28/08/2026
కువైట్లో 517 ఔషధాల ధరలు తగ్గింపు.. జీసీసీలోనే అత్యంత తక్కువ ధరలు
కువైట్ సిటీ,ఆగస్ట్ 27: దేశంలో ఔషధాల ధరలను తగ్గిస్తూ కువైట్ ఆరోగ్య మంత్రిత్వ శాఖ కీలక నిర్ణయం తీసుకుంది. మొత్తం 517 రకాల మందులు, ఫార్మాస్యూటికల్ ఉత్పత్తుల ధరలను తగ్గించేందుకు ఆమోదం తెలిపింది. తాజా ధరల తగ్గింపుతో ఈ మందులు జీసీసీ దేశాల్లోనే అత్యంత తక్కువ ధరలకు అందుబాటులోకి రానున్నాయని మంత్రిత్వ శాఖ తెలిపింది.
గత మూడేళ్లలో ఇప్పటివరకు మొత్తం 2,760 రకాల మందులు, ఫార్మాస్యూటికల్ ఉత్పత్తుల ధరలను తగ్గించినట్లు వెల్లడించింది.
తాజా జాబితాలో క్యాన్సర్ మందులు, కొలెస్ట్రాల్ తగ్గించే ఔషధాలు, మూర్ఛ, అలర్జీ, నొప్పి నివారణ మందులతో పాటు యాంటీబయాటిక్స్, యాంటీఫంగల్ మందులు, ధూమపానం మానేందుకు ఉపయోగించే ఔషధాలు ఉన్నాయి.
అంతర్జాతీయ మార్కెట్లు, జీసీసీ దేశాల్లోని ధరలను పరిశీలించి సాంకేతిక సమీక్షల అనంతరం ధరలను తగ్గించినట్లు ఆరోగ్య మంత్రిత్వ శాఖ పేర్కొంది. మందుల నాణ్యత, ప్రభావం, భద్రత విషయంలో ఎలాంటి రాజీ ఉండదని స్పష్టం చేసింది.
రోగులకు సరసమైన ధరల్లో మందులు అందుబాటులో ఉంచడం, వైద్య ఖర్చులను తగ్గించడం, మార్కెట్ స్థిరత్వాన్ని కాపాడడం లక్ష్యంగా ఔషధ ధరలపై పర్యవేక్షణ కొనసాగిస్తామని తెలిపింది.
