04/09/2026
അങ്കമാലി റെയിൽവേ സ്റ്റേഷനിൽ മെട്രോ കണക്ടിവിറ്റിക്കായി വാശിപിടിച്ചാൽ ഫലം പദ്ധതിയുടെ കാലതാമസമായിരിക്കും!
ഒരുപക്ഷെ എറണാകുളത്ത് ഏറ്റവുമധികംപേർ സവിശേഷമായ താൽപ്പര്യത്തോടെ വീക്ഷിച്ചുകൊണ്ടിരിക്കുന്ന വാർത്തകളാണ് കൊച്ചി മെട്രോയുടെ മൂന്നാംഘട്ടം ആരംഭിക്കുന്നതിനുള്ള നീക്കങ്ങളുമായി ബന്ധപ്പെട്ടവ. എറണാകുളത്തുനിന്ന് എയർപോർട്ടിലേയ്ക്കും അങ്കമാലിക്കുമുള്ള യാത്രയിലെ നിരന്തര പ്രതിസന്ധികൾ ഒരു പരിധിവരെ പരിഹരിക്കാൻ മൂന്നാം ഘട്ട മെട്രോ നിർമ്മിതിയ്ക്ക് കഴിയുമെന്നതാണ് കാരണം. എയർപോർട്ടിലേക്കുള്ള യാത്ര, ആലുവ അങ്കമാലി റോഡിലെ ബ്ലോക്കുകൾ തുടങ്ങിയവ എറണാകുളത്തെ സംബന്ധിച്ച് കീറാമുട്ടി പ്രശ്നങ്ങളാണ്.
കൊച്ചി മെട്രോ ആദ്യ ഘട്ടം ലാഭകരമായി മാറുകയും കേരളസർക്കാർ മൂന്നാം ഘട്ട പദ്ധതിയോട് തികച്ചും അനുകൂലമായ നിലപാട് സ്വീകരിക്കുകയും ചെയ്തിരിക്കുന്ന പശ്ചാത്തലയിൽ, കേന്ദ്ര നഗര വികസന മന്ത്രാലയത്തിന് പദ്ധതിയുടെ ഡിപിആർ സമർപ്പിച്ച് അനുമതി ലഭിക്കുന്ന പക്ഷം സ്ഥലം ഏറ്റെടുക്കൽ പ്രവർത്തനങ്ങൾ ആരംഭിക്കാൻ കഴിയും. എന്നാൽ, വിശദമായ പദ്ധതി രേഖ സർക്കാരിന് സമർപ്പിച്ചതോടെ ഉയർന്നുവന്ന പ്രധാന ചർച്ചാവിഷയമാണ് അങ്കമാലി റെയിൽവേ സ്റ്റേഷനിലേക്ക് മെട്രോ എത്താത്തത്. അങ്കമാലി റെയിൽവേ സ്റ്റേഷനെ ബന്ധിപ്പിച്ച് മെട്രോ പാത നിർമ്മിക്കണമെന്ന ആവശ്യവുമായി പ്രാദേശിക മെട്രോ ആക്ഷൻ കൗൺസിൽ പ്രതിഷേധമുയർത്തുകയും മന്ത്രികൂടിയായ സ്ഥലം എംഎൽഎ റോജി എം. ജോണും എംപി ബെന്നി ബെഹനാനും ഈ നിർദ്ദേശംകൂടി പരിഗണിക്കണമെന്ന് ആവശ്യപ്പെടുകയും ചെയ്തപ്പോൾ, പഠനത്തിനായി കെ.എം.ആർ.എൽ നിയോഗിച്ച പ്രമുഖ കൺസൾട്ടൻസി ഏജൻസിയായ സിസ്ട്ര എംവിഎ കൺസൾട്ടിങ് പ്രൈവറ്റ് ലിമിറ്റഡ് വീണ്ടും സാധ്യതാ പഠനം നടത്തുകയും പുതിയ റിപ്പോർട്ട് സമർപ്പിക്കുകയും ചെയ്തു. എന്നാൽ, പുതിയ ഡി.പി.ആറും വ്യക്തമാക്കുന്നത്, അങ്കമാലി റെയിൽവേ സ്റ്റേഷൻ വഴി മെട്രോ തിരിച്ചുവിടുന്നത് സാങ്കേതികമായും സാമ്പത്തികമായും പ്രായോഗികമല്ലെന്നാണ്.
