24/07/2025
ئەمڕۆ پێنجشەممە ٢٤-٧-٢٠٢٥ لە شاری سلێمانی، لاهور شێخ جەنگی پێشوازیکرد لە یان برایم کونسوڵی گشتی فەرەنسا لە هەرێمی کوردستان.
لەو دیدارەدا گفتوگۆیانکرد لەبارەی دۆخی گشتی هەرێمی کوردستان و عێراق و ناوچەکە. پرسی گۆڕانکارییەکان و کاریگەرییەکانی تاوتوێ کران.
باس لە بابەتی پێکهێنانی کابینەی دەیەمی حکومەتی هەرێمی کوردستان کرا، كە ناکرێت هەردوو حیزبی دەسەڵاتدار بەم جۆرە بێباک بن وە داهاتوی هەرێمی کوردستان بخەنە مەترسییەوە لەپێناو ڕێکنەکەوتنیان لەسەر پۆستە وەزاریەکان،
هەروەها جەختیانکردەوە لەسەر پێویستی چارەسەری ریشەیی کێشەکانی نێوان هەرێم و بەغدا، بەتایبەت کێشەی موچەی موچەخۆرانی هەرێم،
لاهور شئخ جەنگی رایگەیاند: مانەوەی کێشەکان بەم جۆرە وا لە هەموو دڵسۆزانی ئەم نیشتیمانە دەکات کە بیر لە ڕێگەچارەیەکی تر لەدەرەوەی خەباتی مەدەنی و خەباتی پەرلەمانی بکەنەوە، چونکە لەکاتێکدا کە دەسەڵات بەم جۆرە بێباک بێت و بەداخەوە هێزەکانی ئۆپۆزیسیۆن هەر یەکەو کلکی بەشوێنێکی تر گرێدرابێت و جگە لە قسەی بێکردار بەیەکەوە ئامادەی بەشداریکردنی هیچ پرۆژەیەک نەبن دژ بەم هەموو نادادییە، بۆیە ئێمەو مانان ناچار دەبین کە بیر لە شێوازی تر بکەینەوە بۆ گەڕاندنەوەی مافی خەڵک.
لە تەوەرێکی تردا باسیان لە هەڵبژاردنی داهاتووی ئەنجومەنی نوێنەرانی عێراق کرد، رەخساندنی زەمینەیەکی لەبار و گونجاویان بەپێویست زانی بۆ ئەنجامدانی هەڵبژاردنێکی پاک و بێگەرد، ئەگەر نا وەک بەرەی گەل ئامادەی بەشداریکردنی هەڵبژاردنێکی دووبارە دیزاینکراو نابنەوە سەرەڕای ئەوەی کە هەموو ئامادەکارییەک ئەنجامداوە لە ئێستادا.
