17/09/2025
زنجیرەیەكی تری تاریكی
ساڵی خوێندن چۆن دەست پێ دەكات؟
سایتی دەسەڵاتی چوارەم (D4):
ئەگەرچی بەرپرسانی پەروەردەو كاربەدەستانی هەردوو حزب سورن لەسەر ئەوەی كە لەم مانگەدا ساڵی نوێی خوێندن لە هەرێمی كوردستان دەست پێ بكات. بەڵام مامۆستایانی ناڕازیش سورن لەسەر ئەوەی كە ئەگەر موچەیەكی تر نەدرێت، ئەوا مامۆستایان دەوام ناكەن.
لە سەرەتای قەیرانی داراییەوە، پرۆسەی خوێندن لە هەرێمی كوردستان چۆتە تونێلێكی تاریكەوەو تا ئێستاش لە ئاسۆدا دیار نیە كەی لەو قۆناغە دەردەچێت، کە بە هۆیەوە پرۆسەی پەرورەدە ئیفلیج بوە.
هەموو ساڵێك چەندین مانگی خوێندن بەتایبەت لە ناوچەی ژێر دەسەڵاتی یەكێتی نیشتمانی كوردستان ( سلێمانی، گەرمیان، هەڵەبجە، راپەرین)، بایكۆت و خۆپیشاندان دەكرێت. سەرەنجامی ئەمەش تا ئێستا هەزاران خوێندكار ناچاربون واز لە خوێندن بهێنن، ئەوانەشی بەردەوامن لە داهاتودا دەردەكەوێت كە توشی چ كەموكوڕیەك بون.
بۆ ئەمساڵیش كە ئێستا مانگی ئەیلولە، بەڵام هێشتا موچەی مانگی تەمموز دابەش نەكراوە. گشت ئاماژەكان بەو ئاراستەیەن كە زنجیرەیەكی نوێی خۆپیشاندان و بایكۆتی مامۆستایان دەبینین.
لەو بارەیەوە مامۆستا نەوشیروان حەمە غەریب ئەندامی ئەنجومەنی سەرتاسەری مامۆستایانی نارازی، بۆ سایتی دەسەڵاتی چوارەم وتی: تا ئێستا ئەنجومەنەكەمان بریاری بایكۆت و نارەزایی نەداوە، بەڵام نیگەرانی و نارەزایی مامۆستا، چاوەروانی حكومەت و ئێمەش ناكات، چونكە ئەگەر موچە نەبێت مامۆستا خۆی دەوام ناكات.
وتیشی: دۆخی ئێستای كوردستان زۆر سەختە، نزیكە لە دۆخی ساڵی نەوەدەكان، مامۆستا زۆر زیاتر لە پێشوو توڕەترە، بەڵام بڕیاری بایكۆت نەدراوەو مامۆستا خۆی دەوام ناكات، چونكە كەس ناتوانێت بەبێ دەرەتان و بژێوی كار بكات.
دوپاتیشی كردەوە: مامۆستایان ئیدی تەنیا بۆ تاكە موچەیەك خۆپیشاندان و بایكۆت ناكەن، بەڵكو داواكانیان زیاترن و دەبێ جێبەجێ بكرێن.
لە نێوان فشاری دەسەڵات و نارەزایی مامۆستایاندا، خوێندكاران قوربانی یەكەمن، شنۆ جەزا خوێندكاری قۆناغی دوەمی زانكۆ، بۆ سایتی دەسەڵاتی چوارەم وتی: هەموو ساڵێك پۆلە كۆتاكان نیوە دەوام دەكەن، بەڵام كە دەچینە زانكۆ دەزانین چ نەوەیەكی نەخوێندەوار دروست بوە لەم هەرێمە.
وتیشی: نەوەیەكی تەواو نیمچە خوێندەواریەكی هەیە، خوێندكار هەیە گەیشتۆتە زانكۆ، هێشتا كۆمەڵێک زانیاری وەك پێویست وەرنەگرتوە، كە ئەمە لە داهاتودا كارەسات دروست دەكات، چونكە هەر ئەم نەوەیە ئەبێتە مامۆستاو پزیشك و ئەندازیار، بە زانیاریەكی پڕكەموكوڕیەوە.
