
18/08/2025
ناسیونالیزمی کوردی لە مەم و زینی ئەحمەدی خانیدا
| نووسینی بە سوێدی: بێنگت نووردلینگ
لە سوێدییەوە: کەریم تاقانە
[ئەم نووسینە لە ڕۆژنامەی هەولێر (ژمارە ٤٣٦٧)دا بڵاو کراوەتەوە. لێنکی ڕۆژنامەکە لە کۆمێنتدایە.]
شیعرەکە بەم ڕستەیە دەست پێ دەکات: «هێراکلێس کە لە تافی لاویدا بوو، بەیانییەک لە خەو هەستا …» ئەم شیعرە بڕیار بوو لە ناوەڕاستی سەدەی حەڤدەیەمدا ببێتە داستانی نەتەوەییی سوێد، ببێتە ئێنەید ی ئیمپراتۆری زەریای باڵتیک. ستییەرنهێلم «خواژنی گۆرانی ـی فێر کرد بە سـوێدی شـیعر بهۆنێتەوە» و، ناسناوی باوکی هونەری شیعری سوێدیی پێ بەخشرا.
کە کتێبەکەی فەرهاد شاکەلی «ناسیونالیزمی کوردی لە مەم و زینی ئەحمەدی خانیدا»م خوێندەوە (بیرگیتا مێلاندەر ساڵی ١٩٨٥ کردوویەتی بە سوێدی، زانستگەی ستۆکهۆڵم بۆ پەروەردەی مامۆستایان چاپ و بڵاوی کردووەتەوە)، بیرم لە ستییەرنهێلم و شیعرەکەی کردەوە. هێراکلێس. ئاخر لێکچوونی سەرنجڕاکێش هەیە لەنێوان ستییەرنهێلم و هێراکلێسەکەی لە لایەک و، ئەحمەدی خانی (١٦٥٠-١٧٠٧) و مەم و زینەکەی، لە لایەکی ترەوە. خانی لە ڕێگەی مەم و زینەوە کە لە ناوەڕاستی دەیەی ١٦٩٠دا بڵاو کراوەتەوە، وەک باوکی شیعری کوردی دەردەکەوێت. ستییەرنهێلم تەنیا لاتینی هەبوو بەربەرەکانێی لەگەڵدا بکات، بەڵام خانی سێ زمانی وەلا نا کە زمانی دەستەڵات بوون، سێ زمان کە دەیزانین و دەستەڵاتی بەسەریاندا دەشکا: زمانی ئایین کە عەرەبی بوو، تورکی کە زمانی ئیمپراتۆریای عوسمانی و، فارسی کە زمانی ئەدەبییاتی ئیمپراتۆریای سەفەوی بوو. خانی زمانی کوردیی هەڵبژارد.
کەواتە شیعری مەم و زین چەکێکە لە خەباتی نەتەوایەتیدا، فەرهادشاکەلییش دەیەوێت بە نووسینەکەی ئەوە پێشان بدات. لە جەنگی چاڵدیراندا (١٥١٤) کوردستان لەنێوان دوو ئیمپراتۆریای عوسمانی و سەفەویدا دابەش کرا، دواتریش لە ١٦٣٩دا دابەشکرانی کۆتاییی کوردستانی لێ کەوتەوە. کاتێک سنوورەکان چەسپێنران، ئەو قۆناغە کە پڕە لە ڕەنج و ئازار، دەبێتە پاشخانی شیعرنووسین لای خانی و هەڵمەتی چڕوپڕی ئەو بۆ ئەوەی کورد بکات (ـەوە) بە نەتەوەیەک ( دەوڵەت و تەخت و پاشای خۆی هەبێت) و بتوانێت کورد لە دەستەڵاتە داگیرکەرەکان ڕزگار بکات.
