18/09/2025
നീലത്തിരയില്‍ വിരിയുന്ന സ്വപ്നം.
യേശുദാസ് വില്യം
നോട്ടിക്കല്‍ ടൈംസ് കേരള.
തിരുവനന്തപുരം: കേരളത്തിന്റെ തീര,മല്‍സ്യമേഖലയെ കേന്ദ്രബിന്ദുവാക്കിക്കൊണ്ട് ബ്ലൂ എക്കോണമിയുടെ അടിസ്ഥാനത്തില്‍ ഒരു അന്താരാഷ്ട്ര കോണ്‍ക്ലേവ്.യൂറോപ്യന്‍ യൂണിയനിലെ പ്രതിനിധികളും,കേന്ദ്ര,സംസ്ഥാന സര്‍ക്കാരുകളുടെ സമുദ്ര ന,ഫിഷറീസ് നയരൂപീകരണ വിദഗ്ധരും പങ്കെടുക്കുന്ന കോണ്‍ക്ലേവിനു 'ബ്ലൂ ടൈഡ്‌സ് 'എന്നാണ് പേര്.കേരളത്തിന്റെ തീരത്തിനും,സമുദ്രമേഖലക്കും,മല്‍സ്യ സമൃദ്ധിക്കുമായി കേന്ദ്രവും കേരളവും കൈകോര്‍ത്തു കൊണ്ട് ഒരു കോണ്‍ക്ലേവ് അത്യന്തം പ്രതീക്ഷാ നിര്‍ഭരമാണ്.തകര്‍ന്നടിഞ്ഞു കിടക്കുന്ന കേരളത്തിലെ മല്‍സ്യമേഖലക്കും,മല്‍സ്യത്തൊഴിലാളികള്‍ക്കും,മാരിടൈം മേഖലക്കും ഉണര്‍വ്വു പകരുന്ന ആശയരൂപീകരണങ്ങള്‍ ഉണ്ടാവുമെന്നു ഈ മേഖലയിലുള്ളവര്‍ പ്രതീക്ഷയര്‍പ്പിക്കുന്നു.
യൂറോപ്യന്‍യൂണിയന്‍ പ്രതിനിധികളായി കോവളം ലീല ഹോട്ടലില്‍ എത്തുന്ന വിദേശ പ്രതിനിധികള്‍ നിശ്ചയിച്ചതിന്‍ പ്രകാരം ആദ്യം സന്ദര്‍ശിക്കുന്നത് കോവളത്തെ പരമ്പരാഗത കടല്‍ത്തീരമാണ്.ഹവ്വാബീച്ചിനോടു ചേര്‍ന്നുള്ള തീരത്തുള്ളത് കരമടിയും അതിനുപയോഗിക്കുന്ന താങ്ങുവള്ളങ്ങളുമാണ്.അതല്ല കേരളത്തിലെ മല്‍സ്യബന്ധനം.കോവളത്തിനു തൊട്ടു കിടക്കുന്ന വിഴിഞ്ഞത്തു വന്നാല്‍ വിദേശ പ്രതിനിധികള്‍ക്ക് പരമ്പരാഗത മേഖലയിലെ ഫിഷ് ലാന്‍ഡിംഗ് സെന്റെര്‍ കാണാം.അവിടെ 'യൂറോപ്യന്‍' നിലവാരത്തിലുള്ള 'ഹൈജിനി'ക്കായ ഹാര്‍ബറും പരിസരങ്ങളും കാണാം.മല്‍സ്യവിപണനം നടത്തുന്ന നമ്മുടെ അമ്മമാരെ കാണാം. അവര്‍ മീനുകള്‍ക്കായി പേശുന്നതു കാണാം.നമ്മുടെ വികസനം വരുത്തിയ മാറ്റങ്ങള്‍ കാണാം.തൊട്ടപ്പുറത്തെ അന്താരാഷ്ട്ര കണ്ടെയ്‌നര്‍ ട്രാന്‍സ്ഷിപ്‌മെന്റെ തുറമുഖം കാണാം.തീരത്തണയുന്ന ഫൈബര്‍ വള്ളങ്ങളും അതില്‍ വന്നണയുന്ന കേരളത്തിലെ ശേഷിക്കുന്ന നമ്മുടെ സ്വന്തം മുക്കുവന്‍മാരെ അല്ലെങ്കില്‍ കേരളത്തിന്റെ 'സൈന്യ'ത്തെ യൂറോപ്യന്‍ യൂണിയനില്‍ നിന്നുള്ള പ്രതിനിധികള്‍ക്കു കാണിച്ചു കൊടുക്കാം.