ പീഡനങ്ങള് കൊണ്ട് വിശുദ്ധന്റെ വിശ്വാസത്തെ തടയുവാന് സാധ്യമല്ല എന്ന് കണ്ടതിനാല് ഖനികളില് കഠിനമായ ജോലിചെയ്യുവാന് അദ്ദേഹത്തെ നിയോഗിക്കുകയാണ് ഉണ്ടായത്. 311നും 313നും ഇടക്ക് ക്രിസ്തുമതത്തിന് നേരെയുള്ള ഭരണാധികാരികളുടെ മനോഭാവത്തില് മാറ്റം കണ്ടു തുടങ്ങി. 312-ല് കോണ്സ്റ്റന്റൈന് ചക്രവര്ത്തി ക്രിസ്തുമതം സ്വീകരിക്കുകയും അടുത്ത വര്ഷം തന്നെ ക്രിസ്തുമതം നിയമവിധേയമാക്കുകയും ചെയ്തു. ഇതിനിടയില് മാക്സിമിനൂസ് ദയ്യ മരണപ്പെട്ടു.
മതപീഡനത്തെ അതിജീവിച്ച വിശുദ്ധ പഫ്നൂഷിയസിനെ കോണ്സ്റ്റന്റൈന് ചക്രവര്ത്തി വളരെയേറെ ആദരവോടെയാണ് കണ്ടിരുന്നത്. തെബൈഡിന്റെ ഉന്നത പ്രദേശങ്ങളിലെ മെത്രാനായിരുന്ന പഫ്നൂഷിയസുമായി കോണ്സ്റ്റന്റൈന് ചക്രവര്ത്തി നിരന്തരം കൂടിക്കാഴ്ച നടത്തിയിരുന്നതായി പറയപ്പെടുന്നു. വിശുദ്ധന്റെ കണ്ണ് നഷ്ടപ്പെട്ട മുറിവില് ചുംബിച്ചുകൊണ്ടായിരുന്നു ചക്രവര്ത്തി തന്റെ ബഹുമാനം കാണിച്ചത്. അരിയാനിസമെന്ന പാഷണ്ഡതയെ എതിര്ക്കുവാനായി വിളിച്ചു കൂട്ടിയ ആദ്യത്തെ സഭാസമ്മേളനത്തിലും വിശുദ്ധന് പങ്കെടുത്തിട്ടുണ്ട്.
നിസിയ സഭാ സമ്മേളനത്തിനു ശേഷം ഉടലെടുത്ത സൈദ്ധാന്തികമായ ആശയകുഴപ്പങ്ങളില് യേശുവിന്റെ എന്നെന്നും നിലനില്ക്കുന്ന അസ്ഥിത്വത്തെ വിശുദ്ധന് ഉയര്ത്തിപ്പിടിച്ചു. അങ്ങനെ അലെക്സാണ്ട്രിയായിലെ വിശുദ്ധ അത്തനാസിയൂസിനും മറ്റ് സഭാ നേതാക്കള്ക്കും ഒപ്പം നിന്നുകൊണ്ട് യാഥാസ്ഥിതിക ക്രിസ്തീയതയെ സംരക്ഷിക്കുകയാണ് അദ്ദേഹം ചെയ്തത്. 335-ല് പഫ്നൂഷിയസ് ഈജിപ്തിലെ ഒരു വലിയ മെത്രാന് സമൂഹത്തോടൊപ്പം ട്ടൈറിലെ പ്രാദേശിക സഭാ സമ്മേളനത്തില് പങ്കെടുക്കുകയുണ്ടായി. വിശുദ്ധ പഫ്നൂഷിയസ് ജനിച്ച ദിവസത്തേപ്പോലെ തന്നെ അദ്ദേഹം മരണപ്പെട്ട ദിവസത്തേക്കുറിച്ചും യാതൊരറിവുമില്ല. സഭയില് വിശുദ്ധന്റെ നാമത്തില് മറ്റൊരു വിശുദ്ധന് കൂടിയുണ്ട്. ഏപ്രില് 19-ന് രക്തസാക്ഷിത്വത്തിന്റെ ഓര്മ്മപുതുക്കല് കൊണ്ടാടപ്പെടുന്ന പഫ്നൂഷിയസ് എന്ന രക്തസാക്ഷിയാണ് ആ വിശുദ്ധന്.
