13/09/2026
*సాగునీటి ప్రాజెక్టుల పరిరక్షణకు వైఎస్సార్‌సీపీ పోరుబాట*
*కూటమి సర్కారు నిర్లక్ష్యంపై ఉక్కుపాదం*
*అరణియార్ ప్రాజెక్టు దుస్థితిపై రైతుల పక్షాన పోరాటం, పిచ్చాటూరులో భారీ ర్యాలీ*
*కీలపూడి నుంచి అరణియార్ వరకు మహా ర్యాలీకి పిలుపు*
*‘జలధార’ పేరుతో పచ్చ నేతల జేబులు నింపే యత్నం*
*మండిపడ్డ ఎంపీ మద్దిల గురుమూర్తి, నూకతోటి రాజేష్*
పిచ్చాటూరు: రాష్ట్రంలో సాగునీటి ప్రాజెక్టుల పట్ల కూటమి ప్రభుత్వం అనుసరిస్తున్న నిర్లక్ష్య వైఖరికి నిరసనగా వైఎస్సార్ కాంగ్రెస్ పార్టీ పోరుబాట పట్టిందని తిరుపతి ఎంపీ మద్దిల గురుమూర్తి అన్నారు. సాగునీటి ప్రాజెక్టులను పరిరక్షించి, రైతులకు చివరి ఎకరం వరకు నీరు అందించేలా ప్రభుత్వంపై ఒత్తిడి తీసుకువచ్చేందుకు రైతులతో కలిసి ఉద్యమిస్తామని తెలిపారు.
ఈ సమావేశానికి ముఖ్య అతిథులుగా తిరుపతి పార్లమెంట్ సభ్యులు మద్దిల గురుమూర్తి, సత్యవేడు నియోజకవర్గ సమన్వయకర్త నూకతోటి రాజేష్, గూడూరు నియోజకవర్గ పరిశీలకులు బీరేంద్ర వర్మ,రాయలసీమ సాగునీటి పరిరక్షణ కమిటీ సభ్యుడు వేలూరు రాకేష్ హాజరయ్యారు. వీరికి రాష్ట్ర సంయుక్త కార్యదర్శి కె.వి.భాస్కర్ నాయుడు, రాష్ట్ర సంయుక్త కార్యదర్శి కేటీ హరిశ్చంద్రా రెడ్డి, పార్టీ ఉపాధ్యక్షులు రమేష్ రాజు తదితరులు శాలువాలు కప్పి ఘన స్వాగతం పలికారు. పిచ్చాటూరు మండల అధ్యక్షులు అధ్యక్షులు చలపతి రాజు ఆధ్వరంలో జరిగిన ఈ కార్యక్రమంలో అన్ని మండలాల కన్వీనర్లు, ముఖ్య నాయకులు పాల్గొన్నారు.
ప్రాజెక్టుల నిర్వహణ, మరమ్మతులపై దృష్టి పెట్టకుండా కూటమి ప్రభుత్వం కేవలం ప్రచారానికే పరిమితమవుతోందని ఎంపీ విమర్శించారు. నీటి ప్రాజెక్టులపై సరైన శ్రద్ధ పెట్టి, దెబ్బతిన్న కాలువలు, గేట్లు, లాకులకు మరమ్మతులు చేపట్టి, అందుబాటులో ఉన్న నీటిని చివరి ఆయకట్టు వరకు అందించాల్సిన బాధ్యత ప్రభుత్వంపై ఉందన్నారు.
రాయలసీమలో వర్షాభావ పరిస్థితులు నెలకొనే అవకాశం ఉన్న సమయంలో సాగునీటి ప్రాజెక్టులను మరింత పటిష్టంగా నిర్వహించాల్సిన అవసరం ఉందన్నారు. సప్లై ఛానల్స్‌ను పూర్తిస్థాయిలో శుభ్రం చేసి, మరమ్మతులకు గురైన కాలువలు, గేట్లు, లాకులను వెంటనే బాగు చేయాలని డిమాండ్ చేశారు.
అరణియార్ ప్రాజెక్టు దాదాపు 5 వేల ఎకరాలకు సాగునీరు అందించాల్సి ఉండగా, ప్రస్తుతం సుమారు 3 వేల ఎకరాలకే నీరు అందుతున్న పరిస్థితి ఉందని ఎంపీ తెలిపారు. కుడి కాలువ, ఎడమ కాలువ, మధ్య కాలువల్లో సమస్యలు ఉండటంతో నీటి సరఫరాకు తీవ్ర అంతరాయం ఏర్పడుతోందన్నారు. గేట్లు, లాకుల సమస్యలను కూడా పరిష్కరించకపోవడంతో ప్రాజెక్టు ఆయకట్టు క్రమంగా కుంచించుకుపోతోందని ఆవేదన వ్యక్తం చేశారు.
అరణియార్ ప్రాజెక్టు సమస్యను రైతుల సమస్యగా భావించి వైఎస్సార్‌సీపీ పోరాటం చేస్తుందని చెప్పారు. పార్టీ అధ్యక్షులు వైఎస్ జగన్‌మోహన్‌రెడ్డి, ప్రాంతీయ సమన్వయకర్తలు, జిల్లా పార్టీ నాయకుల సూచనల మేరకు రైతులతో కలిసి భవిష్యత్ కార్యాచరణను రూపొందిస్తామని తెలిపారు.
ఈ నెల పిచ్చాటూరులో భారీ ఆందోళన కార్యక్రమం నిర్వహించనున్నట్లు ఎంపీ వెల్లడించారు. ఈ కార్యక్రమానికి రీజినల్ కో ఆర్డినేటర్ పెద్దిరెడ్డి రామచంద్రా రెడ్ది, ఉమ్మడి చిత్తూరు జిల్లా అధ్యక్షులు భూమన కరుణాకర రెడ్డి పాల్గొననున్నారని ఆయన తెలిపారు. కీలపూడి నుంచి అరణియార్ వరకు మహా ర్యాలీ నిర్వహించి, అరణియార్ ప్రాజెక్టు సమస్యలను ప్రభుత్వం దృష్టికి తీసుకెళ్తామని చెప్పారు. ఆయకట్టు పరిధిలోని రైతులు, పార్టీ నాయకులు, కార్యకర్తలు పెద్ద సంఖ్యలో పాల్గొని కార్యక్రమాన్ని విజయవంతం చేయాలని పిలుపునిచ్చారు.
అనంతరం ఎంపీ మద్దిల గురుమూర్తి, సత్యవేడు నియోజకవర్గ సమన్వయకర్త నూకతోటి రాజేష్‌తో కలిసి అరణియార్ డ్యాంను సందర్శించి ప్రాజెక్టు పరిస్థితిని పరిశీలించారు. ఆయకట్టు రైతులతో మాట్లాడి వారి సమస్యలను అడిగి తెలుసుకున్నారు.
‘జలధార’ పేరుతో సాగునీటి ప్రాజెక్టుల అభివృద్ధి, మరమ్మతుల పేరుతో ప్రజాధనాన్ని ఖర్చు చేసి పచ్చ నేతల జేబులు నింపే ప్రయత్నాలు చేస్తున్నారని నూకతోటి రాజేష్ మండిపడ్డారు. రైతులకు వాస్తవంగా ప్రయోజనం చేకూరేలా ప్రాజెక్టులను అభివృద్ధి చేయాలని, అరణియార్ సమస్యలను తక్షణమే పరిష్కరించాలని డిమాండ్ చేశారు.
