16/10/2025
خیانەتی 16ی ئۆکتۆبەری یەکێتی چی بۆ یار و نەیاری کوردستان دەرخست؟
هەشت ساڵ لەمەوبەر لە 16/10/2017، تاقمیکی نێو یەکێتی کە ئێستا بە سەرکردایەتی یەکێتی ناودەبرێن، خیانەتێکی گەورە و پیلان بۆ داڕێژراویان دژی پارتی دیموکراتی کوردستان و هەرێمی کوردستان ئەنجامدا، بە شێوەیەک ولاتانی ئیقلیمی بەشێک بوون تێیدا و پاڵپشتی تەواوی حەشدی شەعبی و یەکێتییان دەکرد و هێزەکانیان هاوشانی حەشدی شەعبی و هێزە خیانەتکارەکانی یەکێتی بوون لە دژی پێشمەرگەی کوردستان، خیانەتەکە بە شێوەیەک بوو کە تاک لە تاکی خەڵکی کوردستانی شۆک کرد و تاوەکوو ئێستاش لێککەوتەی خراپی هەیە لەسەر تەواوی ناوچە کوردستانییەکانی دەرەوەی هەرێمی کوردستان.
ئەگەر هەر هێزێکی تر لە جیهان لە شوێنی پارتی دیموکراتی کوردستان بووایە، ئێستا بە هیچ شێوەیەک بوونی نەدەما، بەهۆی ئەوەی هێزێک هاوسەنگەرت بێت و خیانەتت لێبکات و لە هەندێک شوێن هێرشبکاتە سەر هێزەکانی پێشمەرگە، جگە لەوەش هێزێکی گەورەی ئێرانیان لەگەڵ بێت لەگەڵ هەزاران چەکداری حەشدی شەبی و چەکی پێشکەوتوو کە بە هیچ شێوەیەک بەراورد ناکرێن بە چەکەکانی هێزی پێشمەرگەی کوردستان، کەچی پارتی دیموکراتی کوردستان لە پردێ بە ورەی پۆڵاینەوە بەرگری لە خاکی کوردستان کرد و نەهێشت قەوارەی هەرێمی کوردستان بکەوێتە مەترسییەوە، هەر ئەو بەرگرییەی پارتی دیموکراتی کوردستان لە هەرێمی کوردستانی کرد، بۆچوونی یار و نەیاری کوردستانی گۆڕی و هێزی پێشمەرگەی نیشانی تەواوی جیهان دا.
خەڵکی کوردستان لە دوای 16ی ئۆکتۆبەر بۆیان دەرکەوت، کە تەنها پارتی دیموکراتی کوردستانە بەرگری لە خاک و خەڵکی هەرێمی کوردستان دەکات، بۆیان دەرکەوت کە ورە و خۆڕاگری پێشمەرگە بەهێزترە لە چەک و هێزی حەشدی شەعبی و وڵاتانی ئقلیمی، ئارام بوونەوە و بۆیان دەرکەوت کوردستان لە دەستێکی ئەمیندا، بە خیانەتی هێزی ناوەخۆی چیتر ناکەوێتە مەترسییەوە.
نەیارانی کوردستان بۆیان دەرکەوت، چیتر ناتوانن بەهێز خاکی کوردستان داگیر بکەن، ناتوانن بە بەکرێگریاوەکانیان هەرێمی کوردستان لەناو ببەن، ناتوانن ورەی پۆڵاینی پێشمەرگە بە ئەبڕامز و دەبابە تاقی بکەنەوە، هەر بۆیە لە دوای 16ی ئۆکتۆبەرەوە بە سەرپەرشتی ئێران جۆرێکی تر لە دژایەتی کردنی هەرێمی کوردستان دەستی پێکردووە، هەر لە برسیکردنی خەڵکی کوردستانڕا بگرە، تاوەکوو شەڕی یاسایی و سیاسی، تاکە ئومێدی نەیارانی کورد ئەوەیە جاشەکانیان بتوانن دەنگ بە دەست بێنن بۆ ئەوەی لە دژی هەرێمی کوردستان بەکاریان بهێننەوە، بەدڵنیاییەوە پارتی دیموکراتی کوردستان وەکوو چۆن لە پردێ و سحێلا حەشد و نەیارانی کوردیان بێ ئومێد کرد، ئەم جارەشیان خەڵکی کوردستان بە دەنگەکانیان حەشدو جاشەکانیان بێ ئومێد دەکەن.
لە بەرامبەردا یەکێتی لەو هەلومەرجی بۆی ڕێککەوتبوو، نەیتوانی دووبارە هەڵسێتەوە، کە لە مێژوودا تەنها دوو جار بۆی ڕێککەوتووە، یەکێتی تەنها لە 1966 و 1995 بۆی ڕێککەوتووە بەم شێوەیە گەلە کۆمەکی لە خەڵکی و خاکی کوردستان و پارتی دیموکراتی کوردستان بکات، هەموو ئەو جارانەش شکستی هێناوە و سەرجەمیشان بە پاڵپشتی گەورە و هێزی ئقلیمی بووە، ئەم جارەشیان هاوشێوەی هەموو خیانەتەکانی تر نەیپێکا و بە دڵنیاییەوە تەنها سەرشۆڕی بۆ مایەوە و خیانەتێکی تری لە مێژووی پڕ خیانەتی یەکێتی زیاد کرد.