അങ്കമാലി കേന്ദ്രീകരിച്ചു രൂപീകരിക്കപ്പെട്ട മെട്രോ ആക്ഷൻ കൗൺസിൽ ഈ വശ്യമുന്നയിച്ച് പ്രതിഷേധം തുടരുമ്പോഴും അത്തരമൊരു ആവശ്യം പ്രയോഗികമല്ലെന്നുതന്നെയാണ് പ്രാഥമിക നിരീക്ഷണത്തിൽ ആർക്കും വ്യക്തമാവുക. നെടുമ്പാശ്ശേരി ഇന്റർനാഷണൽ എയർപോർട്ട്, എയർപ്പോർട്ടിന് സമീപം പണി പുരോഗമിച്ചുകൊണ്ടിരിക്കുന്ന പുതിയ റെയിൽവേ സ്റ്റേഷൻ എന്നിവ പദ്ധതിയിലെ രണ്ടു പ്രധാന സ്റ്റേഷനുകളാണ്. അവയിലേയ്ക്ക് ആലുവയിൽനിന്നുള്ള നിലവിലുള്ള മെട്രോയിൽനിന്നും അങ്കമാലി ഹൈവേയിൽനിന്നും കണക്ടിവിറ്റി നൽകുകയാണ് പദ്ധതിയുടെ പ്രധാന ലക്ഷ്യങ്ങൾ. മറ്റൊന്ന്, അങ്കമാലിയിൽനിന്നും എറണാകുളത്തേക്കുള്ള മെട്രോ കണക്ടിവിറ്റി. അങ്ങനെയിരിക്കെ, മറ്റൊരു റെയിൽവേ സ്റ്റേഷൻകൂടി ഈ പദ്ധതിയിൽ ഉൾപ്പെടുത്തേണ്ട ആവശ്യമില്ല. ഇക്കാര്യം ഡിപിആറിൽ വ്യക്തമാക്കുന്നുണ്ട്.
അങ്കമാലി റെയിൽവേ സ്റ്റേഷനിൽ ഇറങ്ങുന്ന ഒരാളെ സംബന്ധിച്ച്, അങ്കമാലി ടൗണിലേക്ക് എത്തുക എന്നതിനപ്പുറം അവിടെ മെട്രോ സ്റ്റേഷൻ ലഭിച്ചതുകൊണ്ട് പ്രയോജനം ഉണ്ടാകാനില്ല. എന്നാൽ, നിലവിലെ പദ്ധതി പ്രകാരം ആലുവയിൽനിന്ന് കരയാംപറമ്പ് വരെ ദൈർഘ്യവും പതിനഞ്ചു സ്റ്റേഷനുകളുമുള്ള മെട്രോ ലൈൻ കടന്നുപോകുന്നത് ഹൈവേയുടെ ഒരേ വശത്തുകൂടി മാത്രമാണ്. എന്നാൽ, അങ്കമാലി റെയിൽവേ സ്റ്റേഷൻ ഹൈവേയുടെ മറുവശത്താണ്. ഹൈവേ ക്രോസ് ചെയ്യേണ്ടി വരും എന്നതിനാലും നീളക്കൂടുതൽ ഉണ്ടാകുമെന്നതിനാലും പദ്ധതി ചെലവിന്റെ കാര്യത്തിൽ ഗണ്യമായ വർദ്ധനവുണ്ടാകാൻ ഇത്തരമൊരു മാറ്റം കാരണമാകും. മാത്രവുമല്ല, കൂടുതൽ വളവു തിരിവുകൾ പോലുള്ള സങ്കീർണ്ണതകളും അതിനാൽത്തന്നെ കൂടുതൽ സ്ഥലം ഏറ്റെടുക്കേണ്ട ആവശ്യവും ഉടലെടുക്കും. ഏറ്റെടുക്കേണ്ടി വരുന്ന സ്ഥലം അങ്കമാലി പട്ടണത്തിന്റെ ഹൃദയഭാഗം തന്നെ ആയതിനാൽ സ്ഥലവിലയിലും വലിയ വ്യത്യാസം ഉണ്ടാകും. പ്രഥമ ദൃഷ്ട്യാ തന്നെ അനാവശ്യമായി തോന്നിയേക്കാവുന്ന ഇത്തരമൊരു മാറ്റവും പദ്ധതിയിലെ സങ്കീർണതകളും കേന്ദ്രസർക്കാരിന്റെ അനുമതി ലഭിക്കാൻ തടസ്സവും സൃഷ്ടിച്ചേക്കാം.
