10/11/2023
دکتۆر ئاسۆ مەحمود،ئەندامی پێشوی جڤاتی نیشتیمانی و بەرپرسی ڕێکخستنەکانی سلێمانی گۆڕان لە نوسینێکدا چەند ڕاستیەکی گرنگ لەسەر موڵک و ماڵ و گردەکەی نماوچیا ئاشکرادەکات.
ئەو نووسیویەتی✍🏻
لە سێ ساڵەی مەرگی کاک قادردا..
ڕاستیەکی تاڵ هەیە کە چوار ساڵە دەیچێژم…
بەندە وەک هەرکەسێکیتر لە ژیانی سیاسیدا هەڵەم کردوە،
کاتی خۆی کە کاک قادر و کاک عوسمان و ئەو برایانەیتر بڕوایان وابو کە دەبێت ڕاگەیاندن و موڵک و ماڵی کۆمپانیای وشە هی گۆڕان بێت نەک کوڕانی کاک نەوشیروان من دژبوم. بەڵام هەڵەبوم.
دژبونەکەم پەیوەندی هەبو بەو بڕوایەی کە حیزبی سیاسی نابێت هاوشێوەی یەکێتی و پارتی خاوەنی مەکینەیەکی ڕاگەیاندنی گەورە و موڵک و ماڵێ زۆربێت، بڕوام وابو ئەگەر ئەمانەی هەبێت هاوشێوەی یەکێتی و پارتی مەکتەبی سیاسی و سەرکردایەتی هەتا سەری دەبێت یانی دەستاودەستی دەسەڵات ئەستەم دەبێت، چونکە ڕێگەیەکە بۆ خۆ دەوڵەمەند کردن.ئەمە سەرباری ئەوەی کەسی یەکەم دەکاتە بکوژ و ببڕ.
تێڕوانینەکەی ئێمە درێژکراوەی وتارێکی نەوشیروان مستەفا بو کە ساڵی ٢٠٠٦ ڕەخنە دەگرێت لەوەی کە ڕاگەیاندنەکان لە کوردستان هی حیزبە سیاسیەکانن، جگە لەوەی لە مانیفێستی (ئێمە و ئەوان، ناکۆکیەکانمان لەسەرچین) لە نوسینی نەوشیروان مستەفا ئاماژەی پێدراوە. واتا تێڕوانینێکی بابەتیانە بو نەک لەبەر خاتر یان دژی ئەم و ئەو.
تێڕوانینەکەی من هەڵەبو ،لەوەی ئەوەم لەیاد کردبو کە گەڕانەوەی موڵکیەتی کۆمپانیای وشە بۆ نەوەکانی کاک نەوشیروان، چ درز و دەلاقەیەکی گەورە دەکاتە تابلۆی مێژوی سیاسی نەوشیروان مستەفا.
ئەگەرچی هۆکاری کەوتنی گۆڕان هەر ئەمە نەبو، بەڵکو زۆر هۆکاریتر ، مێخی کوتا بە ڕۆحی گۆڕاندا و لە پەل وپۆی خست ، کە ئێرە شوێنی باسکردنی نی یە
ئەگەر چی لەسەر ئەم بۆچونەم زۆر لە دۆستەکانم زویربون کەمیان پێ نەکردم لەوەی کە من لەبەر خاتری شتێک ئەم بۆچونەم هەیە ،بەڵام دەستەبەرداربونی بەرپرسیارێتیم لە ئابی ٢٠١٨ لە گۆڕان، دورکەوتنەوە لە کایەی سیاسی هەمو ئەو تۆمەتانەی بەتاڵکردەوە.
کە وازیشم لە گۆڕان هێنا دۆستەکانی دوێنێم تۆمەتباریان کردم ، بە پشو کورت و ڕاکردو لە مەسئولیەت.
ناشرینترین خاڵی سیاسەت و حیزبایەتی لە کوردستان ئەوەیە کە (ڕەش و سپی) یە، یان سپی و لەگەڵمی یان رەشی و دژی. ئیتر هیچ پانتایەک بۆ بیروباوڕو تێڕوانینی جیاواز لەو نێوانەدا نی یە. هەتا لەتەکی بیت پیاوی باشی ، هەر ڕوت وەگیڕا ئیتر خراپی.
ئەوە چەند ساڵە من پەیوەندیم بە هیچ حیزب و هێزێکی سیاسی یەوە نەماوە، نە ناڕازیەکان من بە ناڕازی دادەنێن و نە دەسەڵاتی ئێستای گۆڕانیش من بە دۆستی خۆی. بەندەش بەشێک نی یە لە هیچ ئەجەندایەک لە ئێستادا.
مەرگی قادری حاجی عەلی،مەرگی ئەو پرۆژە سیاسی یەبو کە بڕیاربو پاش گۆڕان لەدایک ببێت ئەگەرچی بەندەی تێدا نەبو.کە دەبو ببومایە.
کە نەوشیروان مستەفا مرد خەڵک بۆ خودی نەوشیروان مستەفا نەدەگریا، بەڵکو بۆ خۆی بو چونکە دەیزانی ئیتر بێ پشت و پەنا دەبێت، دەیزانی ئەگەر گۆڕانکاریەک بکرێت بە ئەو دەکرێت.
کە قادری حاجی عەلی مرد و یادی دەکەینەوە بۆ ئەو نی یە، بەڵکو بۆ مەرگی ئەو جورئەتەیە کە جارێکیتر ئەسپی گلاوی موعارەزەی سەرپێ بخستایەتەوە، کە هەتا ئێستا گلاوە.
ئاسۆ مەحمود