گەر دێ هەبووا مە پادشاهەک
لائق بدیا خودێ کولاهەک
تەعیین ببووا ژ بۆ وی تەختەک
زاهر ڤەدبوو ژ بۆ مە بەختەک
حاسل ببووا ژ بۆ وی تاجەک
ئەلبەتتە دبوو مە ژی ڕەواجەک
غەمخواری دکر ل مە یەتیمان
تینانە دەرێ ژ دەست لەئیمان
ئێمە زانیارییەکی زۆرمان لەبارەی خانییەوە نییە. کارە ئەدەبییەکانی خانی لە سێ بەرهەمی سەرەکی پێک دێن، دووانیان دەچنە ڕیزی شیعری پەروەردەیییەوە، سێیەم بەرهەمیش «مەم و زین»ـە کە داستانی نەتەوەییی کوردانە. مەم و زین لە لایێکەوە چیرۆکی عاشقانەی کوڕەلاوێکی کورد و شازادەیەکی کوردە، لە لایێکی دیکەیشەوە بەڵگەنامەیەکە، دەتوانین لە ڕێگەیەوە هەم لە دنیابینیی نووسەرەکەی بگەین، هەم بزانین چۆن ڕوانیویەتە ژیانی خۆی. بۆیە دەتوانین بڵێین، مەم و زین گرنگترین سەرچاوەیە کە دەتوانین لە ڕێیەوە زانیاری لەبارەی خانییەوە بە دەست بهێنین.
خانی بە شێوەیەکی کلاسیکییانە پەروەردە کراوە، لە نووسینی شیعریشدا هەر ڕێگەی شیعری ڕۆژهەڵاتیی گرتووەتە پێش، بەڵام مۆرێکی تەواو کوردانەی پێوە دەنێت. لە هەندێ بواری گرنگدا بە شێوەیەکی ئاشکرا لەو نەریتە لا دەدات، بۆ نموونە کاتێک لە شیعرەکەیدا خۆی لەوە دوور دەخاتەوە کە ستایش و پێداهەڵدان بۆ سەرکردەی سیاسیی سەردەمەکەی بنووسێت. بە پێچەوانەوە، بە گژیاندا چووەتەوە و ڕەخنەی توندیشی لێ گرتوون. لە جێی ئەوە، فەرمانڕەوای دڵخوازی خۆی دیاری دەکات، کە کارکردی ئەفلاتوونی پێوە دیارە: پیاوچاک و ژیر بێت:
گەر دێ هەبوویا مە ژی خودانەک
عالی کەرەمەک لەتیفەدانەک
عیلم و هونەر و کەمال و ئیزعان
شعر و غەزەل و کیتاب و دیوان
ئەڤ جنس ببوویا ل بال وی مەعموول
ئەم نەقد ببوویا ل نک وی مەقبوول
من دێ عەلەما کەلامێ مەوزوون
عالی بکرا ل بانێ گەردوون
بیناڤە روحێ «مەلێ جزیری»
پی حەی بکرا «عەلی حەریری»
کەیفەک وە بدا فەقیهێ تەیران
حەتتا ب ئەبەد بمایە حەیران
چ بکەم کو قەوی کەسادە بازاڕ
نینە ژ قوماشڕا خەریدار
مەلای جەزیری، عەلی حەریری و فەقێ تەیران کە ناویان هاتووە، بە درێژاییی سەدەی شازدەیەم و حەڤدەیەم نوێنەرایەتیی شکۆدارترین سەردەمی شیعری کوردییان کردووە. ئەم کەسایەتییانە قوتابخانەی شیعر بوونە، خانی ئاشنایەتیی لەگەڵیاندا پەیدا کردووە و چووەتە کۆڕیانەوە.
خانی ئەوەی زۆر بە لاوە گرنگ بوو کە بیر و بڕواکانی بە کردار بنوێنێت. لە فەرهەنگی مەزنی «نووبار »دا، کە بە زمانی کوردی و عەرەبییە، دەنووسێت:
گەر تە دڤێتن کو بەرابەر نەبتن کەس ب تەرا
علمێ بخوون هەم عەمەلێ تو بکە (صنعەت) ژ خوەرا.