നൽകിയിരിക്കുന്ന റൂട്ട് മാപ്പ് പരിശോധിച്ചാൽ മെട്രോയുടെ റൂട്ടും പുതിയ ആവശ്യത്തിന്റെ സങ്കീർണ്ണതയും വ്യക്തമാകും
വിമാനത്താവളത്തിന്റെ ഭൂഗർഭ പാതയിൽ നിന്ന് പുറത്തുവരുന്ന മെട്രോ പിന്നീട് കടന്നുപോകുന്നത് കാര്യമായ ജനവാസമുള്ള നായത്തോട്, കവരപ്പറമ്പ്, അങ്കമാലി ജംഗ്ഷൻ, LF ഹോസ്പിറ്റൽ പരിസരം, അങ്കമാലി ടൗൺ, കോതകുളങ്ങര, കരയാംപറമ്പ് എന്നീ പ്രധാന പോയിന്റുകളിലൂടെയാണ്. ഈ അലൈൻമെന്റ് ദേശീയപാത 544 മായി ബന്ധിപ്പിച്ച്, അങ്കമാലി ടൗണിലെ ഗതാഗതക്കുരുക്കിന് നേരിട്ട് പരിഹാരം കാണുന്ന തരത്തിലാണ് തയ്യാറാക്കിയിട്ടുള്ളത്.
നേരെമറിച്ച്, മാപ്പിൽ വ്യക്തമായി കാണുന്നതുപോലെ, അങ്കമാലി റെയിൽവേ സ്റ്റേഷൻ പ്രധാന ദേശീയപാതയിൽ നിന്നും ടൗണിൽ നിന്നും പടിഞ്ഞാറോട്ട് മാറിയാണ് സ്ഥിതി ചെയ്യുന്നത്. ഇവിടേക്ക് മെട്രോ പാത തിരിച്ചുവിട്ടാൽ പാതയുടെ നീളം അനാവശ്യമായി കൂടും. എൽ.എഫ് ആശുപത്രി തുടങ്ങിയ അതീവ തിരക്കുള്ള ഭാഗങ്ങളിലെ യാത്രക്കാർക്ക് മെട്രോയുടെ പ്രയോജനം നഷ്ടപ്പെടുകയോ അല്ലെങ്കിൽ അവർക്ക് മെട്രോ കയറാൻ അധികദൂരം സഞ്ചരിക്കേണ്ട അവസ്ഥയോ വരും. കരയാംപറമ്പും എൽ.എഫ് ആശുപത്രിയും ഉൾപ്പെടുന്നതിനാൽ എറണാകുളം, ആലുവ ഭാഗങ്ങളിലേക്ക് ദിവസേന ജോലിക്ക് പോകുന്ന ആയിരക്കണക്കിന് സാധാരണക്കാർക്ക് ഏറ്റവും എളുപ്പത്തിൽ മെട്രോ ലഭ്യമാകും.
ജനപ്രതിനിധികളുടെ ആവശ്യപ്രകാരം സമഗ്രമായി പരിശോധിച്ച ശേഷമാണ് സിസ്ട്ര കൺസൾട്ടൻസിയും കെ.എം.ആർ.എല്ലും അങ്കമാലി റെയിൽവേ സ്റ്റേഷൻ ഒഴിവാക്കി വിമാനത്താവളം-നായത്തോട്-അങ്കമാലി ടൗൺ വഴിയുള്ള റൂട്ട് തിരഞ്ഞെടുത്തത്. സാങ്കേതിക കൃത്യത, കുറഞ്ഞ ഭൂമിയേറ്റെടുക്കൽ, പദ്ധതിച്ചെലവ് ചുരുക്കൽ, അങ്കമാലി നഗരകേന്ദ്രത്തിന് ലഭിക്കുന്ന മെച്ചം എന്നിവ കണക്കിലെടുക്കുമ്പോൾ നിലവിലെ ഡി.പി.ആറിലെ അലൈൻമെന്റാണ് തികച്ചും ശാസ്ത്രീയവും ദീർഘവീക്ഷണമുള്ളതും. ആക്ഷൻ കൗൺസിലിന്റെ വാദങ്ങൾ മുൻനിർത്തി ഈ രൂപരേഖ മാറ്റാൻ ശ്രമിക്കുന്നത് നാടിന്റെ സമഗ്ര വികസനത്തെയും മെട്രോ യാഥാർത്ഥ്യമാകുന്നതിനെയും ദോഷകരമായി മാത്രമേ ബാധിക്കൂ.
- വിനോദ് നെല്ലയ്ക്കൽ
