05/09/2026
आदर्श शिक्षक, सेवानिवृत्त शिक्षक व गुणवंत विद्यार्थ्यांचा सत्कार सोहळा उत्साहात संपन्न
तिरोडा–गोरेगाव विधानसभा क्षेत्रांतर्गत आज आदर्श शिक्षक, सेवानिवृत्त शिक्षक तसेच माध्यमिक व उच्च माध्यमिक शाळांमधील परीक्षांमध्ये प्रावीण्य प्राप्त करणाऱ्या गुणवंत विद्यार्थ्यांचा सत्कार सोहळा उत्साहात व गौरवपूर्ण वातावरणात संपन्न झाला.
शिक्षण क्षेत्रात आपल्या कार्यातून उल्लेखनीय योगदान देणाऱ्या आदर्श शिक्षकांचा तसेच दीर्घकाळ शैक्षणिक सेवा बजावून निवृत्त झालेल्या शिक्षकांचा यावेळी सन्मान करण्यात आला. विद्यार्थ्यांच्या शैक्षणिक जडणघडणीत शिक्षकांचे योगदान अत्यंत महत्त्वाचे असून, शिक्षक हे समाजाच्या भावी पिढीचे शिल्पकार आहेत, असे यावेळी उपस्थित मान्यवरांनी सांगितले.
तसेच माध्यमिक व उच्च माध्यमिक परीक्षांमध्ये उत्कृष्ट गुण मिळवून प्रावीण्य प्राप्त करणाऱ्या विद्यार्थ्यांचा देखील सत्कार करून त्यांच्या यशाचे कौतुक करण्यात आले. विद्यार्थ्यांनी आपल्या मेहनत, जिद्द आणि सातत्याच्या जोरावर मिळविलेले हे यश इतर विद्यार्थ्यांसाठी प्रेरणादायी असल्याचे मान्यवरांनी नमूद केले.
यावेळी विद्यार्थ्यांना भविष्यातील शैक्षणिक वाटचालीसाठी शुभेच्छा देताना “गुणवत्ता, मेहनत आणि सातत्य यांच्या जोरावर विद्यार्थ्यांनी आपल्या कुटुंबासह तिरोडा–गोरेगाव विधानसभा क्षेत्राचे नाव उज्ज्वल करावे,” असे आवाहन करण्यात आले.
शिक्षकांचा सन्मान आणि गुणवंत विद्यार्थ्यांचे कौतुक हा समाजातील शिक्षणविषयक सकारात्मक वातावरणाला चालना देणारा उपक्रम असून, अशा उपक्रमांमुळे शिक्षकांना अधिक चांगले कार्य करण्याची प्रेरणा मिळते आणि विद्यार्थ्यांमध्ये स्पर्धात्मक वृत्ती निर्माण होते.
कार्यक्रमास शिक्षक, शिक्षण क्षेत्रातील अधिकारी, विविध शाळांचे मुख्याध्यापक, पालक, विद्यार्थी तसेच सामाजिक व राजकीय क्षेत्रातील मान्यवर मोठ्या संख्येने उपस्थित होते. कार्यक्रमाच्या यशस्वी आयोजनासाठी संबंधित शिक्षक, शिक्षण विभागाचे अधिकारी व आयोजकांचे सहकार्य लाभले.
याप्रसंगी राज्यसभेचे खासदार मा. श्री. राजेंद्रजी जैन, विधान परिषदेचे आमदार श्री.डॉ. परिणयजी फुके, विधान परिषदेचे आमदार श्री. अविनाशजी ब्राह्मणकर, गोंदिया जिल्हा परिषदेचे अध्यक्ष श्री. लायकरामजी भेंडारकर, भाजपा गोंदिया जिल्हाध्यक्षा सौ. सीताताई रहांगडाले, राष्ट्रवादी काँग्रेसचे गोंदिया जिल्हाध्यक्ष श्री. प्रेमजी रहांगडाले, तिरोडा नगराध्यक्ष श्री. अशोकजी असाटी, माजी आमदार श्री. हेमंतजी पटले तसेच अनेक मान्यवर उपस्थित होते.
#शिक्षक_दिन #सत्कार_समारंभ