കുറച്ചു കൂടി വടക്കോട്ടു ചെന്നാല്‍ മുതലപ്പൊഴിയില്‍ കടലടിയേറ്റും ജീവന്‍ പണയം വെച്ചും മല്‍സ്യബന്ധനം നടത്തുവാന്‍ കടലില്‍ പോകുന്ന ലോകത്തു തന്നെ അപൂര്‍വ്വമായജനുസ്സില്‍പ്പെട്ട മീന് പിടുത്തക്കാരെ കാണാം.അതിനും വടക്കോട്ടു ചെന്നാല്‍ കൊല്ലം കടപ്പുറത്തു തീരത്തണയുന്ന വള്ളങ്ങള്‍ ചുമലില്‍ കെട്ടി നിര്‍ത്തിയിരിക്കുന്ന 'ബന്ധനസ്ഥ'രായ മല്‍സ്യത്തൊഴിലാളികളെ കാണാം.അതിനപ്പുറത്ത് നോര്‍വ്വേക്കാര്‍ പകര്‍ന്നു നല്‍കിയ ട്രോളിംഗ് മല്‍സ്യബന്ധനത്തിന്റെ പൂര്‍ണ്ണതയും കാണാം.വടക്കോട്ടു വടക്കോട്ട് കാസര്‍കോട് വരെ വൈവിധ്യമാര്‍ന്ന മല്‍സ്യമേഖല പടര്‍ന്നു കിടക്കുന്നു.
ഹാര്‍ബര്‍ എന്‍ജനീയറിംഗ് വിഭാഗവും,മാരിടൈം ബോര്‍ഡും നിയന്ത്രണം കൈവശവെച്ചിരിക്കുന്ന കേരളത്തിന്റെ തീരങ്ങള്‍.ഇപ്പോള്‍ ഇതില്‍ ഭൂരിഭാഗവും സ്വകാര്യമേഖലക്ക് പാട്ടത്തിനു കൊടുക്കുവാനുള്ള പത്ര പരസ്യങ്ങള്‍ കാണാം.അങ്ങിനെ യാതൊരു നിയന്ത്രണമോ,ദിശാബോധമോ ഇല്ലാതെ സഞ്ചരിക്കുന്ന തുറമുഖ,ഫിഷറീസ് മേഖലക്ക് കോണ്‍ക്ലേവ് നല്‍കുന്നത് എന്താവും.എന്തു തന്നെയാണെങ്കിലും ഇതൊക്കെ നടപ്പിലാക്കേണ്ടത് ആരാണ്. മല്‍സ്യമേഖലക്കു വേണ്ടി നിരവധി കേന്ദ്ര പദ്ധതികള്‍ ഉണ്ട്.അതു നടപ്പിലാക്കുവാന്‍ ഫിഷറീസ് വകുപ്പും നരേന്ദ്രമോദി അനുവദിച്ചിരിക്കുന്നു.എന്നാല്‍ അവരുടെ ഒരു പദ്ധതികളും ഇവിടെ ലക്ഷ്യം കണ്ടെത്തുന്നില്ല.ഡീപ് സീ മല്‍സ്യബന്ധനത്തിനുള്ള ട്രോളറുകള്‍ തന്നെ ഉദാഹരണം.സൊസൈറ്റികള്‍ കൊക്കലാക്കിയ ട്രോളറുകള്‍ യഥാര്‍ത്ഥ മല്‍സ്യത്തൊഴിലാളികളുടെ കൈകളില്‍ എത്തിയിട്ടില്ല.പലയിടത്തും പോലീസ് ബോട്ടുകളായി കെട്ടിയിട്ടിരിക്കുകയാണ്.ഏതായാലും കേന്ദ്രമന്ത്രിമാരും,സംസ്ഥാന മന്ത്രിമാരും,ഉദ്യോഗസ്ശരും മല്‍സ്യമേഖലയിലെ ട്രേഡ് യൂണിയന്‍ പ്രതിനിധികളും പങ്കെടുക്കുന്ന കോണ്‍ക്ലേവില്‍ പുതിയ വികസനസ്വപ്‌നങ്ങള്‍ുണ്ടാകുവാനായി കാത്തിരിക്കാം.