مەبەستی بێ چەندوچۆنی خانی ئەوە بووە گەل هۆشیار بن، ڕاپەڕن و بەرانبەر داگیرکەر ڕابوەستێن.
ئەوەی لێرەدا دەرمبڕیون، چەند وانە و تێڕوانینێکن من لە کتێبەکەی فەرهاد شاکەلیم چنیونەتەوە کە لەبارەی ئەحمەدی خانی و مەم و زینە مەزنەکەیەوە نووسیویەتی.
لە شیعری هێراکلێسدا توندوتیژی و شکۆی قۆناغی زلهێزیی سوێد ڕەنگی داوەتەوە، لە مەم و زیندا، بەر گێڕانەوەیەکی تەواو تاکەکەسی و پڕ لە وێنە دەکەوین، گێڕانەوەیەک کە دەنگ تێیدا زوڵالە و وشە، زەنگین. شیعرەکەی ستییەرنهێلم کە لە زەوینەی نەتەوەییدا هۆنراوەتەوە، دۆخێک لە هێمنی و بەخۆداچوونەوە پێشان دەدات. بەڵام مەم و زینی خانی بە ئاشکرا بانگی خەباتگێڕی و نەتەوەدۆستی بە گوێدا دەدات، هەڵبەت ئەمەیش مەرج و ڕێوشوێنی خۆی هەیە.
بارودۆخی نالەباری کوردەکان، ئەوسا و ئێستایش، بووەتە هۆی ئەوە ناکۆکیی ناوخۆیی بێنە گۆڕێ، ئەمەیش پرسی ڕزگاریی دوا خستووە، لە سەدەی حەڤدەیەمدا، هەروەهایش لە سەدەی بیستەمدا. ئەو خواست و ئامانجانەی خانی باسیان دەکات، ئەمانەن: یەکگرتوویی، هێز، چاکی؛ ئەم خواست و ئامانجانە چەندە ڕاستەقینە دێنە پێش چاو و لەگەڵ واقیعی ژیاندا تەبان، هەر بەو جۆرەیش بەدیهێنانیان دژوار بووە. ئەمە دیارە زمانە کوردییەکەیشی گرتووەتەوە، زمانێک کە خانی ویستوویەتی لە شیعری خۆیدا برەوی پێ بدات و وەک زمانێکی سەربەخۆی نەتەوەیی جێگە و پێگەی پێ ببەخشێت.
ئەم دەربڕینەی خوارەوە پێشانی دەدات نووسەر و شیعری ئەو چەندە لە یەکترەوە نزیکن:
ئەڤ مێوە ئەگەر نە ئابدارە
کورمانجییە ئەو قەدەر ل کارە
ئەڤ تیفلە ئەگەر نە نازەنینە
نووبارە، قەوی ب من شرینە
ئەڤ مێوە ئەگەر نە پڕ لەزیزە
ئەڤ تیفلە ب من قەوی عەزیزە
ئەوینی خانی بۆ بەرهەم و شیعری خۆی، بە ئاشکرا کاری کردووەتە سەر فەرهاد شاکەلی و تێڕوانینی ئەو بۆ خانی. منیش کە کتێبەکەی فەرهاد شاکەلیم خوێندەوە، ئەوینەکە جۆشا و بۆ لای منیش هورووژمی هێنا. من ئێستا کونجکۆڵی ئەم کوردستانەم کە هاوکات نییە و، هەیشە. هەستیش دەکەم دیداری مرۆڤێک کە خۆی داوەتە دەست چیرۆکێکی درێژ و دڵڕفێنی عاشقانە، دڵ و دەروونمی ئاوەدان کردووەتەوە.
سەرچاوە:
Svensk-Kurdisk Journal, Nr. 1–2 (1986), p. 38